السلام عليكم
الاخوه الاعزاء كلهم فردا فردا جزاكم الله خير علي الاطراء .. وهذي ياجماعه معلومات نتبادلها في هالموقع الطيب .. نفيد ونستفيد .. وأتمني من صاحب اي تجربه يذكرها لربما تكون خافيه علي .. المهندس الانشائي الي اتعامل معاه يقول لي انا خبره بالبناء بس لازلت كل يوم اتعلم شئ جديد .. لانه البناء بحر .. ولهذا اشكركم كثير الشكر للمتابعه .. انا بالنسبه للاخونا عذبي 71 فأحب اقوله بالفعل اخوي انا افرح للمشاركات لسبب انه اعرف ان موضوعي متابع من قبل الشباب وهذا يسعدني لاني احب ان اوصل الفكره للاكثر عدد من القراء .. وشاكر لكم كلكم كلماتكم الطيبه ..
اليوم شفت بالصدفه واحد من الاخوان الي اعرفهم .. سألته عن بيته في غرب الجليب قال لي انه واقف من خمس سنين بسبب ان الكهربائي سرقه .. والبيت الان متعطل بسبب القضايا .. رديت عليه اشلون سرقك ؟؟ قال عطيته كل افلوسه قبل مايخلص .. قام هو وهرب بالفلوس ولاخلص الشغل .. !! ولهذا ياشباب لاأحد يأخذ الصحي او الكهربائي بالمواد .. اخذه بشغل ايده .. وأشتري انت المواد بنفسك .. والله الشغله تفاهه بتفاهه .. بالتلفون توصلك المواد وانت حاط رجل علي رجل .. ايش هالناس المشغوله الي ماعندها وقت لمجرد مكالمه هاتفيه !!!! والله شئ يقهر .. معطيه بالمواد ليش ؟؟ اكو واحد فيهم عنده ذمه يجيبلك المواد السنعه ؟؟ ولا يحط لك ارخص شئ ويدبل عليك السعر .. عموما .. نكمل موضوعنا ..
--------
بالنسبه للاسئله الاخ عذبي .. انواع المزاييك .. والله ياخوي الي الان مادخلت هالمرحله لكني سادخل عندها بالقريب .. وبأعلمك العلم الصحيح .. لكنها المزاييك ارخص وايد من السيجما الجيده .. علي فكره السيجما مراحل وكلها نوعا ما مكلفه .. اولا لما تبي تبني البيت سيجما لازم من البدايه تسوي فيه حركات .. ديوانيه دائريه كمثال .. فوق الشبابيك تسوي بروز ... عمدان نازله من فوق لي تحت .. صبات خرسانيه لزياده جمال البيت ..هذا اذا تبي بيتك يصير شكله حلو .. وفي ناس تسوي ستايل البيت ستايل قديم .. طبعا للتوفير .. تسوي البيت عادي بدون اي بروز بس تحط جندل طالع من هنا او هناك .. طبعا هذا ارخص من اللعب بالشكل الخارجي الي ذكرناه من شوي .. ... بعد هالمرحله تجي مرحله ثانيه اولا المساح الخارجي .. وبعدين شبك .. وبعدين زوايا حديديه .. وبعدين صبغ .. وبعدين طبقه الحمايه واللون .. كل هذا مراحل .. والصبغ عندك انواع .. فيهم الغالي وفيهم الرخيص .. فيهم جي تي سي ارخيص والاغلي هو جوثن .. هذا حسب ماقال لي صاحبي كان يشطب بيته .. هو دخل علي السعر النهائي تقريبا 8.5 الاف دينار نقريبا .. فلاتستهين بالسيجما لانها غاليه .. هذا لااذا تبي شغل نظيف .. اما الرخيصه ماأسرع ماتتقشر ..
اما سؤالك عن التوفير من الدفعات .. فيااخي مافي توفير .. فالحساب يضيع مابين الراتب والدفعات .. لنفرض ان الدفعه خلصت .. ويبيلك طابوق ابيض كمثال .. وانت عارف ان الطابوق يطول علي مايجيبونه لك .. تروح تطلبه من معاشك لتكسب الوقت .. وبعدين لما ينزل الشيك اخصم افلوسك وافصلها عن الدفعه .. وكله الفلوس تصب في مكان واحد البيت او القسيمه .. لكن في النهايه انت ماصرفت دفعتك الا علي البيت مو شئ ثاني .. مثل سفر او سياره او شئ ثاني .. افلوس البيت للبيت .. خلاص خلوها قاعده .. اما التوفير الي تتكلم عنه بالدعم للمواد .. فأنا كتبت لك السعر بالدعم .. كمثال سعر 15 طن الحديد مدعوم 1125 انا شريته بهالسعر لكني لو شريته من السوق .. راح يكون اغلي من هالمبلغ .. وأنا ارقامي كلها بالمدعوم ...
