عذبي 71
عضو نشط
- التسجيل
- 21 أبريل 2009
- المشاركات
- 1,617
عذبي كيف الحال
انا ابشرك اللغة العربية عندي ممتازة والحمدلله لرب العالمين...واعرف الفرق بين التوصيف والتصريف...هذا اولا..
ثانيا من قال ان التصريف لازم يكون باسعار منخفضة...التصريف يكون بطرح الاراضي سواء كان بسعر غالي او رخيص..والسوق يحكم اذا كان في شراية ولا لا...وهذي اراضي الشركة وتحط السعر اللي تبيه والله يرزق الجميع...بس مو بكيف الشركة انها تحدد سعر السوق..اللي يحدده الشراية المواطنين المساكين..
ثالثا الحسبة على قولتك مو انا اللي حاطها...هذا سعر وكمية المعروض من قبل الشركة او المكتب العقاري وانا مجرد ناقل للخبر...وناقل الكفر ليس بكافر...
رابعا ماعندي مشكلة مع ابوفطيرة ابدا يالحبيب بس حبيت ادلي بدلوي..واتمنى الشي هذا مايضايقك.
والسموحة على الاطالة
ياهلا اخ خالد احيي فيك ادبك وارجو ان تعذرني يوم قلت خانك التعبير
لكن يا اخي الغالي انا ابي اناقشك وامام الاخوان جميعا واتمنى ان نستمر بالنقاش البناء ليتضح للناس الحق من الباطل ولا نكون سبب بتظليل الناس اللي داخله هالمنتدى عشان تستفيد من مناقشات الهادفه وملت من المهاترات
اولا كلمة تصريف ياخي خالد. انت صاحب لغة عربية جيده تطلق على كثرة الانبعاث
تصريف الماء ، وتصريف الرياح ، وتصريف الاموال ،
كلها على وزن تفعيل ومفاده الكثرة والوفرة
ويستخدم هذا اللفظ بالتجارة في حالات معينه
فنقول : التاجر بدأ بتصريف السلع الغذائية قبل انتهاء صلاحيتها ،
والمحفضة قامت بتصريف اسهمها قبل نزول قيمتها
ولكن لاحظ ان التصريف لايبدأ بسعر اعلى من سعر السوق
فاي عاقل يشتري المتر 320 دك وبالسوق 260 دك؟؟؟؟؟
فهذا الاعلان الذي نقلته لا يسمى تصريفا لان السعر اعلى من السوق رغم حجم الاعلان الكبير
ثم هل يقبل عقلك يا سيد خالد ان سعر العقار بالكويت يحدده المواطنين؟؟؟؟؟؟؟
والمساكين بعد افا عليك!!!
والله لو كان كما تقول جان ما في ازمة سكنية ولادور وطلبات والدولة مرتاحه من اذيتنه
لكن الواقع ان السعر يحدد من قبل المستحوذين على العقار وهم هوامير البلد
وانت وانا نعرف اساميهم ولا نجهلهم
وهذوله الهوامير عندهم خبراء وناس تخطط لهم وناس تشتغل معاهم وناس تسهل لهم القوانين الصعبه علي وعليك
يا خالد العليان انت كويتي ولا لا؟؟؟؟
ان جان انت كويتي فتكلم بالواقع والصحيح واجعل الله سبحانه بين عينيك
شنو اللي بيمنع هالتجار من المماطله وعدم دفع الضرائب
مثال عليه وضع اليد على اراضي تملكها الدوله وبلع الاموال العامة
لاتقولي بيسجنونه او بيبيعون عقاراته بالمزاد
ثم تعال من اليوم 1 مايو الى ابريل القادم
التاجر يطلع تراخيص البناء ، ويحفر ، ويصب قواعد ، ويوقف بعدها البناء
بهالطريقه وبالقانون ماتشمله الضريبه
