قلم حر
عضو مميز
عندنا باجر برنامج احتفالي ومن ضمن فقراته نطير حمام
أبيض ورحت الساعه ٥ مساء اليوم سوق الحمام
ولما اشتريت الحمام وحطيتهم بالقفص وقف بجانبي طفل
عمره لم يتجاوز العشر سنوات وقالي / حمالي عمي ؟
قلت له نعم ؟!
قال تبي حمالي ؟
قلت لا
وانا أحاسب البياع لقيته واقف يم القفص وقلت له شيل
وساعدته كان معاي كيس شعير وهو يحمل القفص
والسياره كانت بعيده شويه وقلبي قام يعورني على هذا
الطفل وهو يحمل قفص اكبر من حجمه !
قلت له ثقيل القفص ؟
قال لا عمي
قلت له أساعدك ؟
قال لا عمي
وصلنا السياره وحطيت القفص بالسياره وعطيته المقسوم
وقال مشكور عمي
قلت له وانا امسح على شعره انت عمي ،،، انت بطل
ابتسم الطفل وكان سعيد وادار ظهره بسرعه وانا اطالعه
ومشى خطوات وسوى حركه عورت قلبي طالع الفلوس
وحبهم وحطهم بجيبه
فعلا الطفل هذا يستحق الاحترام والتقدير
وكم كنت اتمنى لو معي أطفالي ليشاهدوا هذا المشهد
حتى يعرفوا اننا نعيش في جنة الدنيا
جنه اسمها الكويت
والآن علينا شكر الله ليحفظ لنا النعمه اللي عايشين فيها
الحمد لله حمدا كثيرا مباركا طيبا لأني مسلم كويتي
