مواقف محرجه جدا....بطولة أطفالنا!!!

[zizo 40]

مواقف محرجة من ‏الأطفال

تقول وحده من الأمهات .. ‏كنت معزومه على حفل ‏عشاء فأخذت ابنتي الصغيرة معي ، فلما جلسنا حول البوفيه ظنت انه مطعم وقالت بصوت ‏عال : هذا الأكل بفلوس و إلا ببلاش ؟؟ فضحكوا عليها الحاضرات..
------------------
‏والثانية ... ‏جانا ضيوف وجابوا معهم هديه للمولود ‏الجديد فكان ابني يريد فتحها فقلت له ( اصبر حتى يذهبوا ) صار يدخل ويطلع ولما مل ‏الولد من الانتظار دخل وقال بصوت مرتفع ..... (خلاص أبفتحها شكلهم بينامون عندنا( !!!!
------------------
‏وقالت وحده بعد ... ‏ذهبنا في زيارة لعمات زوجي ‏، وحده منهم كبيرة في السن قلت لولدي حب رأسها فرفض وقال ريحة رأسها شينه !!! -‏يقصد الحناء- شوفوا الإحراج اللي صار لي ..!!!


‏كما قالت.. ‏جتني وحده ‏من صديقاتي وكانت ملامحها تشبه دول شرق أسيا فجلست بنتي تطالعها بقوه ، و لما قلت ‏لها عيب ردت وقالت شكلها شغالة
------------------
‏هذه من جد ‏يبغالها بالشنطه على رأسها...‏أخذت من أختي شنطه ورحنا لحفله ومعنا بنت أختي ‏ولما وصلنا وخلعت عبايتي حتى شافت بنت أختي الشنطه وقامت تسحبها بقوة وهي تقول ) ‏حقت ماما هاتيها ) !!! وأنا أحاول أسكتها... !!!
------------------
‏و وحده ‏تقول .. ‏زوجي كان عنده ضيوف على العشاء وحطيت العشاء كله لهم وكان ولدي يبي ‏يتعشى قلت له: إذا خلصوا الرجال بنتعشى.. رحت أصلح لهم الشاهي ... راح ولدي دخل على ‏الضيوف وقال لهم ( لا تخلصون العشاء لأنا بنتعشى أنا وأمي بعدكم ) !!! شوفوا وجه ‏أبوه وقتها ....!!!
------------------
‏وحده تقول ...‏بنتها دايم ‏تحرجها بنقل الكلام قدام الناس – هذا عيب اللي يحش بالناس - تقول : مره كنت أكلم ‏صديقتي بالهاتف وكنت أقولها عن وحده من جاراتي وإني ما أطيقها دمها ثقيل وإذا جت ‏تجلس عندي بالساعات في بيتي وتحب الكلام الكثير ومره دق الباب وطلعت جارتي قلت لها : ‏تفضلي وجتها بنتي الصغيرة وقالت بصوت عالي : يمه هذي جارتنا اللي دمها ثقيل واللي ‏إنتي ما تحبينها !!! طيب ليش تدخلينها البيت ...!!! تقول الأم : صار وجهي مية لون ..!!!! ‏ويوم سمعت جارتي هذا الكلام زعلت وطلعت من البيت ....!!!
------------------
‏تقول أخرى ....‏هذا موقف حصل لي ومع أقاربي : كنا ‏بنصلي المغرب جماعه في إحدى الاستراحات وكان أمامنا طفلين , الأول يقول للثاني : ‏أنا اسم أمي فاطمة , ايش اسم أمك انتا ؟؟؟؟ يرد عليه الولد الثاني وهو اصغر منه ‏بكثير : اسم أمي ماما !!! وهاتك ضحك وحنا نصلي استغـفـر الله ما قدرنا نمسك الضحكة .!!!
------------------
‏في المدرسة ...‏كانت المعلمة تشرح لطالبات الصف ‏الثالث الابتدائي عن وسائل الاتصال الحديثة مثل الهاتف والتلكس والبريد الجوي ‏والفاكس فرفعت إحدى الطالبات الصغيرات يدها وقالت: أبله حنا عندنا فاكس في البيت ‏عند جدتي وتستعمله كل يوم....!! فشجعتها المدرسة على إكمال حديثها وقالت: وكيف ‏تستخدمونه؟؟؟ فقالت الطفلة: تدهن به ...- البنت بالطبع كانت تقصد دهون الفكس- ....!!!!!
------------------
‏أيضاً ‏في المدرسة ...‏طفلة في الروضة كانت تعبث بأنفها أثناء الحصة ... فانتقدتها ‏المعلمة وقالت لها استعملي المنديل عيب اتسوين كذا فأجابت الطفلة ‏لا مو عيب !! ‏بابا يسوي كذا !!!!
------------------
‏جاء بيكحلها عماها ...‏دعيت العائلة للعشاء عند أحد أقارب الزوج وأثناء تناول الطعام كانت صاحبة ‏المنزل تضـيّـف الأم وتصر عليها أن تأكل صحناً آخر بينما كانت تتمنع فرد الطفل ‏بلهفة لإنقاذ أمه من المأزق .... (( لا تحطين لها صحن ثاني ترى بابا يقولها لا ‏تكثرين أكل انتفختي !!! ((
------------------

