استفسار بخصوص كمبياله

[Taekwondo]

رحم الله والديك ، والله يتقبل صيامنا وصيامكم ان شاء الله

 

[Taekwondo]

تقبل الله طاعتكم وصيام مقبول ان شاء الله اخر المستجدات: بالنسبه حق سالفة الاعلان هل اقدر ادزه حق مكتب المحاماة اللي موكله الطرف الثاني؟ لأن المكتوب اللي دازينه لي اهم على البيت كانوا كاتبين فيه: عنوان فلانه الفلانيه اللي تطالبك فلوس هو كذا كذا (حاطين عنوان محاميهم) مو عنوان اللي تطالبني

واساسا هذي صاحبة الشركه مصريه الجنسيه ومادري عنها اذا كانت بالكويت ولا لأ .. لأني دقيت على محاميهم اللي موكلينه وقلت له وين عنوانها ولا وين شركتها بروح اتفاهم وياهم جان يقولي معرفش واللهي قلت له وانتوا منو قال احنا عندنا الشؤون القانونيه واجراءات التحصيل

هل اخليهم جذي وانطر لين توصل السالفه اعلان عن طريق النيابه؟ ولا في اجراءات ثانيه؟

عيدكم مبارك جميعا والعيادي ان شاء الله مع انتهاء القضيه

 

[fayoona74]

اي تقدر تدزه على محاميهم باعتباره الموطن المختار لهم

 

[Taekwondo]

تسلمين اختي فيونه وبعد العيد ان شاء الله لي تصرف ثاني معاهم والعيادي بالحفظ والصون

 

[Taekwondo]

الا صج يا جماعه بما ان صاحبة العلاقه ما ادري عنها هل هي بالكويت ولا برى وان شاء الله بحيل واحد احد اذا طلع الحكم لصالحي .. شلون على التعويض والسوالف هذي؟ وين نلاقيها هذي بالله؟

 

[Taekwondo]

تقبل الله طاعتكم

 

[Taekwondo]

احم تقبل الله طاعتكم .. ونرد نطرح السؤال بصيغه ثانيه: الطرف الثاني واللي تدعي انها تطالبني فلوس غير كويتيه ومادري اهي بالكويت ولا لأ وبما اني رافع عليها قضيه وان شاء الله بحيل واحد احد كسبتها ، شلون على المصاريف والتعويض والفلوس اللي اندفعت حق التايم شير مالي؟ هل مكتب المحاماة اللي اهي موكلته راح يتحمل كل شي ولا ؟

 

[fayoona74]

منا ومنك عيدك مبارك مقدما
لا طبعا مكتب المحاماة ماله شغل يدفع لها كل القصة ان اهو الموطن المختار لها يعني تعلنها عن طريقه انت لما تكسب باذن واحد احد تاخذ الحكم وتذيله بالصيغة التنفيذية وتبدي اجراءات التنفيذ اذا نفذت كان بها واذا امتنعت في حجز تنفيذي وقصة واذا مالها املاك بالكويت تقدر تاخذ الحكم وتنفذ بره بس راح تحتاج محامي ولوية اذا بره الكويت

 

[Taekwondo]

ايامج سعيده ان شاء الله اختنا المحاميه فيونه بالحاله هذي ماكو الا نشوف وينها فيه اذا بالكويت ولا راحت مصر .. الله يكتب اللي فيه الخير وراح نخبركم ان شاء الله بآخر المستجدات

 

[Taekwondo]

عساكم على القوة .. اخر المستجدات: حطيت رقمي المدني بسايت وزارة العدل بشوف شنو علي طلعلي التالي:
القضايا المرفوعة ضدكم بهذا الرقم المدني
الرقم الآلي ........... - الجهه/ المحكمه الكليه - النوع/ أمر اداء جزئي - تاريخ التسجيل 12-10 - تاريخ الحكم 13-10-2009 - نوع الحكم/ ابتدائي

ياريت توضيح من الاخوان و الاخوات المختصين رحم الله والديكم

 

[Taekwondo]

هل سالفة امر الاداء شي عادي خصوصا اني رافع على الطرف الثاني قضيه وجلستنا ان شاء الله شهر 12 ولا يبيله اجراء ثاني؟ وبالنسبه حق الحكم الابتدائي له فتره معينه ويصبح نافذ الاداء ولا شالسالفه؟

 

[fayoona74]

