اخترب العرس وانقلب الحال و تطلقت العروس ... و السبب ......

[نواره1]

بقولكم حدث صار معاي بس بالأمانه أحداث حقيقيه حدثت من كم شهر .. والغرض من الطرح ليس لعرض مشاكل و مصايب الناس ... لكن .. المقصد هو العبره ..و طرح السؤال الذي يجول في ذهني ...؟؟؟

هل عناد المرأه ممكن يصل إلى حد أنها تدمر حياتها ولبنات مستقبلها الأولى وهي في طريقها إلى حياة جديده و في أول مواجه .. ؟؟؟؟
أم أنه دخول الشيطان بينهم .. ( حزة الشيطان ) لذلك رسولنا الكريم علمنا التعوذ من الشيطان وقت الغضب لأنها هي فرصته لدخول بيننا ....؟؟؟؟
أم أنه الحظ و النصيب أراد أن يتغير و ينقلب بلحظه ... لنعلم أن الله وكأنه أراد أن يقول لنا أن النصيب و الحظ ينقلب كإنقلاب أحوالنا ...!!!!!!!


في مجال عملي الخاص .. لدي قسم لديكور و تجهيز قاعات المناسبات (والله مو داعايه لنفسي .. بس عشان تعرفون وين موقعي من المصيبه )

إتصلت علي أختي وقالت لي جيرانه عندهم عرس ولدهم ويبونج تجهزين ديكورات العرس .. وأنا استانست لما قالوا كلمي إختج ودي أتكشخ فيج جدام جيرانه و ايشوفون ابداعاتج و أمشي بالفريج وأقولهم هذا ذوق إختي ..
قلت لها أوكي ..ببيض وجهج .. ( عز الله صبغته لها )

إلتقيت بالعايله ( الأم و الخوات ) طبعا الأم ماشاءالله قمة في الأخلاق ولسانها معطر بذكر الله ..و بناتها نفس الشي ..و قالت لي يا نوره ... أهم شي عندي معازيمي أبي أسعدهم و أفرحهم لفرحي و أكرمهم بضيافتي ..
وكملت البنت .. نوره إحنا نثق بذوقج و نبي نسلمج الديكور من غير ما نشوف أي شي ....

تعرفون شعور اللي يجي لك حد يشتري منك ومن غير ما يشوف بضاعتك (ودك تعطيه أحسن ما عندك ) هذا شعوري ...
رديت عليها ........وعد لأسويلكم أحلى ما عندي .. و الوعد الثاني لأخلي الناس تتكلم شهر عن ديكوراتكم .. و الوعد الثالث بشتغل وكأني مشتغله لعرس أخوي ...

عز الله صج خليت العالم تتكلم شهر ... مالت عليج و على وعدج .. هو الله لو فاكنه من وعودج اللي ودتنا بداهيا إحنا بخير ...

و كملت كلامها إخت المعرس و قالت لي .. العرس لمعرسين إخوان والعرايس من عايلتين مختلفه ..فيه وحده بتدخل الصاله و الثانيه ما راح تدخل بتقعد بغرفه موجوده بالصاله بس معزوله و يجي معرسها ياخذها حطي لها في الغرفه كوشه ناعمه ...
هذا اتفاقنا و اتفاقهم مع العروستين بناء على رغبة كل وحده فيهم ...

فشي طبيعي أن الحضور بيقعدون بالقاعه .. و مساحة القاعه غير عن مساحة الغرفه .. يعني بديهي إن التركيز في الشغل بيكون على القاعه ...........


جا يوم العرس ...... و بالأمانه حطيت حيلي فيه .. أولا زباين .. ثانيا جيران إختي .. ثالثا ناس عطوج ثقه عميا ... هذا يومج يا انوير ..... بدعي بدعي ...و رينا الشغل على أصوله ..

فعلا ........ عفست لهم القاعه .. و ظليت أنتظر أهل العرس حتى أسلمهم الشغل و أعرف ردة فعلهم ..
أول ما دخلو اذكروا الله و استانسوا و اشكروني واصروا إني أظل ..
قلت لها خلاص بقعد اتقهوا و امشي .... ( إنتي لو ذالفه قبل لا اتكورفين بالقهوه ) هم زين .. بس بعد اشلون رداة الحظ ...... أحمر أخضر ..


