نبي مراقب المنتدى

[ح.الموسوي]

السلام عليكم ورحمة الله تعالى وبركاته

ماحب اطول الموضوع علشان محد يمل

ببساطه اشوف وايد مواضيع مبالغين فيها بالسعر وايد ليش ياجماعه نبي رقابه على الاسعار خصوصا بالقسم هذا انا فتحت الموضوع علشان لا ازعل اي احد من الاخوان الله يرزقهم بس اشوف وايد مواضيع مبالغين فيها بالاسعار وفيها غش ياريت اي مراقب يراقب الاسعار طبعا الله يعطيهم العافيه لان المنتدى كبير واقسامه وايد وزواره وايد يعني الله يعينهم بس هم احنا من باب ان نحسب روحنا من اصحاب المنتدى ونمون على المراقبين فتحت الموضوع واتمنى ينفتح موضوع خاص ويثبت حق اللي يغشون بالاسعار نكتب فيه جم سعر السلعه بره وجم سعرها عند الشخص علشان المراقب ينبه صاحب السلعه مااظلم في ناس ما تدري ويمكن شاريه السلعه غالي وتبيعها هني غالي علشان تربح بس وايد يعرفون ان السلعه ما تكلف ويحطون اسعار خياليه والله في اشياء انا اشوفها بالمنتدى بسعر وبره بالسوق متورفره بسعر اقل بوايد

الله يرحم والدينكم رفعوا الموضوع علشان المراقبين ينتبهون له واكيد بدون شك اداره المنتدى راح تهتم بالموضوع والله يعطيكم العافيه

 

[! فارس !]

للربع قصدي للرفع :d

 

[ح.الموسوي]

للرفع وننتظر رد المراقبين

 

[بو شهاب75]

والله يا الموسوي ما ادري شنو تبي بالضبظ

يعني اذا السعر على قولتك مبالغ فيه منت مجبور تشتري ....... و الي يبي يشتري يكون اول شي قادر وثاني شي يكون مقتنع اما انك تشتكي وتقول سعره مبالغ فيه وانك شايفه بره بسعر اقل عيل شوف وين السعر الاقل وشتره وانتهى الموضوع ..... واول مره اسمع غش بالسعر .... الغش ما يصير بالسعر الغش يصير بالاتفاق ..... وكل واحد حر بسلعته وبجم يبي يعرضه

والله يعطيك العافيه

 

[ح.الموسوي]

بو شهاب مشكور على المرور ياريت تشوف بعض السلع واسعارها وتحكم انا ما قصدت شخص وكتبت موضوعه وشهرت فيه انا اتكلم بصفه عامه يعني مفروض يكون شوي رقابه

الحمدلله مو ناقصنا عندنا وعندك خير بس كل شي بالمعقول

اتمنى موضوعي ما يضايقك ولا يضايق الاخوان توقعت احصل تشجيع

عموما اذا الموضوع يضايق نطلب من الاداره ان تلغيه

واسمحولي يمكن هذا تطفل مني

بالتوفيق للجميع

 

[فهد97788]

والله يا الموسوي كنت طول الفتره الماضيه اكتب مثل هذا الموضوع

لكن قلت سيلغى مباشره

وبالتالي هذا عائق ومشكله ليس لها حل

وإذا غاب الرقيب الذاتي .. من تراقب

 

[كوويتي]

اول شى اخوي مشكور على الموضوع
وخل نناقشك فية

بخصوص السلع يمكن انا طالع على السلعة بــ 10 و بحطها بــ 12 او 13 الادارة ماتقدر تمنع شى لان اسلع حق اشخاص معينين و كل شخص و جم تكلف علية السلعة هذا الشخص بينة وبين نفسة و زباينة اما اذا صج لقيت ارخص لا والله اشتر من برا احسن ليش نروح حق الغالى بس نفس ماقلت لك اخوي الادارة ماتوقع بتسوي رقابة على السلع المعروضة لانها ماتعرف جم تكلفتها على الشخص و الموقع اسمة سوق المؤشر مو شركة تتحكم فيها هذا الفرق وياليت وضحت لك راي الشخص

 

[ح.الموسوي]

احب اقول شغله حق اخوي بو شهاب للعلم بس انا شريت من وايد شباب بالمنتدى واسعارهم جدا ممتازه وبضاعتهم حلوه يعني ما قصدت الكل ناس معينين الله يرزق الجميع وبعدين اذا انا شاري تلفون بعشرين دينار وعارضه ميتين دينار حلال ولا حرام ؟؟؟

احسبها واسال وراح تشوف كلامي يحتاج افتح موضوع

 

[ح.الموسوي]

اشكرك اخوي كويتي الله يرحم والدينك اكيد وصل رايك الشخصي وبالتوفيق

 

[خدمة الشعب]

يعطيك العافيه يالموسوي

السؤال / ليش لما الواحد يقول كلمة الحق يعتبرونه يكسر بحلالهم

مثال / نشوف بعض الشباب عارض شيء بـ 100 دينار و أنه الوحيد بالكويت ومن هالكلام

تقوله : السلعه موجوده بالمكان الفلاني و قيمتها 30 دينار يرد عليك أنت تكسر بحلالي !!

