بستقيل وابيكم تفيدوني

[ooo_75]

السلام عليكم ورحمه الله وبركاته

اخواني

اانا عسكري بالجيش الكويتي والخدمه 11 سنه ومتزوج وعندي طفل



وودي استقيل واتوظف مدني

وانا سمعت ان اللي يستقيل لازم يقعدونه سنه بدون وظيفه

فهل هذا صحيح او لا

او يحقلي النسجيل بالديوان واتوظف بسرعه


وجزاكم الله الف خير مقدما

 

[ح.الموسوي]

انا استقلت من شركه وبعدها باربع شهور توظفت بس ماادري عن العسكريين شلون

عموما الديوان له شروط طبعا الاوليه لها بالتوظيف اللي اهي

العمر فوق 25 وان تكون متزوج وووو
واعتقد ان الشروط تنطبق عليك

اخوي الصبح قوم من النوم وروح الديوان اللي بالشويخ جنب شركه زين

واسالهم ولا تعور راسك
وموفق خير يارب

 

[ooo_75]

جزاك الله خير اخوي الموسوي

 

[nasser_q8i]

بما انك عسكري كأن باقي لك 9 سنين على التقاعد..!!

المدني اظن بعد قانون التقاعد الجديد ما يتقاعد قبل سن 55 عام

 

[مستثمراستراتيجي]

موفق خير
اما عن الاستقاله من شروط الديوان انه سنه بعدين تتعين في الوظفيه الجديده
لكن في حالتك ممكن يصير استثناء كونك متزوج والعمر له دور
قدم كتاب لرئيس الديوان جايز يعطيك استثناء
والافضل انك تدور في الوزارات تشوف لك اختصاصك
ولا تنسى واسطتك معاك

وموفق مره ثانيه

 

[ooo_75]

جزاكم الله خير اخواني علي الردود

 

[مطيري2010]

السلام عليكم

نصيحة مجرب وابو اولاد لا تستقيل نهائيا استحمل وانتظر لحين التقاعد

لا تتورط مثلى وتستعجل

 

[RichMan]

السلام عليكم

الوظيفه المدنية راتبها ضعييف وانت اذا ماعندك شهادة نصيحه لوجه الله خلك عسكري وتقاعد بسرعه براتب زين .

ولا تستقيل على امل انك تسوي كتاب استثناء

بالتوفيق

 

[ooo_75]

بيض الله وجيهكم جميعا اخواني علي نصايحكم

وجزاكم الله خيرا

 

[ابو برهوم]

شوف الهيئات المستقلة تقدر تداوم فيها بعد ماتخلص اجراءات استقالتك ولاتنطر سنة ولا بطيخ مثل مؤسسة الاسكان بيت الزكاة مجلس الامة ديوان المحاسبة الهيئة العامة للزراعة وغيرها من الهيئات واذا عندك شهادة فنية تقدر تسجل بالديوان على طول واذا ماعندك تقعد سنة حتى لو عندك 20 طفل ......... معلوماتي من 2006 تاريخ تقديم استقالتي من الجيش اذا في شي تغير من بعد هالتاريخ فأعذرني والسموحة حبيت اساعدك ....... لكن اخذها نصيحة من اخوك اذا ماعندك شهادة خلك بالجيش احسن واذا مو مرتاح بقسمك شوف قسم ثاني او ادارة ثانية

بالتوفيق اخوي

 

[ooo_75]

عندي شهاده اتصالات محليه (مساعد فني) من التطبيقي

وشهاده صيانه حاسب آلي معهد خاص

ولدي خبره بالخرايط

 

[بو مريم]

السلام عليكم

اخي العزيز : الناس تبحث عن وظائف وانت تبي تستقيل ؟

انت عسكري وراتبك فوق الزين نصيحتي لك لا تستقيل وباقيلك اقل من 9 سنوات

وتتقاعد وترتاح

صحيح يمكن عندك ظروف خاصه لاكن رائيي تحمل اهم شئ الوظيفه والراتب المحترم

تقبل تحياتي

و بالتوفيق

 

[bol-bol]

اذكر الله واقعد قبل لا اتسوي اى شى استخير الحياة صارت صعبه وانت ريال صاحب اسره عسى الله يوفقك ويخليلك اهلك واعيالك اذكر الله ادي الى عليك وابذل الاسباب وتوكل على الله واستخير ^__^

