دعوى ضد ابوي !!

[حبيبي يـ الله]

السلام عليكم ورحمة الله وبركاته..

انا امي من المذهب الجعفري وابوي من المذهب السني واهم منفصلين من عمري 8سنين وطول الـ15 سنه ابوي مايدري عنا انا واخواني وخواتي علاقتنا معاه منقطعه بس نتواصل مع اهل ابوي يدتي وعمامي وعماتي وعلاقتنا معاهم زينه وااايد.. انا وخواتي واخواني غيرنا مذهبنا الى المذهب الجعفري.. امي لمن تطلقت من ابوي ماطالبت بمؤخرها لمدة 10 سنين لانها ماتبي مشاكل وكانو متفقين ع النفقه من غير روحتهم المحكمه لكن بعد ماتزوج ابوي من جنسيه عربيه باع معاشه وراح ديرة زوجته من غير مايعلمنا ماسأل شنو ياكلون عياله لمدة 4شهور تقريبا واهني امي رفعت عليه قضية نفقه وطالبته بالمؤخر وحجزو معاشه عشان جذي رجع الديره.. وخالي لانه شاف النفقه صارت شويه علينا ماتكفينا وامي معاشها كله قروض قرر انه يزوجني ولد خالي وكلم ابوي بس ابوي ماعطاه الموافقه بس قاله يصير خير.. وفي يوم ابوي دق الصبح وقال لاخوي خل تزهب اختك وولد خالك انا بوديهم المحكمه رحنا محكمة الرقعي وعقد زواجي كان بالمحكمه السنيه وطبعا الشاهدين على عقد الزواج من جنسيات اجنبيه والمهر دينار واحد فقط ومابارك لي هالزواج وطول الطريج يسب ويقول هذولا مو عيالي بس على الورق وانا متبري منهم..*

بعد مدة سنه و3شهور تطلقت من ولد خالي لانه كان رجل غير كفء وغير سوي وماكان يصرف علي ومعاملته كانت قاسيه معاي رفعت عليه قضية خلع وتطلقت منه الحمدلله ..

مشكلتي الحين انه تقدم لي رجل من مذهبي الجعفري مهندس وما تزوج من قبل وسمعته زينه ماشاء الله وعمره 29 سنه لكن ابوي مو راضي والسبب يقول انه ***** مايجوز يزوجني ياه مع انه ولد خالي نفس مذهب الي خاطبني ولما قلتله انا منفصله صارلي 4 سنين داشه بالخامسه محد تقدملي غير هذا وواحد قبله كان ريال كبير ومطلق.. انا مطلقه وين القا واحد جذي البنات هالايام مو لاقيين رياييل انا مطلقه ابوس ايدي ويه وظهر لانه تقدملي واحد بهالاخلاق والمواصفات انا ابي الستر ابي زوج يعيشني احسن من عيشتنا انا افرش الارض وانام يم الخدامه يقولي انا اروح الجمعيه الخيريه اييبلج ريال من اهناك
(وللعلم انا كويتيه من اب كويتي وام كويتيه)

رفعت دعوى عضل الولي وجلستي الاسبوع الياي بمحكمة حولي.. ابي اعرف شكثر يبيله الحكم يطلع بعد موعد الجلسه.؟ وممكن القاضي يرفض يعني هل عذر ابوي مقنع لاختلاف المذاهب.؟ واذا رفض القاضي يصير احولها للمحكمه الجعفريه.؟

 

[حبيبي يـ الله]

نسيت اقول انه اخوي الكبير وخوالي وعمامي ويدتي ام ابوي اهم الي قالولي اروح المحكمه ارفع على ابوي دعوى عضل الولي لانه اهلي كلهم موافقين بس ابوي الوحيد معارض زواجي

 

[عبرني؟]

مرحبا اختي

السلام عليكم

الله يعينك انشالله لو هاي مواصفات الاب الله يسامحه على كل حاال

ويصلح حااله انشالله انا بقدم لك نصيحه لوجه الله مهما كان الابو قاسي لهدرجه مايصير ان حنا تقسي قلوبنا عليهم

ندعولهم بالهدايه فهو اب وانتي اكيد اختي انسانه تعرفين حقوق الوالدين من ناحيه الله سبحانه وتعالى .

بالنسبه للمحكمه انشالله انه مايطول الحكم وانشالله انه يكوون من صالحك

وخصوصا انو سبق وزوجك من واحد كان نفس مدهبك

وراح يتعاطف معك القاضي انشالله .

وراح يكون من صالحك اكثر لو ما حضر الوالد الجلسه

نرجع ونقولك الله في عونك وعوون امك وخوانك

صدقيني انا متعاطف معك حيل .

 

[حبيبي يـ الله]

الله يهديه ان شاء الله
والله يسهل علي هالزواج ان شاء الله
ومشكور اخوي على مرورك

 

[fayoona74]

راح تكسبين القضيه انشالله لان اختلاف المذهب لايعد مانع من موانع الزواج ولايدخل بمعيار الكفاءه

 

[حبيبي يـ الله]

انا متخوفه لانه دكتوري بكلية الحقوق طلعلي كتاب كبير فيه قضايا وكان في بنت عمرها فوق ال30 سنه بس مو ثيب نفسي وتزوجت بالبحرين ولمن ارجعت الديره ابوها طعن بعقد زواجها وكسب القضيه لاختلاف المذاهب !!

