أين خبير دول شرق اوروبا ؟

[bo7anon]

السلام عليكم يعطيكم العافيه

مادري اذا في احد منكم راح دول شرق اوروبا اللي اهمه

اوكرانيا
رومانيا
بلغاريا

انا وصاحبي مخططين نروح حق هالدول

اول شي بعرف وين اسوي فيزتي ؟ وبجم وشنو المطلوب من صور وماشابه ؟
جم يوم تطول ؟؟


وبالنسبه للدول اي وحده فيهم احلا بكل شي ؟
وجم تكلف 10-12 يوم ؟
جم تذكرتها على اي طيران ؟
جم المصروف يكفي 10 ايام ؟
هل فعلا التعامل مع العرب فيه نصب ؟

يليت اللي له تجارب وراح يفيدني

 

[bo7anon]

تدرون شلون بهون لان سمعت عن العصابات اهناك شكثر

 

[بو بـدر]

1- تحتاج الى فيزا " شنغن " وهي لجميع دول اوروبا ماعندى بريطانيا " تقدم عليها باحدى السفارات الاوروبية او مكتب سفريات يقوم بالواجب

2-الخطوط يا الاماراتية او القطرية ويكون ترانزيت او الوطنية ويكون دايركت ولكن تاكد من الوطنية اعتقد مافي حالياً رحلات

3- ابتعد عن العرب ابتعد عن العرب ابتعد عن العرب ألخ ... لان اذا في احد بينصب عليك بهل دول فهو اخ العروبة والدين

4 تكاليف السفرة على حسب الدولة + السكن + المواصلات+ المطاعم + الرحلات وهذي تحددها انت وابتعد عن عواصم الدول الاوروبية ما عدى النمسا اما اوكرانيا ورومانيا وبلغاريا وسلوفاكيا والمجر فاذهب الى الريف


واما بخصوص العصابات نادراً ما تواجة مشكلة الا في حالة تواجدك في اماكن مشبوهه

ونصيحتي جرب تروح لان الدول هذي قديمة وفيها اثار وراح تعجبك المباني والشوارع والمطاعم والاسواق وتختلف عن الدول الاخرى ولكن روح لها في الصيف مو الحين برد مو طبيعي وماتقدر تستفيد من الطبيعة .

 

[فـيـصـل-9]

سلام عليكم

ههههه , اول شي الي صار معاك صار معاي شهر 5 الي طاف لاني كنت ناوي اروح مع الشباب لـ بلغاريا والحمدلله رحت لها سبوع , وان شاءالله شهر 7 بروح لها سبوعين , سمعت من ولد عمي ورفيجي وحتى الوالد واخواني كلها عصابات يافيصل ولا تروح صدقني وانا ولا همي قلت بشوف الديره مع الشباب واخو صاحبي صارله 7 سنين وهو كل سنه يروح لها
المهم رحت لها عن طريق سفريات الدبوس على ما اعتقد دايركت من الكويت لـ بلغاريا ( طياران روحه ورده + فيزه شهر + سكن سبوع بفندق + فطور + باص من المطار للفندق ومن الفندق للمطار ) كل هذا بـ 350 دينار للشخص وهذا لسبوع وبخصوص الفيزا اقل شي شهر , واما عن متى تخلص انا حجزت بعد 8 ايام طرت ..

الديره تسوى وسعرها حلو , ومع اني سمعت وقالو انها ارخص ديره في اوروبا , وفعلاً سعرها حلو وانا مارحت لا العاصمه ولا فارنا , رحت لـ منتجع اسمه صاني بيتج وكان روعه وكل شي فيه 24 ساعه من اسواق ومطاعم ووووو ...

بس نصيحه سفريات الدبوس لاتروح فيها بتكرهاها لانهم علقونا بالرده مادري جم ساعه ..


واما عن النصب فعلاً قالها ابعد عن العرب هم الي ينصبون عليك , وخلك بعيد عنهم ولا تعطي اي واحد وجه اذا يبي يبيع لك تفاحه او خوخ , لان الواقفين على الرصيف طاح سوقهم , والمنتجع صاني بيتج كبير حيل ( ديره ) وكلها سياح من المانيا ومن امريكا ومن ومن ومن , يعني المنتجع كله سياح , وانصحك فيها وممتازه من ناحيه الشباب ...

 

[bo7anon]

الرجاء مسح الموضوع