توهقت بالبيت اللي طلعلي بالقرعه شسوي الحين

[q8taub]

الموضوع وما فيه اخواني

اني قالوا لي انه سيتم توزيع بيوت في مدينه صباح الاحمد
كلها زوايا و600 متر وشغل عدل مدل
عيشوني في عالم الاحلام
بتصورات عن المنطقه

المهم
رحت القرعه وطلع رقمي اخر 10 ارقام
يعني البيت مردوف ومافي ارتداد يسوي
اي شي بحرقة قلب

الحين شسوي
هل اقدر اقول للاسكان ما ابي البيت
اخذوه و دخلوني القرعه لمنطقه اخري ؟

انا الحين هونت من مدينه صباح و ما ابيها
هل ممكن

علموني يا شباب ؟
هل في حل او طريقه

 

[yahoo77]

مافي حل
الا اذا
تبدل مع بيت بنفس المنطقه بالمواصفات اللي تبيها
او منطقه ثانية
او انك تبدل مع طلب
وشكرا

 

[مستريح]

تقدر ترجع القسيمة عادي بس لما يسلمونك الارض رسميا فتعرضها الاسكان للطلبات وياخذها احد من راغبي المنطقة

 

[الأرستقراطي]

المنطقة بعيدة ،،، بس الأغراءات هي 600 م و موقع ،،، حطلك اعلان مبادلة مع دفع الفرق ،،، حتى لو تدفع أكثر من 10 آلاف دينار اتعب على الزاوية ،،، بالتوفيق ،،،

 

[ليث متواضع]

600 متر مرغوبه لدى كثير من المواطنين ناس كثيره راح يأخذونها منك بسرعه لا تحاتي

 

[أبو عبد الرحمن]

قدر الله وما شاء فعل

أخوي إنت لما خذيت رقم للقرعة عطوك خريطه للمنطقة والخريطة واضحة فيها روس وزوايا وسد ما انتبهت لها

عموما .... شنو يعني سد ، البيت ولله الحمد ٦٠٠م ومنطقة مرغوبه وأقل ارتداد إذا بيتك أخو الزاوية ١١.٥م وإذا بالنص ١٣.٥ ومربع يعني واجهتك ٢٥م ولله الحمد ، نصيحة لاتسمع كلام الناس بيتك زين ولله الحمد والفلوس الي راح تدفعها للبدل استفيد منها في البنيان ، وعلى فكره ... أغلب الشعب الكويتي بيوتهم شارع واحد ( سد ) ... ، يعني مو إنت بروحك .

إذا معزم ماتبيها إنطر ليما يسمحون في البنيان ويسمحون في البدل والتسليم ولا تسلمها على طول إنطر اشوي لين تعرف وضع المنطقة وبعدها سولك اعلان واعرض بيتك للبدل ما تدري يمكن تتسكر المنطقة ويصير عليها طلب وساعتها راح تستفيد بمبلغ ولو بسيط ، وإذا كلش كلش تسلمها للمؤسسة وإذا الي خذاها طلبه أقدم من طلبك راح ترجع لطلبك وإذا أجدد راح تاخذ طلبه ويروح عليك طلبك هذا في حد علمي والله أعلم .

الله يوفقك أخوي ولا تحاتي ولا تشيل هم والحمد لله على كل حال