قعدت وتقهويت وطبعا الابتسامه شاقه الوجه و بدوا المعازيم يهلون و الابتسامه زادت لما كنت أشوف اعجابهم بالشغل .. وخاصه لما يسألون منو مسوي هالشغل و يأشرون علي ............ يوووووووووه الخشم وصل السما ما أدري وراي كسرة خشم .....

اشوي و إلا تجيني أم المعرس .. يا نوره لحقيني .... حضرتي يعني المنقفذ هلا خالتي عسى ما شر ..؟؟
أم العروس اللي بنتها بتقعد بالغرفه ..هاوشتني و زفتي ..
أفا .. ليش .. ؟؟ تقولي ليش ما سويتي كوشة بنتي نفس فخامة اللي بالقاعه و ليش ما سويتي الإستقبال اللي بالرسبشن مثله .. وليش .. و ليش ..و ليش ..

تكفين يا نوره كلميها و فهميها إن الغرفه غير عن الصاله ..

الصراحه .. تفاجأت ..معقوله .. !!!!!!! والله لو ما أعرف أم المعرس إنسانه متدينه كان قلت تكذب وتبالغ ..؟؟
رحت أهدي الوضع مالقيت إلا شرارة المعركه بدت .. و طاحوا زف بالمقروده أم المعاريس ..

بسرعه عدة الساعه و ابتدأ العرس و الناس تتزاحم ... و تحضر العروس اللي هي بتدخل الغرفه ..
و أمها و خواتها قالو لأم المعرس ..الكوشه اللي بالصاله عاجبتنا و بنتنا خلاص قررنا اندخلها الصاله ..
حاولوا معاهم .. ما يصير .. العروس الثانيه على وصول و إنتوا هذا طلبكم ليش ما قلتوا من قبل ..كان ضفنا كرسي ثاني و ما صارت مشكله ...
والله عاد كيفكم بنتنا بندخلها بندخلها .. ادخلت ...
و زادت شرارة المعركه ..

أهل العروس الثانيه اللي متفقين إنها تدخل ولعوا .. اشلون هذي تدخل مكان عروستنا و عروستنا بالطريق و دموع خواتها أربع أربع ...
أهل المعرسين يهونون المشكله .. ميخالف هدوا هدوا .. الحين بس تقعد العروس الأولى اشوي انطلعها و اندخل الثانيه ....
عاندوا........ لا لا ما نبي اشلون تاخذ كوشتها ..

وتوصل العروس الثانيه اللي هي المفروض تدخل .. بسبب لعناد و الزعل ما يدخلونها و يقعدونها بالغرفه ...
بهالوقت ... زادت شعلة المعركه و زاد الهرج و المرج بالقاعه .. و صارت معركه ثلاثيه بين ثلاث عوايل .. و أكثرها بين عايلة العروستين .. و المقروده أم المعرس و بناتها ضاعوا بينهم وخذوا نصيبهم من الكلام الجارح ....


و انوير بهالوقت ..... إطالع بعويناتها ........... اشسويتي اشهببتي .. يا الفقر يا أم الكوشه النحس !!!!!!!!!


وطبعا المقاريد أهل العرس أنقلب عرسهم و تبدلت نفسياتهم و يتصلون على معاريسهم كل واحد يجي ياخذ عروسته ويطلع ...........

و المعرس زوج العروس اللي دخلت القاعه بنفس اليوم .. في البيت قالها أمج و خواتج عفسوا العرس بعنادهم الحين احنا في بداية حياتنا و حتى تستمر لو سمحتى ما أبيهم يدخلون شقتي ولج ساعتين باليوم من كل اسبوع تشوفينهم ...

الصراحه الرجال ما قال شي كبير معاه حق وكيفه .. و خاصه إنه ما زال في يوم الغضب و المعركه فأكيد مع الايام الوضع بيهدا ...

