═︻▄█▒ ............... أبوفطيرة ...... الجزء 3 .............. ▒█▄︻═

[عقاري1]

هلا بالشباب والسلام للكل موصول

الأخبار الحلوه جايه بطريج بس أنتو زهبو حالكم عليكم بالمخطط تره باقي لطبخه حبه وتستوي .

الصفحه منوره بأخواني وجيراني وصاحبنا الغالي عقاري 1 إلي مواضيعه أن دلت تدل على حبه للخير لناس مو أكثر .

نطرا شوي وراح تسمون أخبار حلوه قولو آمين

السلام للجميع -- تسلم ياخوي المنضور الشامل -بومزيد --وبالتوفيق انشاله هانت راح الكثير ومابقا الا القليل --وشاكرلك علا كلامك الطيب -

 

[المنظور الشامل]

مساكم الله بالخير شباب جنكم مريحين اليوم

 

[ابوهاجر الشمري]

المياه الجوفيه مرتفعه بابوفطيره لاتسوون سراديب الا بعد التاكد من منسوبها

 

[المنظور الشامل]

المياه الجوفيه مرتفعه بابوفطيره لاتسوون سراديب الا بعد التاكد من منسوبها

هلا بهساع ابو هاجر ونصيحتك على الراس نشيلها ومنستغنى عنكم يأهلنا وعزوتنا .

نعم كلامك بمحله الماء الجوفي نسبته مرتفعه بمناطق شرق القرين كافه
لكن أبشرك أبوهاجر كلا من بلش بناء ما شكا الحمدلله خاصه مع التطور الحديث بالبناء واكتساب الخبره من شرواك والحاضرين .

منطقة الاحمد فيها كهوف مائيه واللحين عمرانه تبارك الرحمن عندك منطقة غرناطه إلي يبي يبني يقعد يسحب الماء 5 شهور ولكن الحمدلله على كل شئ

 

[المنظور الشامل]

بو خليفه وينك مكبر المخده مو من عوايدك ... الظاهر داق عشوى ثقيله وم........... ريح

 

[منور]

اخواني مع القرار الجديد تتوقعون نزول الاراضي بابو فطيره؟؟
انا حصلت ارض 110 قلت بنطر شهر 3 جم تتوقعون توصل الاسعار؟

 

[المنظور الشامل]

هلا بالأخ منور

محد فينا يعلم الغيب لكن السوق واضح الاسعار مرتفعه حتى سعر 110 الف مرتفع ولو وصل إلى 90 الف هم بالنسبه للمواطن مرتفع

يقولون فيه مزاد لتصريف الاراضي ولكن محد يدري هل هذا بدوره راح ينزل الاراضي أو العكس صحيح مجرد قس نبض لمصلحة التجار

الايام الجايه صعب الواحد يجزم بالنزول او الصعود ولكن اذا عندك سيوله وما تأثر فيك نزول بسيط توكل على الله لأن سعر 110 الف الموجود هو سعر السوق والخوف لو نطرت تروح عليك الفرصه والله اعلم

 

[عذبي 71]

هلا بوراشد الحبيب
وهلا بكل الاخوة الكرام ..

واسمحلي عالغياب فالاوضاع السياسية اشغلتني عنكم..

فمثلما انت شايف هالايام الكويت تعيش مظاهرات..
وتجمعات من نوع مختلف ..

حناجر المتظاهريين تصيح وتصرخ هاتفة باسم حاكمها..
وتدعو له بطول العمر والتوفيق والسداد ..
وتقسم له بالوفاء والطاعه..

وقلوب الناس المتجمعه في الساحات وشوارع البلد..
تدق على انغام الولاء للكويت ..

والارض الطاهره تضرجت بألوان الورود الحمراء وأشرطة الزينة المتلئلئة..

والمواجهات الساخنة بين عناصر الامن والمواطنين ..
أسقطت الكثير من الضحايا .. والذين يقدر عددهم بالألوف..
وهم ضحايا الحب والمودة والاحترام المتبادل بين قوات الامن الذين
حافظوا على النظام بالاحتفالات..
وبين جموع المتجمهرين في ذكرى عيد الوطن وتجديد البيعه لوالدهم..

هذا ملخص الوضع السياسي وما يجري بشوارع الكويت التي تحتاج لمن يبخرها عن العين..
ويسمي على بيوتها من الحسد..
ويتعوذ على ترابها من شر الحاسديين..

والله يديم على هالبلد السعادة والفرح..

 

[عذبي 71]

حيا الله الاخ منور ..
والمكان بك تنور ..

أنا رأيي من رأي خبيرنا وأخونا الكبير المنظور الشامل بوراشد ..
وأحب أن أضيف نقطة صغيره ..

أخي الكريم منور ..
مهما أثرت قوة قانون الضريبه وأتجهت الاسعار للانخفاض ..
(مع تأيدنا الكامل للقانون وتفاؤلنا فيه والذي منح للمواطن أخيرا فرصة أن يتنفس الصعداء)..

