السلام عليكم اخواني
الصراحة أنا تكلمت من قبل وقيمت لكم السهم على حسب اللي شفته من بياناتهم المالية و سبق و قلت الشركة تعبانة و ما يبت الكلام من عندي هذا كله مبين من تقاريرهم. و للأسف طلع لي بعض الشباب الله يهديهم وشخط فيني! اللي قال انت مدير صندوق و متعمد تخرعنا علشان نقط اللي عندنا و اللي يدش يقولي أنت تتفلسف و اللي يقولي كل واحد يه و سمى نفسه محلل استثمار ، لا و اّخر شي الموضوع تسكر و انردم!! أنا يحز بخاطري ان أشوف ناس ما يعرفون بالاستثمار كلش و يطبلون حق الأسهم. يا جماعة هذا علم قائم بذاته! مو كل واحد يفتي فيه. بصراحة انصدمت من اللي يقول السهم يسوى 800 فلس و اللي يقول دينار و اللي يقول دينارين!! هذي أسهم مو طماط ، يدوبل سعره 100 مره على حسب الموسم.
على العموم هذا كلام صار وانتهى و احنا عيال اليوم و سامحوني اذا عتبت عليكم، هذا من حبي لكم و من الحرص على أموالكم ، مو شرط اني أخالفك الراي معناه أني أكرهك أو أبي أخسرك. أنا كنت شايف شي و قلته من باب الأمانه.
معلومات جديده:
أغلق السهم اليوم على المضاعفات هذي:
السعر إلى الربحيه = 51.22 ضعف
السعر إلى القيمة الدفترية = 3.357 ضعف
مضاعفات قطاع الصناعة:
السعر إلى الربحيه = 15.01 ضعف
السعر إلى القيمة الدفترية = 2.16 ضعف
سهم القرين متضخم بمقدار 241% عن القطاع من ناحية السعر الى الربحية
و متضخم بمقدار 55.4% عن القطاع من ناحية السعر الى القيمة الدفترية.
مع العلم بأن كافة ايرادات الشركة من الأنشطة الاستثمارية فقط وليس التشغيلية. يعني نمو غير عضوي "InOrganic Growth"
انظر:
http://en.wikipedia.org/wiki/Inorganic_growth
يا أخوان الحذر واجب، مادري يمكن السهم يروح 100 دينار أو يمكن ينزل 150 فلس. بس أخذوا الحيطة.
بارك الله فيكم و أحبكم في الله