اريد ان ابدأ المضاربه بشكل يومي بالبورصة الكويتية واحتاج النصيحة

[MH For Ever]

السلام عليكم

اخواني اود شراء اول سهم لي في البورصة الكويتية يكون سهم للمضاربة حيث انوي الدخول بالمضاربة بشكل يومي بمبلغ بسيط ابتدي فيه .

فما هي نصايحكم لي وبأي سهم تنصحوني للبدء؟؟

مع جزيل الشكر سلفاً

 

[CHART TRADER]

اذا كنت ناوي تكون مضارب يومي تحتاج الى خبره مو اقل من ثلاث

سنوات .....



تحياتي لك ...

 

[الراقي]

اذا كنت ناوي تكون مضارب يومي تحتاج الى خبره مو اقل من ثلاث

سنوات .....
هذي النصيحة الطيبة الله يجزاك خير ياالحربي

 

[المستثمر الراكد]

صح لسانك يا الحربى

 

[kuwait2world]

ابتعد عن الطمع وكلمة راح يرتفع اكثر ساعات اتخليك اسابيع علي الرف اطالع سهمك

اي ارتفاع طيب ومقنع بيع وقول اللي بعده

 

[المهذب جداً]

.

المجموعة الدولية للإستثمار راح يوصل 330 وينزل إلى 260 يرد إلى 380 فلس

بتروجلف راح يوصل 430 وينزل إلى 340 يرد إلى 450 فلس

بوبيان ==> 1.460 دينار

الأنظمة ==> 1.400 دينار

الحاسبات ===> 285 فلس

المباني ===> 800 فلس

.

 

[بوحسن]

اول شي دش السوق واعتقد اعتقاد جازم ان الرزق من الله سبحانه فقط

ثاني شي انوي انك جزء من ربح اليوم ...لله سبحانه ( للفقراء )

ثالث شي تابع المنتديات واخص بالذكر هذا المنتدى

رابع شي ركز على جم سهمكل يوم صبح قبل افتتاح البورصه بمتابعه اخبار الجرايد وغيرها و للا تشتت نفسك بكل الاسهم

خامس شي ..وايد ركز على الاشاعات ( اهي الي تربحك )

سادس شي : بيع دايما باخر اليوم ..لا تنطر لي باجر ( وانطر السهم باجر)

سابع شي لا تشتري اول نص ساعه ( واتحداك تتحمل هالنقطه )

ثامن شي لا تبيع شي شريته خلال اول نص ساعه من نزوله وراقب بالنزول الكميات

نصيحتي الاخيره لك( اعتبر ان كل طراق بتعلومه )

 

[almared]

اول شي دش السوق واعتقد اعتقاد جازم ان الرزق من الله سبحانه فقط

ثاني شي انوي انك جزء من ربح اليوم ...لله سبحانه ( للفقراء )

ثالث شي تابع المنتديات واخص بالذكر هذا المنتدى

رابع شي ركز على جم سهمكل يوم صبح قبل افتتاح البورصه بمتابعه اخبار الجرايد وغيرها و للا تشتت نفسك بكل الاسهم

خامس شي ..وايد ركز على الاشاعات ( اهي الي تربحك )

سادس شي : بيع دايما باخر اليوم ..لا تنطر لي باجر ( وانطر السهم باجر)

سابع شي لا تشتري اول نص ساعه ( واتحداك تتحمل هالنقطه )

ثامن شي لا تبيع شي شريته خلال اول نص ساعه من نزوله وراقب بالنزول الكميات

نصيحتي الاخيره لك( اعتبر ان كل طراق بتعلومه )

راح تشبع طراقات بس تحمل

أهم شيء تابع التحليل الفني للسهم مهم جدا وإذا ما تعرف لا تضارب ...
وأنت حر عقلك في راسك وتعرف خلاصك

 

[بوحسن]

اي والله بيشبع طراقات

هالشي اكيد لاي واحد يضارب بدون مرشد وبدون خبره كافيه

اكبرها واسمنها باطين بالمخازن ومجموعتهم

 

[النوط الأخضر]

اخوي الحبيب فور افر بالنسبة لك كمتداول جديد بالبورصة فأنا اقولك ابتعد ثم ابتعد ثم ابتعد عن اسهم شركات المضاربات اليومية وانصحك بالاتجاه الى اسهم الاستثمار المتوسط اوالطويل وتريح بالك او انصحك بالابتعاد عن البورصة ووضع افلوسك في صناديق استثمارية , والله ايوفقك .

 

[MH For Ever]

الف شكر اخواني جميعا ما شاء الله ما قصرتوا كفيتوا ووفيتوا.

اخي المهذب جداً بالنسبة للأسهم التي نصحتني وهي المجموعة الدولية للإستثمار وبتروجلف متى تتوقع نزولها حسب ما اشرت بالأعلى؟؟

اخي السهم الاخضر ممكن تعطيني امثلة على اسهم الاستثمار المتوسط؟؟

مع جزيل الشكر لكل من شارك وعساكم على القوة

 

[boalons]

اخوي انصحك بالابتعاد عن المضاربة اليومية لانها صعبة جدا لاتحسبها سهله ابد

 

[الرشيدي]

