المجموعة الدولية للاستثمار ش .م.ك.م ( المجموعة د )

[قربان]

شفتها لكن ذكرتني باللي يدعمك ويقول ماشفتك


وثق بانك عزيز

مهما إختلفنا في النقاش
أخوك
بوفواز

يمكن صج ما شفتك

مشكور علي كلامك الطيب

اخوك بو ادم

 

[قربان]

مقتطف بسيط عن المؤتمر للبدر :


موضحا انه سيتم تأسيس شركتين تابعتين للشركة الوليدة في الامارات والسعودية خلال الاسبوعين المقبلين، لافتا الى ان شركة جراند للاستثمار السياحي »السعودية« ستؤسس برأسمال يبلغ مليار دولار وان شركة جراند للاستثمار السياحي »الاماراتية« ستؤسس برأسمال يبلغ مليار درهم حيث ستعود ملكية حصص مؤثرة في الشركتين الى شركة جراند للاستثمار السياحي الناجمة عن اندماج جراند مع اللبنانية.


شوفو ضخامة رؤووس الأموال والتي تصب لصالح جراند الأم وبالتالي المجموعه الدولية .

هلا حبي المارد ماكو شارتات اليوم اشوف قمت تحط اخبار
ممكن تشرحلي شلون هالشي ايجابي علي المدي القصير و المتوسط ؟ ترا صج و دي افهم

و من ويين لهم فلوس هالمشاريع كلها !! ما عتقد الفلوس الي خذوهم من صغار المستثمرين خلال الاشهر الي فاتت كافيه

 

[garmin]

يمكن صج ما شفتك :d

مشكور علي كلامك الطيب

اخوك بو ادم

تدري عاد ضحكتني من غير ترند نازل ولا صاعد

لعنبو السوق اللي يكدر صاحبه علشان سهم


أخوك بوفواز

 

[مرسى]

ماذا حدث بالامس لمجموعة سامي البدر

ماحدث وما أقيمه شخصيا بان خوف وهلع المستثمرين مما حدث بالسابق هو سبب البيع من غير سبب وما تم عباره عن أرتباط ذهني ونفسي للسيناريو السابق الذي أحدث النزول المره الماضيه وانهيارهم لمده أربعة أيام تقريبا

لو رجعنا قليلا بالذاكره لسيناريو النزول الاولي كان عباره عن توقيف قراند مطالبة البورصه بأرباحها للربع الثالث
وفي نفس اليوم بدأ البيع القوي على المجموعه الدوليه وبتروقلف وحال رجوع قراند كان مصيرها الأدنى كحال زميلاتها التابعه

اليوم :
تكرر نفس السيناريو وكأنه يعيد الشريط في اذهان المستثمرين وخاصه ( صغار المستثمرين ) فلدى توقف قراند اليوم أدى الى البيع الغير منطقي على المجموعه وبتروقلف خوفا من تكرار السيناريو الفائت وهذا ما أنا أشك فيه حيث أتوقع وبإذن الله بأن غدا سيكون إرتداد للصعود مره أخرى بعد مؤتمر قراند وعمليه الإستحواذ على اللبنانيه ومن ثم تحويلها وزيادة رأس مالها من 9 مليون الى 100 مليون
وهذا بالتأكيد سيعطي زخم للشركة الأم قراند واللبنانيه خاصه بان من لهم الحق في الزياده سيكون قراند واللبنانيه ومما نعرف سابقا بأن المجموعه تملك في قراند فستكون الأخرى مستهدفه
الكثيرين اليوم كانوا مستائين من مؤتمر قراند حيث لم يتم الاعلان بشكل رسمي عن أي عقد ولكن من تابع الندوه عرف بان هناك شي كبير قادم وخلال أيام
وخلال أسبوع تقريبا سيكون هناك مؤتمر للبتروقلف مشابه للعمليه التي تمت ولكن مع شركة خارج الكويت ولا أخفي سرا بان هناك شي يدور بين شركة أرامكو وبتروقلف والتي تم نفيه لأن لايوجد شي رسمي لغاية الآن بينهم ولكن ما أعلمه بان سوف تأسس شركه مشتركه بين أرامكو وبتروقلف للعمل في المجال النفطي في الأراضي السعوديه

