▀▄▀ مواليد السبعينات بس يدخلون ▀▄▀

[abo Rana]

تصدق ما اذكرهم يمكن لاني ما اطلع من البيت ​

 

[AL-3raab_ku]

الله يا ذيك الايام
احلى ايام......

 

[Kuwait]

عرفت الحين الشياب بالمنتدى

والعجايز

 

[game master]

الله يجزاك خير على هالنفحه اللي من الماضي

99% من اللي قلته صار معاي الا استقبال الحجاج

بس نسيت الكشتات قبل نطير طيارات وناكل يوستفندي " اهم شي بالكشته اليوستفندي " و لما تلقى ضب وتدش فيه على خيام الحريم تخرعهم

نسيت سلسله بروسلي ولبس الكاراتيه اللي يجيك الوان اسود واحمر وابيض بس احلى شىء الاسود تتشيش وتروح تحارش واحد اكبر منك ويسطرك وهو مو لابس لبس برسلي وتستغرب اشلون سطرني وهو مو لا بس لبس كرتيه وتلعب بسلسلة بورسلي لا والسلسلة تعور نفسك فيها


ونسيت قوطي السانكست لما تحطه برفر القاري "الدراجه الهوائية " يعني سيكل

ونسيت التيل وروزك الصيني او الحديدي او المصلفح والكسيري من الدائره وتيز واول بالطين واذا القطه ميه تلعب بنباطه

ونسيت نجوم العرب واهم ورقتيني كانو النادرين عادل الامام اللي لونه ادعم ونجلاء فتحي لونها بنفسجي وغيرهم صورة صفره لمحمود ياسين وزرقه لمرفت امين

ونسيت الفخه والنباطه وفانيله مارادونا والكره التانقو باول هبتها وجوتي الاديداس او الباما وين راسك لا لبسته وربطت الربطه على لسانه

ونسيت تفتيش المدرسه على الاظافر ولا المرهم اللي يلوع الجبد ويحطونه بعينك بالحصه الاخيره من اليوم ويضيق خلقك ليما ترد البيت

ونسيت البلوفر الكحلي اللي كانت توزعه المدرسه وريحته مواد بترو كيماويه
ولا زحمة المقصف وريحة الزعتر الحار بعز الشتويه وكاكو بو نجم " تلحس القرطاس اذا ذايب " والصوره الجماعية انت وعاهات الصف اللي تنباع بنص قبل نهاية السنه

نسيت اغاني رويشد الوطنيه بالفرصه وعبدالكريم عبدالقادر

نسيت ان دايما في اي صف بالابتدائي لازم في واحد بالصف اللي انت فيه او اللي يمك مسويها على نفسه اخر الدوام والذبان يفتر عليه وينفضح على مستوى طلبة الجناح كل اللي يطلع يشوفه وهو يبجي خخخخخخخخخخخ


نسيت ليلة العيد تنام وهدومك يم سريرك هذا اذا كان عندك سرير بطفولتك
تحط الدشداشه والجوتي "والبوك والقلم الفيراري او الكارتير التقليد والعطر والنظاره السوده اللي تتسفط اللي شاريهم من الهندي بياع الجنطه اللي يمر امك كل جمعه واول ما تقوم ما تبي تسبح تبي تلبس على طول

نسيت المحكر وتطير الحمام وكان اهم حمامك نوبي واشعل وماشيه
ولازم عندك طير هندي يطق روس ولا طيرك العاهه اللي كله يزبن "يعني يوقف على اريل تلفزيون الجيران " وانت ترست سطح جاركم من الصخر اللي تحذفه عليه ويشتكي لأبوك منك /وتوكل حمامك عدس لا صكه مرض اسمه ابو جساس وتحاتي المخلط لا يخلص والماي بالصيف

نسيت مسلسلات سينان وغريندايز وابو الريش

الله يذكرك بالخير وياريت هالايام ترد اخ عليها من ايام

 

[عزوز18]

ههههههههههههههههههههههههههههههههههههههههههههه

الله يذكرها من ايام بالخير

مانسا استاد الدين شلعت ضروسي والسبه هو
كل ثلاثا الحصه الاولى دين وانا طبعا كله مو حافظ مالك يا ولد الا الصحه المدرسيه واشلع ضرس لا يشلعك الاستاد بصبوحه طبعا صبوحه النك نيم مال الخيزرانه اللي كانت الافظع والابشع في مجموعه الاستاد وسماها تيمنا باغنيه صبوحه اللي توها هابه ذيك الايام خخخخخخخخخخخخخخخخخخ