تتوقعون شنو ردت عليه... لا مو بكيفك ... و أنا مو جايه خدامه لأهلك ...
رد عليها مو عاجبج شروطي
لا موعاجبني ودني بيت أهلي .........
إذا رحتي بطلقج ..
أوكي طلق
و فعلا تروح .. و يطلقها ................


هذا سؤالي .........
جذيه عناد المرأه ممكن يهدم كل شي ..؟؟؟؟؟؟؟؟

بدايتها عناد بين أم العرايس و نهايتها عناد العروس مع زوجها و النتيجه .....الطلاق ...
E

 

[abo Rana]

نوارة

وي اقرا موضووعج بس انا كلام واجد ماعرف اقرااه

بس برد على اللي باللون الاحمر

ماااعندي تعليق وشكراً نوااره

 

[نواره1]

نوارة

وي اقرا موضووعج بس انا كلام واجد ماعرف اقرااه

بس برد على اللي باللون الاحمر

ماااعندي تعليق وشكراً نوااره

كلام واجد قرقر واجد ما يبي
بورنا ........... روح الديوانيه أحسن

كافي طلتك يا شمعه منوره

 

[قلم حر]

الاعراس نااار تحت الرماد

والواحد يقول ياااارب يعدي هاليوم على خير مع انه

يوم فرح ووناسه

الله يرحم ايامنا قبل اقل من 20 سنه الحريم معزومين

بحوش بيتنا وعقب ما نضيف الرجاجيل عقبها يضيفون

الحريم واذكر عرسي يعني مسوين فيه حركه وهو اول

عرس بجماعتنا نجيب طقاقه والاكل تم اضافة جدر جريش

عليه ويحمدون ربهم حريم ذاك الوقت

وخل اضيف شغله عرسي اول 1992 وعطيت اخوي

عقب الزفه يجيب لي عشا من الكنتاكي >> مافيه غيره

وما دريت الا جايب بطاط وفلافل ومغير الحبيب جايب

بعد بيدجان وبطاط

قلت له ليش قال صكروا المطاعم ولا ومكثر الطرشي بعد

والامور سهالات وعدى العرس على خير

لانه الحريم ما حكمت والحين الحريم احكمت ،،، يا ساتر


وخلي اقولج شغله ترى كان عندي مؤسسة تجهيز الاعراس

وهاف لوري صج والله

والحين نوره اللي عندها هاف لوري وتجهيز اعراس


يبه قلنا لكم الحريم احكمت


​

 

[النايفه]

صباح الورد،،،
والله يانواره سالفتج ماره علي بس بشكل شوي غير بس الأساس سوالف ليلة العرس تبين بعض الناس على حقيقتهم،،،
واللي صار دليل أن أهل العروس اللي تطلقت غيورات ويحبون المظاهر وما يبون الستر،،، وعبالهم الزواج والطلاق لعبه أو شي سهل،،،
هذا ردي بختصار لأني أعاني من صداع صار لي فترة وتركيزي قليل.. لي عوده بإذن الله.

 

[دنياء غريبه]

صبآحك سكر يآسكر ..! كيف حآلكـ نوآرهـ

بجد قــرآءت الموضوع كآمل وتحمست آعرف وش صآر بنهآية .! بس مآتوقعت خآتمه بالطلاق من آول يوم ..! يلا آلله يكتب اللي فيه الخيـــر

ومن نآحيتك انتي مآلكـ دآخل في آلمشكلة اللي صــآرت انتي وصلتي لهم ونفذتي اللي طلبوآ منك وشئ طبيعي انو القاعة بتكون افخم ترتيب الديكورآت وآلكوشة فيها من آلغــرفة .!

