محتار .... أرجع للداخلية ولا أبقى في المدنية

[almymony]

السلام عليكم ورحمة الله وبركاته

أولا أنا لا أعرف هل هذا هو القسم المخصص لموضوعي أم لا ، وعذرا على أي حال

بدش في الموضوع على طول

أنا حاليا أعمل فني بوزارة الكهرباء والماء من سنتين ولي خدمة سابقة بوزارة الداخلية تقريبا 14 سنة 8 شهور وبالتأمينات يخصمون منهم سنتين لأن كان عمري 18 سنة والتأمينات تحسب الخدمة لعسكري وزارة الداخلية من عمر 20 سنة يعني راحت علي سنتين والله المستعان مع العلم بأن الجيش والحرس وغيرهم يحسبون الخدمة من تاريخ دخولك الدورة واحنا ماكلينها وماكنا ندري .... الزبدة ما اطول عليكم

استقلت من الداخلية كنت برتبة عريف سنة 2007 بعد ما استقلت بأربع شهور تقريبا رقوا دفعتي رقباء ( الظاهر كنت مقبس عليهم ) وبعدها بأشهر استلموا نوط الخدمة الذهبي أبو 15 سنة

حاليا كثر الكلام على الزيادة المالية للعسكريين ولي أصدقاء ينصحوني إني أرجع للداخلية لعدة أسباب .. منها

1- الزيادة المالية
2- التقاعد المبكر

يعني أنا بإذن الله 6 أو 7 سنوات أتقاعد وبالمدنية بعد عشرين سنة لأن عمري حاليا 35 والتقاعد بعمر 55 إذا الله عطانا وإياكم عمر

أنا عن نفسي متردد ودي وماودي

أنا حاليا حاصل على شهادة الثانوية الصناعية ويقولون إلي بالداخلية وعنده خدمة يعطونه رقيب أول على طول يعني ألحق دفعتي ولكني سألت واحد يعرف ناس بشئون القوة كلمهم قالوا هالقرار موجود وإلي عندهم الثانوية ارفعوا شهاداتهم وعلى طول عطوهم علاوة ما أدري كم ناس تقول عشرة وناس تقول ثلاثين دينار إلي هي فرق الشهادة وقالولهم بخصوص الترقية ماصدر فيها قرار ننطر متى يصدر القرار وندخلكم دورة وتترقون رقباء أوائل

أنا شهادتي فني تمديدات كهربائية ثلاث سنوات بعد المتوسط من التطبيقي وكملت بعدها سنة وحصلت على الثانوية الصناعية

إذا برد على شهادتي وين يعينوني بأي إدارة وهل مسماي يصير مثلا رقيب فني وهل فيها علاوة أفضل من باقي الشرطة الغير فنيين

أرجوا منكم جميعا الشور علي بما تعرفون وأسأل الله أن لا يحرمكم الأجر

وجزاكم الله خير​

 

[طويل البال]

أخي العزيز
أهم شئ المهنه اللي تحبها شنو و ايهي ترتاح لها

وهذا الشئ محد يقدر يساعدك فيه الا نفسك !

وانا أشوف في فرق كبير بالمهنة بين مدني و عسكري

المقارنه
لا تحسب فرق الفلوس بينهم لانه اذا العسكريه اكثر
فغدا يزيدون الوزارات و يصيرون اكثر ! !
يعني لا تغير حياتك علشان 50 و 100 و لا 200

العسكريه ممكن التقاعد بعد 7 سنوات ولكن ممكن تكون أسوأ 7 سنوات تمر بحياتك (لا سمح الله)

والمدنية 20 سنه للتقاعد ولكن عسل على قلبك واتحس انك عايش

ع العموم اذا تبي تعرف بالضبط المسمى و الراتب و البدل
فاذهب للناس المعنيين و لا تسمع كلام الناس اللى مو عارفين بالضبط موضوعك

ونصيحتي لك

خلك على الشغل المدني و شوفلك عمل حر , لبذل اسباب الرزق.
انت مو كبير و لا انت صغير بعد للعسكرية والأوامر

الله يوفقك من أوسع أبوابه

وييسر أمرك

وطول بالك

 

[بروه]

خلك علي المدنيه ويرزقك الله والله العسكريه ما فيها خير
مع اجترامي للعسكرين

 

[ح.الموسوي]

السلام عليكم ورحمة الله تعالى وبركاته

اخوي العزيز الداخليه وايد تعدلت عن قبل وراحت ايام الحجز على اي شي واي حجز تستلم فلوس عليه والامور شحلاتها بخصوص شهادتك راح يخلونك في هندسه المنشئات ونفس وظيفتك فني بس مو اكيد لان انت تدري العسكري كل مكان ينقط يعني ماله اختصاص اما الرتبه نفس رتبتك القديمه والشهاده عليها علاوه مبلغ بس مادري جم لان العلاوات انت تدري فرق بين الاداري والميداني يعني حسب مكانك وصدقني انا اشوف الداخليه وايد فرق عن قبل تعدلت وايد طبعا اكلمك لاني اداوم فيها

فكر عدل وشوف الاصلح وانصحك روح انت شؤون القوه واسال واستفسر من كل شي
وبعدين تاكد في دوره انعاش علشان ترد ولا شلون الطريقه وبعدها قرر

بالتوفيق

 

[Low Fat]

الله يوفقك
وأنصحك بالأستخاره ..

.. وجهة نظري أخدم 50 سنه مدني ولا أخدم 5 سنوات عسكري ,,,​

 

[::فزاع::]

عليك بالاستخااره,,,

وشوري
شد عمرك 7 سنين وعقبـه رتااح

 

[Maxima]

قبل كل شئ عليك بصلاة الاستخارة
ومن رأيي الشخصي ارى الافضل العودة للعسكرية مهما كان موقعك او ادارتك لثلاثة أسباب :
1- الزيادة المالية المنتظرة خصوصا ان معاك ثانوية صناعية وراح تتغير امورك عن ايام خدمتك السابقة.
2- التقاعد المبكر وتختصر على نفسك طريق طويل.
3- خبرتك العسكرية السابقة تفيدك في عملك المقبل ان شاءالله
ولا تنسى صلاة الاستخارة وبالتوفيق إن شاءالله