إلا أن حجم الطلب مقابل العرض تعتبر ((قوة)).. تفوق قوة القانون..

فلو أن هذا القانون دعم بعرض 20 ألف قسيمة للبيع بمواقع قريبة ومهيئه بكافة الخدمات..

لأصبحت اسعار البيوت لا تزيد عن 70 ألف..
والقسائم 40 و30 ألف ..

ولكن بهذا الوضع الراهن وشح القسائم المعروضه..
فمن المتوقع أن لا يؤثر القانون سلبا عالاسعار كما يتفائل البعض..

فأنت اليوم أمام 80 الف طلب اسكاني وأكثر ..

وفي المقابل القسائم القابله للعرض للبيع حوالي 20 الف قسيمة متفرقة بين جنوب السره وشرق القرين واشبيليه..

وهذه القسائم التي اقدر عددها ب 20 الف ليست جميعها مسجله بأسماء شخص واحد ..

فقانون الضريبه لن يشمل كل هذه القسائم ..
ولن تتطرح بالسوق جملة واحدة فتتأثر الاسعار..

أضف الى ذلك أن القسائم المشار إليها والمستحقة للضريبه ..
قد عمل ملاكها منذ أعلان القانون قبل عامين على ترتيب أوضاعهم وتحويل ملكيات هذه القسائم الى اسماء متعدده للهروب من الضريبه..

بالنهاية القانون جيد ولكن ينقصه الدعم ..
والفرصه قائمه لانخفاض الاسعار ولكن شح المعروض يدعم السعر ويشكل مقاومة ضد الانهيار..
والسوق العقاري لا يخلو من صناع .. نسميهم باللهجه المحليه هوامييير..

واترك القرار لك..
مع تمنياتي لك وللجميع بالتوفيق...

 

[منور]

انا بنت منيره مو ريال,,
ماقصرتوا

 

[عذبي 71]

تشرفنا بمرورك يا اختنا الغاليه والصفحه تنورت بنورج.... ياخزنة التاير

طبعا نصيحتي اليوم قد لاتفيدك يا مناير
ولكنها تفيد بالمقام الاول كل شخص يحلم بامتلاك عقار للسكن..

انصحكم بتجهيز نفسكم ماليا ونفسيا لاي تغير قد يطرئ بسوق العقار..
ماليا برصد الميزانيه المحدده لشراء العقار حتى اذا حصل انخفاض تكون جاهز وما تحتار من وين تدبر افلوسك..
ونفسيا انك من اليوم تضع امامك هدف بحيث يكون القرار سهل جدا ..
لانه في ناس وقت الشراء ما يبقى احد ما يشاوره .. ربعه واهله والدلالين واللي يصب جاي بالقهوه والسايق.. ويضيع بين اراء مختلفه بعضه غثه وبعضها سمينه..
وتفوت عليه الفرصه فوات السحاب على الاراضي الضاميه ..
وهالشي لاحظنا في ازمة 2008 وخير دليل اخونا القصاص الغالي فوت الفرصه بالسعر الرخيص وشرا بالغالي..
طبعا انا بهالكلام لا اقصد ان اعترض على القدر ومشيئة الرزاق عز وجل..
ولكن انا وكل من بهالصفحة نتفق على ان الفرصه لا تتكرر كل يوم والانسان اذا حدد هدفه من البدايه سيكون في ساعة الصفر جاهز لاتخاذ القرار المصيري بكل جرئه ولا يحتاج لنصيحة زيد وعبيد ونطاط الحيط.. وكل هالشله اللي مالها خبره بالسوق ولا توفيق في قرائة المستقبل ..

بالنهايه ..
تعجب الناس من ابوفراس الهمداني عندما بذل كل ما يملكه..
واستدان ديونا ((ما تشيلها البعارين)) ليقدم مهرا لفتاة خطفة قلبه ..
وبذلك اصبح فقيرا معدما (( منتف)) لايملك درهما يكفيه لقوت يومه ..
فاشفق عليه اخوته ورفاقه.. ولاموه على هذا المهر الباهض الذي قدمه دون تردد لوالد الفتاة ..
في حين ان بنات القبيله (( اشزينهم )) ولايصل مهرهن -لعشر - المهر الذي قدمه ((هالمطفوق)) ..
فرد عليهم ابوفراس متفاخرا ..
تهون علينا بالمعالي نفوسنا... ومن يخطب الحسناء لا يغلها المهر..

 

[القصاص 2]

السلام عليكم ورحمة الله وبركاتة
جزاك الله خير يا عذبي والله يسامح اللى تسبب علي وخسرني فلوس زيادة وهو يدعي المعرفة وشكرا

 

[المنظور الشامل]

مساكم الله بالخير

عذبي خوش رد

 

[القصاص 2]

السلام عليكم ورحمة الله وبركاتة
كيف حالكم يا اخواني

الشعب يريد فيديو جديد وشكرا

 

[Never_one]

اتوقع مو وايد اللي يقدرون يشترون حتى لو نزل سعر الاراضي وايد في ناس مديونه

بس مثل ما قالوا انا في ناظارك يالعقيله وابو فطيره

 

[عذبي 71]

عمتم مساء يا الايواااد..
ومساكم معطر بالعود والزهر والورود..
وابعث سلامي لقوي الباس القصاص..
وكل التحيه للمنظور الشامل..
وعموم من يمر على مشاركتي ويقراها..