اكثر شئ مآحبيتهآ تصرف المعرسة اللي طلبت ترتيب الكوشة بالغرفة وبعدين غيرت رآيهـآ بجد مآلهآ حق ابدآ وتصرفهآ موحلو

​

 

[نواره1]

الاعراس نااار تحت الرماد

والواحد يقول ياااارب يعدي هاليوم على خير مع انه

يوم فرح ووناسه

الله يرحم ايامنا قبل اقل من 20 سنه الحريم معزومين

بحوش بيتنا وعقب ما نضيف الرجاجيل عقبها يضيفون

الحريم واذكر عرسي يعني مسوين فيه حركه وهو اول

عرس بجماعتنا نجيب طقاقه والاكل تم اضافة جدر جريش

عليه ويحمدون ربهم حريم ذاك الوقت

وخل اضيف شغله عرسي اول 1992 وعطيت اخوي

عقب الزفه يجيب لي عشا من الكنتاكي >> مافيه غيره

وما دريت الا جايب بطاط وفلافل ومغير الحبيب جايب

بعد بيدجان وبطاط

قلت له ليش قال صكروا المطاعم ولا ومكثر الطرشي بعد

والامور سهالات وعدى العرس على خير

لانه الحريم ما حكمت والحين الحريم احكمت ،،، يا ساتر


وخلي اقولج شغله ترى كان عندي مؤسسة تجهيز الاعراس

وهاف لوري صج والله

والحين نوره اللي عندها هاف لوري وتجهيز اعراس


يبه قلنا لكم الحريم احكمت


​

ايه يا بو عبدالله ... الزمن تغير و الحال تبدل

بس سالفة إني أخذت مكانك بالشغل .. جديده :d

قبل صج الناس تبي الستر .. و للحين طبعا ...بس قبل ما كان أهل العروس يتجرأون يبدون آرائهم بتفاصيل عرس بنتهم .. لأن هالأمر لأهل المعرس وكيفهم

الحين بعد غير المبالغه بتجهيزات العرس .. تدري وصل حاليا تجهيز بعض الأعراس بس الديكورات بحدود ال 200 ألف هذا اللي أعرفه .. و الخافي أكبر من هالرقم ...
أنا مع إنك تتميز بالعرض ...... لكن مو حد المبالغه الشديد بالسعر

أقولك .......... منو طقاقة عرسك .. لايكون فوزيه أم لجدوره

 

[نواره1]

صباح الورد،،،
والله يانواره سالفتج ماره علي بس بشكل شوي غير بس الأساس سوالف ليلة العرس تبين بعض الناس على حقيقتهم،،،
واللي صار دليل أن أهل العروس اللي تطلقت غيورات ويحبون المظاهر وما يبون الستر،،، وعبالهم الزواج والطلاق لعبه أو شي سهل،،،
هذا ردي بختصار لأني أعاني من صداع صار لي فترة وتركيزي قليل.. لي عوده بإذن الله.

يا صباح الغلا ..
ما تشوفين شر حبيبتي ...

ايه كلامج صحيح ... ممكن الغيره هي سبب من الأسباب ....
و للأسف لو معدينها ........ أكيد النهاية غير ..
خاصه إنه أهل المعرس ناس معروفين بالتدين و الأخلاق ..
معقوله تتنازل عن الأخلاق و المستقبل عشان كوشه وعناد ؟؟؟؟

 

[نواره1]

صبآحك سكر يآسكر ..! كيف حآلكـ نوآرهـ

بجد قــرآءت الموضوع كآمل وتحمست آعرف وش صآر بنهآية .! بس مآتوقعت خآتمه بالطلاق من آول يوم ..! يلا آلله يكتب اللي فيه الخيـــر

ومن نآحيتك انتي مآلكـ دآخل في آلمشكلة اللي صــآرت انتي وصلتي لهم ونفذتي اللي طلبوآ منك وشئ طبيعي انو القاعة بتكون افخم ترتيب الديكورآت وآلكوشة فيها من آلغــرفة .!

اكثر شئ مآحبيتهآ تصرف المعرسة اللي طلبت ترتيب الكوشة بالغرفة وبعدين غيرت رآيهـآ بجد مآلهآ حق ابدآ وتصرفهآ موحلو

​

أهلا يا عسل ...
الصراحه يا الغلا .. أنا حيل ضاق خلقي لمدة يومين نفسيتي تعبت حسيت بالذنب وما تمنيت أشوف اللي حصل مع إنه فعلا بعدها استوعبت إنه مالي ذنب ...

