كيفية التعامل مع قرض التسليف أثناء البيع و اشراء

[busalih]

السلام عليكم

يا أخواني الكرام عندي استفسار ضروري بخصوص قرض التسليف ، إذا أبي أبيع بيتي و البيت مرهون عند التسليف و مسدد مبلغ بسيط من ال70 ألف ، كيف يتم التعامل مع القرض و الرهن ، هل يجب تسديد القرض قبل ما أقدر أبيع ولا يتسدد مع البيعة وشلون يتم هالإجراء؟

إنزين إذا المشتري أهو راح يشتري بيتي عن طريق التسليف بعد ، شلون راح آخذ أنا فلوسي منه كاملة؟ فرضا عنده كاش و باقي المبلغ من التسليف ، راح يعطيني الكاش و ال 70 الف (ورقة من التسليف) مع بعض عند التسجيل؟ و إذا عطاني ورقة من التسليف (التعهد) شكثر وقت على ما أحصل فلوسي؟

يعني باختصار أنا ناوي أبيع بيتي و أشتري بيت غيره بس خايف من تعقيدات العملية هذي و ما أدري اشكثر وقت راح يضيع من التعامل مع بنك التسليف (أولا في تسديد المدوينية في البيعة ثم استلام ال 70 من المشتري ، ثم الحصول على تسليف مرة أخري في شراء البيت الجديد)

برجاء الرد من ذوي العلم و الخبرة

 

[fuphcr]

اخوي اذا اللي يبي يشتري البيت منك واحد عنده طلب التسليف راح ياخذ السبعين منه ويعطيك اياها بس يخصم اللي باقي من 70 مالتك
ويعطيك اللي دفعته لهم
بس شوري عليك تبدل مع طلب احسن لك من تاخذ ال70 مالته علشان يصير معاك جوكر تلروح اي منطقه وتقدر تبدل مع اي ارض او طلب

 

[مستثمر73]

أخوي السقف المسموح فيه 300 ألف دينار
يعني أذا أنت شاري بيت وماخذ 70 الف بنك التسليف ونويت تبيع هالبيت سعر 250 ألف راح تكون بهالطريقه التاليه :

يتم تسديد المتبقي عليك لبنك التسليف من قيمة البيع ألي أهو (250ألف) وذلك لتحرير وثيقة البيت من بنك التسليف ثم يقوم بنك التسليف بأرجاع المبلغ لك وهو المتبقي من 300 ألف السقف المسموح فيه - 250 الف قيمة البيع = 50 ألف دينار

يعني بأختصار تكوم بيعتك 230 ألف ديمنار

في ناس أذا يبي يبيع بسعر 250 ألف يتفق مع الشاري أنها تتسجل بالبيعه غلي 230 ألف علشان التسليف مايخصمون عليه شي ..

أتمنا أني وضحت لك الموضوع

 

[busalih]

اخوي اذا اللي يبي يشتري البيت منك واحد عنده طلب التسليف راح ياخذ السبعين منه ويعطيك اياها بس يخصم اللي باقي من 70 مالتك
ويعطيك اللي دفعته لهم
بس شوري عليك تبدل مع طلب احسن لك من تاخذ ال70 مالته علشان يصير معاك جوكر تلروح اي منطقه وتقدر تبدل مع اي ارض او طلب

اخوي مشكور على الرد ، بس ما فهمتك عدل ، تقصد المديونية راح تتحول عليه؟ يعني نفرض البيت سعره 200 الف و أنا دافع للتسليف 10 آلاف ، راح يعطيني كاش 140 الف و المديونية 60 الف تتحول عليه؟ معقولة؟

 

[busalih]

يتم تسديد المتبقي عليك لبنك التسليف من قيمة البيع

أخوي متى يتم التسديد؟ أثناء التسجيل العقاري لما يتحول البيت باسم المشتري ، أسدد اهناك ولا شلون؟

ثم يقوم بنك التسليف بأرجاع المبلغ لك وهو المتبقي من 300 ألف السقف المسموح فيه - 250 الف قيمة البيع = 50 ألف دينار

أخوي انت تقصد اهني لما أشتري بيت مرة ثانية يعطوني المبلغ المتبقي من التسليف الغير مسدد و محدود بسقف ال 300 الف ، عدل؟

 

[busalih]

أشكر الاخوان اللي شاركوا بس ترا و الله للحين ماني فاهم بالضبط شلون تصير العملية ، ياليت أحد مجرب هالعملية أو عنده خبرةة في هذا المجال يوضح لنا شلون ينباع بيت مرهون عند التسليف على مشتري عنده طلب تسليف كذلك

باختصار انا ناوي ابيع بيتي و اشتري غيره بس خايف من التعقيدات خصوصا متى راح تتوفر الفلوس من البيعة ، خصوصا إن المشتري راح بالأغلب يكون عنده طلب تسليف

أي تفاعل أنا شاكر لكم ، و مبارك عليكم الشهر و تقبل الله صالح أعمالكم

 

[Packard Bell]

العملية يسمونها "نقل التزام" ، يعني يتم نقل الالتزام اللي عليك من قبل بنك التسليف للمشتري الجديد، طبعا بعد ما يستكمل الشراي أوراقه وياخذ موافقة لجنة البنك، وعادة ما تاخذ الموافقة 60 يوم وعادة ما تتأكد اللجنة من خلال هذه الموافقة أن المشتري فعلا يستحق القرض الإسكاني.