و أختم بهذي النكته :‏ والد و ابنه راكبين الباص , وصورة ‏الرئيس فلان معلقه في المقدمة
-‏الولد وهو يأشر على الصورة : بابا بابا مو هذا ‏اللي قلت عنه حمار !!!!!
-‏الأب: لمين هالولد يا إخوان ؟؟؟​

 

[zizo 40]

اللى صارت وياه مواقف محرجه مع العيال يا ليت يشاركنا, خلنا نتسلى ونضحك شوى

خلنى أبدأ:

قبل سنتين كنت مع العيال فى شرم الشيخ فى إجازه
بنتى كان عمرها تقريبا 3 سنوات, وكنا على المسبح ووياها شيبس,
فى طفل روسى قريب منا وشكله حزين, المهم بنتى تعزم عليه شيبس بالعربى, طبعا مو فاهم, قلتلها هذا ما يفهم عربى وقلتله you want chips
طبعا حتى إنجليزى ما يتكلم, المهم ما يبى وفشلنى, قلتله "لاه يا الأحمر يا الأثول" طبعا عارف ما يفهمنى وماكو عرب قريبين

بالليل فى مطعم الفندق, بنتى لاحقه طفل عربى وتعزمه على شيبس, هم ما يبى, لحقته وتصارخ "يا أحمر يا أثول" "يا أحمر يا أثول" "يا أحمر يا أثول"

طبعا أنا وراها وماكو فايده تصارخ, على بالها شى حلو, وأنا طبعا ندمت أقول شى غلط جدامها مره ثانيه
والحمدلله مع إنهم عرب ما فهموا, إلا عائله سعوديه قريبه تبسموا
وحتى لين ردينا الكويت تعيد الجمله للكل, وأنا وراها وراها حتى نستها والحمدلله

 

[النايفه]

‏كما قالت.. ‏جتني وحده ‏من صديقاتي وكانت ملامحها تشبه دول شرق أسيا فجلست بنتي تطالعها بقوه ، و لما قلت ‏لها عيب ردت وقالت شكلها شغالة

أمبيييييه أحس هذا الموقف اللي لو أنا فيه ودي الأرض تنشق وتبلعني

أنا أكثر شي يحرجني ولدي يوم كان صغير عمره وقتها خمس أو ست تقريباً... مااااايقدر يسكت إذا شم ريحه مش ولا بد عادي يقول ماما فلان ريحته خايسه أو ما أبي أسلم على فلانه ريحتها مو حلوة واللي في باله يقوله طبعاً خفت هالشغله مع العمر بس للحين صراحته قتاااااله حتى المدرسه ممكن يقول لها بوجها رايه فيها وبدا يتحسن في أنه يتعلم المجاملة لكن ما أقول غير الله يعين اللي بتاخذهبيطلع لها قرووون

 

[ورد و هيل]