وان حب لا يكمل البناء ويعرضها بيوت جاهزه بسعر اللي يعجبه مو سعر اللي يبيه المواطن او يقفلها ويخليها حالها حال البيوت اللي بالزهراء قريب 360 حول قطعه كامله مبنيه ومقفله واسعارها نار الله الموقده التي تطلع على الافئده
عمي التاجر الكويتي ما ينطق على بطنه تدري ليش ؟ لانه ظهره قوي
النقطه الثانيه : ابي اسئلك سؤال واخذه مني على سبيل المزاح
هل كان عندك ارض في ابو فطيره وبعتها وقت النزول وانت اليوم متحسف من خسارتك؟؟؟؟؟
ترى ياخوي انت جنك متقصد منطقتنه كل مواضيعك ابوفطيره ابوفطيره ياخي الصديق برايك ارخص واشبيليه والعقيله ولا الادهي شرق غرب جنوب شمال الصليبيخات شوف بكم البدل هذوله مايهمونك؟؟؟؟
انت ناوي تحضر رسالتك للدكتوراه في موضوع ابوفطيره؟؟؟
صج انها منطقة تاريخية ومجال للبحث لكن مو بهالطريقه
يا اخي ترى انا وهاللي شاركوا وياي شرينه في ابو فطيره من دم اقلوبنه
وباقساط لها اول مالها اخر
انا واحد من الناس ادفع 800 دك شهريا اقساط غير تحويشة عمري اللي دفعتها للارض فقط والهدف عشان اضمن لعيالي مسكن بقناعتي انه افضل من تخصيص الحكومه
فلا تظن اني قاعد اكل بملعقه ذهبيه واشرب بكاس من فضة لاني شاري في ابو فطيره
لا يبا ترى احنا شرينه راحة باجر والثمن مو بلاش الثمن غالي وانا اخوك
كنا نتمنى منك كلمه تشد فيها من ازرنا مو تفتح مواضيع تسخر فيها من هالمنطقه وتسفه فيها معاناتنا
ثم تعال يا ابا وليد راجع معاي مشاركات القسم العقاري بالمنتدى كم واحد حلف وتكفر وقال النزول قادم بصيف 2009 والمصدر موثوق والخبر من حلج التاجر الفلاني وسامعه يقول لاحد يشتري ترى الاسعار رايحه قوع ويخليك تظن ان الاسعار بتصير مثل سعر الخيار هالايام وبالتحديد ابوفطيره وشرق القرين
وكم من واحد صدق هالكلام اللي انت جاي اليوم تردده
وانجان اصدقوا ربعك اللي تحجوا قبلك انت ابتصدق
يا خالد في ناس داشه مالها خبره تبي تاخذ الراي من المنتدى
تقرئ كلامك وتصدقك
اذا اطلقت هالتصريح الكبير تصريييييييييف اللي له معنى والواقع معنى اخر
والمعلقين الله خير عارفهم شلون يحطون على طبختك البهارات
طيب
اذا جاك الصيف والقسيمة اللي اليوم 120 الف صارت 130 الف شبتقول لهم؟؟؟؟
هارد لك تعيش وتاكل غيرها يالله نصيب خيره الله كاتب لك ما تشتري
والا بتوقف مشاركاتك مثل الربع اللي انت وانا خابرينهم
اتمنى ان تراعي امر مهم مثل ما انت حريص على مصلحة الناس وتخاف ان ينغشون ويشترون باسعار اتفق معاك انها غاليه
اتمنى كذلك ان تتخيل الضرر الذي سيلحق القارئين لمشاركاتك لو ارتفعت الاسعار
كما اتوقع انا بعد اشهر بسبب اكتمال البنيه التحتيه وبدء بناء القسائم
ويومها بتكون انت من وقفت في طريق كثيرا من الناس واثرت عليهم وظللتهم
وما راح تلقى منهم الا كلمة حسبي الله ونعم الوكيل
واتمنى ان تجد كلماتي منك صدرا رحبا واذنا واعيه .
واتمنى ان لاتستعجل بالرد علي قف مع نفسك وفكر بكلامي وبعدها رد علي.