نصيحه من ذهب

اخوي انصحك بالابتعاد عن المضاربة اليومية لانها صعبة جدا لاتحسبها سهله ابد

كلام مشرفنا العزيز بولنس جميل وهو عين الصواب


بس ابذكر لك مواقف احصلت معي


شريت التمويل الخليجي :385وبعت بال410

شريته مره ثانية بال460وبعت بال510هذا كله في فترة بسيطة


لو ناطر علي السهم لي اخر السنة جان دوبلت فلوسي

ثانيا :المصالح العقارية (الدايخه ) شريتها بال275وبعتها علي 250فلس

وبعد شهر بس وصلت الي 290فلس

شريت الصناعات المتحدة بال196وبعت بال220 وينها اللحين

مايد مواقف واسهم اكثر دخلت وطلعت واخر السنه محقق 700دينار بس


علي راس مال 30الف دينار لو صابر علي اسهمي جان دوبلت فلوسي


بس شتقول مسوي نفسي مضارب

اخذ النصيحة وابتعد عنها نهائيا اريح لك ولاعصابك صابتي حاله نفسية منها

 

[boalons]

خذ الاقوى يالرشيدي

كانت عندى المجموعه بكل المبلغ الي عندى بال 140 وقلت ماراح ابيع الا اخر السنه

الحمدلله على كل حال ضاربت فيها وطلعت قرابه 50 فلس لكن لو مخليها للحين ....

الله كريم

 

[ALBETROLY]

السلام عليكم

ارضى بالقليل ما يطبع بالسوق الا الطمع اسال مجرب

 

[bo jassem]

نصيحه من أخ الى أخ,,,
الله يرزقك من أوسع أبوابه بس سالفة المضاربه اليوميه انا ماني معاك بالمره لعده أسباب, منها الربح البسيط والذي هو ضايع بالعمولات, الشي الثاني احتمال الخطوره كبير مقارنه للاستثمار المتوسط المدى (3 الى 6) شهور, الشي الثالث انت قاعد على اعصابك بشكل كبير و لا تنسى العصبيه تولد ارتفاع الضغط و السكري يكافينا و يكافيكم الشر,,,على العموم الله يوفقك ويسهل دربك و يرزقك من واسع ابوابه,,,
من سأل ما ضاع ,,, و اسال الاعضاء الكرام و المتداولين عن التداول اليومي و شوف شنو ينصحونك فيه,,,

أخوك محمد,,,

 

[المهذب جداً]

.

اخي المهذب جداً بالنسبة للأسهم التي نصحتني وهي المجموعة الدولية للإستثمار وبتروجلف متى تتوقع نزولها حسب ما اشرت بالأعلى؟؟

النزول من أول شهر سبعة و الصعود في النصف الثاني من شهر سبعة إن شاء الله!

وخلك على المجموعة الدولية للإستثمار ولاتفكر بغيرها أبد وأنا أخوك ...؟؟!!

.

 

[MH For Ever]

الف شكر اخواني جميعا مرة ثانية ويا ليت لا تحرموني من نصايحكم تراني جديد واحتاجكم تاخدون بإيدي عشان اطلع السلم درجة درجة.
اخي المهذب جداً يعطيك العافية على النصيحة وان شاء الله يرزقنا وياكم وجميع الاخوة.

عساكم القوة

 

[assa]

السلام عليكم

اول شى اذا حبيت تشترى لازم تراقب السهم فتره معينه

ثانيه: تتابع اخبار الشركات والتوفيق بيد الله

ثالثا : راح تربح باحدى الطرق التاليه :
أ : اولها اذا الله وفقك وقسم لك ربح انشاء الله
ب : المعلومه لها اثرها فى الربح . وانواعها اما خبر او احد الناس الذى له معرفه فى احد الصناديق او التجار يبلغك انه غدا مثلا سوف يتم الضاربه على سهم معين . بس ديربالك يمكن يغير التاجر او صاحب المحفظه رايحه اذا صحا من النوم . وهذى مشكله هاهاهاها

رابعا واخر نقطه وهذى اهم نقطه : اذا شريت فاعرف ان الله قسم لك ربح من عنده فقط . فلازم تقول الحمد والشكر لله . وتحاول تشكر باى طريقه لو بالكلام والدعاء والشكر .
واذا خسرت لا سمح الله . فاعرف ان الله قد قسم لك الخساره وهى من الله سبحانه فقط لا غير . فيجب ان تراجع نفسك فربما اخطات بشى او ان هذا اختبار من الله فيجب ان تشكره كذلك
وديربالك ترى الطمع مشكله اذا ربحت ولو قليلا اطلع من السهم الا اذا علمت انه طاعد الى حد معين مرتفع هذا بالنسبه للمضارب

واعرف ان كل الذي يقال هو وجهات نظر

وان السوق يمشي بتوفيق من الله
ولا تفعل مثل الذي يدخل السوق ويقول يا خال يا ابوثنتين اى مقامر
فالسوق ممكن ان تكون مقامره او باب رزق على دراسه ومتابعه
والله اعلم
والله اعلم
والموفق الله

واسمحو لى اطلت عليكم بس هذى وجهه نظر
والله اعلم والله يوفقكم الى مافيه الخير
---------------------------------
اذا اصبت فمن الله سبحانه وتعالى فقط
واذا اخطات فمن نفسي والشيطان

 

[أحمد بورصة]

طراقي

انا طراقي يا طويل العمر اني شريت المخازن اب 4980 اوصلت 6750 بفتره قياسية جدا و ما بعت.

نصيحتي لك


لا تطمع مثلي

و حطلك هدف

مثلا : بيع اذا ارباحك 10 % .. و بيع اذا خسارتك 5%

هذا كمثال و النسب انت و كيفك .. بس بالمعقول طبعا

و بالتوفيق انشاء الله