مرة كنا ناوين نروووح عمررة

قبلها ب ليله --كنت اقوول حق بناتي شنوو يسووون ب العمرة

وومادري ش ياب طاري ان الناس اللي يدخلون مكة مسلمين--


وواللي مايدخلووونها غير مسلمين --كفار


المهم --

اول ماوصلنا المطار--الهوووتيل طرش لنا سيارة تشيل 6 اشخاص


بعد ركوبنا السيارة ب نص ساعة -- تعبت مرة عجووز معانا ما اعرفها بالسيارة

جان يوقفووون السياره على جنب ---عشان ينزلوونها -- تتنفس وترتااح



جاان تسالني بنتي و باعلى صوووت -- والولد لي الحين ينزل امه من السيااارة



ماما هذيل الكفار اللي قلتي عنهاا امس


انااا من الصدمة -- حطيت ايدي على حلجهاا وسكرررته





الناس بحالة -- امهم تعبانة ووبنتي تغثهم زيااادة ::verymad::


-

 

[هيفا]

رفيجتي مع بنتها بيزورون ناس

الام وصت بنتها اذا حطولنا عصير لا تشربينه كله وتفشلينا جنه مو شايفه خير

خلي شويه بالقلاص

لزوم الايتيكيت يعني

يوم الاستقبال الام قاعده بصوب والبنت بصوب ثاني بعيده عنها

حطولهم عصير وشربوا

ولا البنت تصوت على امها من بعيد بأعلى صوتها

يماااا يماااا هالكثر يخلوووون

ولا بعد اشرب ؟

 

[إبن الوليد]

انا ابي اذكر موقف محرج لي في البنك الوطني


وقفت بجانب واحد لابس دشداشه وكان شعره مدهون شوي
واسمر الون ... وانا واقف بجانبه ، صدفه رقمه انتهى ، وجاء دوري

ولكن لم يغادر ظل واقف قال له الموظف خلاص معاملتك انتهت

هم لم يرد ولم يغادر وقف يطالعني ويطالع الموظف

قلت انا للموظف ، هذا هندي مايعرف عربي وانا والله على نيتي على بالي صج هندي

قال الموظف يبا الريال كويتي حرام عليك

انا انصدمت من رد الموظف ، وانحرجت حيل ، واعتذرت للشاب

ولما غادر الشاب الذي يشبه الهندي ، قال لي الموظف ليش احرجته

قلت للموظف والله مادري شفته مايتكلم وشكله هندي

الموظف يضحك على الاخر لما مشيت من عنده وهو يضحك ويتبسم​

 

[زهره]

هيفا ؟؟؟؟؟

شهالصوره؟؟

 

[هيفا]

هيفا ؟؟؟؟؟

شهالصوره؟؟

ليش مو حلوه صورتي؟

 

[زهره]

شطاري؟؟

 

[جواهر]

هاهاهاهاهاهاهاي مواقف حلوه يا عزوز

والله الاطفال الخوف منهم مايمسكون كل شي ويخزنونه ويفضحون

لي رجعه ان شاء الله بموقف

 

[zizo 40]

هاهاهاهاهاهاهاي مواقف حلوه يا عزوز

والله الاطفال الخوف منهم مايمسكون كل شي ويخزنونه ويفضحون

لي رجعه ان شاء الله بموقف

ناطرين الموقف اللى صار وياج.

قبل شهر سألت بنتى خدامتنا وين بلدها؟ قالت أثيوبيه

وأمس رحت البنك وتشوف بنتى خال ناطر دوره وتتحرش فيه وتسأله: إنت أثيوبيه؟

شوفى الإحراج, طبعا الخال ضحك وعطاها علكه

 

[جواهر]

لا والله الموقف ماصار لي

صار الموقف مع وحده اعرفها تقول

كانت هي وزوجها معزومين ع عرس ناس زوجها مايحبهم

فقالت له بكره زواج بيت فلان نبغي نحضر زواجهم

قال لها ماني رايح ماحبهم ولا ارتاح لهم روحي انتي

طبعا ولدهم جالس معهم ويسمع اليوم الثاني حضرت الزوجه الفرح مع اهلها

وولدها الصغير راح مع خواله وهم بصالة الفرح واحد من اهل العرس شاف

الولد وساله اشلون ابوك وليش ماحضر ولا شفناه

قال له ابوي يقول هو مايحبكم ولايرتاح لكم ولاهو حاضر فرحكم

اليوم الثاني تصير مشكله بين العيلتين

 

[دروب الخير]

في آخر سنة لي في الجامعة طلعنا انا وصاحبي بعد نهاية المحاضرات ورحنا نتغدى.

