حتي الحراج منعوه التجار والله قهر اللي يصير

[K.KHALED]

يا جماعه عمركم سمعتوا عن دوله بالعالم كله مافيها حراج سيارات ؟؟؟

بس الكويت والسبه التجار والحكومه الفاشله قاطين الناس وسط البر بين الخرايب والمخلفات ومرتع المجرمين وكل واحد يدبر حاله حتي حراج الصومال ارقي منا !!

ليش يا حكومه ليش

 

[sound blaster]

أفضل مشروع حالياً في الكويت إقامة حراج سيارات .. بس السؤال.. منو التاجر إلي
أمّه كَبتها عَامر .. وراح ترسي عليه المُناقصه ..

 

[كوستا]

اعرض سيارتك بالوسيط او 8080 او اى جريده او كويت كار او حراج السيارات والمنتديات والحمدلله والتجار مالهم علاقه الله مغنيهم عنا عن حراجنا ,,,,والحكومه الله يعينهم على مشاكل الدوليه و الاقليميه
.......................
والرزق على الله والتوفيق من الله
بس انت توكل على الله
وَمَا مِنْ دَابَّةٍ فِي الْأَرْضِ إِلا عَلَى اللَّهِ رِزْقُهَا

 

[HABBOOB]

والله فعلا الوضع يحتاج وقفة من أعضاء المجلس البلدي أو الأمة علشان يضغطون على البلدية او التجارة يحطون حراج.

حراجنا صار قمة المسخرة والنصب والإحتيال وكلهم أغلبهم مو كويتيين ويفتخر بالنصب عيني عينك.

ذاك اليوم قلت للدلال السيارة اذا فيها شاصي ولا شي يرجع فلوس الدلال قالي لايبا مايرجع شي فلوسك اخذها من هالشق لي هالشق لا والمشكله يقولي عشاي 50 دينار والسيارة قيمتها تقريبا 1400 ليش ... قلت له خلاص يبا سيارتك مانبيها ماكثر الله الا الوكالات والجرايد المجانية.
على أيام قبل حراج الرقعي كان ياخذ على السيارة تحت الـ 2000 ياخذ 20 دينار وتحت ال 5000 ياخذ 30 وفوق ال 5000 ياخذ 50 هذا المعروف.

والمشكلة يجون ناس من برا من السعودية وياخذون سياير الشريطية المكسرة والملمعة واللي فيها شاصي ويفشلونا فيها تعال عاد فكنا منهم .

وانا والله دايم انصح قرايبي السعوديين دايم كل مايجون مايروحون الحراج والله على وضعه الحالي..

لكن حسبنا الله ونعم الوكيل على اللي تسبب بالوضع هذا ولاهو راضي يعدله ولا يسنع الحراج.

 

[New Style]

ما يستفيدون التجار من الحراج

فا اغسل ايدك يفكرون فيك او في اي مواطن بسيط

 

[سالم العبيد]

