الرعاية السكنية لمن يعيد قرض بنك التسليف

[سواح العرب]

السلام عيكم وتقبل الله طاعتكم اخواني جاني خبر راح يفرحكم سمعت ان القرار اللي تبناه الوزير السابق تواجهه مشاكل صعب حلها سمعت انه تم تحويل القرار مع جميع الحلول المقترحة من قبل اللجنه المختصه الى مجلس التخطيط الاعلى وتم الاتفاق على توزيع اراضي لجميع الكويتيين الذين لايملكون سكن والسر عندكم بالامان ان الاراضي لكل مواطن عباره عن الف متر ٥٠٠ القسيمة ٥٠٠ حديقه علشان الازاله ماتأذي المواطنين الكلام هذا من ديوانيه عروقها بالماي

الله يسامحك انت تهتزء بموضوع اسر كويتية حدتها الظروف بان تكون بهالموقف واللي مثلك اذا عنده خبر اما ان يفرحنا او يصمت

 

[ابوسعد2010]

السلام عليكم انا حالي من حالكم شريت عن طريق بنك التسليف وبعت وناطر حالي حال جميع الاخوان وعسى الله يرزقنا من فضله وانا حبيت اضحك لان الموضوع طول اكثر من اللازم وتقبلوا تحياتي

 

[بو عبد الر حمن]

السلام عليكم

السلام عليكم وتقبل الله طاعتكم ياجماعه انا خايف من موضوع مشروع بيوت منخفظة التكاليف الي قاعد يضبطونه مناقصات حق التجار والتجار موراضين عشان يدرون انه المكان بعيد بسالمي ومحد يبي يسكنه ومساحة البيت 160متر يعني مشروع فاشل شلون نستثمر ومحد راغب في الاستثمار انتو فاهمين المشكله محد جاب طاري موضوعنا كلش بلسكان او جرايد اشوف الشغل ماشي للمطلقات ارامل القرض الاسكاني المدة التوزيع يعني العالم تجتمع وحنا كلش مالنا طاري الله يستر اخاف يخلونا كبش فدا المهم ان شاء الله وره العيد لازم نجتمع وكل عام ونتم بخير

 

[BO-MUBARAK]

ورا العيد باذن الله نتفق

 

[K.KHALED]

السلام عليكم ورحمة الله

شاركونا في الحمله للمطالبه بالحق السكني.

المطلب : نبي نسكن ياحكومه

 

[waledany]

>>>>>>>>>>>>

 

[waledany]

ياجماعه سمعوا قصتي وحكموا .. آنا بعت بيتي سنة 2003 ورديت قرض التسليف بالكامل .. بقولكم قصني .. قبل لا أبيع بيتي بجم يوم رحت لوزارة الإسكان وقلت لهم إذا ببيع بيتي أقدر أرد طلبي للإسكان مره ثانيه فقالولي تقدر ترد طلبك للإسكان بشرط اذا رديت قرض التسليف بالكامل فأكدت عليهم هذا كلامكم أكيد يعني ماراح تقطوني على صخر فأكدولي بأنه بعد مابيع البيت ورد قرض التسليف يحقلك ترد طلبك وملفك للإسكان وراح يكون دورك محفوظ . بصراحه انا فرحت وايد لحظتها لأني راح أفتك من هالبيت اللي دمرني ماديا بسبة الترميمات اللي سويته للبيت وكل شوي يخترب شي بالبيت وانا أصلح وعدل بهالبيت بدون فايده ليمن خلصت كل فلوسي وبديت أسحب من الراتب ليمن وصلت حالتي بأني مافي ماجله بالبيت بسبة الخساير اللي يحتاجها كل شوي.. الشاهد آنا ماصدقت خبر فعرضت البيت للبيع وبعته وعقب ماخلصت كل اجراءات تسجيل البيت بإسم المشتري رحت للإسكان علشان أرد طلبي لهم وأنطر ليمن يطلعلي بيت حكومه ولما قدمت لهم كل أوراقي إنصدمت منهم بأنهم قالولي مايصير ترد طلبك للإسكان مره ثانيه انا بصراحه علبالي انهم يتغشمرون معاي لأنهم نفس الموظفين اللي قالولي قبل لا أبيع البيت بأني يحقلي أرد طلبي وملفي للإسكان فإتضح بأنهم ماكانو يتغشمرون وياي فعصبت عليهم وواجهتهم وقلت لهم بس إنتم انا قبل لاأبيع بيتي ييت لكم وإستفسرت منكم وفلتولي يحقلك ترد طلبك في حالة اذا بعت البيت ورديت قرض التسليف بالكامل ولكنهم إنكروا وقالوا احنا ماقلنالك ولاحتى شفناك قبل هالمره .. بصراحه حسيت اني بهالخبر المفجع بأني ضعت وضيعت عيلتي معاي بسبة هالموظفين الكذابين فقمت أصارخ عليهم وأقسمت بأني راح أوصلها للصحافه وفعلا طلعت منهم ورحت لجريدة القبس فورا فشرحت موضوعي وشكوتي لجريدة القبس وبعد جم يوم نزل الخبر بالجريده وسبب صجه إعلاميه ضد وزارة الاسكان فقاموا بعض المسئولين بوزارة الإسكان بالاتصال بجريدة القبس وطلبوا مني أقابلهم فرحت لمقابلة المسئولين بوزارة الاسكان ولما سمعوا سالفتي يابو الموظفين الثلاثه اللي جذتوا علي وورطوني وقالولي تقدر ترد طلبك للإسكان بعد ماتسدد قرض التسليف ولكن الموظفين ردوا ونكروا كل الكلام اللي قالولي وخليتهم يقسمون على القران وفوق هذا إنكروا الحجي اللي قالوه لي قبل لا أبيع البيت . وربي إني لما طلعت منهم بكيت بحرقه على اللي سووه فيني وبعيلتي .