كانت الساعة3 تقريبا وكان المطعم فاضي، طلبنا وبعد شوي دخلت عايلة كويتية ومعاهم ولد مزعج

رايح وراد بالمطعم ، انا وصاحبي قاعدين نسولف وناطرين الطلب ، وهالمزعج يحوس بالمطعم وفجأة

وبلمح البصر لقيت غترتي وعقالي على الارض،ابتسم صاحبي وانا تمالكت اعصابي وقمت وحطيت

الغترة على الكتف وقلت حق صاحبي اشرايك فيني مو أحلا بدون الغترة. طبعا اكيد عرفتو الي صار

الولد وهو مار من وراي سحب الغترة وراح يركض وكأن ما سوا شيئ، طبعا ابوه انحرج وكان رجل

محترم ، قوم عياله وزوجته واظاهر قالهم انتو مو كفو مطعم .

 

[zizo 40]

لا والله الموقف ماصار لي

صار الموقف مع وحده اعرفها تقول

كانت هي وزوجها معزومين ع عرس ناس زوجها مايحبهم

فقالت له بكره زواج بيت فلان نبغي نحضر زواجهم

قال لها ماني رايح ماحبهم ولا ارتاح لهم روحي انتي

طبعا ولدهم جالس معهم ويسمع اليوم الثاني حضرت الزوجه الفرح مع اهلها

وولدها الصغير راح مع خواله وهم بصالة الفرح واحد من اهل العرس شاف

الولد وساله اشلون ابوك وليش ماحضر ولا شفناه

قال له ابوي يقول هو مايحبكم ولايرتاح لكم ولاهو حاضر فرحكم

اليوم الثاني تصير مشكله بين العيلتين

مسكين الأب صادوه

مشكوره على المشاركه الحلوه

في آخر سنة لي في الجامعة طلعنا انا وصاحبي بعد نهاية المحاضرات ورحنا نتغدى.

كانت الساعة3 تقريبا وكان المطعم فاضي، طلبنا وبعد شوي دخلت عايلة كويتية ومعاهم ولد مزعج

رايح وراد بالمطعم ، انا وصاحبي قاعدين نسولف وناطرين الطلب ، وهالمزعج يحوس بالمطعم وفجأة

وبلمح البصر لقيت غترتي وعقالي على الارض،ابتسم صاحبي وانا تمالكت اعصابي وقمت وحطيت

الغترة على الكتف وقلت حق صاحبي اشرايك فيني مو أحلا بدون الغترة. طبعا اكيد عرفتو الي صار

الولد وهو مار من وراي سحب الغترة وراح يركض وكأن ما سوا شيئ، طبعا ابوه انحرج وكان رجل

محترم ، قوم عياله وزوجته واظاهر قالهم انتو مو كفو مطعم .

يا كثرهم الأولاد من هذى النوعيه فى هذا الزمن

مشكور على الإضافه

 

[العاشق]

انا ابي اذكر موقف محرج لي في البنك الوطني


وقفت بجانب واحد لابس دشداشه وكان شعره مدهون شوي
واسمر الون ... وانا واقف بجانبه ، صدفه رقمه انتهى ، وجاء دوري

ولكن لم يغادر ظل واقف قال له الموظف خلاص معاملتك انتهت

هم لم يرد ولم يغادر وقف يطالعني ويطالع الموظف

قلت انا للموظف ، هذا هندي مايعرف عربي وانا والله على نيتي على بالي صج هندي

قال الموظف يبا الريال كويتي حرام عليك

انا انصدمت من رد الموظف ، وانحرجت حيل ، واعتذرت للشاب

ولما غادر الشاب الذي يشبه الهندي ، قال لي الموظف ليش احرجته

قلت للموظف والله مادري شفته مايتكلم وشكله هندي

الموظف يضحك على الاخر لما مشيت من عنده وهو يضحك ويتبسم​

حشر الموضوع مواقف للاطفال

مووووو للشيبان ​

 

[ليث متواضع]

مواقف الاطفال حلوه وفي نفس الوقت محرجه وما نقدر ننساها ابدا

 

[الاحمـد]

موضوع عجيب يستاهل الرفع