بعد ما تطلع الموافقة للمشتري، يطلبون منه وثيقة بيتك ومن ثم يتم استخراج شهادة من بنك التسليف بالموافقة على "نقل الالتزام" للمشتري الجديد ويعطونك ورقة عشان تروح تحول البيت، وعند التحويل راح يسألك موثق وزارة العدل أنك تروح تدفع رسوم التحويل (عادة ما يتحمل المشتري هذه الرسوم) ومن ثم يسألكم إذا تم استلام فلوس البيت وهني أنت تستلم باقي قيمة البيت من المشتري.



​

​

 

[busalih]

مشكور اخوي Packard Bell ، كلامك واضح و مفهوم

يبقى شي واحد ناقص في الموضوع ، إذا أنا مسدد 10 آلاف من ال 70 ألف ، و إذا تم "نقل الالتزام" له راح يحصل أهو 60 ألف من التسليف فقط ، و أكيد المشتري يبي يستفيد من ال 70 الف كلها مالته ، فاشلون راح يحصل ال 10 آلاف الناقصة علشان يعطيني إياها مع باقي قيمة البيت؟ مو معقولة لازم يدبرها كاش لأنه يبي يستفيد من ال 70 كاملة؟

 

[Packard Bell]

نقل الالتزام بالنسبة للمشتري لا يكون بمقدار مديونية البيت، بل يكون بمقدار السقف الأعلى من القرض العقاري اللي يستحقه المشتري وتقرره لجنة البنك. يعني تحسب المديونية الجديدة على المشتري بـ 70 ألف دينار (السقف الأعلى) ، ومن ثم يتم عمل مقاصة ما بين مديونية البائع ويصرف الفارق له بعد سداد كامل المبلغ المستحق للبنك.

مثال: بعت البيت بـ 150 ألف دينار والبيت مطلوب 50 ألف للتسليف، يقوم المشتري بدفع 80 ألف دينار كاش، و يقوم البنك بسداد الـ 70 ألف عنه. وبما أن البيت مطلوب 50 ألف، يخصم هذا المبلغ ويطلع الشيك للبائع بمتبقي الملبغ وهو 20 ألف دينار.
​

 

[sloom11]

موضوع حلو فيه احد الخوان ذكر بيع بطلب شلون
اذا البيت مطلوب للتسليف شلون يصير بطلب اتمنى المشاركه من الجميع

 

[دولار2009]

كم مرة يحق لك تبيع وتشري إذا عن طريق بنك التسليف والادخار ؟

ومتى يتم خصم ال 15% وفي أي بيعة الثانية أو الثالثة أو الرابعة ؟؟؟؟

ضرووووووووووووووري الرد ياأخوان عندي بيعة بعد شوي ؟​

 

[Packard Bell]

والله يا أخوان أنا جاوبت على بعض استفسارات الأخ السائل لأني مريت بنفس التجربة بالسابق، أما الأمور الأخرى اللي تتفضلون فيها عندي بعض المعلومات لكن قد تكون غير دقيقة، فأفضل أنكم تزورون موقع بنك التسليف والادخار.
​

 

[busalih]

مشكور اخوي Packard bell و بصراحة جوابك ممتاز و واضح ، و استفدنا واجد

أخوي تقدر تقولنا شكثر وقت خذت عملية المقاصة و صرف الفارق لك؟ يعني متى استلمت فلوسك من بنك التسليف بعد ما حولت البيت عند التسجيل؟

أدري كثرت الأسئلة عليك ، و مشكور جدا و تقبل الله منا و منكم صالح الأعمال

 

[Packard Bell]

مشكور اخوي packard bell و بصراحة جوابك ممتاز و واضح ، و استفدنا واجد

أخوي تقدر تقولنا شكثر وقت خذت عملية المقاصة و صرف الفارق لك؟ يعني متى استلمت فلوسك من بنك التسليف بعد ما حولت البيت عند التسجيل؟

أدري كثرت الأسئلة عليك ، و مشكور جدا و تقبل الله منا و منكم صالح الأعمال

إسبوعين.. وممكن أقل حسب معارفك​