بعض التفاصيل المهمه
اخوي
007
تأكد .. وعلشان يتأكد الجميع أني اعتبر نفسي أخوكم الصغير هني في المنتدى
ولاني أستفدت الكثير
من هذا المنتدى علشان جذي أشوف انه فيه دين في رقبتي للجميع وأبي أخدمكم
باي طريقة ..
علشان جذي راح الووع جبدك والووع جبد الاخوان من طول الكلام في هذا الموضوع فارجو المعذرة من الاطاله مقدما
وسلامة جبودكم ...
... سوق الجت .. " الناسجت " ... آآآآآآآخخخخخخ وما ادراك ما سوق الجت
أول شيء غريب في هذا السوق انه أسمه بعيد كل البعد عن نشاطه ... ولا ما تقول لي ..شنو جاب الجت ..للاسهم يا بو الشباب ....
المنطق يقول انه سوق الجت لازم ينباع فيه العلف والبرسيم والجت ...
ما تقولي شنو جاب الاسهم والكمبيالات والدعوات ...
تصدقني لو قلت لك انه مصير ادارة شركة القرين اللي راس مالها مليار سهم
وتعيين الاعضاء لمجلس الشركة أنحسم في سوق الجت ..............
لان اكبر كمية تم شراؤها من الدعوات لشركة القرين .. تم عبر ومن خلال هذا السوق
فسوق الجت قرر مصير مجلس الادارة لشركة راس مالها مليار سهم ..
يا عجبي وما عشت الدهر أراك عجبا .. ومن يدخل سوق الجت يرى الاعجب
على كل حال ندش في الموضوع ..انت انسان تبي تستثمر فلوسك وتشتري اسهم تاسيس
جيد جدا مبدئيا الاستثمار جيد .. بس انت تدري انه تم فرض قوانين جديده لعملية التحويل ..
ولحد هذا اليوم وهذي الساعه وهذي اللحظه .. لا يمكن وما في اي طريقة لنقل الملكية
المقاصة هالمره ماعندها غشمره يا جماعه .. وشادين ظهرهم بالوزير الطويل
عيل شنو قاعد يصير في سوق الجت " ناسجت " وليش الناس قاعده تبيع وتشتري .. انه اقولك
اللي يشتري عنده فلوس وايد واللي يبيع اغلبهم محتاجين وايد .. ارجوك خل هالنقطه في بالك علشان اكمل
اللي يشتري بصراحة وبرايي الشخصي .. مجازف وداش في استثمار معقد جدا
ليش مجازف وليش معقد جدا ... اشرح لك تفاصيل البيعه..علشان اجاوبك عدل
البايع راح يوقع على التالي
1- عقد بيع اسهم
2- طلب دمج اسهم
3- ايصال امانه
4- عقد وعد بالبيع
5- اقرار بالتنازل والتوكيل
وكل هالاوراق عاديه وفيها ملاحظات راح اشرحها لك بالتفصيل علشان لا يزعل حبيبي نوط بو الف
بس يبقى وصل الامانه اللي راح يوقعها البايع عالبياضضضضضضضضضضضضض
وهذي فيها مشكله للطرفين .... وعوار راس للطرفين .. قول ليش ..
الطرف البايع يمكن يبيع ربع دينار بوبيان بس الشاري يحط ديناربالوصل الامانه على كيفه ..
بالتالي لو فكر البايع انه يخون راح يدخل نفسه في مشاكل ... أقول وانتبه ..راح يدخل نفسه في مشاكل قانونية
واما الشاري فطبعا راح يحط مبلغ دينار بدل الربع في محل البياض .. بالتالي
يحسب انه صايد الحركه وراح يحصل ربح 750 من العملية اذا حاول البايع يخون
وهنا ملاحظه مهمه جدا ومعلومه غايبه عن أكثركم ... يا جماعه واقولها عن تجربه سابقة
لو اشتكى البايع بالمحكمة وقال انه وقع على بياض والشاري حط مبلغ على كيفه واعترف الشاري بذلك
راح يتمشكل الشاري بدل ما يحصل فلوسه .. لاني اعتقد وراح اتاكد اكثر من هالشي ان التوقيع على بياض
فيه شبهه قانونية ...