في اجراء انك تقرا اول شي شنو محتوى الامر وشنو محله وبعدها تتظلم منه خلال 15 يوم واذا رفض تظلمك تستانف خلال 30 يوم وسلامتك

 

[Taekwondo]

تسلمين اختي فيونه والحمدلله على السلامه ماكو الا ننطر اذا وصلني شي البيت اعطيكم خبر اول بأول



ربنا انصرنا على من ظلمنا

 

[Taekwondo]

السلام عليكم ان شاء الله الكل بخير وصحه وعافيه .. اخر المستجدات: مثل ما ذكرت من قبل انهم سجلوا ضدي امر اداء جزئي بتاريخ 13/10/2009 .. طبعا متى وصل الاعلان حق بيتنا بتاريخ 16/11/2009 حاسبينها صح الظاهر .. كلمت المحامي وقال راح يسوي امر تظلم بس مادري شنو معناة امر التظلم وشنو راح يصير بعدها؟ وبخصوص الاعلان اللي من طرفي حق صاحبة الشركة ، موظف العدل راح اول مره قالي العنوان غلط وبعدها راح حق مكتب محامي الطرف الثاني جان يقولون: احنا ما عندنا توكيل عن فلانه الفلانيه .. مع العلم بأمر الاداء مكتوب ان عنوانها المختار هو مكتب المحامي لكن مثل ما سمعت مكتب المحامي من حقه ما يستلم اي اعلان

طبعا حطيت رقمها المدني بوزارة العدل لقيت بلاوي وقضايا وايد سواء لها او عليها .. واخر شي طلع عليها منع سفر بتاريخ 4/11/2009 .. بس ماني عارف دام اكو منع سفر ليش ما يصير عليها القاء قبض؟

الله يوفقنا لعمل الخير وينصرنا على من ظلمنا .. اسف طولت عليكم بس هذي اخر المستجدات

 

[fayoona74]

لازلنا بانتظار مستجدات قضيتك ومشكور عالتواصل

 

[Taekwondo]

السلام عليكم ان شاء الله الكل بخير وصحه وعافيه .. اخر المستجدات: راجعت وزارة العدل وعطيت موظف الاعلانات عنوان الطرف الثاني طبعا العنوان طبقا لبيانات الهيئه العامه للمعلومات المدنيه .. يوم اجيك بموقع وزارة العدل ولا الله يهديه الموظف كاتب نتيجة الاعلان: لم يستدل المرشد (اللي اهو انا) على العنوان.. بالحاله هذي اعتقد بالجلسه القادمه القاضي راح يأجل لعدم اعلان الطرف الثاني .. ممكن احد يفيدني ما عليكم امر؟ وهل المطلوب مني انا اروح افتر وادور العنوان ولا هذي وظيفة موظف الاعلانات؟

رحم الله والديكم

 

[rahaly]

اخوي كثير من الاحيان عنوان المعلومات المدنية لا يمكن الاستدلال عليه
تلاقي عمارة رقم 8759776 مثلا !!!

لازم انت ترشد عن العنوان وتطلع مع المندوب تريه المكان

 

[Taekwondo]

تسلم اخوي رحالي يعني ماكو الا اروح افتر بحولي لمن اصيد العمارة الله يعين ويسهل الامور ومشكور مره ثانيه عزيزي

 

[Taekwondo]

الحمد لله رب العالمين بعد ما لفيت وحست بشوارع حولي حصلت العنوان والعماره لكن السؤال: اذا بيوم الارشاد رحت مع مندوب وزارة العدل وقالنا الحارس مفيش حد بالاسم هذا .. شنو الاجراء بالحاله هذي؟ للعلم العنوان اللي عندي طلعته من الهيئه العامه للمعلومات المدنية الشهر اللي فات يعني ما يعتبر عنوان قديم .. هل بعدها يصير اعلان عن طريق النيابه ولا خلاص القاضي احتمال يحكم؟ اسف على الاطاله واسمحولنا على كثرة الاسأله

 

[rahaly]

قضيتك يبيلها اتفاقية فيينا

اذا ارشدت على العنوان .. خلاص امام القاضي تكون قد بذلت ما في وسعك للاعلان
وقتها تطلب تصريح للاعلان في مواجهة النيابة العامة

ومعود جمع كل اسألتك مرة وحدة .. الموضوع وصل الصفحة الخامسة واخاف السنة القادمة يبدأون يدرسون قضيتك في الجامعة

موفق