بستقيل وابيكم تفيدوني

[السهم المجروح]

اخوي اذا عندك شهاده استقيل
بس اذا شهادتك مو ذاك الزود الراتب يفرق معاك

 

[Business Man1]

اقول الزم ارضك ابركلك ومعاشك كلن يتمناه حرام عليك تطلع منها
وبعدين ترا شغلك شنو حده بسيط
لا هو يبيلة تفكير ولا شي بس شيل سلاحك و وانتظر الاوامر يعني شغل بدني اكثر منه ذهني

 

[GMC1]

قبل لا تقدم على الاستقالة اسئل نفسك هل اسئلة ؟
1- هل انتة تبي اتقدم الاستقالة لانك عندك مشاكل في الدوام؟
اذا كانت الاجابة بنعم ترى في جميع الوزارات فيها مشاكل في الدوام ولاهي مقصورة في مكان معين وابسط شي انك اتسويه انك تنقل لمكان ثاني
2- هل انتة تبي اتقدم الاستقالة لانك مليت من الدوام ؟
اذا كانت الاجابة بنعم ترى في كثير من الوزارات الدولة راح احوشك الملل والحل نفس الجواب اللي فوق تنقل لمكان ثاني
3- هل انته اهمك جم راح اكون راتبك لما تستقيل من العسكرية وتداوم مدني بمعنى هل راح تفرق وياك ولا ماتفرق ؟
طبعا كلنا نعرف بان راتب العسكري افضل من المدني وتقدر تسـأل ربعك أو معارفك اللي يداومون مدني جم رواتبهم وعلى اساسه اتسوي مقارنة
4- هل تملك دخل ثاني غير دخل الوظيفة ؟ هل لديك التزامات مالية لدى جهات أخرى مثل بنوك شركات ... الخ ؟
يعني هل عندك تجارة أو وظيفة ثانية غير وظيفتك في حالة اذا قدمت استقالتك ممكن راح تنطر ثلاث أشهر أو اكثر هل راح تقدر تتأقلم مع الوضع الى ان تستلم الوظيفة الجديده وهل راح تقدر اتغطي التزاماتك وانتة في هذه الفترة
5- هل تملك شهادة بكالوريوس؟ وعندق طموح؟
اذا كنت تملك شهادة ولديك طموح اهني بس اقدر اقولك توكل على الله
واذا كانت الاجابة بالنفي اسمحلي بان اقولك انك ماعندك سالفة وخاصة ان عندك اسرة
وفي النهاية اذا جاوبت على هل أسئلة وانته بينك وبين نفسك مقتنع من اجاباتك فهذا شئ راجعلك وانت المعني فيه وصل صلاة استخارة والله يوفقك

 

[هامور 2000]

انطر لا تستقيل غير مكانك
إذا مو زين
انطر الزياده منت خسران
موفق خير

 

[soud_ss]

الله يسهل امورك يالحبيب

 

[Bo-SaNaD]

السلام عليكم


اخوي خير ما فعلت انك تستقيل انا قبلك كنت عسكري وخدمتي كانت كبيره واستقلت من العسكريه بالعربي من الجيش وكنت مديون 30 الف دينار وابشرك لا مت من الجوع ولله الحمد وابشرك اني من طلعت من العسكريه ان اموري صارت احسن من الاول وسكرت الديون اللي علي كلها واخوك حاليا مدني صحيح معاشي مو نفس الجيش بس ابشرك بنعمه وخير وبراحه نفسيه .

