ممكن استشيركم ؟؟

[ashomwaw]

السلام عليكم
صارلي مدة اشتغل على مشروع وحاب اني استشيركم
المشروع عبارة عن موقع الكتروني فكرته عبارة عن انشاء موقع تجارة الكترونية ويتم عبره منح اشتراكات تسمح لك بادخال منتجاتك بصورها وتفاصيلها واسعارها بصورة حلوة وعند طلب زائر الموقع لمنتج من منتجاتك يقوم الموقع بارسال رسالة الي بريدك الالكتروني انه تم طلب احد منتجاتك وتفاصيل الطلب ومعلومات الزبون من رقم الهاتف والعنوان والاسم يعني مو باقي الا اتأكد من الزبون على التلفون ماله وتقوم بالتوصيل واستلام فلوسك ... حلو
ولكن بعد جهد جهيد وعقب ما خلص الموقع برزت مشكلة
شلون اسوق الموقع عند الشركات والمحلات باقل جهد وتكلفة طبعا اكيد مو ببلاش ولكن وين احسن طريقة ؟؟؟؟؟؟؟
انا ما راح احط اسم الموقع عشان ما اسوي دعاية ولكن حبيت استشيركم مادام الموقع اقتصادي يمكن في احد متخصص بالتسويق ؟؟
على العموم احب اسمع ارائكم كلكم

 

[stillhamad]

يعني دورك أنك تجمع بين راسين بالحلال .. الشاري والبايع

أنا شخصيا لو كنت اريد تسويق شيء معين فسوف أتجه ألي أي صحيفه أعلانيه .. فهي توزع مجانا وتصل ألي أبواب البيوت والجمعيات والبقالات وكل مكان ومنتشره بأنحاء الكويت و أكتب التوصيل مجانا وأحط رقم تلفون وكان الله غفورا رحيما وبعض صور البضاعه ..

وهذي هي الطريقه المتبعه من غالب من يريد تسويق بضاعته .. اسهل كثيرا من طريقة وين أذنك يا جحا واوفر بالوقت والجهد ...

كون الفكره فنتغا لا يكفي لنجاحها .. وألا جان أنا أول المستفيدين من كثر الفناتغ و الأفكار اللي براسي ..


أتمني أني ما أكون قد سببتلك الأحباط وتكسير المجاديف بردي ... علي الرغم من تيقني أني قد حبطت فيك بالفعل وخليتك تكره الساعه اللي دشيت فيها المنتدي ..

 

[ashomwaw]

بالعكس ما احبطتني ولا شي انت عطيتني فرصة ابين لك الفرق ومميزات الاعلان بالموقع
1- الموقع موجود 24 ساعة باليوم وسبع ايام بالاسبوع .
2- بالموقع تقدر تقارن بين منتجين من شركتين مختلفتين وتشوف الفرق بتفاصيل كل وحدة منهم بنفس الوقت من حيث السعر والمواصفات والجودة.
3- بالموقع يفترض يكون السعر اقل من اي مكان ثاني لان الموقع شال عنك الاعلان المكلف بالجرايد الاعلانية او اي طريقة للاعلان.
4- بالموقع تقدر انت اتحكم باعلانك و تقدر تغيره على كيفك بدون اي تكلفة .
وبخصوص التوزيع اي نسبة من اطلعوا على اعلانك اذا الصحيفة توزعت بكل مكان فهذا مو شرط انك تحقق مبيعات لان المشكلة مو بالكم بل بالكيف يعني انا لما اسوق منتج عن طريق النت انا اعرف ان بالكويت في اكثر من مئة الف مستخدم للانترنت والناس هذي من النوع المواكب للتطور واللي عندها ميل للشراء.
والشغله الثانية العجيبه تعليقك (وين اذنك يا جحا ) احب اوريك كم موقع تجارة الكترونية عالمية وقبلها احب ابين لك ان اقل موقع منهم يحقق اكثر من 100 مليون دولار صافي ارباح بالسنة
www.amazon.com
www.ebay.com
www.buy.com
bestbuy.com
وروح قولهم اذنك وين يا جحا
على العموم انا احب النقاش المفيد وانت عطيتني فرصة ومشكور على المشاركة

 

[بومحمد55]

بتوفيق

الله يوفقنا معاك ان شالله سيرو ونحنو من وراكم

 

[سوينق]

بالتوفيق

افضل طريقة انك تحطلك اعلان في الجرايد الاعلانية

 

[ياقوت]

تقدر توزع مثل بروشورات على السيارات او عند البيوت .. مثلا تبدي اول شي بمنطقتكم واذا شفت انه الفكره نجحت طبقها على مجال اوسع
اطبع الاوراق وعطهم حق شباب صغار بعايلتكم فيهم 12 او 14 سنه
وقولهم ان وزعتوهم اشتريلكم وجبه



موفق ان شاء الله​

 

[stillhamad]

أخوي الأمازون والأيبي والبلو نايل وغيرها من مواقع ما ينقال عنهم وين أذنك يا جحا .. لأنها وبكل بساطه مواقع تخدم سوق من أكبر الأسواق في العالم وهو السوق المريكي أولا ومن ثم أوروبا وأسيا .. وهذه مواقع فيها مجالس أدارات و موظفين ومدرجه في البورصه .. وتعتمد علي أدارة بريد فعاله مضافا ألي ذلك كله المرضي النفسيين هناك أقل كثيرا .. وأعني هنا الي يدق يبي يشتري شغله أو يدز أيميل وأخر شي تتعني لبيته ومصرف بانزين وتعب ودواره وتدور العنوان .. وأخر شي يطلع واحد لوح يبي يضيع وقت ويتمصخر أو يدز هنديتهم ولا أخوه الصغير يقولك العنوان غلط أو ما طلبنا .. ويروح تعبك بلاش ..

وأما أعتمادك علي المية ألف مستخدم بالكويت فحط ببالك انه أكثرهم شاري كمبيوتر حق الشات واذا حيل مثقف يتصفح عليه جريده .. والبقيه الباقيه من المستفيدين فعليا من الكمبيوتر لا أظن أنه سيتوقفون كثيرا عند موقع يعرض بضايع أنا متأكد أنه غالبها راح يكون ستوكات من الصين .. يا أباجوره علي شكل وزه أو ولاعه تشب ليتات أو ساعة طاوله داخلها برايه ..


علي العموم أخوي الله يوفقك وخصوصا .. أنه موقع مثل هذا بروحك تقدر تديره و تكلفته قليله وبالأخص أن كنت تملك خبره في أنشاء المواقع حتي وأن كانت متواضعه ..

أما عن كيفية تسويقه فالعمليه بسيطه ولا أظنها غابت عن بالك .. أن كنت لا تزال مصمم علي رايك .. أعرض عليهم تسويق بضاعتهم مجانا في موقعك .. و لمده معينه ولنفترض شهر مثلا .. فأن أثبت نجاحه ووفر لهم الزبائن بالشكل المربح لهم .. فذلك هو أكبر تسويق للموقع .. وبالنهايه أنت من سيفرض شروطه حول قيمة الأعلان (( التكلفه )) و بحكم فعالية موقعك ونجاحه يعني تتشرط عليهم و المنه لك بعد

بس أهم شي ظبط الموقع أول وشوفلك سيرفر أستضافه محترم وكثر من هالفلاشات والزي منوه .. وخله تقول زينة عرس .. وحطلهم نمونه أعلان من تصميمك و أخذ لاب توب وأفتر علي محلاتهم وورهم الشيء علي أرض الواقع علشان يقتنعون ..

والسلام خير ختام ..