ماذا سيحدث لو تم الغاء نظام الوحدات وسوق الكسور

[دخيل الله]

اشكر الاخوه على مشاركاتهم واحب ان اوضح مره اخري

بأن المقصود من الموضوع كله هو ليس نظام تغير السعر
وانما تغير كمية الوحده "عدد الاسهم في الوحده"

بمعنى انه يكون لك الحرية لشراء 100 سهم او 10000 لشركة مثلا قيمتها نص دينار حسب قدرتك الماليه.
يعني العدد مفتوح،باي مبلغ تشتري باي سهم ودمج السوق الرسمي مع الكسور .

بالنسبه لنظام تغير السعر (1و2و5و10و20 فلس ) فهو ممتاز وواضح.
وايضا لحدود السعر العليا والدنيا، ممتاز رغم فشله في تصحيح 2006، "عرض بدون طلب"
والسبب عدم ايقاف التداول في السوق قبل فسخ عقود الأجل.


اخر ما توصلت اليه:

مزايا النظام الحالي لتحديد "عدد" الاسهم في الوحده.
فقط انك تعرف كم ربحت في كل تغير للسعر بسهوله .

عيوبه:
- اعاقة المستثمر الصغير والمواطن العادي في عمليات البيع والشراء،ومحدوديتها في سهم او اثنين.
- تجميد سيولة ضخمة في السوق ،سواء داخل السوق او خارجه، وتتمثل بالمبالغ البسيطه الغير مستثمره لدى صغار المستثمرين.
- حرمان المستثمر الصغير من استراتيجيات كثيره للتداول "ابسطها، كم واحد يقدر ياخذ مركز ثابت في سهم معين منه يقرر
اسعار التجميع التصريف له اذا كان هدفه الاستثمار المتوسط او الطويل بدون لا يملك راس مال كبير في السوق".
- استغلال تجميد سيولة صغار المستثمرين في الاقفالات الوهميه: الاقفالات الوهميه جميعهاتتم من اطراف تملك مبالغ هائلة
لا يضرها لو خسرت وحده اوثنتين لهدف تمويه الاسعار والمؤشر عند نهاية التداول باسهم الشركات تداولها ضعيف
والسبب عزوف صغار المستثمرين لان اغلبيتهم لا يملك الا وحده او ثنتين غير مستعد ان يخسرهم.

لو تم الغاء "كمية الوحده"،بهالحاله سوف تجد اعداد كبيره من الاوامر لاخر لحظه بالسوق تعطيك الوضع
الحقيقي للسهم،واذا اصحاب المبالغ الكبيره ودهم باقفال وهمي، عليهم دفع مبلغ اكبر.... وهذا المطلوب اعاقة الاقفالات الوهمية.

لو تم الغاءة ماذا سيحدث ؟؟؟؟
الشي الوحيد السلبي الممكن حدوثه هو ارتفاع الاسعار لارقام كبيره كما حدث في السوق السعودي
لكن المطمئن هو ان درجة الوعي والخبرات في السوق الكويتي افضل واقدم ويعتبر هذا صمام امان.

الايجابيات عد وخربط، اللي وصلت له حتى الآن:

- سيوله ضخمه "فوق التصور" ستدخل السوق الكويتي:انا عندي 500 دينار مو مستفيد منها لا بسوق رسمي ولا كسور
وكم وكم واحد نفس حالتي، المبالغ الصغيره هذه بمجموعها ما هي الا سيوله ضخمه محرومه من الدخول في السوق الرسمي
- توسيع قاعدة المتداولين:يوجد شريحه من الافراد خارج السوق يرغبون في التداول من غير اخذ قروض، ولا زالوا يجمعون
مبالغ تكفي لشراء وحده، الغاء النظام يتيح لهم التداول من غير المخاطره بمبالغ كبيره وبدون قروض.
- معدلات تداول ودوران للاسهم عاليه، وهذا شي ايجابي.
- مرونه كبيره في الدخول والخروج من الاسهم.
- ينتهي عصر الاقفالات الوهميه والمضاربات القاتله للمستثمر الصغير راعي "الوحده الواحده"
اللي يتعلق بسهمه بين الخساره وسوق الكسور.
- عزوف عن الاجل من قبل المستثمرين قليلي الخبره: "هذا صمام امان لتخفيف اثر عمليات التصحيح".
- نيوتريدر وربعه راح يخرعون الهوامير: قاعد امزح
- انتهاء مهزلة الادراجات الجديده والورطه مع سوق الكسور.
- ننسى الايام اللي يجيك احد بالمنتدى ويقولك بعد اول نص ساعه بالدقيقه الثالثه بعد عطسه القهوجي
اللي عند اول وسيط راح يرتفع السوق ثلاث نقاط :d وبعدها بثلاث عطسات راح ينزل 3000 نقطه ونص نقطه !!!
- حماية الاسهم الممتازه "الغير قياديه"،بتثبيت اسعارها وتوسيع قاعدة المتداولين والمستثمرين فيها.
- تنويع الاستثمار: يتيح لك المجال للاستثمار باكثر من شركه جيده بنفس الوقت، ولفترات طويله
من غير تجميد باقي رأس المال.