 

[wazer]

تذكروون

معقوله محد ذكر يوم الجمعه مسلسل الي ابي وامي مع التحيه وبعد المسلسل يضيق خلقك وتذكر ان وراك مدرسه

والمسلسل الكارتوني جرندايزر والبطل دايسكي لما يقول الصحن الدوار

ومسلسل الرجل الحديدي و بالاتحاد قوه
ولا تنسون مسلسل سنان يا سنان ومسلسل بشار
ومسلسل الفريق الاول

ومعلق المصارعه خليل صباغ

وتذكرون محل ابوجميل مال الرياضه بالفحيحيل ونطبع ارقام على الفنايل
( خاص للربع )

 

[المهندس حسين]

معقوله محد ذكر يوم الجمعه مسلسل الي ابي وامي مع التحيه وبعد المسلسل يضيق خلقك وتذكر ان وراك مدرسه

والمسلسل الكارتوني جرندايزر والبطل دايسكي لما يقول الصحن الدوار

ومسلسل الرجل الحديدي و بالاتحاد قوه
ولا تنسون مسلسل سنان يا سنان ومسلسل بشار
ومسلسل الفريق الاول

ومعلق المصارعه خليل صباغ

وتذكرون محل ابوجميل مال الرياضه بالفحيحيل ونطبع ارقام على الفنايل
( خاص للربع )

أيام حلوة

 

[بوعلي الشمري]

الماضي احلي خاصه وانت راكب عيربانه حصان رايح سوق اللافي والناس تطالع والامر عندك عادي ولا بالبال.... كنا بقمه السعاده ... وجدنا المال فلم نجد السعاده العيب بالمال ولابالسعاده....وجدت ان القلوب هي اللي تغيرت المال موجود من زمان والوقت هو هو لا تغير لاطال ولا قصر size]

 

[نوكيا]

 

[ابو سالم1]

ماركة قووية

 

[ريّس نفسه]

فاصل دعايااااات


هذي احد الدعايات التوعوية واذكر كان لها صدى حلوو عند الناس وفادت
[YOUTUBE]38x7NrDOs20&feature=related[/YOUTUBE]

دعاية بطاط كتكو
[YOUTUBE]HduEGa0Rfvo&feature=related[/YOUTUBE]


دعاية تكا ..
[YOUTUBE]fshTf5aHqnI&p=F4DF4E5FF4D51D1E&playnext=1&index=71[/YOUTUBE]


دعاية زيت دلال .. مادري ليش مسوينها على رسوم متحركة.. حق يهال اهي ولا امهات؟
[YOUTUBE]r0qrvpAGCRo&feature=related[/YOUTUBE]


دعاية الوطني .. زينة تحلم انو يصير .. عندها مال كتير كتير .. صارت عيوز ولا شافت الكتير
[YOUTUBE]bMixJtAZXOQ&feature=related[/YOUTUBE]


دعاية جاي الوزة حووووووسة ههههههه
[YOUTUBE]7i68RqVnyWQ&feature=related[/YOUTUBE]


دعاية *نحن والاطفال* ... زرررت عقولنا يوم فتح
[YOUTUBE]VfM88RGkZKs&feature=related[/YOUTUBE]


وهذي دعاية بيتزا ايطاليا ...
[YOUTUBE]q98cSXhKyeg&feature=related[/YOUTUBE]



الارنب الجائع ....
[YOUTUBE]ifNGXKcP5Bc[/YOUTUBE]


ولا نقدر ننسى حبنا الاوول
[YOUTUBE]DSa6dnpx0N4&feature=related[/YOUTUBE]​

 

[عقد ألماس]

يجي على بالكم الترويح السياحي بالحدايق

[YOUTUBE]rFu5Av7dhUo[/YOUTUBE]

 

[faisal_pontiac]

معقوله محد ذكر يوم الجمعه مسلسل الي ابي وامي مع التحيه وبعد المسلسل يضيق خلقك وتذكر ان وراك مدرسه

والمسلسل الكارتوني جرندايزر والبطل دايسكي لما يقول الصحن الدوار

ومسلسل الرجل الحديدي و بالاتحاد قوه
ولا تنسون مسلسل سنان يا سنان ومسلسل بشار
ومسلسل الفريق الاول

ومعلق المصارعه خليل صباغ

وتذكرون محل ابوجميل مال الرياضه بالفحيحيل ونطبع ارقام على الفنايل
( خاص للربع )

أيام حلوة

الله يذكرها من ايام بالخير .