 

[waledany]

والحين انا لابيت وحتى عماة عين .. والحكومه للأسف الشديد فالحه بس في إصدار القوانين اللي تساعد على خراب بيوت الكويتيين مثل القانون اللي يحق للزوجه في سن 30 سنه ان تأخذ قرض ال70 ألف من بنك التسليف لشراء منزل بعد طلاقها . يعني الحكومه قاعده تحرض الزوجات الكويتيات على طلب الطلاق و الحكومة أيضا تحث الزوجات الكويتيات على تدمير بيوتهم الزوجيه بطلب الطلاق طمعا في قرض ال 70 الف. وأيضا قانون البنت العانس اللي وصلت لسن الأربعين وماتزوجت يحق لها ان تأخذ قرض اسكاني من بنك التسليف مع بنت أخرى بنفس حالتها ويشترون بيت ويسكنون مع بعض .. يعني كأنهم يحرضون البنت اللي توصل لسن ال40 سنه أن تخرج عن طوع أهلها وتعيش مع بنت أخرى بسكن بروحهم بدون حسيب ولا رقيب مما يخطرنا بالمستقبل في إزدياد الفواحش والرذيله .. وكان بالإمكان ان الحكومه تعطي هالبنت العانس مبلغ مالي شهريا يضمن لها العيش الكريم بين أهلها بدل من إخراج هالبنت عن طوع أهلها....... وللأسف الحكومه قاعده على تصرف مبالغ ضخمه من ايرادات الدوله على إصدار قوانين تساعد على تدمير بيت الأسره الكويتيه.

 

[waledany]

وبقولكم على شغله ترى آنا أول من طالب الدوله بوجوب إعادة طلب من باع بيته للمره الأولى للرعايه السكنيه اذا رغب بذلك . ويكون بعلمكم ان الإقتراح في إصدار قانون يجيز لمن باع بيته لمرة واحد فقط ان يعيد طلبه للإسكان بعد سداد باقي القرض لبنك التسليف موجود منذ سنة 1993 في عهد الشيخ جابر الأحمد الجابر الصباح رحمة الله عليه وأسكنه فسيح جناته ولكن هالقرار لم يوقع الى يومنا هذا .. وآنا من 7 سنوات كنت دايما أراجع الاسكان وأدخل على الشئون القانونيه وأحثهم على أخذ موقف حاسم لإيجاد حل وإقناع المسئولين بوجوب التوقيع على هذا القرار قبل تفاقم المشكله.

 

[BO-MUBARAK]

اللي يسمع قصتك وصارلك سنين لا بالله كدينا خير لا حول ولا قوة الا بالله

 

[waledany]

لدي إقتراح .. ليش الحكومه ماتصدر قرار لمن باع بيته لأول مره ان تخيره في إعطائه شقه تمليك من الشقق اللي بالمشروع السكني جابر الأحمد وغيرها من المناطق القريبه من المدينه أو أن تبني مجمعات سكنيه بنفس نظام شقق الصراف اللي بالمنقف اللي ثبت نجاحها بشرط ان تكون قريبه من مدينة الكويت وليس في المناطق الخارجيه البعيده.

 

[BO-MUBARAK]

لدي إقتراح .. ليش الحكومه ماتصدر قرار لمن باع بيته لأول مره ان تخيره في إعطائه شقه تمليك من الشقق اللي بالمشروع السكني جابر الأحمد وغيرها من المناطق القريبه من المدينه أو أن تبني مجمعات سكنيه بنفس نظام شقق الصراف اللي بالمنقف اللي ثبت نجاحها بشرط ان تكون قريبه من مدينة الكويت وليس في المناطق الخارجيه البعيده.