طبعا بعد اللتيا واللتي وبعد كل المشاوير والوقت والجهد اللي راح يضيع هنا وهناك
راح يسأل حضرة القاضي عن المبلغ الحقيقي المتبادل بين الطرفين ..وهو ربع دينار لا غير
فيحكم القاضي كما حصل في اكتتابات الشرق الاوسط والهواتف بان يرجع البايع للشاري
المبلغ الفعلي ..... مو المبلغ المكتوب على بياض
يعني يا شاري طلعت من المولد بلا حمص .. ورجعت راس مالك بلا استثمار ولا ربح ولا بطيخ
والاوراق 1\2\4\5 اللي ذكرتهم... نقعهم !! ...
لان اللي راح تشتريهم .. عبارة عن سندات تخصيص حاليا وليست أسهم
ويوجد قانون حالي بالتجارة واضح المعالم وما فيه يما ارحميني القانون يقول
اي تعامل \ تداول\تنازل\بيع\رهن\ بالسندات هذه باطل باطل ..
مثل ما هو زواج عتريس من شادية اللي ما ادري شنو كان اسمها بالفيلم باطل باطل
ويحتفظ الطرفين في حق بطلان العقد وفسخه في اية لحظه ..
هذا اذا قلنا في حال انه البايع ناوي نيه مو طيبه ..
اما اذا قلنا ان البايع يخاف اشوية من الكمبيالات وعنده اشوية ضمير وكان معاك الى يوم الادراج ...
.. اذا طبعا ما مات بحادث او ما مات موته طبيعيه \ أو ما دش السجن بسبب شيكات أو ما اشبه\
أو ما هاجر من الديره لانه مطلوب لعدة قضايا \ أو ما غير عنوانه السكني وغير ارقام النقال والبيت
اذا قلنا انه كل شي على ما يرام .. وجاء لك الشخص يوم الادراج وقال لك شبيك لبيك انه حاضر آمر شنو المطلوب
!!!!!!!
.. انتبه معاي اخوي ولاحظ انك شريت على ربع دينار يعني الريال باعك على ربع
ويمكن لمن ينزل السهم بالسوق يمكن يمكن انشاء الله 600\700 فلس
تخيل شنو راح يصير فيه هذا اللي باعك اسهمه وشايفهم الحين جدام عينه فرق دبل مرتين
ولا زالت الاسهم باسمه ... طبعا الشيطان اشويه راح يلعب فيه .. وابيك تفهم شنو اللي اقصد
وياما..ياما..صارت فينا والله شرينا الوطنية للاتصالات على 300 فلس ولمن نزلت بالسوق صارت 600
صارت بلاوي وشفنا معادن الناس اشلون صايره ..على العموم
احنا نفرض انه .. كل شي ماصار.. وما خون صاحبنا للحين
اشلون تنقل الملكيه عيل .....
اشلون ننقل الملكية ...
ر اجع اخوي ويا اخوان هالرابط
عرفت الحين شنو قصدت لمن قلت لك ... انه استثمار معقد وفيه مجازفه ...
معقد لانه فيه احتمالات كثيره وارده .. ومجازفه لانه البايع ممكن يقلب عليك بكل سهوله
اذا تبي تشتري وتبي شغلك يكون صح اشتر من الثقاة \ الاهل \ الربع \ ترى أهل الديره اياويد
وفيهم معادن ماتبيع ضميرها ولو بالملايين ..
وعندي كلمه.. وبعد اذن اهل المنتدى اقولها لك وحق اللي يبي يشتري
شطارتك انك تصنع وتدور على الزبون الثقة .. ومو شطاره انك تشتري بابخس الاثمان
وتوقع وصل امانه ومش عارف ايش ... قد ما تقدر دور على الثقه ..
اذا كنت تبي نصيحة اخو وصار له سنين بهالشغله .. ابحث عن الثقاة ولو في الصين .
اخواني الكرام اعتذر عن الاطاله .. واعتذر لك اخوي 007 اذا اسأت الادب معاك
او مع الغير بس .. الهدف انه ما تروح فلوسك وفلوس عيالك بوشششششششش..دير بالك وانه وكما وعدت حاضر لاي استفسار عن سوق الجت وعن الاسهم الغير مدرجه
دمتم ومره ثانيه يا نوط بو الف كل شيء ولا زعلك
دمتم
