مرحبا ياشباب وشيبان المنتدى الكرام
مرحبا يا صبايا وعجايز المنتدى الكريمات
حبيت اقولكم قصه بوصلاح هذا اللي تعرفت عليه قبل يومين
دخل علي بوصلاح الديوانيه وكان وجهه مبتسم باين عليه علامات الكبر وكذالك الصلاح
وجهه بشوش ترتاحله
كان معاه اجياس خلاهم عند الباب رحبت فيه وشرب قهوته
سألته عن اجياسه قال فيها بضاعه اضيع وقتي في بيعها بدال القعده وترزق الله
قلت من متا انت بالكويت ابتسم وبعدين بانت عليه علامات التاثر صمت لفتره
وعقب قالي انا من1964 بالكويت الله يحفظها اهي وهلها اللي مانساهم ونسا فضلهم
يقول توفا ابوي عمري 7 سنين وحالتنا عدم وكان خالي شغال بالكويت قال حق امي اباخذه
اشغله بالكويت يكد عليكم جيت للكويت وعمري بالكثير 8 سنوات
طفل يتيم ماعرف شيء ابتلش فيني خالي
يقول في يوم من الايام رحت مع خالي لي عائله كويتيه وكان فيهم مره كبيره بالعمر
قالت لخالي هذا منو يفلان قال الخال هذا ولد اختي يتيم جبته يترزق الله ويكد على امه وأخوانه
قالت العجوز خله يشتغل عندي وهنيه بو صلاح رجعتله الغصه والعبره ورفع ايده وقام يترحم عليها
يقول بو صلاح خلاني خالي بثوبي اللي علي ماغيره شيء
يقول كانت توكلني وتنومني بين عيالها وبنفس الوقت تشغلني وطرشني سو كذا وفعل كذا
وانا طفل اتهرب وروح العب مع الصبيان بالسكه اول مره زفتني وعقب
صارت تخليني وتقعد ترقبني لين يخلص اللعب ورجع للبيت انا وعيالها
يقول ماكانت تراقب عيالها ولا توقف لين يخلصون لعب ؟
بس صارت تجي تراقب عشاني وانا ماني سااائل طفل يبي اللعب
تخانقني احيااناا ومره زعلت علي وقااالت يافلان انت ماجيت للعب انت
جاي ترزق الله اهلك يبون نفعك يقول وانا بزر اسمع منيه وطلع منيه ماني داري شالسالفه
قاااالت يبه انت لازم تدخل المدرسه ودخلتني المدرسه
وكانت البس احلااا لبس نفس عيالها والله مافي فرق
وان رجعت تغديني وتشغلني حتا لو غصبااا عني
يقول مرضت مره ماخلت دكتور بالكويت ماودتني وتسهر الليل علي
ومن جيتها وهي تطبخلي وتشتريلي ملابس وتغسلهم بعد
ولاكنها هم تشغلني ماتخليني على كيفي وانا اتهرب يمين ويسااار
يقول قعدت عندها ووقف عن روايه القصه للترحم والدعاااء لهااا بحرقه
ثم اكمل الا ان كملت 16 سنه قالت لخالي خلاص شوفله شغل ثاني صار رجال
وخذاني خالي دبرلي شغل ثاني ورجع لها كل يوم اسلم عليها ومشي
يقول طاحت مريضه بعد كم سنه ورسلت واحد من عيالها يناديني
يقول شفتها بهالحاله وقعدت ابجي ماتحملت قالت يمك شوف
والله قسوتي عليك احيانااا ماهو كره فيك
وماخذيتك بحاجة خدمتك
قسوتي ابي اعلمك وربيك ودري اني ماني دايمه لك وانت وراك اهل يبون النفع من وراك
ولحقك وراقبك اذا طلعت برا لينك امانه عندي
وخليت خالك ياخذك يوم كبرت خلاص مايصير تدخل بوسط بيتي وعندي بنات ودري انك عادهم خواتك
بس هذا دين ومابغيت عقب هالسنين اقول حدك الديوانيه وانت رابي بوسط هالبيت
ابيك تحللني يفلان
يقول طحت عليها احب ايدها وراسها ورجلهااا وقول انتي والله امي والله امي
جيتج جايع وحافي وماعلي الا ثوبي بس وكلتيني ولبستيني ودرستيني
وحرستيني حتا اذا طلعت برا تتبعيني وماتتبعين عيالج
مالحق جزاج والله مانسا فضلج علي لي اخر يوم بحياتي
يقول ابو صلاح نقعد عندها انا وعيالها لين يطردونا من الطبيب غصب
لين توفت حلفت اني لادعيلها بكل صلاة وبكل سجده ومن ذاك اليوم وانا ماخليتها
من الدعاء
صد بو صلاح عن عيني وقال والله يا بومحمد مانساها وعادها مانساااها
ولا انسا الكويت كلها انا يمني حضرمي وعتز باليمن وباهلي بس قلبي يرف للكويتي
برا الكويت وافرح فيه اكثر من اليمني
ولو تصيرلي مشكله افزع وزبن الكويتي ومازبن اليمني وهو راعي فزعه بس قلبي ماهو بكيفي
قال انا عندي خير ووالله احيانا مابيع شيء بس لازلت قاعد بالكويت وعيالي باليمن قلبي ماهو مطاوعني اخليها
اتمشا وتعلل وتعرف على الناس بهالدواوين وسري بالليل
طريقته وهو يرويلي قصته وخصوصا مع هالعجوز ماني قادر انساها