 

[bol-bol]

كيفية صلاة الاستخارة ؟
1- تتوضأ وضوءك للصلاة .
2- النية .. لابد من النية لصلاة الاستخارة قبل الشروع فيها .
3- تصلي ركعتين .. والسنة أن تقرأ بالركعة الأولى بعد الفاتحة بسورة (قُلْ يَا أَيُّهَا الْكَافِرُونَ) ، وفي الركعة الثانية بعد الفاتحة بسورة (قُلْ هُوَ اللَّهُ أَحَدٌ) .
4- وفي آخر الصلاة تسلم .
5- بعد السلام من الصلاة ترفع يديك متضرعا ً إلى الله ومستحضرا ً عظمته وقدرته ومتدبرا ً بالدعاء .
6- في أول الدعاء تحمد وتثني على الله عز وجل بالدعاء .. ثم تصلي على النبي صلى الله عليه وسلم ، والأفضل الصلاة الإبراهيمية التي تقال بالتشهد . « اللّهُمَّ صَلّ عَلَى مُحَمَّدٍ وَعَلَى آلِ مُحمَّدٍ كمَا صَلَّيْتَ عَلَى إبراهيم وَعَلَى آلِ إبْرَاهيمَ وَبَارِكْ عَلَى مُحمَّدٍ وعَلَى آلِ مُحمَّدٍ كمَا بَارَكْتَ عَلَى إبْرَاهيمَ وَعَلَى آلِ إبْرَاهيمَ في العالمينَ إنَّكَ حَمِيدٌ مَجِيدٌ » أو بأي صيغة تحفظ .
7- تم تقرأ دعاء الاستخارة : ( اللَّهُمَّ إِنِّي أَسْتَخِيرُكَ بِعِلْمِكَ وَأَسْتَقْدِرُكَ بِقُدْرَتِكَ ... إلى آخر الدعاء .
8- وإذا وصلت عند قول : (اللَّهُمَّ إِنْ كُنْتَ تَعْلَمُ أَنَّ هَذَا الأَمْرَ (( هنا تسمي الشيء المراد له
مثال : اللَّهُمَّ إِنْ كُنْتَ تَعْلَمُ أَنَّ هَذَا الأَمْرَ (( سفري إلى بلد كذا أو شراء سيارة كذا أو الزواج من بنت فلان ابن فلان أو غيرها من الأمور )) ثم تكمل الدعاء وتقول : خَيْرٌ لِي فِي دِينِي وَمَعَاشِي وَعَاقِبَةِ أَمْرِي أَوْ قَالَ عَاجِلِ أَمْرِي وَآجِلِهِ فَاقْدُرْهُ لِي وَيَسِّرْهُ لِي ثُمَّ بَارِكْ لِي فِيهِ .
تقولها مرتين .. مرة بالخير ومرة بالشر كما بالشق الثاني من الدعاء : وَإِنْ كُنْتَ تَعْلَمُ أَنَّ هَذَا الأَمْرَ شَرٌّ لِي فِي دِينِي وَمَعَاشِي وَعَاقِبَةِ أَمْرِي ... إلى آخر الدعاء .
9- ثم تصلي على النبي صلى الله عليه وسلم .. كما فعلت بالمرة الأولى الصلاة الإبراهيمية التي تقال بالتشهد .
10- والآن انتهت صلاة الاستخارة .. تاركا ً أمرك إلى الله متوكلا ً عليه .. واسعى في طلبك ودعك من الأحلام أو الضيق الذي يصابك .. ولا تلتفت إلى هذه الأمور بشيء .. واسعى في أمرك إلى آخر ماتصل إليه

 

[بو عزوز 777]

