الدليل العقاري
عضو نشط
السلام عليكم ورحمة الله وبركاته
أسباب أرتفاع أسعار العقار الخاص البيع والبدل ؟
=================================
=================================
1- أسباب أرتفاع أسعار (( البيوت والقسايم )) العقار الخاص :-
* العقار دائماً في ارتفاع وازدياد والعقار ( يمرض ولا يموت ) ولاينزل او يموت العقار إلا بتهديد أمني مثل ماحصل بالغزو الله لايعوده انباعت الابيوت بهذاك الوقت على 20 الف
ومن الطبيعي ارتفاع الاسعار للارتفاع وزيادة التمويل من البنوك والرهن العقاري ومواكبة التضخم بكل شي حتى بأسعار مواد البناء و حتى بالمواد الغذائيه وغيرها ، ولاكن شهدنا بالأونه الاخيره ارتفاع كبير بأسعار العقار ومن اسباب ارتفاع الأسعار
أولاً : بسبب فشل البورصه ونجاح العقار وخروج التجار من البورصه وتوجهم إلى العقار الاستثمار الآمن
ثانياً : تثمين الحكومي للعقارات يزيد الطلب على العقارات وترتفع الاسعار
ثالثاً : خلال الاربع الاشهر الماضيه تم دخول غسيل الاموال بالعقار مما رفع بالاسعار
رابعاً : ومن اسباب ارتفاع العقار تملك الشركات والمؤسسات بالقطاع الخاص واحتكارهم
خامساً : عدم توفر قانون يضبط المكاتب ولاتوجد رقابه على المكاتب المفروض قانون يضبط السوم بالمكاتب مثل "تسجل أسم السوام - تلفون السوام - تاريخ السومه "
وكثره المكاتب الجواله واكثر اللي يشتغلون بالنت وغير النت او بالجرايد ماعندهم رخص او ماعندهم دفتر دلاله ورخصتهم ايجار واستئجار أو رخصتهم مقاولات يشتغل بالبيع والشراء الله يرزقهم ولاكن لاتخرب على اهل المهنه سمعتهم وفي سماسره ماعندهم رخص يخافون الله بالشغل اكثر من اللي عندهم رخص " والعكس صحيح " ولو خليت خربت "
سادساً : تدخل (( بعض )) المكاتب بأسعار العقار مثلاً انعرض علي قسيمة بسعد العبدالله المالك يقول كم تسوا القسيمة انا قلت له 245 السعر يرتفع خمسه إلى عشره وينزل خمسه إلى عشره حسب التشطيب قال اشتقل عليها وانا بياع ، وبعد فتره جبت له زبون شراي فقال المالك ابو عامر انا ماني بايع بهالسعر في مكتب قالي اجيبلك 275 ألف !!!! انا قلت للمالك والله ماراح يجيبلك المكتب هالسعر شنو خلينا للارواق والقسايم الثانيه !!!
وللعلم كثير من المكاتب يجهل هالمعلومه من مصلحت المكاتب نزول الاسعار اذا كانت الاسعار مناسبه يسهل البيع واذا الاسعار مرتفعه صعوبه بالبيع
سابعاً : طمع وجشع (( بعض الملاك )) البعض لما تدق عليه وتقوله قسيمتك بالقيروان كم وصل السوم يقول السوم على القسيمة 250 وبالحقيقه مانسامت بس يبي يرفع سعر قسيمته ومن حقه ان يبع قسيمته بالسعر اللي يبيه ولاكن مو بالكذب والخداع وهذا يعتبر (( من النجش ))
وكل بايع يبي اعلى سعر
لاتوجد قناعه إلا مارحم الله
سابعاً : ومن اسباب ارتفاع الاسعار السوامه اكثرهم موجاديين ولا شرايه يطير القسيمة يسوم 250 ألف ويطير صاحب القسيمه وبالاخر يروح يشتري بيت حكومي سد وصاحب القسيمه محتفظ بالسومه مع علمه ان السوام شرا بيت
2- من أسباب أرتفاع أسعار (( البدل الأراضي والقسايم ))
* أول أسباب أرتفاع أسعار البدل للأراضي والقسايم المواطن قام يتاجر بالبدل لو كل واحد ينطر منطقته كان ماوصلت الأسعار هالحد يتصل واحد من سكان الجهراء يقول اراضي ابو حليفه كم تسوا " يفكر بالبدل قبل لايدخل المنطقه "
واحد من المنطقه العاشره مو من منطقة الجهراء ليش يدخل جنوب الجهراء ( سعد العبدالله ) مو عشان يبدل بطلب ويحط كم ألف بجيبه صارت تجاره ، المفروض قانون من الاسكان التوزيع حسب عنوان صاحب الطلب ولا راح تشوف بدل مع طلب إلى ماندر راح يكون البدل السد مع الموقع
ثانياً : اول المسموح بالبدل لغاية 98 وكانت الاراضي بسعد العبدالله البطن والظهر على 15 الف والحين كثرة الطلبات لغاية 6/2003 وقلة بالاراضي جابر الاحمد اكثرها غير رسمي بالبدل والقطاع اللي مسموح بالبدل اسعارها مرتفعه وشمال غرب صليبخات غير رسمي بالبدل وقلت المشاريع وكثره الطلبات
ثالثاً : ولا يوجد للمكتب العقاري سبب بأرتفاع الاسعار عمولة المكتب ثابته ألف دينار اذا تم البدل 20 ألف او 60 ألف العموله ثابته
وبالأخير البايع يدور أعلى سعر والشاري يدور الرخص
والبايع او الشاري او المكتب منهم (( اهل الذمه و المصداقيه )) ومنهم (( لامصداقيه ولاذمه ))
=================================
اذا اصبت فمن الله
واذا اخطأت فمني ومن الشيطان
وهذا وجهة نظري المتواضعه ويمكن يخالفني البعض ولاكن هذا ما أنا ارها اتمنى من عنده توضح او معلومه يفيدنا فيها
اخوكم / ابو عامر العنزي
94499002
والبايع او الشاري او المكتب منهم (( اهل الذمه و المصداقيه )) ومنهم (( لامصداقيه ولاذمه ))
=================================
اذا اصبت فمن الله
واذا اخطأت فمني ومن الشيطان
وهذا وجهة نظري المتواضعه ويمكن يخالفني البعض ولاكن هذا ما أنا ارها اتمنى من عنده توضح او معلومه يفيدنا فيها
اخوكم / ابو عامر العنزي
94499002