والله ياليت يسكرون الحراج تدري ليش لان كله نصب اب نصب والدلالين اكبر نصابين لاني مره رحت ابي ابيع سيارتي وقاعد يكسر فيها يقولي لا ماتجيب وخليته يولي وبعتها لواحد وهو وصلها لسعر رخيص وقلت والله حرام عليه حتى العشرين قلت للرجال انا اطلع لك السياره وبعتها ومره شريت من الدلال كان يدلل على سياره ويقولي شرط الفحص قلت اوكي هذا سعري وبعد انا متأكد انه السعر الي قالي عليه وهمي حاطه هو بيع نجش قال نكلم راعيها وقال اوكي بعناك واعطيه عربون ويسجل وقلت لراعي خل نفحص قال شنو فحص قلت الدلال يقول شرط الفحص قالي لا يبا انا قايل له حديد سكراب ورحت للدلال وقلت له حجي انت قلت لي شرط الفحص وينكب والله رجال كبير نكب قلت له عيب ياحجي انك كبير وهل سوالف مو لك قالي لا انا ماقلت لك شرط الفحص قلت راعي السياره استحي وشاف الدلال يجذب قالي ولدي اخذ عربونك وعطاني والدلال يقول لا مايرجع لو مو كبير وكبر ابوي والله كان دست فوق بطنه قلت له وكل عيالك فلوس حرام وعيش عليهم اخرتك تحترق فيهم وسلمت على راعي السياره ورحت ولا همتني ال عشرين دينار ومع مرور الوقت كنت ابي سياره واشوف نفس الدلال وعنده سياره نفس سيارتي الي بعتها رحت له وقلت كم واصله طبعأ مو عارفني هو يقولي اب 750 انصدمت وقلت سيارتي يقولي حدها 350 400 ؟ وسيارات ربعك 750 والله زين سووه لان حاس بان فلوسهم حرام بحرام نصب اب نصب ومره رحت للحراج ودلال توه صافطه عنده السياره ويقول كم فتح الباب محد رد عليه وفجأه يقول 1500 انصدمت وانا واقف يمه ورحت له وقلت الحين منو فتح الباب قال انا ويدري اني اشوفه لو ماشوفه قال واحد والسوم 1500 قلت له انت تدلل او تشتري قال لا انا ادلل قلت شلون تحط للسياره سعر واحنا الشرايين ينطر واحد مار ويشوف السعر ويزود وهذا بيع النجش بعينه وهو يقول انا اترزق الله اي رزق تبيع بيع نجش ورزق الله لايوفقه وانا مع ازالت الحراج نهائيأ ويخلونها مكاتب وجرايد ومنتديات احسن مع انهم كلهم نفس الشي بس جذب مانشوفه احسن من عيني عينك واذا السياره لواحد من ربعه الله اهني يختلف الحجي والنت هم بعد وعندي كان بي ام موديل 95 740 لارج مجدد 2001 وكنت ابي ابيعه ويقولون لي قديم 95 مع العلم كلهم نفس الشي لحد2001 بس تختلف الشاشه المهم يكسرون فيه وهذا قديم مو زين مع العلم انه احسن موديلين بهل بي ام هم 95 و96 المهم لقيت واحد بالحراج موديل 95 قلت لقافه خل اشوف كلامه قلت له جم واصل يقولي 650 قلت له واجد شلون موديله 95 قال لا من صجك احسن موديلات للسياره 95 ههههه وقلت بقلبي حسبي الله ونعم الوكيل الشي الي عندهم زين والي عندنا مو زين المهم ال 20 بأي طريقه وانا اختم كلامي للناس الي مشت على هل بيع المشبوه اعلم ان الله يراك ودينار حلال ولا مليون حرام وباجر وراك حساب وماراح تاخذ من دنيتك غير اعمالك الصالحه واذا انت ماخذ فكره انك شاطر جذي الشطاره ماتجي بهل طريقه انك تحط سعر وهمي وخلك سيده بالبيع والشراء صدقني راح تلقى الرزق الحلال والله احسن من الغش او بيع النجش او المزايده من ناس تعرفهم المهم هذا وجهة نظري وياليت كل واحد يشتغل داخل الحراج يدخل ويشوف وانا واحترم وجهة نظر الكل

 

[Se7T]

الحراج بلا رقابة وبلا قوانين
ومرتع ضخم للنصابين والحرامية الا من رحم الله
اذا كان هناك ضوابط قانونية تحمي المستهلك من هؤلاء الباعه فلا ضرر من اقامة حراج
لكن بنفس النظام القديم فالأمر مرفوض

وللعلم مكان الحراج الجديد الذي خصصة المجلس البلدي ووافق عليه حسب ماقرأت سابقا وان لم تخمي الذاكرة
فهو قريب من مقبرة الجهراء
وقيل بأنه خلف منطقة النسيم بجانب الجواخير الجديدة

 

[S c O r P i O n]

