ديوانية الاستراحه (( الجزء التاسع ))

[NICK]

لا ما طولت بس موضوعك خلا دموعي اربع اربع​

اشوه في ناس حاسه فينا

اشكر تعاطفك

 

[العاشق]

تدري مو المشكله بالوظيفه المشكله بالتخصص
انا تخصصي ماركتنك
واحتمال اشتغل في غير مجالي

عادي واحد من الربع تخصصه ديكور عينوه بالصحه بالارشيف شكو مادري بس ترا رافظ التدريس

 

[NICK]

على طاري الطلبة عندي لكم خوش سالفة
على ايام دوامي قبل
ان شاء الله اقولها لكم بالليل

وحنا بالانتظار ان شالله

 

[قلم حر]

اشوه في ناس حاسه فينا

اشكر تعاطفك

الصراحه دموعي مو عشان حاس فيك
دموعي لاني انا الطالب اللي ماتحبه​

 

[NICK]

وزارة التربية وللأسف بالوقت الحالي تغيرت صارت اسم على غير مسمى
وانا غيرت مجالي بالمرة حول اداري باي مكان مو مشكله خل ينزل الراتب
بس ولا تواجه ناس معد ينفع معهم طب وطبيب

هلا الذييبه

والله انا عن نفسي مستحيل اقعد بالتربيه على طول

بس لين تتسهل الامور انشالله

 

[الذيبة]

الصراحه دموعي مو عشان حاس فيك
دموعي لاني انا الطالب اللي ماتحبه​

هههههههههههه الله لا يحرمنا من هالتعليييقات

 

[NICK]

رفيجتي اللي تخرجت معاي اشتفلت في شركة الاستثمار
قبل جم شهر وتقول زين بس الدوام الى الساعه 3 العصر

خليها تتوسطلج ..مومشكله الدوام لي ثلاث ..بس اذا كان طبيعة الدوام مو متعبه ..

 

[NICK]

الصراحه دموعي مو عشان حاس فيك
دموعي لاني انا الطالب اللي ماتحبه​

ههههههههههههه
حلوه منك

 

[NoOoOoR]

خليها تتوسطلج ..مومشكله الدوام لي ثلاث ..بس اذا كان طبيعة الدوام مو متعبه ..

مو محتاجه واسطه من احد أموري كلها ماشيه ان شاء الله
وانا تاخرت بالتعيين لاني مالي خلق اشتغل في بداية الصيف
واجلت كل شي لبعد العيد

 

[NICK]

عادي واحد من الربع تخصصه ديكور عينوه بالصحه بالارشيف شكو مادري بس ترا رافظ التدريس

تصدق عاد من احلى وظايف التدريس العاب ..وكهربا وديكوور ماعندهم شغل صج
وماخذين ميزة الاجازه ونفس راتب المواد الاساسيه

 

[دنياء غريبه]

ايه الله كريم
والا سالفة حرقة الدم ..ماعتقد احد ينافسنا عليها شوفي
اولا : تداوم الصبح ..وتقابل رئيس القسم ..ويطلع موشي ويطلب منك كذا وكذا مع العلم انك مؤدي عملك

تخلص منه يطلعلك الموجه ..وياهي حرقة اعصاب واحد يزورك حصه ويقعد يتفلسف ويقول ملاحظات والله تضحكون لو اعطيكم امثله ..

ثالثا عندي بالاداره وكيلين ..كل واحد منهم يبي منك جم شغله ..وعلى راس الهرم يطلعلك مدير المدرسه الناظر ..ويقول ابي جذيه .. وطلباته ماتخلص
وبعدين ..تعال وشوف الطلبه دقايق ماتفضى هذا يسال وهذا يبي يسولف وهذا يبي يسلم ..وهذا زعلان ليش ماعطيته درجه عاليه ..وهو فاشل ..والشاطر يبي منك كذا وكذا ويسالك الف سؤال .
ويمرك بالمكتب حتى لو ماعنده شغل يسال اي شيء يبي يثبتلك اهتمامه

واخيرا اولياء الامور ..بعضهم طبعا مو كلهم .

ولدي يقول جذيه وانت تحط عليه ..ومره واحد فيهم يقول ياني ولدي ويقول انك ماتحبه ..

انا استغربت .!! وقلتله انا اعامل الطلبه مثل بعض يعني لازم اميز ولدك عنهم ..وولده مؤذيني بالصف اذية العالمين .. اخر شي بعد كذا زياره له ..قلتله خلاص انقل ولدك الصف ثاني ..جان يقول شنو انقل ولدي ..لايبا ماانقله انت انقل الصف ثاني..

انا شكلي خذيت راحي بالسوالف وطولت عليكم بس شسوي

ييتي على الجرح نور لما قلتي مدير يحرق دمي ..

الله يعينك ويسهل امرك
تر هالدنياا كل تعب وبعده راحه​

 

[دنياء غريبه]

الصراحه دموعي مو عشان حاس فيك
دموعي لاني انا الطالب اللي ماتحبه​

ههههه

الله يقطع شر ابليسك

انا اتوقع انت 24 ساعه تخلي عيالك وزوجتك يضحكون على سوالفك ​

​

 

[NICK]

الله يعينك ويسهل امرك
تر هالدنياا كل تعب وبعده راحه​

امين الله يجعلنا من الي يرتاحون بعدها


والا هي اي والله تعب .. بس كل شي يهون بالصبر الله يصبرنا .

 

[دنياء غريبه]

امين الله يجعلنا من الي يرتاحون بعدها


والا هي اي والله تعب .. بس كل شي يهون بالصبر الله يصبرنا .

ممكن سؤال ..

تدرس اي سنه ابتدائي او متوسط او ثانوي​

 

[الذيبة]

ممكن سؤال ..

تدرس اي سنه ابتدائي او متوسط او ثانوي​

الله يهداج هم هذا سؤال صبه حقنه لبن
قال طلقها وخذ اختها قال الله يلعنها ويلعن اختها

 

[دنياء غريبه]

الله يهداج هم هذا سؤال صبه حقنه لبن
قال طلقها وخذ اختها قال الله يلعنها ويلعن اختها

شنو ؟؟

الي فهمت الله يلعنها
مين ؟؟

مدري
الذيبه وش السالفه فهميني بشويش ​

 

[NICK]

ممكن سؤال ..

تدرس اي سنه ابتدائي او متوسط او ثانوي​

سوري على التاخير في صفحه حاطينها عن الشيخ بن باز عجيبه دشيتها ونسيت نفسي وياها .....

انا ادرس متوسطه

الماده اجتماعيات

 

[NICK]

الله يهداج هم هذا سؤال صبه حقنه لبن
قال طلقها وخذ اختها قال الله يلعنها ويلعن اختها

اي والله كل المراحل تعب

بس الابتدائي ماجربتها والي جربوها وياي حاليا بالمتوسطه يقولون فرق السما عن الارض اريح بكثير الابتدائي

 

[الذيبة]

شنو ؟؟

الي فهمت الله يلعنها
مين ؟؟

مدري
الذيبه وش السالفه فهميني بشويش ​

قصدي التدريس كله مثل مثل صار معلوووم مافي فرق وهاذي امثال
عندنا بالكويت اذا شي يشابه شي يطلع معنا هالمثل

 

[الذيبة]

سوري على التاخير في صفحه حاطينها عن الشيخ بن باز عجيبه دشيتها ونسيت نفسي وياها .....

انا ادرس متوسطه

الماده اجتماعيات

يا حبي للمـــادة

وربي احلى مادة عجيييييييييبه ,,, احب اغوص بعماقها