كله هذا يحدث فقط بسبب اعطاء دور اكبر للمستثمر الصغير بالغاء الزامه بعدد معين من الاسهم في الوحده.

المستثمر الصغير حتى يحصل على مرونه في التداول مجبور على الاقتراض او الدخول في الاجل وكلاهما
له تأثير سلبي واحيانا مدمر على السوق وعلى المواطن البسيط، ولنا في تصحيح 2006 عبره.

العقبه الاكبر لالغاءه هي ادارة البورصه.
ليس من السهوله تغيير نظام قديم بيوم وليله بالنسبة لهم.
الا اذا "استوعبوا" ان النظام لا يصلح في الوقت والوضع الحالي لن يترددوا بتغيير النظام من جذوره.

تبقى مسألة الاقناع.
البورصه تاخذ عموله على كل شهادة اسهم "نص دينار" اذا لم اخطأ.
تخيل كيف راح تتضاعف اعداد الصفقات بالسوق.

ضعف، اثنين او ثلاثه. الاكيد ان دخلهم سيزيد اكثر من الضعف !!!
اذا زاد ايرادهم، سيمنحهم هذا المرونه لتقديم خدمات افضل مما هو حاصل الآن
وسهولة تطوير انظمتهم وكمبيوتراتهم اللي تعلق.

قس على هذا الوسطاء في السوق وارتفاع عمولاتهم ايضا.

غير هذا، التحليل الفني سيكون افضل، لتسكير الباب على الاقفالات الوهميه اللي
بعضها للاسف تستغل التحليل لاعطاء قراءات خاطئة.
مع ارتفاع حجم التداول ليعطي صوره اوضح.


يعني تغيير شبه جذري للسوق.... وسهل جدا جدا "لمن" يريد التغيير "للافضل".

اعتذر على الاطاله.
واقول اخيرا.
بعباره بسيطه: هذا هو عيب السوق الكويتي.



.

 

[الدينار الخليجي]

نظام الوحدات هو الافضل لسبب ان من يملك خمس اسهم ممكن يعرض بالحد الادنى والمتأثر هو من يملك الكميه الاكبر مثل ما هو حاصل في بعض الدول الخليجيه يعني مومشكله اخسر نصف دينار لاكن احسب كم اخسر الاخر

 

[دخيل الله]

نظام الوحدات هو الافضل لسبب ان من يملك خمس اسهم ممكن يعرض بالحد الادنى والمتأثر هو من يملك الكميه الاكبر مثل ما هو حاصل في بعض الدول الخليجيه يعني مومشكله اخسر نصف دينار لاكن احسب كم اخسر الاخر

اخ الدينار الخليجي ما فهمت عليك

ياليت توضح اكثر

.

 

[FLOOD]

new trader

تونى فهمتك اذا معنا كلامك ان الكميه تكون مفتوحة ودمج سوق الكسور مع السوق الرسمى ويضل نظام الوحدات موجود اتفق معاك 100% سوف يكون السوق فى افضل حالاته والتداول سوف يكون ممتاز حينها

 

[الدينار الخليجي]

اخ الدينار الخليجي ما فهمت عليك

ياليت توضح اكثر

.

حاضر استاذي يعني لو عرضة 3000 سهم بسعر 100 فلس والطلب على 70 فلس فتجد من يملك يملك 5 اسهم سيقوم بالبيع على الطلب اويعرض باقل من السعر بكثير المعروض لسبب قلت اسهمه اي ان خسارته قليله ومن ناحيه ثانيه ستجد المشتري لا يرفع السعر نظراا لوجود صفقات على اي سعر ولنا تجارب مع اسواق اخرى يعرض باي سعر ولو بالحد الادنى

وانشاله اني وضحة الموضوع .