وارحب واهلي بالاخ الكريم نيفر ون ..
والساعه المباركة اللي شرفتنا بمرورك وبمشاركتك ..
وانا معاك واحترم وجهة نظرك .. بأن الديون مجتفه اخوانا وربعنا..
ومشترات العقار يبيله سلاح.. وفلوس كثيره..

ولكن ياخوك المثل: يقول غصبن على البل (الإبل) تركب جاريات السفن ..
فالسكن ضروره.. وهم ..وطموح ..واسقرار.. وامان ..

والفرص المتاحه ..
اما اجار يجوي.. ولا بيت حكومه باخر الدنيا ..
وما يستلمه الواحد الا ووصل لعمر عياله يتجون له..
والحمد لله على كل حال.. غيرنا ما يحصل له هالنعمه..

لكن يا خوك اللي امره بيده ولا على ظهره ديون وراتبه زين ..
يحط ايده بيد شريكة حياته ويتعاونون وياخذ له بويت ولا قسيمه بحدى هالمناطق القريبه مثل .. منطقتنه هالزقرتيه ابوفطيره..
هاللي اذا امريت يمها وشفت شوارعها تلق جديده
وشباتها عليا قراطيسها والارصفه توها طالعه من الكراتين..
وهالهوا النظيف اللي يهب عليك من البحر ..
ما ودك تحط اسمك على باب فيلا من فيلل هالمنطقه..؟؟

وبالحقيقه اعرف من جماعتي كثير متجهزين وصاملينها ..
وبيزاتهم زاهبه من تنزل اسعار ابوفطيره عن المئه الف ..
ما راح يطوفون الفرصه حتى لو تقولهم نطرو واكيد بتصير بعشرة الاف ..
لانهم شباب ونيتهم السكن ويبحثون عن شي مضمون..

ولو تراجع المشاركات بتلاحظ انه في شباب نيتهم المضاربه والترزق عسى الله يوفقهم .. هذوله جاهزين وما عندهم مانع يشترون بحساب يربح الف والفين ..
واذا ما لقى منفعه خلاها للزمن .. جان له مزاج بناء بناها وباعها فيلا ..
ولا اجرها.. وان احتاج سكن.. سكنها .. فكلها ربح في ربح ..

ويا خوي الشباب الصغار عيال هالجيل اللي توهم مشتغلين ومتزوجين .. هذوله غير الجيل اللي فات..
اغلبهم شافوا اخطاء غيرهم واسمعوا النصايح واستفادوا..
تشوف الواحد منهم موجه تفكيره للمشاريع والتجاره والاعمال الحره ..
ويفكر بالمستقبل .. وبالحياة المستقره والسكن ..

ومو مهتم للبربسه والسيارات ومضيعة الفلوس على الفاضي ..
الشباب تغيروا ماهم شباب الاول اللي ما انتبهوا لمستقبلهم وما وعوا الا عيالهم طولهم..
ومطلوب 40 سنه جدام ..
ومعاشه كله اقساط وساكن بالاجار..

اتمنى من كل الشباب انهم يسلكون طريق التغيير في حياتهم منذ البدايه ويمشون على طريج الاتزان والتوفير للمستقبل ..
ويستفيدون من اخطاء الجيل اللي سبقهم ..
والله يحفظ الكويت.

 

[yasalam]

مساكم الله بالخير عذبي وودي اربح والمنظور الشامل والقصاص وبقية الجيران .

ماعندي شي اقوله بس ولهت عليكم وقلت اسلم ..
البورصة نازلة .. وناوي ادش بالوقت الحاسم القريب جدا جدا ..
يمكن الله يرزقنا قيمة الحمام السباحة الي ناويه بالقسيمة..
هيهي الله يستر بس

 

[المنظور الشامل]

yasalam هلا بالغالي الجار العزيز شلونك وخبارك هم أحنا ولهنا عليك شد حيلك راح الكثير ما بقى الا القليل .

وأن شاء الله تحط احلى حمام سباحه ويحفظك من العين ربي .

ولا تقاطع دش الصفحه حتى لو تسلم وتمشي عشان نعيش على حسك ونعرف أنا ربعنا حولنا

 

[MUSAED77]

سؤال للجميع والرجاء الجميع يشارك فيه ؟

1- منو فيكم سوه الخريطه .
2- منو فيكم جاهز يحفر من باجر ؟

وشكر

 

[المنظور الشامل]

هلا مساعد ولا شئ من إلي قلته سويته