سؤال لخبراء السيارات افيدونى جزاكم الله خير

[ابو فوز]

بشترى سياره ومحتار شنو اشترى ابيه جيب صغير فمنو الافضل بين المجموعة التاليه من ناحيه الكد والكراف

تيجوان من فولكس واجن

ام اكسبوورر من فوورد ( 6 سلندر)

ام ايدج من فورد ( 6 سلندر)

ام سنتافى من هونداى ( سته سلندر)

راف 4 من تويوتا ( اربعه سلندر)
برادو من تويوتا (سته سلندر او اربعه سلندر)

سورينتو من كيا( سته سلندر)

مورانو من نيسان ( سته سلندر)

كابتيفا من شفر ( اربعه سلندر)

ترافرس من شفر(سته سلندر)

سى آر فى من هوندا الكل يمدحه بس قطع غياره غاليه على حسب ماسمعت بالاضافه الى ان سعره غالى
جيب مازدا يقولون قطع غياره غاليه بعد

الميزانيه بحدود سبعه الاف يعنى اذا برادو بشترى مستعمل لان سعر الوكاله عشره الاف اما سنتافى الجديد سعره بحدود السبعه بيكون وكاله وكذلك جيب فولكس واجن بيكون وكاله لان سعره تقريبا سبعه وكاله
وكذلك كيا بيكون وكاله فهل الافضل اشترى هالجيوب وكاله ام اشترى برادو موديل 2008 او 2007 لانه الاغلى فيهم اما فورد مادرى جم سعر الفورد وكاله؟؟ بس الشفر بيكون وكاله لان سعره رخيص وكاله

راف بيكون وكاله لان سعر الوكاله اقل درجه 6 و900 دينار يعنى = سبعه الاف تقريبا

فمنو افضل للشراء ترا جد محتار وياليت تساعدونى بالاختيار جزااااااااكم الله خير

 

[الاحمـد]

اكسبلورر وخصوصا من موديل 2008 وفوق ( عن تجربة )

او

سورينتو كيا

 

[kwto_o]

انصحك اخذ تاهو او يوكن تحصل موديل 2007 و 2008 بسعر جيد واخذ استعمال وقوه كد ومد وسعره فيه اذا تبي تبيعه وقطع غيار رخيص والكل يعرف يصلحه واترك عندك الجيوب اللي كاتبها اذا بغيت تبيعه محد ياخذه وقطع غيار نار هذا اذا متوفر بعد وحتى اللي بيصلحه بيطلب عليك غالي هذي نصيحه فقط وانت اسأل وان شاء الله توفق بسياره طيبه

 

[troy1]

اولا
كد ومد عليك بالبرادو حتى لو مستعل
مع اني ما احبه ولا اواطن التويوتا عموما ..
ثانيا
اذا بتستخدم من 3 لي 5 سنوات وانت طالع عقبها بتبيع
عليك بالفورد .. اثبت اعتماديته وانه حق كرااف بس بالبيع اكيد ينكسر سعره
عشان جذي سئلتك عن المده المتوقعه لـ استخدامك
ثالثا
حط الباثفندر والاكسترا نيسان .. من ضمن خياراتك
الكل يمدح فيهم

اما باقي الجيوب المذكوره ما اقدر افيدك فيها
والاستخاره اهم شي

 

[ابو فوز]

السياره ابيها للاستعمال طويل المدى يعنى اقل شى عشر سنوات او اكثر وانا من النوع الى اذا شريت سياره ماابيعها الا سكراب

مااحب ابيع واشترى ابى سياره استعمال طويل المدى اذا مو لى للسايق من بعدى
وهكذا

انا عندى حاليا برادو مطلعه من الوكاله من عام 1997 وللحين عندى شغال ومن احسن مايكون وما ودى افرط فيه لانه فعلا للحين ماسك روحه وخراباته لاتكاد تذكر والمكينه ماشيه بحدود 300 وللحين ماشاء الله تبارك الرحمن كانه جديد علشان جذى انا مجرب البرادو وعاجبنى جدا بس المشكله سعره الحين مرتفع مو مثل ايام اول من شريته تقريبا ب 8000 ايامها
المشكله السياره ابيها لواحد من عيالى ومايبى سياره كبيره حيل مثل تاهو ويوكون يفضل الصغيره او البرادوو

وبعدين حاب اجرب ماركات اخرى مثل فورد لانها ارخص بحكم الميزانيه بالاضافه الى انها فعلا على كلام الناس اثبتت اعتماديتها

وشكل اختيارى بيكون اكسبلوور اما نيسان باثفايندر ماادرى كم اسعاره اتوقع غاليه جدا ويمكن اغلى من تويوتا الى عنده علم باسعارها ياليت يفيدنى ؟؟

وجزاكم الله خير على جميع النصائح بس هم افضل اسال اكثر اذا شخص مجرب الاكسبلوورو هل يستحمل استعمال عشر سنين؟ او اقل عمره؟؟

 

[ابو سالم1]

دام تبيها كد ومد واستعمال ومايطيح من سعرها وقت البيع برادو 6 سلندر

 

[ابو فوز]

جزاك الله كل خير ابو سالم عل النصيحه شكلى برجع للبرادو دام اكثر من شخص يوصى فيه

وعساكم ع القوه مااقصرتوو