الحكومه و الظلم بالرواتب

[F A L C O N]

مثل مو مبين بالعنوان يا شباب وش رايكم بسالفه الرواتب وبالظلم اللي صاير بالديره

مثلا ( وكيل النيابه والقاضي والمهندس والظابط والدكتور والقياديين ) وظيفه ماتدخلها الا بواسطه نشيطه جدا جدا

زيدوهم عليهم بالعافيه بس مو بالطريقه هذه وظيفه مرتاحين
ومعاش دبل الوظايف العاديه ب 5 مرات ومزايا تقول امراء

وكل سنه زيادات ومزايا وحنا الموظفين العاديين كنا مو محسوبين من المواطنين
المعاش متدني والزياد اذا طارت 50 دينار والاسعار اندبلت 5 مرات

مثال خريج المعهد التجاري 3 سنوات بعد الثانويه معاشه 560 والمهندس بعد الثانويه 4 سنوات معاشه 1600 !!!!!!! مو ظلم ياناس


مثال ثاني : باحث قانوني معاشه 800 دينار و وكيل نيابه متعدي ال 2000 هذا من غير المزايا اللي تغني عن المعاش
وترا مثل الشهاده والتخصص ولكن هذا عنده واسطه وهذا ماعنده

هل الحكومه مستوعبه بالوضع او انها تنظر بعين واحده !!!!!

وش رايكم

 

[faisel 2]

اللي عنده نقابه قويه ودائما يهددون بالاضراب يقرون لهم كادر ...الحكومه زادت رواتب الضاه بعد تهديدهم بالاضراب ..والدكاتره أقروا لهم كادر بعد ما نفذوا تهديدهم وأستقالوا.... والمهندسين اقروا لهم كادر بفضل عادل الخرافي والقحطاني رئيس جمعيه المهندسيين ضغطوا على الزبن .....ونقابات النفط ها هي تزمجر وتهدد بالاضربات اذا تأخر زياده رواتبهم أكثر...........والفتوى والتشريع كذلك .................اذا تبي كادر هدد بالاضراب وتكون قادر على تنفيذه ........ز

 

[F A L C O N]

المشكله نقاباتنا نايمين ومحتكرين الكراسي لمصالحهم الخاصه

انشاء انشوف اشكال جديده بكل النقابات

 

[زهره]

كل واحد وشهادته ودراسته ومجهوده 000 هذي الحقيقه0

المعهد مو نفس الجامعه , انا معهد وكنت جامعه , الدراسه صعبه ويبيلها مجهود واللي درس وتعب وخلص حصل نتيجة تعبه.

 

[F A L C O N]

يابو التعب انت اي تعب واي بطيخ قاعد اقولك واحد يدرس الجامعه وكليه الحقوق او الشريعه ويتخرج باحث قانوني والثاني هم كليه الحقوق او الشريعه بس عنده واسطه وكيل نيابه او محقق

وتعال شوف الرواتب بينهم شي مايدش العقل

 

[زهره]

يابو التعب انت اي تعب واي بطيخ قاعد اقولك واحد يدرس الجامعه وكليه الحقوق او الشريعه ويتخرج باحث قانوني والثاني هم كليه الحقوق او الشريعه بس عنده واسطه وكيل نيابه او محقق

وتعال شوف الرواتب بينهم شي مايدش العقل

ممكن بس هم تفرق انت شنو بالتخرج امتياز والا مقبول و الذكاء , يعني في وحده معاي جامعيه وامتياز بس ما تعرف تشتغل

 

[بو بـدر]

لكل وظيفة متطلباتها ومستواها الاجتماعي والوظيفي حتى مع تساوي المؤهلات لابد من وجود فوارق مادية وهذا بجميع الدول العالم سواء المنتجة او المستهلكة

سؤال هل تعرف طبيعة عمل الباحث القانوني بالضبط وطبيعة عمل وكيل النيابة حتى تطالب بالمساواة بينهم !!

مثالك غير موفق فيه ...

 

[مقام العز]

لكل وظيفة متطلباتها ومستواها الاجتماعي والوظيفي حتى مع تساوي المؤهلات لابد من وجود فوارق مادية وهذا بجميع الدول العالم سواء المنتجة او المستهلكة

سؤال هل تعرف طبيعة عمل الباحث القانوني بالضبط وطبيعة عمل وكيل النيابة حتى تطالب بالمساواة بينهم !!

مثالك غير موفق فيه ...