 

[fawaz74]

يعطيكم العافيه ياخوان على كل الي تفضلتو فيه بس المحافضه على استقرار السوق راح يكون بستمرار النظام الحالي وتفعيل سوق الكسور بفتح التداول فيه للي يرغب بتجميع او بيع كميات بسيطه بسعر الاساس للسهم بالرسمي وبتذبذب مقعول لا يسمح للمضاربات فيه...اهم شي استقرار المؤشر العام ولا بتشوفون تجربه السوق السعودي عندنا ....المطلوب فتح سوق الكسور بنسبه معقوله وخل الناس تبيع وتشتري على راحتها اهي حركه وحده بورصه مصغره للكميات البسيطه بدون عقد سوق الكسور الحاليه وتعم الفايده وهني يمع من المعاش على راحتك هذا للي يبي مصلحه الصغار

 

[دخيل الله]

حاضر استاذي يعني لو عرضة 3000 سهم بسعر 100 فلس والطلب على 70 فلس فتجد من يملك يملك 5 اسهم سيقوم بالبيع على الطلب اويعرض باقل من السعر بكثير المعروض لسبب قلت اسهمه اي ان خسارته قليله ومن ناحيه ثانيه ستجد المشتري لا يرفع السعر نظراا لوجود صفقات على اي سعر ولنا تجارب مع اسواق اخرى يعرض باي سعر ولو بالحد الادنى

وانشاله اني وضحة الموضوع .

وضحت بافضل ما يكون

نفس اللي تقوله قاعد يحصل الان،الفرق انه يتم لغرض الاقفالات الوهميه
لرفع وخفض المؤشر لدرجة وصلت سهم بداية السوق حد ادنى
واخره حد اعلى بصفقتين او وحدتين فقط اذا لم تخني الذاكره هذا الاسبوع على ما قرأت بالمنتدى !!!


لاحظ اني قلت الاسهم راح يكون دورانها وتداولاتها عاليه جدا
في الاسهم الجيده ماراح يكون فيه فرق بين الطلب والعرض، راح يكون فيه
حركة مستمره في التداول والطلب والعرض بعكس ما هو حاصل الان لكثير من الاسهم بعضها ليست جيده بل ممتازه.


واحب ان اؤكد ان السوق الكويتي لا يقارن بالاسواق الخليجيه الاخرى
لانه اقدم وشركاته الاساسيه معروفه ولها تاريخ وغالبية المتداولين فيه
لهم خبره جيده مقارنه بالاسواق الاخرى ويتبعون اسلوب تفكير بالاستثمار
اقدر اسميه "اسلوب استثمار عقاري" اللي يعتمد على معامل ربحيه 10 .



.

 

[دخيل الله]

new trader

تونى فهمتك اذا معنا كلامك ان الكميه تكون مفتوحة ودمج سوق الكسور مع السوق الرسمى ويضل نظام الوحدات موجود اتفق معاك 100% سوف يكون السوق فى افضل حالاته والتداول سوف يكون ممتاز حينها

منك العذر
هذا مشكلتي مو قادر اوصل اللي في بالي.

 

[دخيل الله]

يعطيكم العافيه ياخوان على كل الي تفضلتو فيه بس المحافضه على استقرار السوق راح يكون بستمرار النظام الحالي وتفعيل سوق الكسور بفتح التداول فيه للي يرغب بتجميع او بيع كميات بسيطه بسعر الاساس للسهم بالرسمي وبتذبذب مقعول لا يسمح للمضاربات فيه...اهم شي استقرار المؤشر العام ولا بتشوفون تجربه السوق السعودي عندنا ....المطلوب فتح سوق الكسور بنسبه معقوله وخل الناس تبيع وتشتري على راحتها اهي حركه وحده بورصه مصغره للكميات البسيطه بدون عقد سوق الكسور الحاليه وتعم الفايده وهني يمع من المعاش على راحتك هذا للي يبي مصلحه الصغار

فرق كبير بيننا والسوق السعودي

لا مقارنه السوق الكويتي والسعودي
ولن يحدث ما حصل عندهم لنا.

السوق السعودي تم استدراج غالبية الشعب عبر الاكتتابات
للسوق وغلبهم لا يعرف ابجديات البورصه نهائيا.

بعكس السوق الكويتي، اغلب الناس عندنا عندهم فكره عن البورصه
وتقييم السهم بالنسبه للارباح والمردود وهم خارج السوق !!.

السوق السعودي سهم معامله 100 يعني بعد 100 سنه يردلك راس ماله
لو تحطه بالسوق الكويتي ما يعيش يوم واحد.

فيه فرق كبير بين السوق الكويتي والاسواق الخليجيه الاخرى.

لنا تاريخ بالاسواق والنكبات "سوق المناخ"

تعلمنا منها، سوقنا ناضج لولا هذا العيب فيه.


.