لا تهور حبيبي اساسي العسكرين بيزيد والراتب راح يكون قوي ومضاعف بالاساسي ومثل ما قال لك الاخ باقي لك 9 سنوات وتقاعد قزرها في الطول او العرض الايام والسنين تمر بسرعة من الغزو الى الحين صار لنا 21 سنه كانه امس الغزو اذكر ربك وقضب ارضك والله يخلي لك طفلك تدري اخوي انا مثلك عسكري في الجيش من قبل الغزو ومريت بأيام عصيبه ما يعلم فيها الا الله من ضغط وتعب العسكرية والاستلامات والمناورت وغيره وفكرت اقدم استقالتي اكثر من مليون مره ولكن الله سخر لي اعيال الحلال اي صبروني وقالوا لي اصبر كلم سنه وتتقاعد كانت خدمتي ولا شي وصبر على التقاعد وصبر صبر ما يعلمه الله وكل يوم اتهدد على الاستقاله تدري الحين شنو صار الحين انا ما زلت في الجيش وخدمتي 22 سنة ولا افكر في التقاعد الا اذا مت او قالوا لي يالله توكل على الله كبرت ولا يمكن احط وسطه عشان ما يطلعوني اذكر ربك دوام الحال من المحال بكره تتعدل اصبر

 

[ابو البراء^^]

السلام عليكم


اخوي خير ما فعلت انك تستقيل انا قبلك كنت عسكري وخدمتي كانت كبيره واستقلت من العسكريه بالعربي من الجيش وكنت مديون 30 الف دينار وابشرك لا مت من الجوع ولله الحمد وابشرك اني من طلعت من العسكريه ان اموري صارت احسن من الاول وسكرت الديون اللي علي كلها واخوك حاليا مدني صحيح معاشي مو نفس الجيش بس ابشرك بنعمه وخير وبراحه نفسيه .

بس اللي ابي اقوله لك استقيل وانت مغمض وانحش من حياة الذل وديرتنا ديرت خير

طبعا انت لك خدمه والتامينات راح تعطيك فلوس خدمتك على شكل راتب يعني ينزل لك من التامينات تقريبا 600 دينار وانت صدقني راح تلقى لك وظيفه اما حكوميه اوقطاع خاص قبل لا تخلص افلوس خدمتك من التامينات

وصيه اخيره

اكثر من الدعاء وتوكل على الله وصدقني ان الله بيرزقك بوظيفه احسن وبترتاح ان شاء الله

 

[السهم المجروح]

فراقهم ييب مطر

 

[Ops]

كل وزارة في القسم الزين وفيها القسم الشين..

يمكن انت بالقسم الشين ...!!!

ونصيحه مني ... قبل لا تقدم استقالة

>>>> انا كنت عسكري سابق <<<<

غير القسم .. يعني قدم طلب نقل الى مكان تعرف انه زين

وتحسن انه مكانك ..

ويمكن تستخير


والله وربي وانا اقولها صاج .. انا عسكري سابق وجامعي بعد حاليا .. ومتؤظف احسن وظيفة وراتبها مثل راتب العسكرية وكلها واسطات ... وودي ارجع للعسكرية

لان لو تفكر فيها تخدم 50 سنه .. ودوام بصمة
وكله شغل حتى تلفون ماتقدر تكلم من كثر الشغل .. ؟؟
وليش قايم عن مكتبك ووين رايح ..؟؟

الدقيقة بالبصمة يحاسبونك عليها

خلك عسكري .. وشغلك تعرفه وسهل.. واذا ضابط رجال شرواك والضباط كلهم فيهم خير
يقدرون الظروف ويساعدون العسكر بالراحه والرخصه


ملاحظة : لاحظت بالعسكر المرتاحيين وماعندهم شغل يقدموون استقالاتهم.. لان دوامهم صار ملل ..


واسمحلي هالكلام ..

 

[z06]

السلام عليكم
رفيجي نفسك يالغالي
قدم استقالته وتوظف بوزاره
توظف تقريبا بعد 3 شهور من استقالته من الجيش
الرجال متزوج وعنده ولدين
استقال لمشاكل عنده بالدوام اجبرته انه يستقيل
كان راتبه بحدود 1300 وعنده بدلات لدورات(حامل شهادة ثانويه فقط)
الحين بالوزارة ياخذ 660 ومنصدم يقول ما توقع هالفرق بالمعاش
فكر ولا تستعجل ترا امور الحياة صعبه ما صارت نفس قبل

 

[ابوجبر]

يبى خلك بالعسكريه
مافي احلى من العسكريه
شنو مدنيه بصمه وماكو راتب وعوار راس
خلك على مجنونك نصيحة اخو لوجه الله
ترا والله ماكو احلى من العسكريه