Common
عضو نشط
- التسجيل
- 14 أبريل 2008
- المشاركات
- 22
كفيت ووفيتوعليكم السلام
ما أقدر أقول لك كل مميزاته لسببين:
السبب الأول: لأن مميزاته وايد
السبب الثاني: لأني ما أعرف كل مميزاته
البرنامج متعوب عليه ويسوى، وإن كان سعره عالي نسبيًا، سعره ب140 دينار سنويًا للحساب الاحترافي، ويعطونك شهرين مجانًا، هذا أعلى اشتراك عندهم، راح ينتهي عندي قريب وراح أجدد بإذن الله
فيه اشتراكات أقل لو كنت ما تحتاج كل شي بالبرنامج
البرنامج يشتغل على الأجهزة الذكية (آيفون آيباد أندرويد هواوي) ويشتغل على الكمبيوتر (ويندوز وماك) ويشتغل على المتصفح (تيكر تشارت نت)، تقدر تنزله عليهم كلهم بس ما تقدر تدخل إلا من منصة وحدة بالوقت الواحد، مجرد إنك تدخل من منصة ثانية، راح يفصلك من الأولى
أعلى مميزات موجودة في النسخة اللي على الويندوز
بالنسبة لنسخة الماك هي نفس نسخة الويندوز بس شغالة ببرامج تسمح لك تشغل برامج الويندوز على الماك، فيه تفاصيل ما راح أخوض فيها لأن مو هذا موضوع سؤالك، اللي لازم تعرفه إن التوافق ما راح يكون 100% ولا بيعطيك نفس قوة البرنامج على الويندوز، البرنامج مصمم إن يشتغل على الويندوز
آنا أستخدم التيكر تشارت على الآيفون والأندرويد والماك والويندوز والمتصفح (تيكر تشارت نت)، ما أستخدمه على الآيباد لأن باختصار ما عندي آيباد، وإلا لو عندي جان استخدمته، الويندوز أعلى مميزات مثل ما قلت، والاشتراك الاحترافي يعطيك القابلية تدخل من وين ما تبي
راح أرد على سؤالك الثاني والثالث قبل الأول
بالنسبة لسؤالك الثاني:
إي تقدر
بالنسبة لسؤالك الثالث:
الموقع الرئيسي اللي تشترك منه هو تيكر تشارت دوت كوم، أما الثاني دوت نت فهو مثل ما قلت لك فوق عبارة عن منصة تيكر تشارت على المتصفح
بالنسبة لسؤالك الأول:
تقدر مثل ما قلنا تشوف أحجام البيع والشراء حتى لو في يوم سابق
تقدر تشوف الصفقات اللي تمت حتى لو في يوم سابق، وتفلترهم، يعني تشوف الصفقات الكبيرة فقط، أو اللي بسعر معين فقط، أو اللي بحجم معين فقط
تقدر تشوف سعر السهم حتى لو من أكثر من 10 سنين، هذا يرجع حق بيانات السهم المتوفرة ويرجع حق حجم قاعدة البيانات اللي انت منزلها، قاعدة البيانات متوفرة مجانًا وتقدر تنزلها من داخل البرنامج
أي إعلان ينزل يخص السهم تقدر تشوفه، آنا أستخدم هالميزة بكثرة عشان أعرف تواريخ التوزيعات بسرعة، يعني أدخل على البرنامج وأبحث عن السهم وأضغط إعلانات وأشوف كل إعلانات السهم موجودة مثل تداول شخص مطلع أو إفصاح أو إعلان توزيعات، ولو انت فاتح على قائمة الأسهم أو قائمة المفضلة، تطلع لك صورة ظرف صغيرة يم اسم السهم وتعرف إن فيه إعلان توه نزل، ولو كان الظرف عليه نقطة لونها أحمر يعني الإعلان انت ما قريته، أما لو كان الظرف عليه نقطة لونها أخضر يعني انت شفت الإعلان
تقدر تفتح الرسم البياني وترسم وتحلل
تقدر تشوف كل الأسهم في السوق، وترتبهم حسب الترتيب اللي انت تبيه، عن نفسي أحب أرتبهم حسب نسبة التغيير المئوية، بهالحالة أعرف شنو أكثر سهم صعد اليوم أو نزل، أو أرتبهم حسب مجموع قيمة الصفقات، فأعرف شنو أكثر سهم صار عليه تداول اليوم
تقدر تبرمجه على شروط معينة وتخليه ينبهك إذا فيه سهم حقق هالشروط، بدال لا تتابع السوق على طول، البرنامج يتابع ويعطيك تنبيه عشان تعرف تدخل أو تطلع من السهم
مثل ما قلت لك آنا ما أستخدم كل مميزات البرنامج، ولا حتى 30% من مميزاته، إذا كنت محترف بالتداول وتعرف تحلل الأسهم، أنصحك فيه
إذا تبي تشوف مميزات أكثر، ابحث في اليوتيوب وبتلقى فيديوات تشرح استخدامه، راح تتعرف على مميزاته من خلال الفيديوات، أو ادخل على الرابط واختار "إظهار جميع المميزات":
https://www.tickerchart.com/ar/live/buy
البرنامج من وجهة نظري يسوى سعره إذا كنت محترف وبتستغل كل مميزاته، ومتعوب عليه، طبيعي يكون سعره عالي لأن يحتاج مبرمجين محترفين ويحتاج سيرفرات قوية تتحمل الضغط والتخزين، تخيل تحتاج تخزن كل الأسعار والإعلانات والصفقات ...الخ
البرنامج له بديل وهو Trading View، هذا برنامج أجنبي بس فيه نفس المميزات تقريبًا، يمكن فيه أشياء موجودة في واحد منهم ومو موجودة بالثاني، بشكل عام Trading View هو أغلى، لكن وقت موسم الخصومات آخر السنة، يسوون عليه خصم 70% فيطلع عليك أقل من نص سعر اشتراك تيكر تشارت، بالوقت العادي تيكر تشارت يكون أرخص، لكن بما إن الخصم 70%، يصير السعر نازل حيل
الله يعطيك الصحة والعافية
معاك اخوك 
