لحق ما تلحق قال:
طلبتك واو نون
لاحظت انك مهتم في معلومات سوق الاجل
انا مبتدا وما تداولت في سوق الاجل
اشلون التداول وعرض الاسهم والكميات اليوميه اعرفها؟؟؟ وهاليوميين في اجل اتحاد ومصالح ؟؟؟
وانا عطيتك
هلا اخوى لحق ما تلحق
بالنسبه حق الاجل هناك نوعين من صناع السوق على الاجل فى اجل اثناء التداول وما يعطونك الى من المعروض فقط يعنى مالك حق تطلب وشغلك كله من المعروض ويعطونك فقط آجل لمد ثلاث اشهر وفى منهم يجدد لك فى حاله الخساره لا قدر الله وفى منهم مثل مجموعه اوراق ما تجدد لك وتقولك فيه شك ، وفى آجل فى اخر السوق بعد التداول يعنى على الاقفال مال السهم شنو السهم قفل تاخذ والكميات على حسب صانع السوق محدوده وممكن تخلص اذا ما لحقت والفتره ممتده وعندك من ثلاث اشهر الى 12 شهر (3،6،9،12) وطبعا فيه فوائد على الاجل وتزيد الفوائد مع زياده المده والفائده تقدر بحوالى (0,021) لكل 3 اشهر واذا مثلا 6 اشهر تضرب القيمه بال (0,042) واذا تسعه اشهر تضرب القميه بال (0.063) وهكذا هذا مثال بسيط
والوحده مالت الاجل على حسب الكميه يعنى ( 5،10،15،20،25) هذه ثابته ، يعنى لو حبيت تاخذ ادنى كميه تضرب وحده كميه الاسهم ب (5) ولو حبيت تاخذ الحد الاقصى تضرب وحده كميه الاسهم ب (25) وطبعا انت فهمت قصدى بالباجى بالنسبه حق 10 و 15 و 20
لو حبيبت تاخذ اجل مثلا حق سهم سعره 520
تقدر لو حبيبت تاخذ كاش وحدتها راح تكون (5000 سهم) صح؟
يعنى سعر الكاش = 5000 * 0.520 = 2600 دينار وهذا بالنسبه للكاش
انزين نفس السهم حبيت تاخذه آجل راح تضرب الوحده مالته بال اللى تبيه من الاجل واحد منهم ( 5،10،15،20،25)
وخلنا نقول انك تبى الحد الادنى بالاجل يعنى
5000 * 5 = 25000 سهم
يعنى يعطونك 25000 سهم كحد ادنى
تضربهم بالسعر اللى موجود سواء معروض اثناء السوق او اقفال اخر السوق وخلنا نقول مثلا انه السعر نفس المثال السابق 520 فلس
25000 * 0.520 = 13000 دينار سعرهم
اهم ياخذون منك بالاجل بس 30% والباقى ال 70 % لما تبيع الاسهم اهم ياخذونهم عن طريق تسويه مع المكتب البروكر مالك يعنى
13000 * 0.3 = 3900 دينار هذه المقدمه المطلوبه منك
انزين وسعر الفايده اشلون ؟ تعال نحسبها بس انا عندى سعر الفايده قبل لا يرفعونها اخر مره ومادرى جم صارت بصراحه بس خلنى احسبها على اخر مره
0.52 * 0.021 = 0.01092 فايده للسهم الواحد لمده ثلاث اشهر
انزين ابى المجموع على الكميه كلها اشلون؟
0.01092 * 25000 = 273 سعر الفايده على المبلغ الاجمالى لمده ثلاث اشهر
ضيفها على المقدمه يطلع
273 + 3900 = 4173 دينار مطلوبه منك فى مقابل انك تاخذ 25000 سهم لمده ثلاثه اشهر ولما تبيعها بالسوق عادى فى اى وقت او حتى تجزئها بالسوق ما فى مشاكل يستردون الباقى مالهم اللى اهو
13000 - 3900 = 9100 دينار المتبقى
اتمنى يكون واضح ولو حبيبت اعاده او تفهم شىء ثانى انا حاضر وموفق اخوى.
موفق.