الخريطه تكلفك 450 دينار بالبدايه .. وبعدها في اشراف يكون مع المكتب نفسه او مكتب ثاني والاشراف يكون 100 بالشهر .. اول شئ 100 عند توقيع العقد وبعدها 100 كل شهر .. وطبعا الاسود يطول تقريبا 4 شهور .. احسب الاثنين يطلع لك .. 450 زائد 500 دينار .. هذا صار 950 .. مافرقت عن الاف .. وفيه مكاتب وأنا انصحكم فيها هي الخريطه مع الاشراف كامل مكمل يطلع 900 دينار حتي لو تتأخر بالاسود اكثر من 5 شهور .. مايأخذ عليك أكثر من المتفق عليه ..
والاشراف هو .. اول شئ .. لما المقاول يبلش يبني البيت .. يقوم يحط الخشب ماله .. ويحط فيه الحديد بنسب محدده كاتبها له المهندس الانشائي .. يقوم يطلع من المكتب الانشائي المهندس .. ويشوف الحديد صح ولا غلط ... النسبه صحيحه او ناقصه .. بعدين هو يعطي الامر للمقاول ان تصب الصبه .. لانه كل شئ علي مايرام .. وهو المسؤول عن الصبه وقوتها ونسبه الحديد ولو سقط السقف لاسمح الله بعدين .. هو المسؤال تقدر ترفع عليه دعوه لانه هو المسؤول الاول والاخير عن متانه الصبه ونسبه الحديد .. الان .... بعد مايشوف الحديد ويطمئن علي متانه الوضع .. يعطيك ورقه بأن كل شئ علي مايرام .. تروح لبنك التسليف تعطيهم الورقه .. بعدها تنزل لك دفعه من الدفعات وهذا معناه انك انجزت المرحله السابقه .. حتي لو انك ماصبيت السقف .. بمجرد وضعك للحديد .. ويشوفها المهندس .. يطلع الشيك ..
اما سؤالك اخي بخصوص رمل الدفان .. اولا المكتب الهندسي يقوم بفحص التربه عن طريق ضرب الابره بالارض يسمونها جذيه .. وهي عمل حفره للتأكد من متانه الارض .. واذا ارضك طريه وفيها ماي يقوم المهندس بوضع قياس لمدي الحفره وعمقها .. فمنهم من يكون العمق متر ونصف ومنهم اكثر .. ولهذا تحتاج الي رمل كثير لتغطيتها ( لان ارضك اساسا منطقه دفان دافنتها الاسكان ) .. وهي دفن الحفره ووضع ماء كثير عليها .. ومن ثم دكها بالمدحله .. واضافه كميه اخري من الرمل .. وايضا ماء واحيانا حموله تنكر كامل او اثنين .. وبعدها ايضا دكها بالمدحله .. وهذا الامر ايضا تشرط علي المقاول ان يفعله .. وضروري يكون راعي القسيمه موجود ليري الشئ هذا بنفسه .. انا طريقتي كالاتي .. اشترطت علي المقاول طريقه مراحل الرمل والمدحله .. لكنه سوي طريقه اعتقد تانها افضل .. اول شئ يجيبلك حفاره كبيره .. تشيل الرمل وتقطه في طرف الحفره .. وبعدها تدوس عليه .. وتشوفه امام عينك الرمل ينضغط الي الاسفل .. ونرش ايضا الماء مره ثانيه .. وتدوسه الحفاره ايضا مره ثانيه .. وتقوم الحفاره وتدفن ايضا البقعه الي بعدها وهكذا .. ترجع تدفن وتدوس .. ويتكرر هالشئ يمكن خمسين مره .. الين ماالارض تصير يابسه تقول مثل القار .. صلبه وقوية .. بس لازم راعي الحفاره يكون شاطر ولايدوس او ( يدعم ) احد العواميد .. تلقاه يتحاشاهم ويوخر عنهم ..
سكس ويل الرمل يحط الرمل داخل الحفره
الحفاره .. تدوس وتوزع الرمل داخل .. اهوه توزيع زائد دك في نفس الوقت احسن واقوي من المدحله لكن المدحله للاماكن الضيقه بس الي ماتدخل فيها الحفاره
لازم يدير باله راعي الحفاره لايدعم العواميد ..
=========
اخوي بوخالد 2009 الي راسلني علي الخاص .. ان شاء الله راح اجاوبك .. بس والله ماكو وقت .. فالسموحه