انت منصجك شقة واللي عنده 9 اولاد غيره هو والام كم شقة بيعطونه ؟؟!!!

اقل واحد عنده خمس اولاد والام والابو الافضل تركز على شي واحد هو الرجوع للاسكان لو يعطونا بيت بصباح الاحمد او الخيران راضي بس بيت يشيل العيال وتقدر تزيد ادوارة للعيال بالمستقبل مو شقه


انا اقترح يعطوني 70 الف اللي دفعتها وانا ادبر عمري عدل

 

[waledany]

يابومبارك آنا كلامي واضح ومافيه أي لبس آنا أقصد للي يرغب بالشقه يعطونه واللي مايبي بكيفه لاياخذ محد راح يجبره .. إعطاء الشقه حق اللي يبي يسكن بشقه بختياره الشخصي وليس إجباري .. وتكمله للإقتراح السابق أتمنى من الحكومه بأنها تقوم بالاتفاق مع المستثمرين بجعل المستثمر يقوم ببناء مجمعات راقيه نظام أدوار مثل مجمع الصراف ولكن بمساحة 350 أو 400 متر لكل شقه وتقوم الحكومه بشراء هذه الشقق بأسعار معقوله من المستثمر وإعطاءها للي يرغب في إقتناء هذا النوع من السكن من الذين قاموا ببع بيوتهم لمره واحده.

 

[fawaz4006]

انا آقول ان الحل الامثل انهم يرجعون طلباتنا ويعطون
لنا الحق بالتبديل مباشره وبهالطريقه نخفف عنهم
ونقدر ندبر حالنا

 

[كنز المعرفه]

انا آقول ان الحل الامثل انهم يرجعون طلباتنا ويعطون
لنا الحق بالتبديل مباشره وبهالطريقه نخفف عنهم
ونقدر ندبر حالنا

نعم هذا الكلام الصحيح

وعلى فكرة من تنطبق عليهم الشروط عددهم محدود

وكافي يا حكومة تعذيب صارلهم سنين يعانون من الإيجارات وعيالهم الآن طولهم​

 

[بوفلاح1]

سبحان الله هذا واحد من ربع اللي مايطيع أيضيع ولا الحكومه معطيتك بيت وتقول أنا ماأسكن محدود اب ابيع وأخذ قسيمه وأخر شي لا حصل القسيمه ولا قدر يسكن المحدود
من أجار بأجار الله يكون بعونه وعونكم ومن ناحية الحكومه ماقصرت بس الناس عقولهم تختلف عن بعض لو أسال الاغلبيه ليش بعتم بيوتكم أغلبكم يبي قسيمه ليش العبث هذا اللي ماعنده مولازم يسكن شفيه المحدود الله يفرج عنكم

 

[فاعل خير للجميع]

يا جماعة ليش ما نكتب كتاب ونقدمه لسمو امير البلاد ..
نشكل لجنة تقابل وزير الديوان الاميري تشرحله اوضاعنا وتعطيه الكتاب يقدمه لسمو الامير حفظه الله ..
الأمير الله يطول بعمره لو أحد يشرحلة أوضاعنا بشكل صحيح بإذن الله راح يأمر بالحل بأسرع وقت ..
الهمه يا شباب ترى قعدتنا ننطر قرار الاسكان ما ظنتي بتفيدنا بشئ ..

 

[كنز المعرفه]

سبحان الله هذا واحد من ربع اللي مايطيع أيضيع ولا الحكومه معطيتك بيت وتقول أنا ماأسكن محدود اب ابيع وأخذ قسيمه وأخر شي لا حصل القسيمه ولا قدر يسكن المحدود
من أجار بأجار الله يكون بعونه وعونكم ومن ناحية الحكومه ماقصرت بس الناس عقولهم تختلف عن بعض لو أسال الاغلبيه ليش بعتم بيوتكم أغلبكم يبي قسيمه ليش العبث هذا اللي ماعنده مولازم يسكن شفيه المحدود الله يفرج عنكم

بو فلاح أنت بوادي وحنا بوادي
القرار المنتظر والموضوع اللي حنا نتكلم فيه يخص فقط من اشتري وباع عن طريق التسليف قبل الطفره العقارية ولم يحصل على منزل أو قسيمة حكومية​

 

[waledany]

ياجماعه والله لازم نتفق ونتحد ونروح للعود علشان يشوف لنا صرفه أو ناخذ ترخيص من وزارة الداخليه لعمل إعتصام في ساحة العلم ونخلي الصحف يكون عندهم خبر عن الاعتصام علشان يكونون موجودين وقت الإعتصام ونجعلها قضيه رأي عام

 

[waledany]

تنويه وتصحيح ..أقصد يكون الإعتصام في ساحة الإراده مقابل مجلس الأمه