للبيع تاهو موديل 2011 lt

[بوعبدالوهاب1975]

للبيع تاهو موديل 2011 lt اللون موكا بني عودي اللون الجديد ومن داخل بيج عليه نياكل من الوكاله وتظليل حراري هم من الوكاله وملبس من الداخل من أول ماطلع من الوكاله بيمه شامل ذهبي وتشغيل من بعد وسنسر سله وعليه دعاميه نيكل من الأمام وديكور خشب ماشي 8000 للحين مادش السيرفس الأول نبي نسمع السومات الطيبه ......
للأستفسار :60363637

 

[بوعبدالوهاب1975]

للرفع

 

[BMW750]

السلام عليك
ماعليك امر راجع الخاص

 

[qazasd]

8000
66754559

 

[q8welcom]

8200وهذا رقمي ٥٥٨١١٦٦٦

 

[m-m-m]

8300
97921210

 

[aw99]

4350
مع كامري 2010 أبيض

 

[BN-GHAIM]

9000 - 66268855

 

[بوعبدالوهاب1975]

تم البيع والله يبارك للشاري ومشكورين على المشاركه

 

[bo zaid]

الى جميع الاخوة الرجاء الدخول للاهمية والمشورة

السلام عليكم ورحمة الله وبركاته
انا الشخص اللي اشتريت التاهو من الاخ بوعبدالوهاب 1975
والاخ يقول الله يبارك للشاري وانا اقول اللهم أمين
بس ازيد عليه واقول عسى الله لا يبارك للبايع

والشخص باعني السيارة على اساس انه فيها تأمين شامل و انا شفت ورقة التأمين الشامل لما شفت السيارة أول مرة
واشترينا وحولنا واستلم الفلوس كاملة ولله الحمد وبعد استلام السيارة شيكنا على الاوراق ما لقيت ورقة التأمين الشامل اتصلنا عليه وقال يمكن الخدامة شايلتها صدقناه واحسنا الظن فيه
اتصلنا فيه مرة ثانية يقول مو لاقيها واتفقنا نروح شركة التأمين نطلع بدل فاقد ويحول البوليصة لاسمي ومن تاريخ شراءنا للسيارة من 18/09
ولغاية الحين على اليوم وبكرة وباشر والسبت والاسبوع الياي مو راضي يعطينا التأمين اللي قيمته فوق 400 دينار
وانا من اول ما لقيت ورقة التأمين مو موجودة سبحان الله حسيت في شي غلط ولما وعدنا اول مرة و ماياب التأمين تأكدت انه كذاب وانا طولت بالي عليه
كل هالمدة على امل انه يتقي الله ويمكن يرجع عن غشه
وانا مشكلتي اني شاري السيارة حق اخوي واخوي كل مايشوفني يقولي ابي ابيع السيارة كرهتها
وانا ماكتبت بالمنتدى عن اللي صار حتى تاريخ اليوم عل وعسى اني اخذ حقي منه وانه يستحي من حاله
كان واعدني اليوم ينهي الموضوع وقاعد ادق عليه ومايرد حسبي الله عليه ونعم الوكيل
وانا صراحة صبرت بما فيه الكفاية وقررت اني اتكلم عن اللي صار معاي عشان الاخوة يكونون على حذر ولايصير معاهم اللي صار معاي و اذا في احد من الاخوة يعرف الشخص اتمنى ان ينصحه يتقي الله ويعود للصواب ويردلي حقي واذا ماصار ما اقول الا حسبي الله ونعم الوكيل عليه وعلى امثاله واسال الله لا يهنيه بفلس من فلوسي اللي خذاهم مني

 

[bo zaid]

اليوم اتصلت بالاخ بوعبدالوهاب ورد علي واتفقنا انه يرد لنا مبلغ مقابل التامين وهذا اللي صار
بحمد الله وتوفيقه حبيت ابلغ الشباب للامانة

 

[بوحمد 2007]

اليوم اتصلت بالاخ بوعبدالوهاب ورد علي واتفقنا انه يرد لنا مبلغ مقابل التامين وهذا اللي صار
بحمد الله وتوفيقه حبيت ابلغ الشباب للامانة

