السلام عليكم
اولا شاكر لكل شارك بالموضوع ..وأخص بالذات من أبدي وجهه نظر حتي لو تخالفني .. في النهايه هذه تجربتي الشخصيه .. وانا جدا أستفيد من اختلاف وجهات النظر ...
الان .. شنو الامور الي أخذها بعين الاعتبار في البنيان ؟؟
اولا .. المقاول هو سيد العمل .. ومنه نتعلم طريقه البنيان .. لكن ايضا لك انت وجهه نظر شخصيه .. لاأتكلم عن طريقه تنظيم القسيمه أو تنظيم الغرف والصالات .. أنا اتكلم عن فنيات الشغل نفسه .. بس لازم في امور تعرفها وتتأكد منها انها مضبوطه .. والا يصير بيتك مبني بطريقه غلط للاسف .. وتتحمل نتائج هالشئ بعدين .. فلاتهاون بالفنيات .. أنت دافع في البيت افلوس .. خل الشغل يمشي ب طريقتك مو علي مزاج المقاول او العامل .. اليوم ماله خلق يشتغل قام سوي الشغل ( سوق ماصلي ) وأنت يالمالك اقبل بالخرابيط بالغصب ..
علشان جذيه .. في أمور راح اذكرها لازم تدير بالك عليها .. امور كثيره .. والي اتذكرها الحين هي نقطتين ..
شوف هالعمود .. قبل لايحطون هالعمود داخل الخشب .. لازم تتأكد من المسافه بين ( الكانات ) وهي الحديد المربع داخل ... لازم تكون المسافه 20 سنتي واقل ..ولاتزيد .. 19 او 18 او 17 .. لكن لاتزيد عن 20 سنتي .. واذا زادت عادي وقف الشغل وسويلهم صيحه .. وأخذ معاك متر .. وقيس أنت وراهم .. الحداد يسوي الحديد وأنت وراه .. ماشي ..
اليوم في القسيمه .. صار موقف .. قاعدين العمال يشتغلون ويبنون الطوف مالت الدور بين الغرف .. لاحظت انا ان هناك طوفه مايله بشكل بسيط .. لان جنبها طوفه ثانيه عدله .. فقدت اقارن بينهم .. ناديت المقاول .. قلت له .. الطوفه مايله .. أهوه تلعثم ولارد .. جبنا المتر .. وقسنا المسافه من تحت بينها وبين الطوفه الثانيه .. وقسنا المسافه من فوق طلع اهناك اختلاف 1 سنتي متر .. بمعني الطوفه عوجه وهذا بالطبع تحتاج لها اسمنت وايد لتعدلها .. نادينا العامل .. قلناله .. قام قدامنا يقيس .. قال اخر شئ : لا .. الطوفه سليمه !! قلت له انا بأستهزاء : أيه .. اهيه سليمه والمتر اهو الغلطان !!!!! قام يقول للمقاول : حتي الوزارات تقبل بأختلاف 1 سنتي متر !! قلت له : أنا يعجبني الواحد يغلط يعترف بغلطه مو يكابر .. رد علي وقال أنا والله ماأعرف اشتغل الا كده والشغل كده ماينفعش .. ( يعني بيمشي ) قلت له الله ومحمد وعلي معاك ( استغفر الله طلعني من طوري ) وقمت اشتغلت علي المقال وهو ولا كلمه يرد .. افلوس ونعطيكم .. مواد نظيفه عندكم .. شاي رايح وجاي .. ليش ماتشتغلون عدل ؟؟ المساح بعدين لما يجي .. لما يشوف الطوفه مايله .. ماراح يقول مين الحمار الي عملها ؟؟ أنا انفعلت والعمال كلهم يسمعون .. نزلت بعدها انا والمقاول تحت .. ومر علينا العامل ماشي طالع بره .. وسلم وسلمنا عليه .. ولما بعد شوي انا ضحكت بصوت عالي .. والله زين .. يغلط ومايبي احد يكلمه .. وأذا تكلمنا أنا ازعل وبطلع بره .. في غيرك الالاف يبون يشتغلون .. كل هالكلام صار والمقاول ولاكلمه .. ومايطالعني من الفشيله .. قلت يابوفلان .. انت وين تجيب ناس رخيصه مايعرفون يشتغلون ؟؟ مو عندهم الميزان ؟؟ والحبل .. يقيسون الميول للطوفه ؟؟ قال لي المقاول يابوفلان .. خلاص انا راح اهدم الطوفه واسمنتها علي .. قلت له وأفلوس الطابوق من عليه ؟؟ قال الطابوق نفسه نرجعه .. بس الاسمنت علي انا .. المهم انا هديت .. ودخلت له مدخل ثاني .. يااخي هذي سمعتك .. انت ماتخاف عليها .. لو يجيني احد ويقول اشلون مقاولك .. وقلت له عندي كذا طوفه عوجه .. مين راح يأخذك بعدها ؟المهم هذا كله .. والمقاول مايرد مستحي ويقول الله كريم راح نظبطها لاتخاف ...
انا لما طلعت بره بالسياره ومشيت عنهم .. تحسفت لاني انفعلت .. لاني بصراحه كنت معتقد أنهم راح يكسرون الطوفه بالطابوق علشان يعدلونها وماكنت ادري انها بس يبيلها شويه اسمنت والطابوق نفسه .. كنت أقدر أخذ الي ابيه وأمشي شغلي السنع بالكلام اللين .. بس ايضا اهوه طريقته فيها شوفه نفس ونفيسه ماأدري علي شنو .. وانا ملاحظه كم يوم ...وناوي انفشه .. مو ناقصني انا الا عامل عندي ومغرور علي !!! بس اليوم صار الي صار .. وماأدري الي سويته غلط ولاصح .. لكن هم ماأرضي يمشون شغل سوق ماصلي علي ..افلوس ونعطيهم .. ليش مايشتغلون عدل ماأدري .. عموما هذا الي صار بلا زياده او نقصان .. وأذا تذكرت شئ جديد من النصائج راح اقولكم .. واتمني من يالشباب ان يذكروني بنصائح مهمه لنستفيد كلنا ..