بس اللي ابي اقوله لك استقيل وانت مغمض وانحش من حياة الذل وديرتنا ديرت خير

طبعا انت لك خدمه والتامينات راح تعطيك فلوس خدمتك على شكل راتب يعني ينزل لك من التامينات تقريبا 600 دينار وانت صدقني راح تلقى لك وظيفه اما حكوميه اوقطاع خاص قبل لا تخلص افلوس خدمتك من التامينات

وصيه اخيره

اكثر من الدعاء وتوكل على الله وصدقني ان الله بيرزقك بوظيفه احسن وبترتاح ان شاء الله

اشهد انك مانصحته ولا عطيته خير ... وبعدين شنو العسكريه فيها ذل؟؟ ليش ذالينك من قبل انت وهل يوم كنت تحت شرف الخدمه حسيت نفسك انك ذليل ... ياخوي مايجوز هالكلام بارك الله فيك ....الخدمه العسكريه شرف مو الكل يقدر يحصد الشرف هذا الا اللي اهم قد المسؤوليه والرجال اللي فيها خير يكفي انك تحمل شرف اسم عسكري في الجيش الكويتي وتحمي تراب الكويت اللي ضامتك وساترتك في ارضها هذا الشرف


اخوي صاحب الموضوع اخذها نصيحه من اخو يحبلك الخير رواتب العسكريين مقبله على زياده ممتازه وبما ان خدمتك 11 سنه يعني باقيلك 9 سنوات على التقاعد واكيد راتبك جيد خلك على وظيفتك ومش امورك والعسكريه يمين يسار صدقني بتمشي وماكو شي يضل على حاله مره حلوه ومره مو حلوه وهذي الحياه وحتى المدنيه فيها مدراء غير كفؤ ويجننونك ويأذونك انا اقول اخوي استمر وجعلها خيره لك يارب موفق​

 

[بوغيث]

صل على النبي انا عسكري حالي حالك وفكر بالاستقاله نفسك بس خدمتي ٨ سنواات وعرف ناس طلعو من العسكريه. ومورهم ماشيه مثل اول واحسن بس طبعا يمكن وضعهم يختلف عن وضعنا وهذا شي اكيد لان كل واحد ضروفه انا بوضح دوام العسكري لان اشوف الاخوان يقولون لا مذله ولا تعب ١- لا تملك الحريه بشكلك الخارجي والداخلي الخارجي طبعا واضح الشعر والحيه تحكمك الهويه العسكريه والداخلي تعبير عن رايك لان هالشي مو موجود بالعسكريه طبق وبس ٢- البدله العسكريه والبسطار والكاب ناهيك عن الاستكرات الاسامي والوحده والعلم الخ لازم تكون موجوده ٣- دخول المعسكر طبعا مشي ويبعد اقل مقر عمل ١٥د مشي لان مادش بسيارتك تخيل وضعك بالصيف ٤- وصلت مقر العمل تنظيف مكانك فبل الاسطفاف (الطابور) وفي الطابور توقف لمدة ربع ساعه لتحضير والتفقد وبعدها تنصرف اللي مقر عملك واكبر رتبه هو اللي تامر ويقود حتى لو مايفتهم شي وبالطلعه نفس الشي يحدث وناهيك على الشرطه العسكريه وظلم الضباط ونعدام القانون المدني يعني لو تهاوش داخل معسكر انت مسجون مسجون غلطان ولا مو غلطان وبتكلم عن نفسي بنفس مقر العمل انا عمري ٢٩ واللي معاي ١٨ سنه والاغلبيه بهالعمر الصغير بالذمه شنو السوالف اللي بالدور بينكم بالدوام مع اغلبيه عمرها صغير حيل وهالشي حاصل باغلبية الوحداة وفي امو واجد ماتكلمت عنها بس اهم شي التزامتك الشهريه احسبها صح ويعتمد الزوجه موظفه ولا لا وكم دخلك بعد الخروح هذي كلها قاعد احسبها وماراح اقدم الاستقاله بشهر ١٢ وبعدين الجيش وبين بيروح موجود حتى لو وضعك مامشى تقدر ترجع وبالنهايه اطلع تليوم قبل باجر اذا ماعليك التزامات واذا في احد يبي يناقش انا جاهز وشكرا *

 

[Bo-SaNaD]

