abdullah6868
عضو نشط
الوالد الله يرحمة كان يتاجر بالسيارات على الخفيف وكسب سمعه طيبة بالسوق بالاخلاص والامانه وعدم غش الاخرين حتي لو غشوه الاخرين .
وكان دائما ياخذ سيارات من العم مصطفي كرم بسعر طيب ويبيعها بالحراج ايام عز الحراج قبل الغزو طبعا بفايده من 200 دينار الى 600 دينار حسب السوق وما كان يرضى اني اساعده فى البيع او تنظيف السياره او اي شى .
المهم فى سنة 1989 تقريبا شري الوالد الله يرحمه شفر كابرس 1986 اللون اخضر بسعر 3000 دينار = غلطة شاطر
وقعد عند ابوي مدة 4 اشهر تقريبا ما فيه اي شخص سئل عن السياره بسبب لونها الغير مرغوب فيه
كنا جالسين بدوانية عمي فى صباح السالم وكان الوالد ينصحني باني اتركد شوى عند شرائي اي سيارة لاني بديت اتاجر مثل الوالد بالسيارات . قلت للوالد الله يرحمه عطني الكابرس موترك اللى طايح بجبدك ابيعه لك قعد يضحك على وقالي بيع سكرابك اول وبعدين تعال بيع سيارتي المهم اتفقنا ابيع سيارت ابوى مقابل 2500 دينار يعني خسارة 500 دينار المهم ينباع الموتر .
خذيت الموتر من الوالد وغسلته ونظفته وعرضته مقابل دوار البدع فى الرميثية ايام عز البيع طبعا وحطيت رقم البيجر وكتبت3900 دينار ورديت للديوانيه عند الوالد . اول ما وصلت دق البيجر الا مدرس فلسطيني الله يذكره بالخير قالي على طول تعال ابي الكابرس وافلوسي كاش الحين
طمر الوالد الله يرحمه من الفرحه وقالي بروح معاك . وراح الوالد معاي للسياره الا هذاك المدرس مع عياله وشاف الموتر واعجبه ودفع المبلغ بالكامل والوالد رد له الثقه مثل ما وثق فينا وعطاه السياره ومفتاحها وفعلا ثاني يوم قبل لايفتح المرور الوالد واقف من الفرحه يبي يحول السياره قبل لا يهون المدرس وحول السياره الوالد وسلم المدرس الدفتر
بعدها قعدنا بالدوانيه كالمعتاد والشياب قاعدين الوالد ما يبي يفتح موضوع البيعه لانه راح يدفع لي 1400 دينار
انا نطرت الشياب لما يتكاملون لانهم شاهدين على الاتفاق بيني وبين الوالد رحمة الله .
قلت للوالد يبه حولت الكابرس الاخضر اللى بعته لك ب 3900 دينار .
عطاني نظرة قلت بقلبي هذى وراها استكانة شاى براسي
اضحكوا الشياب الله يذكرهم بالخير وقالوا الحق حق يابو عبدالله ادفع لولدك 1400 دينار
وبعد مجادلات وترجي وواسطات عطاني 100 دينار وقالي واجد عليك شتبي فيها عندك معاش
قلت هين يبه ما راح ابيع لك شي مرة ثانيه اهنيه عرف اني قنعت ب 100 دينار وقالي خلاص انا عرفت سرك تبيع بالرميثيه ابرك من الحراج والشريطيه طبعا بضحك ونفس طيبه لانه والدي
وفعلا طاح بدوار البدع وصار ينزل سياراته هناك الله يرحمه بمساعدتي طبعا بالبيع والشراء والتحويل وهذا اقل شي ممكن نسويه للوالدين لانه مهما سوينا لهم ما نلحق جزاهم
وهذى احدي مواقفنا مع الوالد رحمة الله وهي كثيره سوف نذكرها لاحقا ان شاء الله
مشاء الله عليك 