الكثيرين يقولون بان سامي البدر ليس اهلا للثقه ولكن رأي أحد كبار الشركات الإستثماريه بأن دخول حسين الخرافي شريكا مع سامي البدر أعطى بعدا جديدا ومصداقيه كبيره لما يعمله سامي البدر بصمت ولولا رؤية حسين الخرافي لنجاح تلك الشراكه لما أقدم عليها
حسين الخرافي هو شخصية إستثماريه وعقليه لايستهان بها نهائيا لا سامي البدر ولا غيره يستطيع خداعه .
قراند وكما ذكر اخوي السر وينه ( بومشعل ) ستقود المجموعه في الوقت الحالي بسبب الإندماج الذي حصل .

رأيي الشخصي المتواضع بأن من باع اليوم سيعود لإسترجاع ماباعه اليوم بأسعار اعلى خلال الأيام القادمه

أعتقد ماقيل بالأمس في الندوه يزيدني أطمئنان للوضع العام لمجموعة سامي البدر

وكافي تشائم وذم في المجموعه

أخوكم
بوفواز

الامور كلها طيبه وممتازه
الله يوفقكم يارب

http://www.tawseya.com/forum/showthread.php?p=27172#post27172

اسمحلي بالمداخله
حسين الخرافي صرف على الناس اسهم اللبنانيه على الدينار وكان
يوعد الناس بسعر 2 دينار للسهم باع 25 % من راس مال الشركه
ايام صعود المخازن
والحين تبي تقنعنا انه له بعد استثماري ومصداقيه علامات استفهام
كثيره تحوم حوله وحول الخرافي الثاني بالانابيب وعد بارباح كبيره للانابيب
ولم تصدق وعوده وهبد السهم 50%
اخوي السوق الثقه تبنا مثل الله يرحمه محمد عبد المحسن الخرافي ( البنك الوطني )
مو هذول اللي ضيعوا اسم الخرافي
واستغلوا ثقة الناس بتاريخ المرحوم الاقتصادي
وخسروهم أكثر من 50% من اموالهم
الثقات معدودين (الثقه تكبر وتزاد في ناس بمرور السنين والكد والتعب والامانه والوعود الصادقه )

التاجر يحافظ على كلمته ولو كان فيها افلاسه ( راحوا الرياييل اللي يحافظون
على اسمائهم وعوائلهم )

 

[قربان]

تدري عاد ضحكتني من غير ترند نازل ولا صاعد

لعنبو السوق اللي يكدر صاحبه علشان سهم


أخوك بوفواز

انشالله دوم تضحك و كل الي شاريين اسهم سامي البدر دوم مستانسين ..
و الله مالي اي مصلحه لا من بعيد و لاقريب و لابعيد بصعود السهم او نزوله ..بالعكس و الله اتمني دايما السوق اخصر و الاسهم كلها صاعد حدا اعلي عشان الكل يربح دايما ..بس انا و انت و الكل يعرف هالشي صعب جدا و جني الارباح و نزول الاسهم هي سنه الحياه بالبورصه و الشاطر الي يلعب بين خطوط الشخابيط الي نحاول نفهم سلوكها علي قدرالامكان ...

عزيز يا بو فواز

اخوك بو ادم

 

[Q8eTrader]

بو ادم ما انسى تحليلك أمس. انت حللت السهم فنيا وتوقعت نزوله وانا سألت شايبي و قاللي ان السهم ابينزل مع انه ماله فنيا ولا محاسبيا بالشركات الا خبرة تداول من قبل ازمة المناخ. و لكن نتمنى كل الاسهم ترتفع وان تعم الفرحة علينا جميعا صغار المستثمرين.