شكراا ياصاحب الموضوع ع ماضي القديم.

 

[الصدق منجاة]

وصلتني رساله من واحد من الربع بالايميل

يذكرني بسوالف قبل

وطبعا مواليد الستينات داشين معانا بالحسبه



تذكرون لما كنا نصور فوري عند مصور الجمعية وطبعا غصبن عليك الخلفيه زرقه مو بكيفك ولازم تمشط شعرك بالمشط اللي عنده كله شعر وبعدين يقصلك الصورة بالآله اللي عنده ام ذراع والاطراف مشرشره يعني يكون حركه .



تذكرون لي شفت واحد عنده سيارة مرسيدس كان يحوشك فضول الا تبي تعرف شنو اكو بالصيدليه اللي ورى بالسياره ونقعد انطلطل بالسياره واخر شي يطلع ( بلاستر وباندج)



تذكرون اول يوم دوام بالمدرسه كانوا يسلمونا الكتب كلهم مع بعض وصافينهم من الكبيييييييييير لي الصغير وطبعا الكبير كتاب العلوم وكانوا يربطونهم بحبل عشان ما ينفلون مع 6 كشاكيل -



تذكرون المعجون الصغير اللي ريحته تبط الراس ومعاه عود لونه احمروكنا نبطله بالمقلوب ونرعصه ونلف العود عليه وننفخ عشان نسوي
تفاخيه وطبعا لاتفاخيه ولا قالها الله لين تطلع بلاعيمك منه .



تذكرون لما كانوا الاولاد يلعبون كره مبارات بالفريج واذاكان واحد من الفريق ناقص لاعب بعد ما يبيله قولجي دفاع هجوم ماشاءالله قرندايزر مو قولجي وطبعا كان اللعب لــــــي اذان المغرب اول ما يقول الله اكبر


تذكرون لما كنا نشوف افتح ياسمسم وانتأثر بكعكي اللي ياكل بسكوت ونشتري بسكوت كاكاو ونقعد ناكل مثله والوالده تصارخ من قمة راسها شنو هالشفاحه من لاحقكم



تذكرون يوم الجمعة ... نقعد من الصبح علشان نسمع أغنية في عالم الشعوب قصائص لا تنتهي وعالم حلو بهي يسكن في قلوب في قصص الشعوب .




تذكرون تيلفون بوقرص اللي يخيب ثناك وانت تتصل وياااااااويلك يطلع الرقم مشغول لان مافي ريدايل والله يعينك لي بغيت تدق مكالمه حق
خدامتكم تلاقي اصابيعك اتعربك.....صج كانت معاناة بالعيشه.



تذكرون لما كنا نربط الشرشف او الفله على رقبتنا يعني يكون سوبرمان ونصعد فوق الكبت وانط على الدواشق واخر شي طاب غلط ومنكسره ايدك....

تذكرون شريط الشراغي الاحمر اللي اذا اخترب المسدس ماله مايبيله كلام حًول على جوتي الوالد وكمل عليه بالكاشي والا على عتبة الباب اخر شي الوالد مكمل عليك بالجوتي لووووووول


تذكرون لما كنا نحط قوطي السانكست بالفريزر عشان يثلج مع العصير الطوالي بونصين وكل ماتروح تبي تاخذه تلاقي الوالده منزلته تحت وماثلج.....راحت الفرحه .



تذكرون لما كان الاولاد يغسلون الحوش بالويك اند قمة الوناسه يمسك المساحه يعني يكون بيساعد واخر شي طايحله سكيتنج على الكاشي لوووووول وبالليل رايح الاميري.


تذكرون لما كنا نستقبل الحجاج عند الحدود من زود الفرحه واللهفه على الصوغه واخر شي جم مسواج وقحفيتين والكاميرا الحمره وسياده والبنات قطعه خام مالت هنود وساعه مينتها صغيييييييره .




تذكرون عزايم قبل والسماط المفروش على كبر الحوش اللي علىصورة ميوه ( فواكه ) وريحته لازم ريحة مطبخ وقاعدين على المده اللي لي قمت تلاقي ريلك كلها شخوط من المده....ياخي شنو هالزهد بس.




