يا
لحد الحين ما دخلت على السوق الامريكي قاعد ادرس سوقهم وعن قريب ان شاء الله اذا الله قسم بدخل بس الي اشوفه المضاربة في الشركات العملاقة افضل مثل شركة ابل ومايكروسوفت وكوكا كولا وغيرها والله اعلم والي اعرفه انك تقدر تشتري نازل SELL وتربح يعني اذا السهم سلبي اخذه نازل ما يوقف شغلك ليش اغامر بسهم فيه خطورة من الناحية المالية وممكن يفلس في اي وقت ولهذا سعره في السوق تحت الدولار او 50 سنت وكمية التداول ضعيفة يعني اذا شريت كمية صعب اصرفها هذا قصدي ولاحظ كمية التداول على الاسهم القيادية بالملاين يومياً وعلى العموم سهمك pphm تم الاختراق فنياً جيد بس الاختراق كان بسيولة ضعيفه مليون سهم فقط يعني 600 الف دولار تقريباً هل تعتبر سيولة اختراق في هذه الاسهم لا علم لي لاني غير متابع لسوق الامريكي الا من وقت قريب وعلى العموم يتم التأكيد بأغلاق يومين
مشاهدة المرفق 266754
اهلا اخوي الاشعف
السوق الامريكي يختلف عن اسواق الخليج يعني تدش في عالم اخر مو مثل سوقنا اللي متعود
عليه تعجبني طريقتك قبل الاقدام على الدخول تدرس السوق الامريكي
وتاخذ فكره وخبره عنه قبل الدخول فيه
حنا ياربعك قبل 10 سنين واكثر من الباحثين عن الثراء ندرعم بالاسهم وبالاخص اسهم
البني استوك سوق otc والمرادف له هذا السوق الخطير اللي اصبح الوسطاء المحليين
يتحاشون التعامل به لانهم بالاصل لايستفيدون منه وهو سعر السهم يكون اقل من 0.01
اقل من السنت من كثر ماتفلس هذه الشركات او تتوقف عن التداول لاشهر معدوده
اويطول الوقت لايتداول عليها احد وهي موظف واحد والسوق الرسمي لايلزمها
بالاعلان عن البيانات الماليه السنويه لانها خارج اطار السوق الرسمي
وبالاصل تلاقيها مطروده من سوق الناسداك هذي اسواق البني استوك
ومع هذا تلاقي فيه شركات على سنتات وفوق الدولار والبعض اكثر
تعدل وضعها وتعود بعد موافقة الناسداك للسوق الرسمي وتطلع من سوق otc
وتحدث مع شركات قليله
نروح للسنتات وهي شركات بالسوق الرسمي شركه تعلن عن الارباع السنويه
ولكن ضعيفه ماليا وقريبه من الافلاس وتتحاشى الطرد من السوق الرسمي
بتقسيم اسهمها لان السوق الرسمي يعطي مهله اظن من يمضي على الشركه
سنه او سنتين عندي شك في المده
ان يكون السهم تداوله بالسوق الرسمي لاينزل عن الدولار فتضطر هذا الشركات
لتقسيم اسهم الشركه مايقال له تخفيض راس المال
كل شركه حسب ماترى
سهم سعره 0.30 سنت يتم تقسيمه او تجزئته عمل له سبلت
10 اسهم يقابلها سهم واحد وبعض الشركات توصل نسبة السبلت عندها
80 سهم يقابله واحد سهم دمااار
مالك السهم يتحاشى التقسيم بمتابعة الاخبار يتم الاعلان عن موعد التقسيم
او تعلن الشركه ان اليوم اخر تداول للسهم قبل التجزئه يهرب من يهرب
وينصاد من ينصاد
وفي البعض من المرات يكون التقسيم فيه ربح للي ماخرج من السهم
بس يكون ماخذه على اخر سعر وصل له السهم قبل التقسيم
واكثر المرات تتلاشى الاسهم بعد التخفيض ويطير راس المال
نروح للدولار الشركات اللي فوق الدولار تترجى منها خير وليس افضل حالا
ومع هذا تخوف لاتضمن كسرها للدولار وتصبح من السنتات المعرضه للتقسيم بالمستقبل
ان لم تعاود فوق الدولار
افضل الشركات اللي سعرها من 50 دولار واكثر للمضاربه بس يكون راس المال
لايقل عن 100 الف دولار تاخذ دولارين اقل شي مضاربه يوميا او كل يومين
ومع هذا مثلا التوقع ان الشركه راح تحقق في هالربع مثلا 30 % زيادة ارباح عن الربع
من السنه الماضيه ويتم الاعلان عن الارباح وتطلع اقل من المتوقع فتلاقي السهم
نزل لايقل عن 7 دولار او اكثر السوق الامريكي لايصلح استثماريا
إلا في ماندر في الشركات الثقيله فقط .. افضل شي المضاربه وجني الارباح يوميا او اسبوعيا
طيب راح تتسأل ليش تتداولون بالاسهم اللي اقل من الدولار السنتات
والجواب الربح اللي فيها طيب بتوفيق من الله تدبل محفظتك كم مره ليس سنويا بل في عدة اشهر
مثال شركة husa قبل ايام من 0.53 سنت الى 1.04 وهي شركه تنقب عن النفط وتحفر ابار
في تكساس سعرها الان 0.75 سنت
قبل اشهر pphm من 0.30 سنت الى 0.77 وهي اخر قمه وصل لها السهم
طيب الدخول لايتم على البركة منها مراقبة الاخبار والشارت
واظن انت اخوي ماينخاف عليك ملم بالتحليل وقراءة الشارت وبالنسبة للاختراق
يتم ولو بسيوله قليله اهم شي الواحد عليه التقيد بنقاط الوقف لان بعد الاختراق واستمرار صعود
السهم تدخل سيوله فجاءة وتطير السهم والخروج وجني الارباح بمراقبة مؤشر السيوله
و rsi السوق الامريكي مفتوح السقف وليس محدد بنسب معينه
ممكن سهم يطلع من 0.20 سنت الى الدولار
ومن دولار الى 10 دولارات والعكس من هو ملم بالتحليل اموره طيبه بتوفيق من الله
ومن ليس لديه علم وخبره بقراءة الشارت يتابع من لديه علم بالتحليل الفني
طولة عليك ولازلت مقصر لم اشرح جوانب كثيره من هالسوق الكبير
تقبل تحياتي
