شسالفة جلاكسي s2

[ابو برهوم]

يعطيكم العافية

ملاحظ هالفترة كثير من الشباب قاعد يبيع جلاكسي s2 مع اني اسمع انة افضل من اي فون 4 بمراحل
ياريت اللي استعمل جلاكسي s2 يقولنا شنو اللي اعجبة بالجهاز وشنو اللي ما اعجبة
يعني تنصحوني اشتري جلاكسي s2 ولا اصرف نظر عنة

بنتظار آرائكم​

 

[الهدف البعيد]

علي حسب ميول المستخدم...
الاندرويد نظام مفتوح وغير مستقر...
الايفون نظام مقفل ولايحتاج تنزيل رومات..
الايفون جرفكس الالعاب افضل بكثييير من الاندرويد...
الماركت بالجلكسي اغلبة بالمجان..
الايفون بدون جلبريك يبقي نظام بارد وظعيف

 

[land1]

كفى و وفى البهلوان في الرد عطااااك الخلاصة بين الاثنين

 

[6alabaty]

الايفون جسمه الخارجي اقوى من الجالكسي بكثير يعني يتحمل صدمات اكثر
الايفون مافي جافا لكن الجالكسي فيه (مو شرط اساسي او مهم )

في التصفح بالانترنت الجالكسي افضل واسرع من الايفون بكثير

وكل هذا يرجع للمستخدم شنو يبي بالضبط

 

[6alabaty]

عن نفسي انا استخدمت الاثنين بس ما حبيت الجالكسي

وهذي مقارنه بالفيديو وبشكل واضح وحلو
http://www.youtube.com/watch?v=2ca_eaDLe-I

 

[ابو برهوم]

اعتقد الغانم يبيع جلاكسي s2 تعتقدون نسخة الشرق الاوسط ( الاصلي )
ولا تعريب اي كلام​

 

[ابو برهوم]

للرفع

 

[شاب محترم]

شوف اخوي انا استعمل الجهازين


الجالكسي يتميز باشياء والايفون باشياء .. بشكل عام للامانة .. عندي الجالكسي احلى من الايفون



مميزات الجالكسي وايد (وهي مميزات كل اجهزة الاندرويد مو بس الجالكسي)

اولا .. نظام مفتوح .. تصممه على كيفك .. في شي اسمه ( widgets ) روعه .. وفي شي اسمه (خلفيات متحركة ) خيال .. تقدر تركب رومات ( يعني نظام التشغيل) باشكال والوان اللي يعجبك .. عكس الايفون اللي هو ايقونات جامدة ثابتة ما تتغير .. نظام ios ينزل من شركة ابل ما تقدر تسوي فيه ولا شي


ثانيا .. الجالكسي يعتبر كأنه لابتوب .. عكس الايفون اللي انا اعتبره نص لابتوب .. كل شي بتسوية بالايفون لازم تشبكة بالكمبيوتر على الايتونز

بتحمل صوتيات فيديوات صور .. بتسوي باك اب .. بتحمل فيرجين يديد .. كله كله .. لازم ترجع للايتونز .. ولازم صيغ معينة للفيديوات .. او انك تحولها الى صيغ معينة .. يعني شغلة مملة وغير عملية صراحة .. اما الجالكسي كأنك تستخدم لابتوب .. نزل الاغاني الصور الفيديوات بالصيغة اللي تبيها من النت على جهازك مباشرة بدون الايتونز وتعقيداته

ثالثا .. بالايفون انت محروم من ابسط الحقوق المهمة .. مثل اليلوتوث والجافا والفلاش .. اما الجالكسي لا طبعا

رابعا .. اكثر برامج والعاب الايفون موجودة بالجالكسي مثل الانقري بيرد نييد فور سبيد والفايبر والتانغو واتساب .. طبعا مو كلها .. لكن وايد منها

خامسا .. الجالكسي اس 2 سرعته بالاداء والالعاب hd واللمس حقه .. يعطي الايفون 1 صفر

سادسا .. كاميرته رووعة رووعة .. وشاشته اللي سوبر اموليد عجيبة .. ودك بس تطالعها وما تشيل عينك ..ومواصفاته تقارن بالايفون 5 اللي لليلحين ما نزل .. لانه معدي مواصفات الايفون 4 بمراحل



اما العيوب .. صراحة اهم عيب عندي .. وهذا عيب قاتل بكل اجهزة الاندرويد . اللي هو البطارية

الجالكسي اس 2 يصرف بطارية بشكل غير طبيعي بالمرة .. يعني احمد ربك اذا كمل معاك يوم .. يعني لا تستغرب اذا شحنته مرتين باليوم !

