السلام عليكم
انا جاي اليوم ابي اكتب شكوى لكم وابيكم تعلموني شسوي لكن بعد ما قريت ردودكم ومشاكلكم حسيت ان شكوتي بتكون تافهه ويمكن مو مهمة !
على العموم انا بذكر لكم شكواي واتمنى الاقي منكم الرد عليها حتى وان كانت مشكلتي صغيرة,
انا بصراحة توني اجرت دور وحبيت اركب خط تليفون ارضي, المهم عملت كل الاجراءات ووصلت الحرارة لكن لان البيت جديد وماتركب فيه تليفون من قبل فالموضوع يحتاج لفني يبطل "نقطة" التليفون اللي بالطوفة ويوصل كم واير ويسكر النقطة.
انا اعرف هالشغلة لاني سويتها قبل لما سكنت شقة واخذ مني العامل على 3 نقط 3 دنانير. اليوم دقيت على نفس المحل الكهربائي وجاني البيت وقام يسوي استعراض ويسحب وايرات ويشيل ويحط ويتمتم ويقول "والله باباا هذا مشكلة واجد !!" , "هذا شغل ممكن 6 دينار او 7 دينار" واخرتها لما شافني مطنشة طلب مني 12 دينار !!!!!!!!!
طبعا لكل نقطة طلب 4 دنانير وانا ابي اركب 3 فكان المجموع 12 دينار !!
قلت له باستخفاف "مافي خصم ؟"
قالي " بلى بابا انا سوي خصم, اول كان نقطة 4 دينار الحين مشان انت انا سوي 3 دينار !!!! "
قلت له اطلع بره خلاص ما ابيك لكني بشتكي عليكم لحماية المستهلك !!
السؤال:
هل هناك حماية المستهلك في عبدالله المبارك تقدر تحاسب هذول الغشاشين والاستغلاليين وتوقفهم عند حدهم ؟
والا هذا ما يندرج تحت الغش ؟
وسلامتكم