 

[حبيبي يـ الله]

مشكوره استاذه على ردج

 

[حبيبي يـ الله]

ابوي مااستلم الاعلان وقال ماراح ياخذه وماراح يوقع ومايبي اييه المحكمه شنو يعني القضيه بتتأجل فيدوني الله يخليكم
واذا ابوي مايه من صالحي هالشي ولا لأ ؟؟ والجلسه راح تتأجل ولا لأ ؟؟ واقدر استعجل بالقضيه ولا لأ ؟؟

 

[حبيبي يـ الله]

اتمنى انكم تفيدوني جلستي يوم الاثنين !!!

 

[عبرني؟]

اهلين اختي

انشالله خير لو ما حضر ابوك الجلسه راح يحكم لك القاضي انشالله من صالحك

بس انا مادري اول مره يرسلون له الاعلان ولا كم مره بالضبط

لو اول مره راح يدزون له مره ثانيه لحد ثلاث مرات لو ما حضر بتكون القضيه من صالحك وراح تخلصين .

اتمنى التوفيق لك اختي .

 

[حبيبي يـ الله]

مره وحده دزوله وقال للمندوب اكتب عندك اني ماني مستلم ولا ابي اوقع وماراح احضر للمحكمه والمندوب وراح للمخفر هذا الكلام امس وجلستي يوم الاثنين شالحل !!!

 

[M7ROOS]

اختي انا نفس موضوعج بالضبط والحمدالله القاضي حكم بالتزويج لاني مذهبي سني والبنيه جعفريه اول جلسه على حسب راح يستدعونج انتي والولد وابوج الي اهوه الولي راح يسمع القاضي بعدين راح ياجل الجلسه انا بعطيج من الحين لي شهر ونص جذي الله يوفقكم

 

[M7ROOS]

بعدين ليمن يحكم القاضي بالتزويج اسبوع لين يصدر الحكم بعدين تاخذون الحكم وتسووله اعلان يطلع بعد شهر وانا الحين ناطر يخلص الشهر واتزوج بس لازم يكون الولد متوضف والله يوفقكم وانصحكم نصيحة وكلو محاميه يكون احسن

 

[M7ROOS]

اذا الابو ما حضر راح القاضي يزوجكم بسرعة وبالعكس هذا الشي لصالحكم انا همن صار جذي معاي والابوي سوا جذي بعدين ثاني جلسه حضر

 

[M7ROOS]

وبعدين خلو فبالكم شي اذا الله سبحانه كاتبلكم نصيب بتاخذون بعض غصبن على الي ما يرضا الله يهنيكم بزواجكم وتتساعدون على الدنيا اميييييييييييييييييييييييييييييييييييييييييييييييييييييييييييييين

 

[حبيبي يـ الله]

اللله يوفقكم ان شاء الله يااااارب
انا ودي احط محامي بس قالولي السالفه مو مستاهله !! عشان جذي هونت وحدي خااايفه ماودي انا الي اروح

 

[حبيبي يـ الله]

اي الريال يشتغل مهندس وعمره ٢٨ سنه .. انزين بين جلسه وجلسه شكثر المده يعني اذا ابوي ماحضر الجلسه الاولى بأجلها القاضي ويدزون له اعلان مره ثانيه واذا يه او ما يه يصدر القاضي الحكم بس بعد اسبوع ؟؟

 

[حبيبي يـ الله]

فعلاً إلي ايده بالماي مو مثل الي ايده بالنار

 

[silencee]

فعلاً إلي ايده بالماي مو مثل الي ايده بالنار

السلام وعليكم ورحمة الله

أولا حياج الله اختي

يعلم الله مثل هالمواضيع نتلاشاها لآن الرأي فيها بيكون صعب

ولا تفكرين تجيبين عقد من بره ولا حتى تحطينهم أمام الامر الواقع بحمل نتيجة هالعقد حقج محفوظ بما قمتي فيه

بس طالما هذي شكواج فأبشرج بتكسبينها أن شاء الله لنفس الاسباب اللي قلتيها خاصتا أنج ثيب وحاولي قدر المستطاع بوجود الوالد بالجلسه أو بأتصاله أشرحي له الاسباب وستعطفيه هذا مهما كان فيتم الأب حتى لو قسى عليج وأنتي من كلامج أمرأه خايفه ربج وباره فيهم وأسبابج بالقضيه مقنعه ( فالقاضي راح يزوجك هالشاب أن كان مناسب ) وثقي وأمني بالله أذا هذي الاسباب شرعا الحق معاج بهالعمر وبهالحاله وأسأل الله أن يحنن قلب والدك ويخلصك من هالحيره بقرارك قبل نطق الحكم ويخاف الله في أمانته أمام ربه

عسى ربي يوفقج في مسعاج ويباركلج هالزواج

 

[حبيبي يـ الله]

Silencee مشكور اخوي الله يسمع منك و يهدي ابوي ان شاء الله ويحنن قلبه علي.. انا ماافكر اسافر واتزوج برا لانه اصلاً اهلي كلهم موافقين ومحد معارض زواجي.. امس كانت جلستي بمحكمة حولي دشيت علئ القاضي انا واخوي الكبير والقاضي سأل اخوي رايه بالموضوع واخوي قاله انه رفضه مو مقنع وان انا متزوجه من قبل من واحد مذهب جعفري والقاضي حولنا لمحكمة الرقعي للجعفريه وابوي ماحضر لانه قال روحي تزوجي بروحج انا ماراح احضر.. وان شاء الله بعد الزواج اكيد بروح اتسامح منه.. الله كريم ويسهل علي ان شاء الله