أعتقد السؤال الي قاعد يطرحونه الأخوة الأعضاء بطريقة غير مباشرة في حديثهم عن المنحة، إنه هل راح تقدر زين تعطي نفس منحة الكاش السنة القادمة؟ الاجابة للآسف احتمال تكون لأ و خل نشوف الحسبة البسيطة هذي.
أرباح هالسنة كانت 320 مليون دينار و الشركة تتوقع إنه الأرباح راح تنمو هالسنة بنفس النسبة يعني تقريبا 10%. يعني جم راح تكون ربحية السهم للسنة هذي؟ 320*1.1 تقسيم عدد الأسهم مع المنحة و زيادة رأس المال = 4,185,868,500 تقريبا، يعني ربحية السهم تطلع 84 فلس.
إذن لو اتيي الشركة و توزع 90 فلس كاش راح تكون أكثر من أرباحها، و مو بس جذي، راح تكون أكثر من دوبلت مجموع التوزيعات الكلي للمساهمين.
إذن نعم يمكن تنزل التوزيعة الكاش لمستوى 60 - 70 فلس بس أنا ما أعتقد إنهم راح يقصونها إلى النص (45 فلس) بس لأنه عدد الأسهم اندبل. أول شي أرباح زين ما تعبر عن الكاش الي يدخل عليها من أرباحها لأنه بند الاستهلاك كبير جدا، و بند الاستهلاك بند محاسبي بحت ماله أي تأثير على الكاش. من جذي حتى ادارة الشركة دائما تركز في تصريحاتها على ال Ebitda و نموه لأنه يعكس أداء الشركة الصح. أيضا الشركة راح تحصل على ما يقارب 1.2 بليون دينار من زيادة رأس المال ضيف على ذلك إنه نسبة ديونها إلى حقوق المساهمين منخفضة (20% تقريبا و راح تقل مع الزيادة)، كل هذا يأهلها إنه نستعين إما بفلوس زيادة رأس المال أو أخذ قرض السنة القادمة عشان تحافظ على هذا المستوى العالي لتوزيعاتها.
و في طبعا احتمالية إنه يحافظون على نفس المستوى من التوزيعات لأنه زين صرحت العام الماضي هالكلام على لسان سعد البراك، يعني في احتمال اتيي زين و تقول أنا بوزع 90 فلس السنة الياية. و اهي لا شك قادرة على توزيعة مثل هذي، لأنه المجموع الكلي للتوزيعة هذي ما راح يطلع إلا تقريبا ثلث قيمة زيادة رأس المال.