المفارقات الماديه بين الوظائف والشهادات ماطلعت الا هالسنة وينكم من خمسين سنه؟! وبعدين رواتب من 4000دينار وبونص 8000و12000 علي شنو؟؟؟ أخاف الجماعه اعضاء بالكونغرس وانا مادري! طالبوا لنا اعضاء مجلس الامة ب50دينار وحلت الحكومة مجلس الامة ونشوف الحكومة بعد الثورات قامت تركض وتكبكب الفلوس وطخيتوا ,اما المساكين ذوي الطبقه الكادحه انشغلوا بعيش التموين.نطروا عيش التموين يخلص وشوفوا اشراح يسوون اصحاب الطبقه الكادحه ثوره ثوره عليه دار دار عيش عيش زنقه زنقه

 

[ستوك]

بعدين عشان الواحد يتعاطف مع الموضوع لازم يكون فيه مصداقية شوي ..

يعني حاشر المهندسين وياهم وتييب أرقام من عندك تقول مهندس يدرس 4 سنين يستلم 1600

أنا مهندس ودرست 5 سنين مو 4 .. ودراستنا الله يعلم بصعوبتها .. اذا نسبة التسرب من الكلية 60 % يعني من كل 100 طالب فقط 40 اللي يتخرجون و عقب ال5 سنوات من الدراسة يتخرج المهندس ويتعين على الدرجة الرابعة ب1080 دينار على الكادر الجديد وقبل كان 930 دينار قبل الكادر.

وانت حضرتك تقول 1600 كلام خاطئ و أنا مسئول عن كلامي

بعدين أنا مهندس عمري ما طالعت الدكتور وقلت أبي معاشي يصير مثل الدكتور لوجود فارق في طريقة الدراسة وحساسية المهنة .. و حتى القضاة و رجال الأمن ووكلاء النيابة هذيلة لهم أهمية خاصة لأن يشتغلون في أماكن حساسة و طبيعة عملهم صعبة.

فالمقارنة بين شهادتين مختلفتين صعبة .. اذا تبي تقارن قارن نفس الشهادة بنفس التخصص في مكانين مختلفين طبيعة العمل بينهم متشابهه أو تقارن شهادتك في الدول المجاورة جم يستلمون حتى يكون الموضوع له فائدة.

 

[F A L C O N]

يا اخ ستوك انت تتكلم عن المهندس المبتدء وبدون اي علاوات انا رفيقي مهندس وراتبه 1450

وكل درجه يترقاها 150 دينار اقل شي

والمهندس المختص متعدي ال 2000

وبعدين من ناحيه الدراسه فحدث ولا حرج اكثرهم من سلوفاكيا والاردن ومصر وبريطانيا ويجيك اهني مايفهم اي شي دراسه خرابيط

انا اكلمك بالواقع

 

[مراويس]

كل جهه تختلف عن جهه انا جامعي وتوظفت بقطاع حكومي سنة 2006 راتبي 550 دينار يعني مالا داعي تتكلم عن الظلم كله ارزاق من رب العالمين والحمدالله على كل حال المهم عايشين بأمان وبصحه وعافيه

 

[مراويس]

اذكر ربك انت عايش بالكويت تعليم وصحه ابلاش وكافي كل سنه عندك مزايا وكافي مخالفات مروريه تعدي الالف والقاضي يطيحهم لك وكافي يعطونك الامن وتنام وباب بيتك مفتوح .. شوف مصايب غيرك وتهون عليك مصيتك شوف الفقر بالعالم والله كافي بالكويت بمليون دينار تقدر تعيش والي عندا 100 دينار يقدر يعيش شنو تبون انتو تصيرون ملوك غصب

 

[مقام العز]

ياجماعه العتب علي الحكومة زادت شريحة من الوظائف وكشتت بالموظف العام ولاتنسون هذا الموظف زود علي راتبه قليل لايتجاوز 1000دينار ومتحمل قروض وفوق هذا الدنيا غلت ومصاريف بين ايجار وتعليم اطفال ومعاش خادمه وووو والله الالفين يالله تكفي

 

[مراويس]

بالكويت الي راتبه 100 يعيش والي مليون يعيش حمدوا ربكم تره النعمه زواله لا حول ولا قوه الا بالله ..

 

[F A L C O N]

مراويس انت تجامل نفسك

وطبعا الحمد لله سبحانه وتعالى

ولكن ان الحكومه تزيد ناس زيادات غير معقوله وتجحف بحق ناس هذا مافيه عدل

وخير الكويت لهلا مو لناس وناس والطبقه العامله لها حق