 

[هيت]

شباب الذي عنده اخبار تؤدي الى نزول او تحليل فني يدل على نزول ينورنا

بس مو معقوله الذي كان يناقش و يتحدى ان السهم يغلق فوق 900 يوم 1/2 يتشمت اليوم لان السهم سعره 990

هذه بورصه يوم صعود و يوم نزول , وهذا شارت سهم Google شركه عملاقه بس سهمها يتذبذب

لاحظ كم مره يعدي مقاومات 200 و 300 و يرجع

لا يقولون يطبل ، هذه ليس دعوة بيع ولا شراء ولكن اجتهاد

 

[Q8eTrader]

السهم كسر اكثر من مقاومه مهمه الاسبوع الي فات بتداول ممتاز

بس فنيا السهم بدت اشاراته الفنيه تضعف ( مؤشر القوه الشرائيه حاليا 75 - مبالغ في شرائه ) و كما هو واضح من الشارت انه السهم راسه طاق بخط الترند--يعني ترند مقاومه
لاكن في مؤشر ثاني يدل ان السهم حاليا في الموجه الخامسه و كما هو معروف للمحللين ان الموجه الخامسه احتمال كبير تاخذ السهم لقمم اعلي من السابق بشوي ..لاكن مشكلتها انها ضعيفه و ليست بقوه الموجه الثالثه ..


السهم عنده دعم قوي علي 950 و 900

و طبعا ما ننسي المقوله المشهوره " تحسف علي ربح احسن ما تحسف علي خساره " .... لازم اتحرش ماقدر

هذا اللي اقصده

 

[sky_limit]

مع احترامي للجميع سواء كان مع او ضد المجموعه وشركاتها التابعه....لا انتوا تنزلون ولا انتوا تصعدون اي سهم في السوق !!!

لذلك صانع السوق والصناديق والمحافظ هي من يحدد ذلك وانتوا جميعا توابع لحركة السهم صعودا او نزولا.....واعتقد من الواضح جدا اليوم ان السهم فتح على سعر 1,040 وبكميات كبيره.....واللي كان شاري بهذا السعر من جم شهر و يتحلطم ان السهم نازل وخسران فيه وايد ويقول بس يوصل 1,040 ببيع وماراح ادش مره ثانيه, اعتقد انه باع وفكنا من حنته ورنته.

واللي مو مقتنع بالمجموعه وشركاتها التابعه لا اشوفه يوطوط هني بعد اليوم.

وفي ناس اسمعها مو واثقه لا بقروب المجموعه ولا باسهم الخرافي ولا بقروب الجناعات ولا ولا ولا ولا ولا ........................

هذا نصيحتي له يبيع كل شي ويشتريله بقاله ويجابلها وايد احسن له.


وانا اعيد واكرر اذا قرر صانع السوق او صندوق او محفظه الدخول على السهم راح يصعد و ماراح يرد عليكم واذا قرر نزوله هم راح ينزل وماراح يرد عليكم.....

لذلك اذا وجد صانع سوق لسهم سوف يكون هناك جولات وجولات سوف ترون اسعار جديده لم ترونها من قبل............


وهذي دعوه للاستثمار بالمجموعه الماسيه..........اشتر وتفرج وراح تربح وايد انشاله.........وانا عارف شنو اقول ولحد يحن ويقول ليش؟؟؟؟

راجع اخبار مؤتمر الشفافيه اليوم وتعرفون ليش....وبتروجلف العملاق النائم راقبوووووووووووووووووووووووووووووووووووووووووووووه.....وهناك مؤتمر خاص لبتروجلف قريبا

 

[Q8eTrader]

اللي شرا أول صفقة 1040 أمس 280,000 سهم من الصناديق؟ ولا المحافظ ؟ ولا مستثمر عنونو؟ ها اشرايكم ؟

 

[Bo Tasneem]

صبحكم الله بالخير يا جماعه


بوتسنيم​

 

[matrex-ku]

يا بو تسنيم الصبــر زين يا خوك

 

[ارسطو الدروازه]

ماعليه بو تسنيم ...

