سؤال للأخوان أصحاب المكاتب العقارية

[أبو عبد الرحمن]

السلام عليكم ورحمة الله

سؤال لبعض الأخوان في المكاتب العقارية الله يهداهم وأنا واحد منهم

ليش ما تطبق إلي موجود بدفتر الدلالة


أي واحد يسوم البيت ثبت سومته بالدفتر وأخذ منه عربون لو 50 دينار لإثبات الجدية بالسوم وإذا هون أو أحد زاد عليه بالسوم ترجعله فلوسه أو إنك تذكر اسم إلي سام البيت ورقم تليفونه للمصداقية

بعض المكاتب الله يهديهم من يسوم أي شخص البيت بنى عليها السوم حتى لو هون عن السومة وهذا مو صحيح إذا هون ترجع للي سام قبله بمعنى واحد سام بمية ألف وجا واحد زاد عليه مية وخمسة وبعدين هون صاحب السومة الأخيرة مية وخمسة تلقائي ترجع للسومة إلي قبله مية ألف إذا كان لازال معزم على شراء البيت وإلا ترجع السومة من جديد ويعتبر البيت مو مسيوم

والله بعض هالمكاتب كرهونا بشغل العقار وخاصة إلي شغاليين فيها من الأخوان المصريين ( غالبهم مو كلهم ) والله كنت أتورع عن هالكلام ولكن خلااااص بلغ السيل الزبى

يا أخوان المصداقية والصدق في العمل والسمعة الطيبة أفضل من كل أمور الدنيا الزائلة أكسب لقمتك بالحلال أفضلك من مليون دينار بالحرام ليش هالناس هذي تركض ورى الفلس سواء حلال ولا حرام الله يهدينا وإياهم​

 

[haddaq8]

انت قاعد خاطب الدلالين و تبيهم يسمعون كلامك يعني؟ المفروض في قوانين و مراقبة ،،،،و مو بس المشتري يثبت مصداقيته ، حتى البائع إذغ قال حد 180 ألف يحط عربون إذا تراجع عن البيع خلال مدة و جايبله عرض شراء بسعر الحد يروح عليه العربون ، علشان يطلعون من السوق اللي بس يبون يشوفون السومه و يخلون السوق غير متوازن ولا تعرف صحة الأسعار

 

[أبو عبد الرحمن]

أخوي حداق المصداقية من الطرفين مطلوبة والأصل إذا اتفقوا على سعر وتفرقوا عليه يكون هذا السعر ملزم للبائع

والدليل


عن حكيم بن حزام رضي الله عنه قال: قال رسول الله صلى الله عليه وسلم : "البيِّعان بالخيار ما لم يتفرقا. فإن صدقا وبيَّنا: بورك لهما في بيعهما. وإن كذبا وكتما: محقت بركة بيعهما" متفق عليه.

وأيضا نستفيد من الحديث وجوب تبيان العيوب في المبيع وعدم كتمانها حتى يبارك الله في البيع

جزاك الله خير ومشكور على المشاركة