صل على النبي انا عسكري حالي حالك وفكر بالاستقاله نفسك بس خدمتي ٨ سنواات وعرف ناس طلعو من العسكريه. ومورهم ماشيه مثل اول واحسن بس طبعا يمكن وضعهم يختلف عن وضعنا وهذا شي اكيد لان كل واحد ضروفه انا بوضح دوام العسكري لان اشوف الاخوان يقولون لا مذله ولا تعب ١- لا تملك الحريه بشكلك الخارجي والداخلي الخارجي طبعا واضح الشعر والحيه تحكمك الهويه العسكريه والداخلي تعبير عن رايك لان هالشي مو موجود بالعسكريه طبق وبس ٢- البدله العسكريه والبسطار والكاب ناهيك عن الاستكرات الاسامي والوحده والعلم الخ لازم تكون موجوده ٣- دخول المعسكر طبعا مشي ويبعد اقل مقر عمل ١٥د مشي لان مادش بسيارتك تخيل وضعك بالصيف ٤- وصلت مقر العمل تنظيف مكانك فبل الاسطفاف (الطابور) وفي الطابور توقف لمدة ربع ساعه لتحضير والتفقد وبعدها تنصرف اللي مقر عملك واكبر رتبه هو اللي تامر ويقود حتى لو مايفتهم شي وبالطلعه نفس الشي يحدث وناهيك على الشرطه العسكريه وظلم الضباط ونعدام القانون المدني يعني لو تهاوش داخل معسكر انت مسجون مسجون غلطان ولا مو غلطان وبتكلم عن نفسي بنفس مقر العمل انا عمري ٢٩ واللي معاي ١٨ سنه والاغلبيه بهالعمر الصغير بالذمه شنو السوالف اللي بالدور بينكم بالدوام مع اغلبيه عمرها صغير حيل وهالشي حاصل باغلبية الوحداة وفي امو واجد ماتكلمت عنها بس اهم شي التزامتك الشهريه احسبها صح ويعتمد الزوجه موظفه ولا لا وكم دخلك بعد الخروح هذي كلها قاعد احسبها وماراح اقدم الاستقاله بشهر ١٢ وبعدين الجيش وبين بيروح موجود حتى لو وضعك مامشى تقدر ترجع وبالنهايه اطلع تليوم قبل باجر اذا ماعليك التزامات واذا في احد يبي يناقش انا جاهز وشكرا *

السلام عليكم يا بوغيث ومبارك عليك باجي الشهر الفضيل

انا راح اتناقش وياك لكن بشروط اخي العزيز اذا كان ردك علي غير منطقي انا راح انسحب من المناقشه هذي وهذا شرطي بترد علي عطني شي منطقي وانا اول واحد يستقيل من هذا الشرف

اولا تقول الاوامر اللي لازم تطبقها... اخوي هذا عسكريه وكل رتبه تاخذ الامر من الرتبه اللي اعلى منها وهذا اهو نظام الخدمه العسكريه لكن تعال بالمقابل الحياه المدنيه الموظف ياخذ اوامره من المراقب او من المدير وهذا نفس الشي انت ماحليت مشكله

ثانيا الشعر واللحيه... لازم يكون شكلك مرتب ونظيف يعني مو معقوله تلبس بدله عسكريه وانت شعرك كارييه او زلفك شابكه مع شعر صدرك لا عزيزي لازم يكون شكلك مرتب حالق لحيتك ومرتب زلفك واهولا واخيرا اهي نظافه شخصيه لك ...

ثالثا تقول مشي مسافه 15 دقيقه انا اوافقك في هالنقطه بعض المعسكرات لازم تمشي عشان توصل مقر عملك لكن تخيل معاي لو كل العسكر بجميع الرتب تدخل بسياراتها داخل المعسكر سواء ضباط او افراد او ضباط صف شنو راح يكون وضع المعسكر وهل الواحد يلقى مصفط لسيارته عشان جذي اقتصر الدخول للضباط ووكلاء الضباط.... وعلى فكره هم المدنيه في قطاعات لازم تصفط برا وتمشي مسافه طويله وابسط مثال مجمع الوزارات ويقتصر الدخول لبعض الموظفين المتنفذين