السلام عليكم

ممكن توضح اكثر اخوي بوزيد او تقولنا شنو صار بعدها
لأنك بصراحة شوهت سمعت الريال وخليت الناس تدعي عليه
ولأني تعاملت مع الاخ بوعبدالوهاب
وكان جدا راقي وواضح بتعاملاته معاي شخصيا بأكثر من بيعة​

 

[bo zaid]

السلام عليكم شباب بناءا على طلب الاخ بوعبدالوهاب وبوحمد اوضح مرة ثانية
اللي صار بالتفصيل بعد موضوعي اللي حطيته بالمنتدى بخصوص مشكلتي
ثاني يوم الصبح دزيتله رسالة وطلبت منه يخلصلي المشكلة يا اما يحولي التامين او يردلي الفلوس
وانا بكل صدق قبل ايام من وضعي للمشاركة ولما يأست من انه يحوللي التامين
قلتله ردلي ١٠٠ دينار مقابل التامين اللي يسوى ٤٠٠ دينار لانه صراحة خلاص مليت
ابي اخلص الموضوع باي طريقة و ١٠٠ دينار احسن من لا شيء ووافق بوعبدالوهاب
ووعدني الجمعة يردلي الفلوس ومادقلي الجمعة وانتظرت للسبت وصرت ادق عليه
ومايرد طول اليوم وبعدها حطيت اللي صار معاي بالمنتدى
ولما كلمني بوعبدالوهاب اعتذر مني انه كان ناسي التلفون عند عمه وقالي
انتظر عليه ٣ ايام عشان الفلوس ورديت عليه مثل هلمواضيع لازم تخلص بسرعة
وبنفس اليوم شان يقولي تعال الدوام الحين وفعلا ييته الدوام وسوالي ورقة مخالصة
وقعنا عليها اثنينا وعطاني ال١٠٠ دينار مقابل التامين وخلصنا الموضوع وانا سويت
هذا الاتفاق من غير علم اخوي صاحب الموتر ولما درى انه اخذنا بس ١٠٠ دينار مقابل
التامين زعل وايد وراح دز رسالة حق بوعبدالوهاب وقاله ترى انا مومسامحك وزعل
بوعبدالوهاب ودق علي واعتذرت منه وقلتله انا اتحمل المسؤولية وماعليك ورحت عطيت
اخوي ١٠٠ دينار من جيبي لاني حسيته مو راضي والله يسامحنا اجمعين
وهذي القصة بالظبط مثل ماصارت والله على ما اقول شهيد وانا كنت قاصد بتوضيحي
ما ادش بالتفاصيل بس بناءا على طلب بوعبدالوهاب والاخ بوحمد حبيت اوضح اكثر
والسلام عليكم ورحمة الله وبركاته

 

[بوحمد 2007]

يعني الريال اللحين بري الذمة

خاصتا بعد ماوقعت على ورقة المخالصة اللي بينك وبينه
وكنت مقتنع بالمبلغ ال 100 دينار

ولا جان ماوافقت عليها

اما بخصوص اخوك هذا الشي بينك وبينه

عندي سؤال اخير اخوي بوزيد اذا تكرمت بخصوص البيعة

هل ذكرلك بوعبدالوهاب ان السيارة مأمنة شامل اثناء البيع ولا بعد اتمام البيعة
ولك مني جزيل الشكر​

 

[bo zaid]

يعني الريال اللحين بري الذمة

خاصتا بعد ماوقعت على ورقة المخالصة اللي بينك وبينه
وكنت مقتنع بالمبلغ ال 100 دينار

ولا جان ماوافقت عليها

اما بخصوص اخوك هذا الشي بينك وبينه

عندي سؤال اخير اخوي بوزيد اذا تكرمت بخصوص البيعة

هل ذكرلك بوعبدالوهاب ان السيارة مأمنة شامل اثناء البيع ولا بعد اتمام البيعة
ولك مني جزيل الشكر​

بخصوص سؤالك اخ ابو حمد اذا تشوف بداية الموضوع اللي معروضه في السيارة تقدر تلاقي الجواب
طبعا السيارة معروضة بما فيها التأمين الشامل الذهبي و الاخ بوعبدالوهاب ورانا بوليصة التأمين قبل ما اشترينا السيارة