تذكرون لما يبلشون الشباب يدخنون زقاير كل واحد حاط باكيت بمخباته ولافه بكلينكس عشان ما يبين من الدشداشه الصيفيه ولي شاف واحد من الربع يدخن يسأله السؤال المعهود (ها فلان تكنها ولا ما تكنها ) لووول شدعوه شي زين عاد ..وكان لازم مالبورو احمر شعار الرجوله .



تذكرون ايام الكشخه قبل كانت عباره عن سيارة هوندا بيضه اكورد باب واحد ولازق على الرقم من ورى شعار نادي الكويت يعني كووول وولد العاصمه والمشط بالدرج اللي على قبضة يد حق الجاكسون وحاط بالمسجل فرقة الدانه ولا عبدالكريم .



تذكرون لما كانت جائزة البيبسي سياره بالمغاطي مالت البطول كنا الظهر نروح الحوش الوراني ونبطل السحاحير كلها وبعدين نرد نسكرهم اي كلام جود الغازات كلها طايره ومتبخره


تذكرون لما اتهاوش مع ولد جيرانكم وتقوله وخرعن بيتنا وعن رصيفنا يقولك مو رصيفكم هذا رصيف الحكومه
كلام منطقي الصراحه , لووول ويقعد يحوس جبال بيتكم ويمر يمك ويقولك ماحشتك ماحشتك خخخخخ .



تذكرون كمبي وتر صخر 170 لما حنينا على الوالد عشان يشتريه عشان يساعدنا بالدراسه اخر شي محولين على لعبة الاميره ام الخواتم ورامبو اللي يطير الطياره ولي دش الوالد حطينا شريط بنك المعلومات يعني استفاده لوووول .

تذكرون لما يروحون الصبيان السوق مع الوالد يشتري لهم خامات حق العيد ..اخر شي شاري طاقه كامله نفس اللون وتشوف باول يوم العيد من الوالد لي الاخو الصغير نفس الدشاديش ( تقول فرقة التلفزيون لوووووووووووووووووووووووووول .)



تذكرون لا بغوا الشباب يشيلون حديد قبل يعبون قواطي نيدو اسمنت ويحطون بينهم بايب حديد وهووووووووبا واخر شي منكسر ه ظهورهم ....
لووووووووووول .


تذكرون المسجله السوده مالت استاد الانجليزي لي دش علينا فيها قمة الوناسه اليوم ليسيننج يعني مافي اسئله ورووووح سكشن فايف .....
ترررررن تررررررن سكشن فايف.....هاي سوبر فالكون ههههههههه .




تذكرون الكشكول الادعم اللي في صوره بابا جابر الله يرحمه ومن ورى صوره بعير والمسجد اللي بالضاحيه .


تذكرون لما نقلد رقص مايكل جاكسون ونسوي حركه الرجعه وحركه الايد اللي على الجام ونغني بيييييييييييلييييييييييه بييييييييييلييييييييه شنو بيله مادري لووول .




كل اللي نقلته لكم

انا مسويه

هذا اللاعب البرازيلي
شكرا لك ذكرتني بأيام حلوه ايام النباطات والتيب الاخضر والبلوزه الكحليه والكتب نربطهم بسير والاقلام بالهندسه والفرجار حق الهوشه الله الله الله ادفع عمري كله واعيش 5 سنوات من اللي مضي

شكرا لك ياكويت والله ذكرتني بأحلي ايام عمري الطفوله مع انها خايسه كلها نباطات وتحبل ودوجه بالشوارع قواري وسياكل وندوج حفاي

وكنا دايم نتهاوش علي سبب وبدون سبب وتري بدون سبب اكثر لاتخزني ليش حشتني انا اقوي منك انا بطل الفريج وكله كوم ورئيس الفريج كوم ههههههههههههههههههههههههه
هذا يبيله موضوع لحاله يعني هو العقل المفكر مع انه حمار قافل بس حنا حطيناه لانه بطه ومايمشي واجد وكله قاعد ههههههه ونأمن عنده الزقاير نرجعله نلقاه شافط نصها ويحلف والله مالمستهم عادي ههههههههههههههههه​

