ماتبخص الناس لين انك تعاشرها

[عفار]

أنا بقرب الدله وبشب النار

والسوالف ماتزين ألا مع الطيبيين سواتك يابوفهد وسواة من يقرا

سوالفنا

فى منتدا ابوعلى

أنا سمعت لى قصيده فى أحد المجالس التى تزخر بالشعار

وقلت والله لسجلها وكتبها وسمّعها ابوفهد

على أن الثمره منها موجود فى العنوان اللى فوق بس



شطر مثقل بالتجارب ليننه طلع

أسمع وش يقول هالشاعر

ليا عسعس الليل قرّبت الجثاميرى
00000000000000000000000وشبيت ضوّن هوى الغربى يسامرها
أشداد عوص النجايب فى مياسيرى
00000000000000000000000وآخذ وأعوّد على الدله0000وبهرها
هواجس الليل ورّاد000000ومصاديرى
00000000000000000000000شى يفوق الخيال وشى00أصوّرها
أثر المخاليق عميان0000ومباصيرى
000000000000000000000000ماتبخص الناس لين أنك 0تعاشرها

أنتهى

الشطر الاخير يابوفهد

ينفع نحطه دعم فى التعامل مع الناس ولاّ لك وجهة نظر

 

[striker]

صح لسانك يابو عبدالله

نعم الشطر الاخير ينفع لكن يا ترى كيف يعرف الانسان اي فئه هو ؟

وبمناسبه الشعر الزين اللي يوسع الصدر مع هالغثى اللي في كل جانب

وخصوصا ان ريح زعفران دلتك اشمها من هنا يابو عبد الله .. اسمح لي

وعلى نفس القافيه ارد في بعض الشجون :- اقول :-


ليا عسعس الليل ودقت في القلب المساميري ....

بدت لي ذكراه مثل طعن السكاكيني .....

ظنيت سيور الايام تلهيني .....

وبعد المسافه لابد تنسيني ....

والقنص وصيد الغزلان يسليني ....

اذا هاجت في نفسي ذكرى تشقيني ....


ادور بن مجول واهذ عليه دواويني ....

ويغرد مشعان بالقصيد اللي كله يكويني ....

والدله والبن والهيل واوتار الربابه والبساتيني ....

مثل سوار المعصم تهزج وتغني لي .....

بس السعاده راحت يا من يشري لي ....

منى عيني قبل ما الموت يدنيني .....



وسلامتكم

 

[دايخ]

ماتبخص الناس لين انك تعاشرها

كلام كبــييييييير وياريت نتقيد به لأنه حِكمه ومع كل أسف فإن الحُـكم من أول نظره هو خطأ دارج في مجتمعاتنا وله تبعات لها ما بعدها من تأثير .

 

[عفار]

صح لسانك

ابوفهد

لكن وراك سردتها كلها

على وزن

أينى أينى

عدلها

خل الشطر الاول

على رى

والشطر الثناى

على اينى

أما المعانى فمايحتاج

تسلم يابوفهد

والله لمشعان وحشه

من زمان ماسمتعه من يوم طحنا فالاسهم

الله يخارجنا منها

بالمرابح

لانى ناوى أصك لى كم راس ناقه

وطلع بها فالصمان اوسع صدرى عندها

 

[خالد فهد السلوم]

مانيب شاعر

يا العفار انا مانيب شاعر ... لكن بعض الاحيان احب الزجل لان فيه نغمه

وعلى اي حال المعنى وصل وشكرا على اطرائك يابو عبدالله وخصوصا

شاعر ومتذوق مثلك ....

وعل طريا البعارين ...... وين من زمان عن هالمزايين .... ترى السوق

اخذنا بعيد ونسينا ذيك الطله اللي تشرح القلب .... وبالمناسبه قريت

نكته في جوال احد الاصدقاء على البعارين وهي :-

يقولون ان بعير اشهب اقشر حشر له ثلاث نياق في غار من الغيران

طبعا النياق خافن منه وهن يرتجفن سألوه خير ان شاء الله يا سي

بعير افندي ... قال هالحين من منكم قالت لمن مريت جنبكم .. جاكم

ابو براطم .