طول بالك الله يرضى عليك ....

بياخذله دوره هون انشالله وبعدها يصعد .....

 

[السالفة طويلة]

المجموعه ماتخوف باذن الله
والمستثمر ماعليك خوف المحافظ تبي تشوه صورة السهم لانه السهم محبوب من صغار المستثمرين ولايزال فيه خير لسبب اساسي وهوة ربحيه السهم تقريبا 125 (تشغيلي) اطلبوه امس بال 980 وقالو للي يبي يطلع قط علينه انت مو خسران او ربحان ربح زين اقفال امس كان مطلوب
وموفقين يارب اللي مومقتنع بالسهم يبيع في اوامر طلب لاباس فيها
في توصيات عليه (قويه) والله اعلم
يارب مايخسر فيكم احد ان شاء الله
بالتوفيق جميعا​

 

[rahaly]

ااااااااه .... يا مؤتمر الشفافية ...
قلت في موضوع جراند واكرر هنا ....

ما ودنا مؤتمرات شفافية من سامي البدر .... السهم ماشي تمااااام ...
وما تخسبق السهم سابقا الا بعد مؤتمر الشفافية ...

تدرون لعبة المضاربين الكبار في الاسهم وقتها بعد هذه المؤتمرات ..

قولوا انشاء الله يعلن عن مشروعات غير متوقعة تصعد السهم ....
((( يعني ما يختارون وقت المؤتمر الا اثناء هالصعود الحلو ؟؟ ... بس لا يكون هم اللي يصعدون ... ويعقدون مؤتمر ... وينزلون !! :d
اذا فعلا صارت هالمرة بعد نزول ... اعرف انها لعبة الجماعة ... مو معقولة تكون صدفة !!!....
بس ندعو الرحمن ان صعود .... قولوا امين )))



تحياتي




رحالي

هم تعتقدون ان المسألة محض صدفة ؟؟ !!!!!
لا ويقول في مؤتمر شفافية حق بترو جلف !!!!!
يا ساتر




رحالي

 

[السوق الكويتي]

لو على المجموعة يهوون الوضع اشوي ...

السووووق بكبره مرض ... ويرفع الضغط ...


الوضع مو شي كلش ....

 

[Bo Tasneem]

إخواني .. كلام بقلبي وهذا اللي خلى المزاج اشوي مومضبوط .. بقوله وأرجو النقاش بصورة راقية مثل ما تعودنا منكم حبايبي ..

ليش سهم المجموعه والبترووو وجراند سابقاً ومازالوا غير ثابتين !!

الحبيب بوبدر الله يخليه اليوم يقول بأن إحنا فعلاً عندنا محافظ ولديها سيوله في تحريك سير السهم .. طيّب يا أخي يا بوبدر هل تناقض نفسك !!

ليش اليوم السهم يكاد يصل إلى الحد الأدنى ولم تحرّك محافظك ساكن !!

اخواني ليش أسهم ماشاءالله بعض الشركات أمثال (جلوبك والاستثمارات الوطنية) مايهزها ريح !! عيني عليهم بارده والله

ليش يا سامي جذيه تخض بطون البشر بهالحركات !!

يقول اليوم بالمؤتمر بأن سلوك السوق اليوم كان هابط فعادي المجموعه والبترووو يأخذون نفس المنوال !! لأ ياخوي منو قال ..

هل الصعود يوم الثلاثاء والأربعاء اللي فاتوا كان السوق صاعد كي تصعّد المجموعه وجراند والبترووو ويمشون عكس السوق !!

اشمعنا اليوم أخوي مو راضي تمشي عكس السوق !!