حتى على ملابس وزارة التربيه وتوزيع الاكل الصبح

بيض وحليب ومادري شنو

مواليدي 1975 توني صغير

وقلاص عدس وموزه وبسكوت المطاحن وروتيتين ​

أنا أذكر لما أنجح يشتري لي أبوي ماكنتوش وأوزعه على الصف والاساتذه بعد .. ترى شطور لما كنت صغير بس شكلي الحين قفلت

وأذكر أسوي عزيمة النجاح كبسة دجاج وسطل فيه فيمتو وطاسه صغيره داخله وأغرف منها وأشرب

ياحلوها من أيام

والله انك صاح ولا تقول حق الربع يا شباب تري العزيمه اليوم عندي اللي يسمع عزيمه حسباله هالحشوووووووا ولا هالخرفان راس مالهم 5 دجاجات وذال فيهم ربعه سنه تذكرون يوم عشيتكم وتذكرون قبل لا اعشيكم صار جذي وتذكرون عقب ماعشيتكم صار جذي كل هذا عشان يذكرهم بالعشا هههههههههههههههههههههههههههههه واللي يقوم من العشا الاخير هو ام العيال عاد رئيسنا دايم ام العيال(لانه بطه) ههههههههههههههههههههههههههه​

الله عليك ذكرتنا بس نسيت مقول شهيره بذيك الفتره

من عنده فيديو صغير ؟؟؟

لا وانت الصاج يطلع واحد من بيتهم ويصييييييييح قرندايزر طلع هي صيحه وحده وتلقا الفريخ صخه هدووووووووء تام ​

تذكرون اول ماطلعت الشاورما ؟؟ نسميها سندويشت قص
عطنا اثنثن قص

اي والله لانه كان يقص اللحم سموها قص وتري ماكان فيه دجاج كان اللحم حصري ​

الله يغربل ابليسك
من وين ذاكر هالسوالف
ذكرتنا بالذي مضى
عيل تذكر المصارعة الحرة لما يحطونها بتلفزيون الكويت
سوبر فلاي سنوكا
هولك هوجن
اكو واحد ياباني اسمه مستر فوجي كله عنده ملح

هههههههه كان يحبه خالي مع انه كل مايطلع يسوي نفس الحركه يطلع كيس ملح من سرواله ويكوبه بوجه اللي ضده وبالاخير ينطق وتنتهي المبارات لصالح الخصم هههههههههههههههه​

تذكرون لما اتهاوش مع ولد جيرانكم وتقوله وخرعن بيتنا وعن رصيفنا يقولك مو رصيفكم هذا رصيف الحكومه
كلام منطقي الصراحه , لووول ويقعد يحوس جبال بيتكم ويمر يمك ويقولك ماحشتك ماحشتك خخخخخ .
هههههه والله عندكم خووووووووووش سوالف

ههههههههههههههههههههههه حسبي الله عليج يانور والله انج منتي سهله كلش ولا رصيفنا وانتي بكرامه حتي زبالتنا واذا مر لاتحوشني ديربالك ونحط خط بينا وبين بيتهم وديربالك اتعداد وانتطاقق واخر شي نروح البراحه نلعب مع بعض واللي يفرقنا يطلع غلطان ​

 

[الصدق منجاة]

نسيت شي مهم وكنا عقب باتمان كل واحد يجيب عبايت امه طبعا يسرقها ونربطها واللي يطب من السور وشوف الاصابات اللي مالها والي


وانا اتأسف للي ماشاركوا يمكن ماعندهم طفوله نفسنا



.
​

 

[الصدق منجاة]

عرفت الحين الشياب بالمنتدى

والعجايز

حسبي الله عليك صدتني

كنت اتغشمر معاك انا ماعرف إلا بارني ​

 

[Kuwait]

قديمك نديمك

 

[يوسف_007]

وصرنا كبار مثل ماكنّا نتمنّى!
والغريب شـصار!
رجعنا نتمنى
لو إنّا بس بقينا صغـار​

 

[اكسبلورر]

اولاتنسون لايك كول
واحد لايك واثنين قص

 

[اماني الكويتيه]

طلعتوووو شياب هههههههههههههه
المفروض المنتدى هذا يسمونه دار المسنين ههههههه
لا اضحك توكم زهور وشباب عسى ربي يعطيكم الصحه والعافيه يارب
ياحلوكم والله احس اني عايشه بينكم علي الوصف والاشتياق للماضي
يالله بعد عشتوها بطولها وعرضها عساكم دوم بخير وعافيه