و العروسه اللي طلبت تقعد بالغرفه فعلا كلامك مالها حق .. هذا طلبها ومو من حقها اتغير ..
بس بعد أهل العروس الثانيه ما عدوها وكان لهم دور بتكبير المشكله وزعلوا ورفضوا بنتهم تدخل وراها ..

القصه عناد بعناد ......

تبين أكملك باقي التفاصيل ما بعد العرس ...
بنفس الاسبوع من الطلاق المعرس ملك على وحده ثانيه .. كانت حاضره بالعرس ... سبحان الله ما تدري إنه بعد اسبوع هذا المعرس اللي حضرت عرسه بيصير زوجها ........... صج نصيب ....

 

[فضل]

انا لالحين اتذكر وانا صغيرون ، عرس الحريم قبل كانوا فوق السطح


واذا طبوا الملعب بعض النسوان الثقال ، كنت احس الارض تهتز من تحتى





اما العرس المنكوب < موضوع اليوم >


اتوقع ان سبب المشكله واحد من اثنين



1 _ العرس الجماعى يسبب حزازات ومقارنات خفيه فى داخل النفوس


وللاسف انها ظهرت للعلن ذاك اليوم وصار اللى صار



او



2 _ انج حاطه عينج على واحد من المعاريس ودقيتى اسفين بين اهلهم


< اقص ايدى اذا بورنا عرف شنو معناة الاسفين >


كود انه يطلق عروسه وياخذج ، وفعلا صار المخطط اللى تبينه


بس للاسف بالنهايه المعرس اخذ وحده ثانيه كانت قاعده يمج




هذى احتمالاتى ، وطبعا تتوقع الخطأ والصواب ..

​

 

[نواره1]

انا لالحين اتذكر وانا صغيرون ، عرس الحريم قبل كانوا فوق السطح


واذا طبوا الملعب بعض النسوان الثقال ، كنت احس الارض تهتز من تحتى





اما العرس المنكوب < موضوع اليوم >


اتوقع ان سبب المشكله واحد من اثنين



1 _ العرس الجماعى يسبب حزازات ومقارنات خفيه فى داخل النفوس


وللاسف انها ظهرت للعلن ذاك اليوم وصار اللى صار



او



2 _ انج حاطه عينج على واحد من المعاريس ودقيتى اسفين بين اهلهم


< اقص ايدى اذا بورنا عرف شنو معناة الاسفين >


كود انه يطلق عروسه وياخذج ، وفعلا صار المخطط اللى تبينه


بس للاسف بالنهايه المعرس اخذ وحده ثانيه كانت قاعده يمج




هذى احتمالاتى ، وطبعا تتوقع الخطأ والصواب ..

​

أقولك ........ إنت من يومين مو إمبين والحين تطلعلي بهالتحليلات
اشهالتخطيط اللي راسمه .......... يا ساتر


السبب الأول اللي ذكرته .......... ميه ميه صحيح .. خلينا عليه

الحين إنت من قلب لو تعرف حد يبي يتزوج ما تنصح يتعامل معاي ..... إتوخر عن كوش نواره النحس

 

[جواهر]

اذا كان هذا اولها ينعاف تاليها

عرسهم من بدايته وجع راس ومشاكل وع شي تافهه مايستاهل العروس ماتحضر الحفل الا ساعه او ساعتين وخلاص ع ايش كل هالعناد والمصيبه انهم متفقين من قبل وبرغبتها مختاره الغرفه
لا والعروس عنيده تقله وديني بيت اهلي باايعتــــها تحسب بيترجها

مالهم نصيب والله رزقه بغيرها

نواره اشك ان داشه كانت معك بالعرس وهي اللي خربتها

الا ايش صار ع العروس الثانيه

 

[دنياء غريبه]

أهلا يا عسل ...
الصراحه يا الغلا .. أنا حيل ضاق خلقي لمدة يومين نفسيتي تعبت حسيت بالذنب وما تمنيت أشوف اللي حصل مع إنه فعلا بعدها استوعبت إنه مالي ذنب ...