على الأقل اخواني .. يحط أوامره ويستريح على كرسيه !! حطلك مليون على الدينار ومليون ثاني على 1.020 .. صدقني بهالحركه محّد بيخاف ويقط تحت .. واحد من الربع اليوم كان بيقط على 1.040 .. نصحته لأ لأن الأمور طيبه والحمدلله والقادم أطيب إن شاءالله .. الحبيب قط اللي عنده على 970 اتصدقون !! ماعليه نصيبه وكيفه .. بس ليش هالنوايا ياسامي .. أليس أنت الذي قلت بأنك تبي الخير للجميع في رمضان !! إذاً لماذا هذا التخويف وجعل الناس تقط بأقل الأسعار !!

ماعليه اسمحولي .. اللي بالقلب بالقلب .. خلوني الله يخليكم

وكان جواب اليوم منه الله يهديه يقول بأن سهم المجموعه شعبي .. فالـ 5 آلاف سهم والـ 20 ألف تنزّل السهم ..

طيّب يا سامي .. خل بو 5 وبو 20 على قولتك يشوفون الخير .. وخلك مفتاح خير من رب العالمين لهالناس هذي !!

صدقني بوتسنيم مايبي شي والله .. ولا تهمني الفلوس والحمدلله الكل عنده خير .. بس اللي أبيه شي واحد .. هو إن محافظ المجموعه تحط الأوامر وتسند السهم .. مولازم تشتري يا أخي .. بس حط الأوامر للدعم مو أكثر ..

عيل يرضيكم اليوم العرض 5 ملايين ونص .. والطلب 300 ألف أو إذا كثّر كثّر 800 ألف !! لا بالله محّد يرضاها ..

ما أدري شنو اللي تبي اتوصله للناس يا سامي .. هل تبي اتبيّن لهم أن يستثمروا ويبطلوا مضاربه مثلاً !! إي جان قلتها اليوم !!

والله ما أدري شنو هاللي طلع منّي اخواني .. بس أرجوكم فهموا القصد .. وهو ليس تجريح أو طعن بشركات البدر .. بس هي خير وفيها من الخير ماشفتوه بعد صدقوني .. بس هالحركات على اللي قاعد يصير لا آنا ولا انتو ترضون عليها أكيد !!

سامحوني اخواني .. والموضوع للنقاش


بوتسنيم​

ونسيت شغله جداً إنسانية وفكروا فيها ..

اشذنب إللي شرا 2500 سهم بدينار مثلاً .. والحين يحتاج هالفلوس لغرض شخصي ووده يطلع خلاص .. يبه ظرف طارئ مثلاً لازم يكيّش اللي عنده .. شنو يسوّي !!

هل من السهل يا سامي بأنك تتنقّل بالسهم مابين الـ 900 فلس والدينار !!


بوتسنيم​

لست ضد السهم وما يحتويه من أخبار .. وأأكّد بأن عندي أخبار ستكون رسمية في القريب العاجل إن شاءالله محّد يدري عنها ..

ليس هذا ما أريد أن أرمي إليه .. المقصود من وراء كلامي هو الدعم للسهم يا شباب .. لماذا هذا التنقل بين الدينار والـ 900 !!

أكتفي بما كتبت في الأعلى .. ولكم التعليق ..


بوتسنيم​

 

[admn]

لى متى واحنا على هالحاله يعني .. وربي هالسهم يرفع الضغط.... بس هم ماني بايع ياهم ياناااااا

 

[LONG TERM]

هم تعتقدون ان المسألة محض صدفة ؟؟ !!!!!
لا ويقول في مؤتمر شفافية حق بترو جلف !!!!!
يا ساتر




رحالي

رحالي صبحك الله بالخير ...........

اللي حصل اليوم عكس ما حصل تماااما شهر 10

لانه بعد المؤتمر الاول صعد السهم صعود صاروخي اما الان فنزول خفيف

وشووف الاقفال واحكم

 

[beckham_23]

اخواني هل تعتقدون ان وقف التداول
علي سهم جراند و اليوم الثاني علي التوالي
لة تاثير مباشر علي سهم المجموعة
اخوكم بواحمد