رابعا تقولي الاصطفاف... ايي طبعا لازم اصطفاف عشان يبين منو الغايب ومنو المتأخر ومنو الحاظر.... نفس الشي بالمدنيه لما تطق الكرت او توقع والطامه الكبرى البصمه

خامسا تقولي البدله والاسامي...اخوي لازم يوني فورم معين للشخص العسكري ولازم تحط اسمك عليييه عشان الناس تعرف انت منو اما اذا كانت في مشاكل بينك وبين اسمك هذا شي ثاني .... بالمدنيه موظفين البترول لهم بلسوت خاص... فنيين الطوارئ الطبيه هم لهم زي خاص .... الجمارك ...موظفين المطافي المدنيين اللي يطلعون كشف على المحلات لهم زي خاص يعني مو بس بالعسكريه

سادسا تقول ماتقدر تعبر عن راييك... لا اخوي هذا الكلام مو صحيح تقدر تعبر عن رايك بالشكل المعقول بدون الخوض في السياسه او ميولك لاحد الاحزاب السياسيه لان ولائك وانتمائك يكون لحزب واحد وهو الكويت والرجل العسكري لازم يكون محايد في هالشغله

عزيزي بوغيث هل تنكر ان العسكريه اللي انت ناوي تتركها انها مافتحت بيتك وعطتك معاش يعيشك انت وعيالك وعطتك مصرف تقدر منه تفتح بيتك وتشتري سياره وتجيل بيتك

انا اقدملك نصيحه واخذها من اخو اذا الباب الان مفتوح لاعاده الخدمه باجر يمكن يتسكر وبعدها بتعض اصابعك ندم لان صدقني اقوى رواتب رواتب العسكريين

واذا انت متضايق من دوامك ترا دوام الحال من المحال باجر الامور تتسنع ويجيكم امر شقردي وتتغير الامور للاحسن

انا بنتظار ردك ومثل ماقلتلك اذا ردك ماكان مقنع لي انا راح انسحب من المناقشه وانت ربي يوفقك ويكتبلك اللي فيه خير يارب

دمت بود عزيزي​

 

[بوغيث]

بسم الله الرحمن الرحيم
شاكر لك على الرد و وجهة نظرك اللي راح احترمها حتى لو كان كلامك غير منطقي بالنسبه لي لان بالنهايه تبقى وجهة نظرك وانا احترمها ولكن من الغير منطقي اني احكم على الكلام بنفسي
المهم ماراح اتكلم على هالنقطه لانها بالتاكيد تعكس رايي صاحبها

الاوامر العسكريه
وكلامك صحيح ان كل رتبه تاخذ امرها من اللي فوقها ولكن تعرف حكم من يرفض الاوامر العسكريه بالتاكيد سجن عسكري لا يقل عن اسبوع والله اعلم بالسجن العسكري والماسي اللي نسمعها
تعال بالجانب المدني هل عدم تطبيق كلام رئيس القسم يعرضك لسجن لمدة اسبوع على الاقل بالتاكيد لا راح يكتفي بلفت نظر او شكوى تنتهي عند المدير
بالتاكيد انا لا احرض على رفض الاوامر والاهمال ولكن لا يوجد انسان يدعي الكمال لابد راح تواجه ضابط يخطا ويعرضك اما ان تطبق الخطا او رفض الاوامر

المظهر الخارجي
انت ذكرة بكلامك ان العسكري لازم يكون مرتب ونظيف وانا اتفق معاك لان الحمدلله النظافة من الايمان ولكن هل السكسوكه او القفل او من يريد ان يتبع السنه ويربي لحيته ممنوع نعم هذا يحدث بالعسكريه ولا يوجد بالمدنيه
هذا اللي اقصده بالمظهر الخارجي اقصد اطلاق الحى وتباع السنه و اذا بنظرك اللي يحط قفل وسكسوك وصخ ومبهذل فا شبابنا كلهم مبهذلين بالنهايه لا تملك الحريه حتى بنفسك

وارجو توضيح قصة الزلف المشبوك بشعر الصدر شسمها او وين شايفها لان اول مره اسمع عنها