يقول لي زميل في العمل على طاري البعارين ان ابوه لازال يعشق البر

ويقضي فيه معظم الوقت يتندح بين الحلال .. المراد هالزميل يعرف له

مدرس انجليزي باكستاني يدرس في ثانويه ... اخذه معه يمشيه

وخصوصا ان هالباكستاني جديد على الديره .. فلوا لهم بساط برا

العريش من شان يتفرجون على الحلال وطبعا البعارين والنوق والخرفان

طليقه تمشي هنا وهناك .... وخوينا الباكستاني مبسوط آخر امبساط

وابو متعب الشايب حاط قبال الضيف طاسه حليب نياق وقبلها القدوع

والدله اللي تصمل الراس .. وفجأه وبدون مقدمات يقرب ذاك البعير

ولا ينصى الا المدرس ويلقط ذراعه اليمين ويتلها تله كادت تفكها من

الكتف ... طبعا الرجال صاح بأعلى صوته Please help me واذا

بالرجاجيل تفوع على البعير ضرب مبرح لكن للاسف اضطر ابو متعب

يثور بالبعير من شان يفك مدرس اللغه الانجليزيه ..

تحررت يد الرجال واخذوه الى اقرب مستشفى وخيطوا الجرح .... وهم

في طريق الرجعه التفت الباكستاني المتجنس بالجنسيه الانقليزيه

وقال لمتعب :-

do you know my dear what bothers me the most now

رد عليه متعب طبعا الالم يا ساجيف ... لكن لدهشه متعب رد سانجيف

no ....no.... what bothers me is how can i use my right hand when i teach English in the school

طبعا بعد هالرد طاح سانجيف من عين متعب وقال في نفسه الا يا ليت

بعير ابوي اكل راسك يالهيس الاربد .

 

[عفار]

ايه والله ليته أكل راس هالباكستانى

ولا أذبحوا هالبعير

عساه ماهو من الفحول الطيبه اللى ينتحسف عليها يابوفهد

ذكرتنى

بسالفة يابوفهد

أسمع ياطويل العمر هذا واحد من أهل القرايا اللى حول الدوادمى

ماعمره عرف البقر

وسكن فى هالقريه عند بنى عمه وشاف كل واحد عنده بقره او بقرتين

حاطينهن فى حويشاتهم

الرجال طقت براسه وقال للحرمه ابشتريلى بقرتيين نحتلب منها

ولبن البقره ماعنه منشود لاخضيتيه أحسن من حليب المعزا

لكن الحرمه قالتله أنت ماتعرف تسرح فيها ولاتعرف تطعمها

ولاتعرف المرعى الطيبه اللى تجوزلها

قال لها

هاذى بسيطه بروح لولد عمى فلان عنده بقر وباخذ منه العلوم كلها

أنتى حطى راسك فالخيشه

قالت تم

الرجال راح لولد عمه وعطاه العلوم كلها بس فيه حاجه هى اللى

تضايق منها

الثور

والرجال ماعنده حق الثور فلوسه ماتجيبله غير بقرتين

لكن ولد عمه نشمى طق له صدره وقال

الثور خله على

أنا اللى اجيب لك أياه متى ماالبقر ) )

الرجال

أنبسط جاب البقر وقام يحلب ويشرب

لين جت ساعة القدر

مع جيّت الثور

لان البقر الظاهر جتهن حزة) )

وجابوا الثور وحطوه فى حوش صاحبنا

يوم يومين الثور ماسوى شى والظاهر أنه دبل كبد صاحبنا

لانه قاعد يصرف عليه والثور أمتكى

اليوم الثالث

صاحبنا دخل الحوش وهى واصلتن معه

وخذله عجره ودخل بيكسّر قرون الثور

ألا ان الثور

أقبل على صاحبنا ونطحه وبرك عليه والبركه هي البركه (بتسكين الراء وفتح ماقبلها)

ولما شافت حرمته هذا المنظر المروّع أخذت تنخا الربع والجماعه

وما قصروا جو وحاولوا بشتى الوسائل أنهم

يزحزحون الثور والثور بارك عليه ماكو فايده

فقام أحدهم

بأخذ سلاحه من نوع كلاشنكوف

ونفظ راس هالثور

وسحبوا الرجال من تحته لكن بعد مافنقش (فطس)

بسبت هالثور الاقشر

وأخذت الحرمه تولول

وتقول حسبى الله على هالثور حسبى الله على هالثور

أخذ رجالى

ونتهت القصه

الشاهد يابوفهد

ان الحيوانات ماينلعب معها سواء كانت ثيران ولا بعارين

 

[متفائل]

ههههههههههه

والله وناسة

كملوا

 

[خالد فهد السلوم]

من هالقصه

بصراحه يابو عبد الله بعد ما قريت هالسالفه حسيت بالحزن وبغت دمعه

تفر من عيني ... والاسباب كثيره ودي اوجزها بالتالي :-

اولا _ لو كان صاحبنا يدري ان قدره بيصير تحت بطن ثور كان ( بتحوير

الكاف سان ) ما شرا الثور ولا قبل به على بيته .... والعجيب لو ركزنا

على هياج الثور وعدائيته لعرفنا ان المرحوم بعد عليه حق ومسؤليه

بعض الناس الله يهدينا وياهم يظنون ان الحيوان على اسمه حيوان

يعني لازم ينفذ كل اللي يقدر عليه واللي ما يقدر عليه ...البعض يحمل

البهيمه احمال يمكن ما يقدر عليها لكن الحيوان يتحمل ...لكن الشى

الوحيد اللي ما قدر الثور يستوعبه هو ان البقر جتهن حزه !

