الشركة الاهلية القابضة ( أهلية )

[الراقي]

سبحان الله بعد كل هذي السنين تجد من يدافع عن مجلس الادارة
فضحتونا بكل مكان صرنا مضرب مثل بسرقة والاحتيال ونصب واكل اموال الناس بالباطل
افضل ماحدث اليوم ان الجميع وفي كل الدول عرف مستوى شركاتنا الفاشلة

 

[333gust !!!]

والله يا جماعة الخير انا متعجب من هالناس اشلون تفكر ! واشلون تبرر ! واشلون تزيف الحقائق !

>> يقولك احمدوا ربكم ان مجلس الاداره الحالي قاعد يفاوض البنوك على المديونيه وفي بوادر امل كبيره انهم يساومون البنك على نص الخساره وانقاذ ما يمكن انقاذه ............... !!!
بالله ما تقولي منو الي متسبب بهالمديونيه من اول ؟ مو اهوى نفس مجلس الاداره الحالي ؟
منو الي ورط الشركة بهالمديونيات وركبها ديون لا لها اول ولا ااخر ........... !
ابي اعرف لييش ما تقولون الصج ولييش تبررون حق الفاشل فشله ؟
يعني المديونيه يت ابروحها محد وقع ولا احد درس جدو المشاريع ؟ عيل لييش قاعدين في مجلس ما دام ما يعرفون يديرونها ؟
>>> حدث العاقل بما يعقول ............ التبريرات هذي كلها مرفوضه ما تدش عقل اصلا !
هذا نفس سالفة الحرامي الي باق البووك بالي فييه واحنا الان نترجااه علشان يرد بس البطايق والهويات .... وانقول خووش ريال باق الفلوس ورد لنا البطايق والهويات ...... يزاه الله خيير خوووش اادمي .....
بالعربي ومن الاخير ........
لفلوس راحت والشركه انلعب فيها لعب من قبل مجالس الادارات السابقه وهم معروفين من ايام لخوان الي تخالفوا ....... ايام ما كان اسمها الاهليه للاستثمار >>> واذا ناسي افكرك
ما يهم المستثمرين الان معرفة اين ذهبت الملايين ومنو وقع عليها ويتحاسب حساب شدييد وينفضح جدام الله وخلقه .....

>>> اي والله يرقعون ويبررون ويطبلون واهما من اساس ما يملكون منطق يتكلمون فيييه ..... علبالهم الناس ما عندها عقول ولا تفهم

 

[BOAHMAD]

اللهم من اراد صغار المستثمرين بسوء فرد كيده في نحره
اللهم لاتسلط على حلالنا من لايخافك ولايرحمنا

 

[التحالف]

مساهمون: خسائر «الأهلية القابضة» 94.5% من رأسمالها
القبس - 17/05/2015

تقدمت مجموعة من مساهمي الشركة الأهلية القابضة بكتاب رسمي إلى وزير التجارة والصناعة بالوكالة أنس الصالح، يعترضون فيه على البيانات المالية للشركة الأهلية القابضة المنتهية في 31 ديسمبر 2013.
وجاء في الكتاب المرسل إلى الصالح، بتاريخ 3 مايو الماضي، والتي حصلت القبس على نسخة منه، أن خسائر الشركة المتراكمة تصل إلى %94.5 من رأسمالها، لا %73 فقط، وذلك على النحو التالي:
1ــ تغاضى عن إثبات أعباء التمويل المترتبة على اقتراض للسنة المنتهية في 31 ديسمبر 2013، والمقدرة بمبلغ 5.41 ملايين دينار بنسبة %6.5 من رأس المال، وعدم إضافتها إلى إجمالي خسائر الشركة المتراكمة، وهو الأمر الذي تحفظ عليه مراقب حسابات الشركة في تقريره لهذا العام.
2 ــ تغاضى عن إثبات الرسوم التي تفرضها الدولة على الأراضي السكنية المملوكة للشركة، والتي لم تقم ببيعها حتى نهاية فبراير 2011، حيث بلغت تلك الرسوم في نهاية عام 2012 مبلغ وقدره 8.8 ملايين دينار. وبإضافة رسوم عام 2013 يتضح أن إجمالي هذه الرسوم حتى نهاية 2013، والمفترض إثباتها بالميزانية، يبلغ 11.8 مليون دينار بنسبة %14.3 من رأس المال، لم يتم إضافتها أيضاً إلى خسائر الشركة المتراكمة.