خمة الدلالين اللي بالحراج والله مافي فرق بينهم وبين عزكم الله الغنم تقول داش حضيرة
صراخ وهواش وسب ولعن وحلفان من اول مادش لين تطلع ماتسمع الا والله ووالله وكلة جذب بجذب
حكومتنا الرشيدة غيبوووبة من زمان الله يصلح الاحوال

 

[ليث متواضع]

من أول ما حطوا حراج السيارات هناك على خط الجهراء
ماعمري طبيته لما أمر على الشارع وأشوف الزحمه والغبار وسوء التنظيم
إلى متى هذا الوضع السيئ

 

[الهارون]

الحراج مسكرينه والسيارات محتكره جمس بهبهاني شفر الغانم تويوتا الساير البابطين نيسان؟؟ ليش مافيه في هالبلد إلا هالولد ويتحكم بالاسعار بكيفه ليش السعوديه كذا وكيل فيه واسعار تنافسيه بينهم حتى كراج الوكاله يكون فيه تنافس واسعار رخيص ... لاتقولون السعوديه كبيره وتحتاج كذا وكيل ... زين محتركه الكويت الف سنه والحين 3 شركات اتصال وشوف شلون الاسعار والعروض تتغير ... اخوانا العرب يسمونا خارج الكويت يهود العرب

 

[الله ثم الوطن]

والله يااخوان الحراج على حســــــــــــــــب السوق مرات تشوف سياره موديل 2000 بـ 500 دينـار وثاني يوم تشوف نفسها بـــــ 1500 تنصدم صراحه .. لان مافي تنظيم وتختنق وانت داخل من زحمة السيارات وخربطـــــــــــــــه المواقف وناس بالنص وناس بالطرف وصراحه يازيـــــــــن حراج الرقعي قبـــــــــــــــــل صراحه عجيب والموتر اشكال وانواع لاكن نتمنـــــــــى يكون فيه ساحه كبيره لعرض السيارات فقط ومصافط منظمه والله مشروع عجيب مايكلف الا الارضيــــــــــــــه ازفلــت والمساحه تكون كبيـره واعلانات وترعاها شركه محترمه .. يصير معرض عالمي وشغلك مرتب .. والله يرزق المسلمين

 

[560SEL]

والله اي حراج بالخليج نصب عينك عينك روح شوف الحراج اقصد المزاد بالدول الاوروبيه وامريكا وشرق اسيا واسمه مزاد مو حراج حتى من اسمه كانه سوق غنم
المزادات بالدول المتقدمه تشوف السياره ويعطيك تاريخها كله من طلعت من المصنع وفيه رقابه عليهم وعلى الاسعار وكل شي له حقه الزين زين والشين شين لكن الله يخلف علينا وين ما رحنا منصوب علينا ومانقدر نتكلم ولا نشتكي ولو اشتكينا ماخذنا لاحق ولا باطل
انا افضل استورد سياره من اوروربا او امريكا او اليابان افضل لي واريح لي
انا مره كنت ابي اشتري مرسيدس من اليابان بالمزاد لكن كان المزاد متعدي ميزانتي
والله صادقين ويقول لك العداد مغير والرفرف مصبوغ والسياره حاشتها دعمه لا لف ولا دوران وفيه نصب عندهم لكن من الباكستني والبنغالي والهندي صارو شريطيه باليابان ونصابين ويبدلون عدادات سبحان الله دائما زبالة البلد او المقيمين هم سبب كل المشاكل والنصب المقيم جاي يدور رزق لكن اهل البلد المنحطين هم المشكله اللي همهم مادي ودنيون ويتعاملون معك بدناءة نفس وحقاره ونذاله ليش ما ادري لا اخلاق ولا احترام ولا ضمير
ما اقول الا حسبي الله ونعم الوكيل فيهم بس

 

[الغريب العجيب]

الحراج ايام تصيد فيه سياره حلوه ورخيصه وايام ينصبو عليك وبصراحه اسعار الحراج بالنسبه للسيارات النظيفه ارحم من اسعار المكاتب