و العروسه اللي طلبت تقعد بالغرفه فعلا كلامك مالها حق .. هذا طلبها ومو من حقها اتغير ..
بس بعد أهل العروس الثانيه ما عدوها وكان لهم دور بتكبير المشكله وزعلوا ورفضوا بنتهم تدخل وراها ..

القصه عناد بعناد ......

تبين أكملك باقي التفاصيل ما بعد العرس ...
بنفس الاسبوع من الطلاق المعرس ملك على وحده ثانيه .. كانت حاضره بالعرس ... سبحان الله ما تدري إنه بعد اسبوع هذا المعرس اللي حضرت عرسه بيصير زوجها ........... صج نصيب ....

يــــــــــــــآإهلابك زود آلنوري

لاوآإلله يـــــآبعدي آنتي مآلكـ ذنب من الاسآس وممكن حسيتٍ بتأنيب ضمير لانــو حن قلبك من آلموقف اللي صار
وام المعرس كملت عليك لم وصلت لكـ سآلفة المعرسة انو مآعجبهآ كوشة الغرفة تكون اقل مستوى من كوشة القآعة
< تبين الصدق انتي سويتٍ اللي عليك كفيتي ووفيتي بس المعرسه اللي هي غلطت
ولــو المعرسه ثآنية الله يهديهـآ تنآزلت وخذت الـوضع بهدوء كان عدت هـ ليلة على خيـــر


بس بجد تكملت القصة مآتخطر في بآل آحد !

سبحآن الله صدق كل شي في آلحيآة قسمة ونصيب ومآحد رح يأخذا غير المكتوب له... ​

 

[نواره1]

اذا كان هذا اولها ينعاف تاليها

عرسهم من بدايته وجع راس ومشاكل وع شي تافهه مايستاهل العروس ماتحضر الحفل الا ساعه او ساعتين وخلاص ع ايش كل هالعناد والمصيبه انهم متفقين من قبل وبرغبتها مختاره الغرفه
لا والعروس عنيده تقله وديني بيت اهلي باايعتــــها تحسب بيترجها

مالهم نصيب والله رزقه بغيرها

نواره اشك ان داشه كانت معك بالعرس وهي اللي خربتها

الا ايش صار ع العروس الثانيه

ايه يا الجواهر ..كلامج صحيح ... الشيطان دخل بينهم عساه الكسر النذل

أقولج ......... أم العرض لو كان وقتها أعرفها الصراحه كان كلش ما أستبعد .. يا أختى هالبنت تموت على الجرايم ....... ( الله يذكرها بالخير )


العروس الثانيه اسلكت .....

 

[abdullah6868]

صج غيرة حريم الله يعين عليهم
انا عرسى بعد التحرير 1991 حتى مصور ما جبنا
بيت شعر بالبراحه
والحريم بالحوش مع دى جى وعشى طبخ طباخ بالشارع وكان الله غفور رحيم
احلى عرس من فضل الله اسبوع عرسى كله امطار وخير وبركه على الكويت

مشكورة بنتى نوارة وعسى الله يوفقج فى تجارتج بالعكس انتى ما اخطأتى اديتى الواجب والدليل انهم تهاوشوا العرايس على ابداعج

موفقه بأذن الله​

 

[away1979]

والله مصيبه صج حظج قبسه

يعني ضاع مستقبلها على شي مايسوى العروس بالايام هذي حدث ولا حرج على اتفه الاسباب يصبح الطلاق بالمخبه !! ذكرتيني بسالفة واحد من الشباب زجته طلبت من المطعم وقالت حق زوجها ادفع الاحساب ابو الشباب فصل وعصب وكبر السالفه وطلقها والمصيبه مرته حامل

الشخص هذا اعرفه عدل مو يقولون

والسوالف شكثر ماقول الا عسى الله لايغير علي وعليكم

الا تعالي نواره زين مانسيت يمكن اتصل عليج حق زواجي الثاني بصراحه ابي افيدج ​

 

[Navigator]

اشوف الموضوع من زاوية ثانية إنه خيره للمعرس

وافتك من ناس عمى عينها حب المظاهر وقليلين حياء

 

[نواره1]