وجاء في الكتاب أيضا أنه لما كان ما تقدم، وبإضافة هذه النسب التي تغاضى البعض عن إثباتها بالبيانات المالية للشركة عن عام 2013، يتضح وبجلاء أن الخسائر المتراكمة للشركة الموضحة بتلك الميزانية غير صحيحة، وان الخسائر المتراكمة الحقيقية التي تكبدتها الشركة كالتالي %73.70 + %6.5 %14.3+= %94.5، الأمر الذي يؤكد أن الشركة قد خسرت ما يزيد على ثلاثة أرباع رأسمالها، وكان يستوجب على وزارة التجارة عدم اعتماد تلك الميزانية، لا سيما ان مراقب حسابات الشركة تحفظ على هذه المخالفات بتقريره كما أسلفنا.
كما أرسلت مجموعة المساهمين كتاباً آخر إلى وزير التجارة والصناعة بالوكالة بتاريخ 13مايو الماضي، كان موضوعه تعسف وتقاعس إدارة الشركات المساهمة، بالتعاون مع الشركة الكويتية للمقاصة، بشأن حجب بطاقات حضور الجمعية العمومية العادية وغير العادية للشركة، المزمع انعقادها في 20 مايو المقبل، عن المساهمين وتسليمها مجلس الإدارة.

 

[VONTI]

روح وطق باب الشركة واسال رئيس مجلس الاداره عن الميزانية حقك واذا عندك دليل واجهم بالقضاء وباسلوب حضاري
بس نصيحة يااخوان الي يبي يلجا اذا حس انه مهضوم يلجا لجهة او كتله حكوميه رسميه معترف فيها مو عن طريق كتلة مسوين ديوانيه وقعده ويالله احنا بنرجع حقكم عفوا فهموا هالشي طالبوا بجهة حكومية رسمية ماتنظر لمصالح شخصية واستنفاعية وبعدها الكل راح يايدكم بس بالطريقه هذي ومع كتلة همجية غوغائية لا وحرام استغلال اخوانا المساهمين

 

[fwaz70]

حسافه عليچ يا كويت وحسافه علينا ككويتين
كل زمان كان فيه المصلح والمفسد لكن ان نصل كشعب الي هذي الحاله الي ندافع وبإستماته عن الفاسدين اعتقد هذي بوادر شر اتمنى انها ما تستفحل
يعني لما كبار الملاك اللي يملكون حصه مسيطره وليس كامل الشركه يدمرون الشركه لمصالحهم الخاصه ولمصلحة شركاتهم المملوكه لهم بالكامل وبعدين يجي يتفضل علينا بعد مضي ٨ سنوات من الازمه العالميه ويقول القيمه الدفتريه خمسين فلس يعني نص القيمه الاسميه وبعيده وايد عن القيمه السوقيه قبل الازمه اللي متدبسين فيها اغلب صغار المساهمين اللي وثقوا للاسف بالاداره ووثقوا بالاجهزه الرقابيه الحكوميه
ثم بعد ذلك تجد من يدافع عنهم دفاع مستميت بلا هواده ولا خط رجعه
هني نقول حسافه عليچ يا كويت ويا كويتين تغيرتوا عن اول
وسامحونا

 

[VONTI]

اذا جهة حكومية ورسمية معترف فيها اتطالب بحقوق المساهمين احنا معاكم اما مع الكتله هذي كتلة حماية صغار المساهمين وعديمي الخبره اكيد لا ومانسمح بهالشي مساهمين وشياب كبار وبعضهم صغار وذوخبرة اقتصادية قليله يشرقون ويغربون بتفكيرهم حرام لاتستغلون الناس ومحد يسمح بهالشي

 

[333gust !!!]

لا حوله ولاقوة الا بالله العلي العظيم ............. وحسبي الله ونعم الوكيل في كل شخص يبرر للمجلس الحالي

>>> يقولك اذا في جهة ثانيه انصير وياكم اما تجمع صغار المساهمين في ديوانيه ما نبي !
اشتبون تبون تجمع في الشيراتون وريوق وبوفييه على احساب منو ؟
>>>> هذا المثل الي يقول احصلت لها ريل وقالت عوور !
احنا لاقين احد يدافع عن حقوقنا واسهمنا بالشركه غير هالناس الي تجمعوا بالدواوين ......... الحين صارت الدواوين موزيينه !
الدواوين ربت رياييل واجيال عندها شرف وكلمه ..... وان كانوا غير متعلمين
>>> اشووف المتعلم الي يابه ابوه من بره وولاه على الشركه اشسوه فيها ؟
وبعدين خايفين على شنو احنا ؟ اهوى في شي بعد ينخاف علييه ؟
95% خساره خايفين على الــ 5% ولييش نضن ضن السووء ...... وحتى اذا اطلعوا نفس مجلس الاداده وكلو علينا الـ5% علييهم بالعافيه
على الاقل برضانا وبموافقتنا .............. مو غصب طيب
>>> يا خي بسكم ترقع ببببببببببببببببببببببببببببس مالكم ويه جدام الله وخلقه