العيب الثاني .. ان النظام لليلحين ما نشهر بالكويت وبدولنا .. مع العلم انه محطم الاسواق عالميا .. علشان جذيه الكل عندنا يبيعه .. لان الناس تبي شي متعوده عليه .. ما تحب اليديد الا لمن ينتشر عند الكل .. مثل سالفة الايفون 2 جي اول ما نزل .. وسوني بلاي ستيشن 3 ببداياتها .. الكل كان يبيعهم اول ما نزلوا .. واللحين طالع بكل بيت تلاقي ايفون وسوني 3 وغيره وغيره



فالسؤال هو .. هل انت من النوع التقليدي اللي تحب الشي اللي انت متعود عليه .. ولا انت من النوع اللي تحب تجرب الشي اليديد وتحب تتعلم وتواكب العالم ؟

اجابتك هي اللي تحدد اختيارك​

 

[q8.sms]

شاب محترم ...عطاك من الاخر والراي المضبوط وكفي ووفي

 

[محمد11]

والله انا استخدمته وما شاء الله عليه ممتاز بكل شي
وفي التصفح ما أظن فيه جهاز مثله

 

[mosawi]

السلام عليكم

أخواني وإعزائي ما يحدث اليوم من تنافس بين شركات الهواتف والحواسب اللوحية عبارة

عن تنافس في نظم التشغيل (operating system) أكثر من ما هو ظاهر بأنه تنافس الأجهزة

كهاردوير ..

بمعنى .. أي أن أي شركة حالياً ومهما كان حجمها وانتشارها المحلي والعالمي باستطاعتها

على سبيل المثال الظهولر بجهاز يحتوي على كاميرا عالية الجودة ( 8 او 10 او 12 ميجا بكسل )

أو حتى أكثر من ذلك .. ولكن بالنهاية ما يحدث اليوم أنه المستخدمين يتطلعون إلى ما يحتويه هذا

الجهاز من نظام تشغيل وقدرته الاستيعابية على صنع برامج وتطبيقات تجعل من هذا الجهاز قطعه

ثمينه يستفيد منها المستخدم ليس فقط للتسلية والاتصال الهاتفي ، إنما يصبح جزءاً مهماً في

حياته العملية أيضاً..

حتى لا أطيل عليكم وباختصار :

نظام الاندرويد ليست مشكلته عدم انتشاره ، فالواقع هو العكس لأنه نظام تشغيل متواجد على

غالبية أجهزة الشركات الكبيرة مثل (سامسونج ، ايسر ، ال جي ، اتش تي سي ... الخ)

ولكن لايزال النظام يفتقر إلى البرامج والتطبيقات اليومية والعملية ومع ذلك أقول بأنه مميز لأن

غالبية الأجهزة التي تحمل نظام الاندرويد تتميز في 1- التصفح السريع المدعوم بالجافا والفلاش
2- الملتيميديا عالية الجودة وسلسة

أما بالنسبة لنظام IOS فهو يتميز بمكتبة هائلة من التطبيقات والبرامج التي يقوم بعض الجهات

الخدماتية التي يحتاج إليها معظم المستخدمين ..

لذلك نسأل أنفسنا هذا السؤال :

لماذا تقوم الشركات الكبيرة والمؤسسات المهمة كالبنوك ووزارات الدول بتكثيف عمل تطبيقاتها على نظام IOS فقط ؟؟ ولم نجد لهم أي أثر في الاندريويد ؟؟

حتماَ الاجابة على هذا السؤال ستكون بمثابة اجابة لكل من يتساءل عن سبب بيع اجهزة الاندرويد بشكل سريع او بعد استخدامها بفترة وجيزة ..

شكراً

 

[الهدف البعيد]

sالؤشات الكبيرة تتسابق فعلا لتطبيق ois....ومنتشر بسرعة ...لكن هناك نقطة غير صحيحة
لان الشركات الكبيرة بالاساس يدعمها نظام الاندرويد( مثال ديوان الخدمة المدنية)
بعكس ابايفون ابغير مدعوم من الشركات سابقا...
وعلي فكرة نظام الاندرويد ليس هو المستعمل عالميا وهو علي اغلب الاجهزة..
وهذي أخر احصائية بأستخدام انظمة الاتصالات عالميا...
1-نظام اندرويد... 52% عالميا
2-نظام ois ...39% او 29%(غير متاكد لكن الاكيد وحدة منهم)
3-نظام ويندون موبايل...5%..
4-الباقي انظمة اخري

 

[ابو برهوم]

كفيتوا ووفيتوا مشكورين وماقصرتوا
واخص بالشكر الاخ شاب محترم مشكور على كل حرف كتبتة

بارك الله فيكم​