بشتري هالسياره وابي رايكم

[متداول اسلامي]

السلام عليكم
ممكن من كل الشباب ينصحوني في هالسياره من جميع النواحي
1-سيرفسها هل مكلف ولا لا من تصفيه وسفايف وفلاتر وبلاكات وهالامور الضرورية المعتاده ؟
2-سعرها بالسوق تقريبا كم تسوى ؟
3-هل لها رغيبه يعني اذا بغيت ابيعها تروح ولا تطيح عندي ؟
وسلامتكم
السياره
جاكور اك جي 8 موديل 2001
وكالة
فيها دعمه خفيفه مو مبينه
هذي صورتها
طبعا شكلها العام والداخلي نظيف
ماشالله
انتظر رايكم
بعد الاستخاره الان الاستشاره
وخلال يوم او يومين اقرر باذن الله

 

[متداول اسلامي]

انتظر نصايحكم
تخيل انك في حراج كم تسوم السياره ؟

 

[سهمكووو]

2000

 

[قاروه]

وعليكم السلام ورحمة الله ..

كيف حالك اخوي متداول طيب ان شاء الله
اخوي بالنسبه للجاكوار لي بغيت تبيعها ما تيبلك سعر وقطع غيارها( غويله شوي) والله يكتب لك الي فيه الخير

 

[متداول اسلامي]

سهمكو
2000 تقصد هذا فتح باب السوم ولا هذا سعرها بالسوق

صدمتني !

معروضه السيارة كاش اب 4 آلاف وقايلين لي سعرها رخيص !
واخوك مايدري عن سعرها بالسوق معقوله !
ولا يمكن تقصد فتحت باب السوم
هلا باخوي قاروه هلا فيك اخوي العزيز الغالي تسلمم لي على النصيحه بارك الله فيك
ها يا شباب شنو آرائكم

 

[سليمان]

هذا عنوان وحدة اختها بس 2003 وكامل المواصفات ولونها اسود ويبونها على 5700 يعني يمكن بعد المكاسر تاخذها على 5500


http://www.q8car.com/Arabic/main.asp?WebPage=CarDetails&id=32242

 

[متداول اسلامي]

جزاك الله خير ياخوي سليمان ماقصرت

 

[abbasmos]

ماتسوى السيارة وقطع غيارها وسيرفسها (ناااااارا)
سعرها من 2000 الى 3000 حدها واذا بتبيعها بيكسرون فيك ومالها شرايه.

ماتسوى السيارة بشكل عام

 

[متداول اسلامي]

جزاك الله خير وماقصرت على النصيحه
فعلا رحت محلات قطع الغيار
اسعار القطع صلخ
دعامية اماميه 250د.ك
مترجم بخاخ 200د.
سفايف50د.ك
معاون 76د.ك
وغيرها من القطع
سياره حلوه ونظيفه بس يبيلها واحد يستحمل

 

[دكتورنت]

ماكو احسن وافضل من فورد ماركيز سياره عمليه وشكل مقبول وسعر مقبول
انصحك فيها

 

[متداول اسلامي]

لاوالله ياخوي ودي فيها بس ماشريتها
خيره

 

[UNIX]

السلام عليكم...

حبيبي أنا من ملاك جاكوار من زمااان.... السيارة تسوى من 3000 الى 3800 بالكثير على حسب نظافتها و كم ماشية؟؟ و سيرفساتها رخيصة مقارنة مع المرسيدس و البي أم و الأودي. سيرفسها يكلف مو أكثر من 200 دينار قبل الخصم شامل كل شي بدون السفايف. و سيرفسها كل 20000 أو 16000 على حسب تصنيف الوكالة لها. ياخوي ليش تسأل عن الدعاميات؟ ناوي تدعم فيها و تصلح؟ أمنها شامل و أفتك. و بالنسبة حق مترجم البخاخ شيخربة؟ اذا ناوي و معزم خبرني أخلي الوكالة يضبطونك بالفحص و يقولولك اذا اوكي و لا لأ. بشكل عام السيارة ممتازة و راقية و مو كل واحد يركبها مثل البي أم و المرسيدس. مكودة بالمكاتب و ذاك اليوم شفت تكسي بي أم 735. نعم السيارة مالها رغابة وقت البيع. الشراي لازم يكون حاب الجاكوار لأسمها و تاريخها و لا تفكر بالبيعة. اذا تبي أي شي عن الجاكوار دزلي مسج عالخاص و أفيدك بكل شي ان شالله

بارك الله فيك

 

[MTC]

بعد قلبي اخذلك كامري 2007 وييب العيد اي والله صدقني راح تدعيلي

تويوتا سيارة وانا اخوك

 

[ford_svt]

اخوي اذا تبي سياره عمليه وماتصرف بانزين وسعرها فيها لومينا اليديده
وقوية واسأل مجرب

والكامري والله عمليه بس مو عائلية

 

[فيصل النيباري]

السلام عليكم

أخوي نصيحتي لك اخذ تويوتا ايا كان الموديل كامرى او اوريون او برادو او لاندكروزر ابرك من الجاكوار ... نسيبي كان عنده نفس هالجاكوار قعد على جبده 8 شهور ويالله لقى واحد يتبرع ويشتريه

وهذى نصيحه لوجه الله لك

 

[F16]

حاول تنزل من سعرها اشوى يعنى تحت 3500 وسياره والله راقيه جدا وعلى قوله اخوى ينكس مو اى واحد يركبها ومبروك مقدما0

 

[الألماني]

:d
احلى مافي الصورة انها ذكرتني بالشتاء بالبارد :d

شباب الموضوع صارلة سنه هههههههههههه

 

[متداول اسلامي]

شاكر لكم ردودكم ونصايحكمماقصرتوا وبالنسبه للسياره انباعت قبل اسبوع مطلوب 3400 تقريبا وفوق الطلب 400 قسطها 120 واردة الوكاله وصج سياره نظيفه من داخل ونظرتها اللهم بارك الله يبارك للي شراها
وموماشيه شي

 

[Dr.Fantaq]

..... بشكل عام السيارة ممتازة و راقية و مو كل واحد يركبها مثل البي أم و المرسيدس. مكودة بالمكاتب و ذاك اليوم شفت تكسي بي أم 735.

اخوي يعني تبي تفهمنا ان هالسيارة اغلى وافخم من البي ام والمرسيدس ؟؟

والبي ام والمرسيدس صاروا الحين كل الناس يركبونها ؟؟!!

ممكن تقولي التاكسي البي ام وين شفته ؟؟