السلام عليكم
الأخوه الأعزاء في المنتدى واهل ابوفطيره الكرام
يشرفني ويسعدني ان انضم لسكان ابوفطيره
حيث انني شريت الأرض بداية شهر 4
واستلمت الوثيقه أمس ولله الحمد طبعا بعد ماتوكلت على الله ثم خذيت قرض زوين وعزمت
أنا اتابع المنتدى كثيرا مجرد متابعه بدون مشاركه
ونسأل الله التوفيق والبركه لنا ولكم وللأخوان الذين يبحثون عن سكن
هلا ومئة هلا بالجار بوعبدالله الف مبروك ونورت المنطقة بقدومك
يارب عساها دار عامرة .. ومنزل مبارك .. وتعمرها بالايمان وبذكر الرحمن..
ويابونجم احنا يا اهل ابوفطيرة لنا عادات وتقاليد واللي يسكن بمنطقتنه لازم ياخذ اطباعنا
اول عادة ما تقاطعنا وتمر علينا بهالمنتدى كل ماسنحت لك الفرصة
وثاني عادة اذا مريت تترك لنا وردة صغير تقدمها باصابعك الكريمة لاخوانك وجيرانك وهالوردة عبارة عن مشاركة كتابية نسمع فيها اخبارك ونطمن عليك..
وعشاك عندي يابونجم الحبيب قول تم..
ياجماعة عندي لكم سالفة تونسكم..
التقيت بالصدفة من اسبوع تقريبا مع احد الاشخاص الكرام ..
والدته حجية من اهل الكويت القدامى من اهل المسك والعنبر من اهل فيلكا..
كان الولد يدورلوالدته قسيمة منذ اكثر من سنه ..عشان تبني لها بويت وتجمع اعيالها يوم الزوارة ..
وكل ماجاب لها منطقة طلعت فيها عذروب ..
فقام الولد جزاه الله خير يبر بوالدته ويقرى لها من الانترنت الاسعار والمواصفات والاخبار ..
ولما وصل عند شرق القرين والبنية التحتية والتصاريح ... ومر على موضوعنا ..
قام ينقل لها سوالفكم وحجيكم وغشمرتكم الحلوة والصور والافلام..
فلزمت عليه هالحجية ان يشتري لها بهالمنطقة من كثر ماحبت سوالفكم وترابطكم ومودتكم لبعض..
وقالت لولدها هذه اللي ادور عليها.. فيها ناس قلوبهم بيضه وسوالفهم تسر القلب..
وماخاف على روحي باجر اذا سكنت بين هالناس..
فيقول هالولد البار بوالدته.. انه اذا تأخر وماسيير عليها العصاري..
تدق عليه وتقوله تعال يوليدي ولهت عليك ..ولاتنسى وانت جاي تجيب الكمبيوتر..
اقولها ليش يمه ؟؟ تقوله بسمع اخبار قسيمتي واشوف الصور..
واحنا نقول:عسى الله يطول عمر هالامييمه الطيبه لعيالها ويمدها بالصحه والعافيه
واحنا كلنا اعيالج وجيرانج وانتي حسبت امنا وابشري ان شاء الله بالاخبار والعلوم السعيده..
بس ديري بالج يالغاليه اذا ماتسوين لج نكنييم وتشاركين ويانا ترى بنوقف الافلاموالصور
نبيج تشاركين لو مشاركه وحده يالحبييبه..