 

[بوحسين11]

اقول لعبوا بعيد عن الاهليه وخلوا صغار المساهمين بحالهم
اشوف احنا تهاجمونا لان نتكلم بالحق وانتوا الي ادورون خراب الشركه نسكت عنكم
صغار المساهمين وله شركة الاستثمارات الصناعيه تبي تستحوذ على الشركه بلاش بدون ما تدفع دينار
ترى المساله واضحه لا نكشف الاسامي وبالادله والتصوير معروفين وبالوكالات الي عندهم من صغار المساهمين وليس لديهم مساهمه شخصيه ولا اعتباريه لشركتهم

 

[بوحسين11]

وكل واحد فيكم يحترم نفسه ويتكلم بالدليل اذا عنده بتقعد تتحسب على الناس بالظلم بترد عليك ان شاء الله

 

[VONTI]

اسمحلي ياكلون عليك 5% بالمية وعندك انته عادي بس عند اخوانا المساهمين الاخرين وعني مااسمح بربع بالمية وحتى من المجلس الحالي واظن مجلس الادارة الحالي صرح وقال للجميع انه الشركة ربحانه اكثر من مره والي قاعد يبث هالاشاعات انها خسرانه 95% اقوله حرام عليك تستغل هالمساكين مو كل الناس تعرف تقرا الميزانية وتستوعب انها شركة ربحانه واذا تبي احد يدافع عنك اذا حسيت انك مظلوم الجا للحكومه وطالب مع مجموعة مساهمين بكتلة حكومية رسمية تقوم بحماية صغار المساهمين لانه الجهة الحكومية تقدر تحاسبهم اما هالكتلة لا راح اتدخل اخوانا المساهمين بدوامه مايطلعون منها وبعدها تشوفهم برا الكويت منحاشين ومحد يقدر يحاسبهم بس لو جهة حكومية راح تعوضك ارجوا انك تفهم هالشي

 

[بوحسين11]

راح نكشف هذي الكتله والهدف استحواذ على شركات على ظهور مساكين لكن الاهليه غير
والمصيبه شركتهم فاشله ومشطوبه

 

[adel1111]

انا بقول اللي بقلبي
حسبي الله ونعمه الوكيل
حسبي الله ونعمه الوكيل
حسبي الله ونعمه الوكيل
راحت فلوسي اللي حاط فيها آمال حقي وحق عيالي
ويطلعون لك ناس تطبل على الشركه
وانا حاط فلوسي من ٢٠٠٩ وكل يوم اقول باجر تصعد عقب باجر تصعد لمن اوقفت عن التداول
واقول ان شاءالله خير السوق موزين وايعدلون اوضاعها الشركه وترجع نفس قبل واحسن وما شفت شي لي يومك
وايون لك ناس اتطبل وترفع واترقع حق الشركه
بإختصار انباقت فلوسنا
بالعربي راحت البيزات
حسبي الله ونعمه الوكيل باللي كان السبب
ومشكورين وماقصرتوا

 

[VONTI]

بسكم استغلال للمساهمين المساكين وقسما بالله بتخسرون دنياكم واخرتكم وكل واحد يروج لافكارهم ولو موعارفين انها ربحانه ماتذابحوا اليوم ويصيح صاحبكم تزوير تزوير ويخرب الاجتماع وجيبه مشقوق

 

[بوحسين11]

اي وايد قاموا يدشون بموضوع الاهليه دليل واضح على من يحرك هذه المشاركات ودليل على ان حجتهم باطله ولا عندهم كلام
اقولها واعيدها يالي قاعد تقرا الاستثمارات الصناعيه لن تؤخذ كرسي واحد من مجلس الاهليه واعلى ما بخليك اركبه
وصغار المساهمين اذكى من اشكالك

 

[بوحسين11]

وحسبي الله ونعم الوكيل فيمن يريد سوء لهذه الشركه
وافوض امري الى الله
ودمتم سالمين

 

[adel1111]

اذا قصدك عني طال عمرك انا محد ايحركني ولا اعرف ولا احد من الكتله وانا من الحره قلت اللي بقلبي واذا كلامي في شي غلط قول
لاني انا داش بالسهم بإرادتي محد محركني
يعطيكم العافيه

 

[بوحسين11]

انت لا عندك حره ولا شي ولا عندك اسهم اصلا
لو عندك اسهم صج ما تقولون هالكلام

 

[بوحسين11]

وحسبي الله ونعم الوكيل فيمن يريد سوء لهذه الشركه
وافوض امري الى الله
ودمتم سالمين

 

[VONTI]

عيل نصيحة لاتسمع او تسمح لاي بني ادم يستغلك ويلعب على جراح المساهمين من هالكتل واطمنك الشركة بخير وبتلقى الخير انشاءالله