التفقد والاصطفاف

هل البصمه والتوقيع والكرت تشبه بالاصطفاف ؟
هل سنعت عن طابور القائد خل سنعت عن النظام المنظم فا صدقني انا اذكر لك شي من لا شي
انت اللي مداوم وقاعد من الصبح توقف اكثر من ربع ساعه عشان يشوف منو الغايب وتلقا الغايب نايم وانت واقف عشان تعرف منو اللي نايم بيتهم ليش مايتم التفقد من اقدم واحد او بصمه او كرت وماتظلم اللي داوم من صباح الله خير وواقف سوا الجو برد او حر فهل هذا يحصل بالمدنيه

البدله العسكريه
ياعزيزي هل تعلم العسكري كم بدله عنده انا اقولك بدلة ميدان وبدلة ايداري ١ ايداري ٢ وكل بدله لها اكثر من طريقه في اللبس اتفق معاك ان العسكري يجب ان تكون هذي هويته ولكن انا اعطيك اسباب للاستقاله والفرق مع المدني طبعا. ما اعتقد ان الدكتور عنده بالطو حق كل عمليه وكذالك المهندس و و

حرية الراي
الظاهر ماتعرف عسكر واجد ياعزيزي ليش انا انحرم من التصويت بالانتخابات ليش مو من حقي اطلع من يمثلني وصوت ليش انا مو عايش بالهديره وشوف منو الاجدر وانتخبه لان بالنهايه انا عندي شغل ومصالح ومحناج عضو يوقف معاي في بعض الامور بس تدري متى راح تحس بشعوري لما تروح تودي اهلك يصوتون وانت تنطرهم بالسياره
خلنا من الانتخابات لقاء تلفزوني لو بشارع ممنوع عليك ليش انت عسكري انزين بكتب بالصحافه لا انت عسكري انزين. بسافر بالويك انت مع الاهل ممنوع ليش انت عسكري ؟ لازم تاخذ اذن ولا راح تعرض اللي رفض الاوامر


يا اخي بختصار شديد الجيش الامريكي استحل العالم كله وله الحريه يفعل مايريد ويوفر له مايريد وياتي صندوق الانتخابات لي عنده عشان يشوف منو الانسب حق الرئاسه تدري ليش لانه عسكري ويهمه رايه اكثر من اي شخص اخر

ياخوي انا ما انكر ان المعاش زين والماده مهمه بس الحمدلله الديره بخير ونعمه واقل وضيفه تعطيك راتب زين حتى لو دعم عماله لس لازم الواحد يحسبها صح ويستفيد من تجارب الغير ولكن لازلت اقول ان العسكري ماله حقوق وعليه واجبات والمدني له حقوق وعليه واجبات

وانا عن نفسي راح اطلع ولا اني اصير عسكري طول عمري الحياه تجارب واذا ماكنت ازيد بالدنيا فا انا زائد عليها ومو عيب ولا حرام اذا الانسان مايرضى بالغلط وصدقني مو من طبيعي احب التسيب والرباده بالعكس تخيل صار لي ٨ سنوات بالعسكريه وملفي كل سنه امتياز والحمدله ما حاشني ولا خصم ولله الحمد بس لما تكتشف انه شغلات واجد مسلوبه منك وترضي تستمر وانت ساكت هذا الغلط

وشاكر لك على الرد وهذا بس تعقيب على ردك واذا تبي زياده ماعندي مانع لان هذا شي من لا شي ومواقف الظلم سمعت وشفت عنها كثير اذا تبي اقول لك ماعندي مانع واذا في اخطا اسف لان ارد عن طريق الموبايل
العسكريه مثل الجبل ان طحت عليها تعورت وان طاحت عليك انتهية

 

[هتلر صعب حبي]

اخوي صاحب المشروع انا من رايي اتم بوضيفتك ولا عليك من كلام الناس وبس اذا تبي دخل ثاني وعندك راس مال انا اقدر افيدك وتقدر تزيد دخلك وانت بالعسكريه وبالمشروع الي اقوله لك موفق حبيب قلبي