 

[fawaz74]

كلامك صحيح اخوي newtrader وهذا ماحصل عندهم بالظبط الي الناس جمعته بخمسين سنه خذوه بسنه بس المشكله لازم مايكون نظام التداول بطريقه تسمح للمضاربين بصولات وجولات لان اساس الموضوع العامل النفسي انا الي فهمته من كلامك انك تقترح فتح المجال للكميات البسيطه للتداول بالرسمي بغرض تنشيط السيوله وفتح المجال للكل بالتداول وبالنهايه الخطر موجود ليش الناس تنصح بالصناديق للي مايعرف بالاسهم وليش نخلي الؤشر العام تحت رحمه 50 سهم ولا توقع في صندوق يبيع ويشتري 50 سهم مثل ماقلتك سوق الكسور يبي حريه كامله وعرض وطلب مفتوح للجميع والكل بيستفيد جمع بالكسور وبيع وحدات بالرسمي وخل الموشر مستقر على كميات تسوى ولا بنزيد الاصفار على رقم المؤشر وبتشوفه مينون اكثر من ماهو الحين احمر واخضر واحنى مو ناقصين

 

[دخيل الله]

كلامك صحيح اخوي newtrader وهذا ماحصل عندهم بالظبط الي الناس جمعته بخمسين سنه خذوه بسنه بس المشكله لازم مايكون نظام التداول بطريقه تسمح للمضاربين بصولات وجولات لان اساس الموضوع العامل النفسي انا الي فهمته من كلامك انك تقترح فتح المجال للكميات البسيطه للتداول بالرسمي بغرض تنشيط السيوله وفتح المجال للكل بالتداول وبالنهايه الخطر موجود ليش الناس تنصح بالصناديق للي مايعرف بالاسهم وليش نخلي الؤشر العام تحت رحمه 50 سهم ولا توقع في صندوق يبيع ويشتري 50 سهم مثل ماقلتك سوق الكسور يبي حريه كامله وعرض وطلب مفتوح للجميع والكل بيستفيد جمع بالكسور وبيع وحدات بالرسمي وخل الموشر مستقر على كميات تسوى ولا بنزيد الاصفار على رقم المؤشر وبتشوفه مينون اكثر من ماهو الحين احمر واخضر واحنى مو ناقصين

صحيح كلامك ممكن المؤشر يصير مجنون،بس ماراح نعرف الا لما نجرب.

حاليا لو تم تعديل سوق الكسور بحيث يتبع قواعد السوق الرسمي
باوامر العرض والطلب وعدم الزام الشاري بجميع الكميه
هذا سيؤدي جزء من الغرض لهذا الموضوع وهو تسهيل التدولات
لصغار المستثمرين.

لكن من الممكن لو هذا تم ان كثير من الناس تشد الرحال من السوق الرسمي لسوق الكسور، لانه راح يكون مغري اكثر.

للالتفاف على مشكلة الكسور والوحدات ومحدودية راس المال افضل شي
بالنسبة لي حاليا هو شراء وحده وكسرها في سوق الكسور بمقدار الفائض
من راس المال، والباقي ارده لسوق الوحدات للمضاربه، واسمي نفسي مستثمر بالكسير اللي عندي


كل الشكر للاخوان على مشاركاتهم.

.

 

[مليون دينار]

المفروض المطالبة برجوع الى النظام القديم التداول بالوحدات

أثبت هذا النوع من التداول لا يصلح بالسوق الكويتي

 

[F.B.I]

المفروض المطالبة برجوع الى النظام القديم التداول بالوحدات

أثبت هذا النوع من التداول لا يصلح بالسوق الكويتي

انا معاك .. نظام التداول السابق كان اكثر تنظيما
ولا يعرض المتداول الى اي مساءله قانونيه ولا للنيابه ولا للتوقيف .. الحين حطوا القانون يسمحلك تتداول بسهم واحد ولكن يا ويلك اذا بعت او شريت سهم او سهمين .. الحين تسمحلي وبنفس الوقت تحولني دايركت للنيابه العامه بتهم سابقتني هناك للنيابه والتحقيق على اكثر من تهمه حتى تثبت عليك وحده منهم غصبن عليك تثبت عليك ،،، شنو هي العمليه فخ للمتداول والا شالمقصود فيها ومن المقصود فيها؟!
خلاص رجعوا نظام التداول السابق وفكوا الناس من الاتهامات اللي طالتهم بسببكم!!

 

[waham]

ما اروع هذه الصفحه .. الحقيقه من اجمل ما قرات .. وما شاء الله عليكم مشاركات ولا اروع .. وينقصها بعض المخضرمين الي مثلكم وشرواكم .. على العموم السوق يحتاج الى الشفافيه والمصداقيه التامه ونكون بخير .. بالتوفيق لي ولكم باذن الله .

 

[egyptian869]

يااااا الله ... منوا اللى نبش بصفحات المنتدى القديمه وبعد ثمان سنوات كامله اعاد الموضوع الى الضوء .... 2007
وينها هالاياااااااااااااااااااااااااام. ناست راحت وناس ردت وناس فارقتنا .. والسالفه لم تتغير