وعلى طاري اطوار الحيوانات العجيبه ..يوم اني والله وغيد في المتوسط

كنت مربي عندي قطوه سميتها ( سوسو) وكنت في حوش البيت

العبها واذا ناديتها ولو من بعيد تركض لي ... الوالد ما يحب القطاوه

لانها ممكن الله يكرمكم تنجس الفرش ..والاستثاء الوحيد عنده ( لغير

البعارين والغنم طبعا ... هاذولي ما بها كلام ) الاستثاء بس لكلاب

الصيد او الحراسه . طبعا وبعد توسط الوالده رضى ابو خالد بهالوضع

المعروف ان شهر ثلاثه ميلادي هو وقت ( الحزه ) حقت القطاوه وانا

طبعا وش يدريني .. لكن لاحظنا ان جدران بيتنا امتلت بزوار غير مرغوب

فيهم ... يمكن يابو عبدالله وبدون مبالغه مابين سته الى ثمان عراري في

نفس الوقت .. وخذ في هالليل الاصوات اللي تموت من الضحك وكأن

القطاوه وهي تتناوش فيما بينها تتكلم حروف وعبارات .. الشاهد الوالد

من بكره قال هالقطوه ما تقعد بالبيت .... حطها السواق بخيشه كاني

اشوفها واخذها في طريق صلبوخ ورماها من غير رجعه .

طبعا غياب ( سوسو ) ترك مسحه حزن في قلبي ... وكل مره الوالد

يبرقني من بعيد يلاحظ هالشي علي ... المهم اخذ الوالده على جنب

وقال لها والله يا حيف ولدي الكبير حزين على قطوه ؟ ... والله لو طقه

الحزن على فرس او ذيب او حتى بعير ان يجيه بدال الوحده ثلاث لكن

وش اقول بتربات الحضر ؟ .... مع الايام رضخ الوالد لحالتي وقال معليش

اللي هو يبي بس لا يجيب لنا قطوه تجرجر علينا عراري القريه ... قلت

يابوي عندي الحل ... قال وش هو قلت ابي اجيب لي عري يحبه قلبك !

طبعا الوالد وافق وهو يقول الله يخلف على بهالولد اللي يحب القطاوه

على آخر زمن آل سلوم ...!

مرت الايام وجت الايام وكبر العري وصار شاب قوي .... الى هنا الامور

طبيعيه .. لكن اللي مهوب طبيعي ان الوالد عنده بغبغان افريقي قيمته

خمسه الاف ريال .. اول ما شافه العري تغدى عليه ...

وعليكم الباقي لمن عرف الوالد ان قتاله العري حقي ... طلب منهم

ينادوني وبسرعه .....


وسلامتكم .

 

[عفار]

ابوفهد

على شان أدخل بجو السالفه

هل العرارى

هى xxxxx القطاوه

أو غير لان هاذى مامرت على

أن كان صح خلها على دربها

وان كان خطا

وضح لنا

 

[بوفهيد2]

هههههههه اضحك الله سنك
والله انها لقصة
ووالدك على مستوى اللي عنده الببغاه الافريقي
يا اخي الناس فيما يعشقون مذاهب
ايه العتوي والا اللي يبي يربي له ذيب صغير!!!
وشكر ا على ترويحكم على الاخوة بالجميل من القصص

 

[المؤشر]

العفار

من سياق الحديث أعتقد أن ابوفهد يقصد ب ( العري ) القط الذكر

 

[عفار]

ماعليه

أبوعلى

أنا أشكل على كلام ابوفهد بقوله بزوار وكلمة العرارى

وحبيت اختار وحده من الثنتين

فى معرفة معناها

على شان أعرف الثانيه

عموما

حصل خير ابوعلى

أبوفهد

أرفعها أشوى

بس بعد مده ولاهى بالطويله أنشاء الله

خل النار على شبتها ودلا لنا على ماهى

وبختم القصيده بقصيده

كل القلم من00 كتبنا بالقراطيس0000وركابنا من كثر الادلاج تومى
للشيخ من يعطى الفقارا المفاليس000يبدل الساعه بعزّ يدومي
والحر لادبت عليه0000 النوامييس0000يشهر وعن دار المذله يشومى
باب الفرج لبسك نظيف الملابيس0000ينجيك بأيام الكرب00والزحومى