يالموسوي خلها على الله و أنا أخوك

بهالوقت نصيحه لا تنصح ولا تعور راسك إذا الشيء يعجبك أشتره ولا تعور راسك وتنصح أحد

 

[pJLc]

كلامك صحيح يالموسوي
والله يكثر من امثالك وكلامك صحيح 100ميه
بس وين اللي يأيدونك وراح يزعلووون التجاراللي رافعين بضاعتهم دبل السعر ولاعنده محل وحاط خط بدون معلومات ويبيع ويضحك ويغش علي الشباب بعض منهم انتبهم ((((الارض يمــــشي بها المجنـون والصـــــــاااحـي)))
وكلمــة الحـــــــك مـاااينزعــل منــــــهها
الا اللي في بطنه ريح
ونتمنا لكم التوفيق للجميع

 

[دبس الرمان]

كلامك عين العقل سيدنا

انا شريت من المنتدي فانوس ب 4 دنانير مع انه حجمه صغير عن اللي بالصورة بس عجبني يشتغل 96 ساعه شي طيب وبالصدفة وانا اتمشي بسوق السلاح والقاه نفسه ونفس الماركة الحجم الكبير ب 4 دنانير !!! يعني شنو اسمه هذا انت بالنت ولا اجار ولا رواتب عمال وتبيعه بالضعف شنو نسميه هذا النوع من الربح مو غبن ( ولو ان الريال قال ارد لك فلوسك يوم بلغته بهذا الكلام) لكن الناس اللي قبل شروا انغشوا بالسعر ويجي احد يقول تبي تبي مو عاجبك لا تشتري انا اقوله لو كنا ندري بالسعر الاصلي ما شرينا .

 

[الوحداني]

كلامك عين العقل اخوي
واغلب البضاعه اهني اييبونها بسعر لتراب ويبيعونها
وغير هذا سالفت هالتقليد اللي هابين فيها باقي بس يقلدون اوادم
وترى على فكره اغلب المعروض اهني تلاقونه بسوق لسلاح واولهم هالعطور التركيب
روحو هناك تلاقون العطر المركز ينباع عند لهنود على 3 و4 دنانير الغرشه وهذي الغرشه
تسويلك 10 عطور او اقل حسب التركيز
يعني يا شباب كافي وربي كافي لعب بعقول الناس لا اجار ولا بطيخ ولا شي بس قاعدين
مجابلين النت وتبيعون
ميخالف انا ما اقولك لا تبيع بيع ياخي وربي يسهلك ويزيدك بس بالمعقول

وعلى فكره تراني ما اقصد ولا احد فيكم بالكلام بس الواحد عنده عقل يفكر
واللي على راسه بطحه يحسس عليها

 

[تاجر3]

يعطيك العافيه يالموسوي علي الموضوع
ترا صج في ناس تبالغ يعني مثلا تلفون سعره يديد 80 يبي يبعه مستعمل 85 لا بعد منتيهيه الكفاله تكلمه تقوله سعره يديد 80 يقولك روح اشتره
صج لازم في مراقبين

 

[توكل على الله]

يـا أخواني انتم مالكم شغل بالشخص الي يبيع غالي او رخيص هذا واحد او وحده تسترزق ما اراح يسرق ولا يشحذ حتى اذا شحذ محد امعطيه واذا شفتوا انه غالي لا تشترون في نااس ترى تشتري لو ما تشتري ماكان حط هالسعر وسامحوني على هالرد والله يوفق الجميع

 

[بوخمسين]

مشكور للسيد حسن الموسوي على موضوعة القيم

واختصار من كلام الموسوي كلة الحذر بالتعامل بالربا


وشكرا للجميع

 

[BO NASER]

السلام عليكم

إخواني لايمكن تحديد أسعار السلع في المنتدى

وهذا الطلب مستحيل ولا يحق لنا التدخل بحلال وأموال الغير

السلع التي تباع في المنتدى بعضها مستعمل وبعضها تقليد ولا يوجد لها سعر محدد

والتقليد درجات منه الممتاز ومنه السيء ولكل سلعة ثمن

هل أسعار السلع في الأسواق محددة ؟

بالطبع الجواب لا !!!

الأسعار حسب الصناعة والجودة وحسب المكان !

في الأسواق الفخمة نجد الأسعار عالية وفي الأسواق البسيطة نجد العكس !

يجب على المشتري أن يبحث ويستفسر عن جودة السلعة وسعرها حتى يقارن مع أسعار المنتدى إذا كانت مناسبة أو لا !!

إذا كان السعر غير مناسب فلست مجبر على الشراء وحاول البحث عن سعر أقل وأفضل

قمنا بتثبيت مواضيع ببعض الأقسام لبعض السلع حتى يطلع عليها المشتري قبل الشراء

والأسعار تتغير باستمرار

وشكرا









​

 

[ح.الموسوي]

السلام عليكم

اشكر الاخ بو ناصر مشرف قسم الاعلانات على الرد والحمد لله هذا اللي كنت متوقعه ان يتم الرد وردك اخوي يبين مدى حرص المنتدى على المشاركين

دام جذي احنا ننصح الاخوان بالتريث والصبر قبل الشراء ويسال ويتاكد من السعر يعني بالعربي نكون حريصين جدا والله يوفق الجميع ومن الاول قلت ياجماعه مافيها زعل انا مااقصد شخص معين انا اتكلم بصفه عامه اللي بيزعل كيفه ما غلطنا على احد احنا نفتح موضوع ونتناقش فيه واعتقد هذا من حقنا

مراقب القسم العزيز الحين الامر بيدك تبي تسكر الموضوع مافي مشكله فتحت الموضوع للاستفاده وحصلنا الجواب

ومره ثانيه بالتوفيق للجمييييييع

 

[Kuwait]

الموسوي شكرا على اهتمامك في الاعضاء والمنتدى

لكن ياخوك صعبه تتحكم في سعر سلعه لصاحبها وتجبره على سعر معين

هذا يعتبر مثل المزاد!

 

[ابو نايف2010]

الله اللي يشوف

وحسبنا الله ونعم الوكيل