يا جماعه شاركونا التقيم بين فلتين !!!

[النائب]

السلام عليكم ورحمة الله وبركاته

بكل صراحة احد الاخوان يسال
قلت له سوف اطرح الموضوع للنقاش عند اصحاب الاختصاص ونتابع

وانتم لها

مطلوب تقيم بين فلتين

مثلا
الاولي

فله 400م في شمال غرب الصليبيخات!!! قلنا مثلا علي ثلاث جهات دورين ونص وسرداب

والثانية
في هدية قطعه 5 فله 400م علي شارع واحد امامها جزيره تقريبا 10م و نفس بناء الاولى

السؤال ايهم ا علا سعر
اذا كانوا نفس مواصفات البناء
او السؤال بشكل اخر
منو يدفع الفرق في حالة البدل؟؟

والف شكر لكل من يشرفنا ويشارك في ترك التقيم

دمتم بخير

 

[النائب]

ممتاز نتابع

 

[abuhbib]

بدون شك الاولى افضل

واللي بهديه يدفع الفرق

اولا الموقع

ثانيا البنيان جديد ولا يحتاج ترميم

بس المهم والاهم انت وين تحب تسكن

هذي وجهة نظري

وتقبل مروري

 

[النجدي2007]

علي حسب الشاري اذا كان يرغب المنطقة العاشرة او غرب صليبخات
بس الي اشوفة افضل ان غرب صليبخات تسوي مكانها بوسط الديرة ومنطقة صغيرة وعلي البحر وكل الخدمات عندها من مستشفيات واسواق وووو , فعلا مكانها استراتيجي الله يبارك لاهلها

 

[أناسة]

شمال غرب الصليبيخات احتمال لا يصرح لهم ببناء سراديب على حد علمي ولم أتأكد من المعلومة ١٠٠ ٪ وابشركم تم تركيب اكثر من محول .
اما موضوع البدل يرجع لصاحب الطلب هل يرغب بالمنطقة وان كان يرغب بالمنطقة يعود التغييم للسوق مع عدم المبالغه بالسعر من قبل صاحب العرض

 

[صقرالبحر]

اللي له الحاجه يدفع البدل

 

[(ابوفواز)]

تري المنطقه العاشره غاليه حيل اكثر من اللي تتصورون كثافه سكانيه عاليه وقلة مشاريع

 

[النائب]

يا مال العافيه يا بو حبيب....
وبغض النظر عن وين احب اسكن
لو افترضنا كاستثمار ........... افهم من رايك ان غرب الصليبخات افضل ونقول 1

مشكور يالنجدي ...... تقول الصليبيخات افضل ......ونقول 2

اناسه ...... مشكور علي المشاركه بس نبي نعرف يا ابيض يا اسود انت مع من كاستثمار

صقر البحر .... لاهنت بس للامانه كنت كاتب في الموضوع ملاحظه وتقول : يا صقر البحر تابع فقط
ومسحتها لاني كنت عارف رايك و مع هذا فعلا اللي له الحاجه يدفع

مثلا واحد عنده
جيب ومو في حاجته محتاج كامري نقول له بدل مع الكامري وادفع !!!!
او يالله جيب 2011 وجيب 2007

ومع هذا تراي الكامري ممتازه وانا من عشاقها هههههههههه

ابو حمد علي البال وصدقني انا بنتظار قرار صاحب القسيمه

ابو فواز والله اني معاك ومصدق كلامك انا صارلي 3 شهور ومعاي 200 ومن بيت في بيت ومن حاره في حاره ومن زنقه في زنقه
ما حصلت بيت !!! بيت مو فله والله بيت بس يكون موقع بهذا السعر
بس مو اغلي من داخل الديره


مشكور لكل من شارك
وننتظر المزين ولا يزال غرب الصليبيخات في المقدمه

 

[صقرالبحر]

حياك يالنائب

كلمن يشوف الفيلا حقته. جيب. ههههه

 

[abuhbib]

موضوعك تقريبا مفهوم

اخوي ابن القسيمه اللي بغرب الصليبخات

وبيعها واشتر احلا قسيمه بالمنطقه العاشره وشرط يبقى عندك فلوس للفرش ههههههههه

 

[صقر3]

حالياً كم سعر قسيمة هديه شارع واحد واسعار شمال غرب الصليبخات نقرنها مع منطقة القيروان 3 واجهات من 270 الف الغاية 320 الف علي حسب الارتداد ويمكن اكثر من هذا سعر

 

[فرحان جداً]

يبه ماكو على الموقع...شارع واحد محكور بين الناس وان جوك ضيوف توهقت فيهم وبجيرانك

ثلاث شوارع تبدل مع شارع واحد...مجنون انت والا صاحي:> خلك بمكانك احسن ومنطقه جديده وباجر بتعرف على جيرانك وتتغير حياتك وان شاء الله انها خيره