يــــــــــــــآإهلابك زود آلنوري

لاوآإلله يـــــآبعدي آنتي مآلكـ ذنب من الاسآس وممكن حسيتٍ بتأنيب ضمير لانــو حن قلبك من آلموقف اللي صار
وام المعرس كملت عليك لم وصلت لكـ سآلفة المعرسة انو مآعجبهآ كوشة الغرفة تكون اقل مستوى من كوشة القآعة
< تبين الصدق انتي سويتٍ اللي عليك كفيتي ووفيتي بس المعرسه اللي هي غلطت
ولــو المعرسه ثآنية الله يهديهـآ تنآزلت وخذت الـوضع بهدوء كان عدت هـ ليلة على خيـــر


بس بجد تكملت القصة مآتخطر في بآل آحد !

سبحآن الله صدق كل شي في آلحيآة قسمة ونصيب ومآحد رح يأخذا غير المكتوب له... ​

حسافه يومها ما كنتي معاي يا الغلا ... وسمعت وقتها كلامك الطيب كان هون علي ..

كنت خايفه لا يغسلون شراعي ...بس اشوه شراعي ما صار فيه شي :d

 

[نواره1]

صج غيرة حريم الله يعين عليهم
انا عرسى بعد التحرير 1991 حتى مصور ما جبنا
بيت شعر بالبراحه
والحريم بالحوش مع دى جى وعشى طبخ طباخ بالشارع وكان الله غفور رحيم
احلى عرس من فضل الله اسبوع عرسى كله امطار وخير وبركه على الكويت

مشكورة بنتى نوارة وعسى الله يوفقج فى تجارتج بالعكس انتى ما اخطأتى اديتى الواجب والدليل انهم تهاوشوا العرايس على ابداعج

موفقه بأذن الله​

يا حلو قلبك .. ويا حلو دعائك يا الكبير ..
الله يبارك لك بعد إن شاءالله بعيالك و عيال عيالك

للحين فيه ناس مازالوا بسيطين ... و العبره بالتوفيق
على قولة رفيجتي ..
تقولي ..ما فرحت بعرس إختي .. أقولها .. ليش ؟؟؟؟؟؟
تقولي الفرحه الكبيره لما الله يوفقها معاه
الفرحه مو بالأبيض الفرحه بالتوفيق

إختي تزوجت من خمس سنوات و كانت كوشتها عباره عن ستاره و العرس بسيط جدا جدا .. مو بخل فيهم بس هم بسيطين و ما يعرفون لسوالف العرس .. بس ما شاءالله هي بعد الزواج قمة السعاده الله وفقها بحموله طيبه ...و بزوج كريم خلوق و حاشمها و رافع من قدرها ..

فعلا السعادة الزوجيه بالجوهر

 

[نواره1]

والله مصيبه صج حظج قبسه

يعني ضاع مستقبلها على شي مايسوى العروس بالايام هذي حدث ولا حرج على اتفه الاسباب يصبح الطلاق بالمخبه !! ذكرتيني بسالفة واحد من الشباب زجته طلبت من المطعم وقالت حق زوجها ادفع الاحساب ابو الشباب فصل وعصب وكبر السالفه وطلقها والمصيبه مرته حامل

الشخص هذا اعرفه عدل مو يقولون

والسوالف شكثر ماقول الا عسى الله لايغير علي وعليكم

الا تعالي نواره زين مانسيت يمكن اتصل عليج حق زواجي الثاني بصراحه ابي افيدج ​

ايه قبسه بس مو تفضحني عند العرب .. هالله هالله بالدعايه الطيبه
وعد ...على كل راس اتجيبه لي لك صندوق بطيخ حق بقرتك .. أهم شي بقرتك المصون سعادتها من سعادتك و بلعتها من بلعتك ...


ايه والله شي ما يسوى ... و فعلا ظاهرة الطلاق و أسبابه شي مرعب .. الأسباب حدها لا تصدق ... بس هاللي اتعرفه الله ايهديه .. اللي عندي عشان كوشه .. و اللي عندك عشان بلعه .. يا ساتر ...

حياك الله ............ بس إن شاءالله أستقبلك بعرس عيالك