شيكات بدون رصيد

[kuwait_17]

السلام عليكم

الموضوع بإختصار ... شخص شرا مني بضاعة بقيمة 40 ألف دينار ... وكان المفروض اصرف الشيكات قبل رمضان ... ولكن للأسف المماطلة إلي يومنا هذا بسبب عدم توفر رصيد ... علما بأن المبلغ مجزء على 6 شيكات نصها من حسابه الشخصي والبقية على حساب الشركته..

واليوم ناوي أقدم الشيكات لأني فقدت الأمل فيه

وأنا يا إخواني ماني عارف وين اقدم الشيكات وشلون أضمن حقي

ومحتاج فزعتكم​

 

[مرحبا بقدوم خلي]

حسبي يالله ونعم الوكيل في هالنصاب
روح المخفر وهم يحولونك النيابة ويردون حقك انشالله

 

[Lawyer25]

السلام عليكم ورحمة الله وبركاته ..

نصيحتي لك اخوي وكل محامي يقوم باعمالك كلها افضل لانه اخبر منك باجراءات الحجز واستيفاء حقك وايضا الحجز والتنفيذ عليه والمنع من السفر اذا كان هناك خوف من تهرب المدين من الدين ..

ونصيحة لك اقرأ موضوع الاخ ( رحالي ) عن أهمية الاستعانة بمحامي !!

وعسا الله يرجعلك حقك باذن الله تبارك وتعالى ,

هذا والله تبارك وتعالى اعلم , ان اصبت فمن توفيق الله تبارك وتعالى !

 

[qanon]

اخوى كويت

الله يعينك اول شى

والشى الثاني

الشغلة سهلة

تكتب كتاب للنائب العام وتبين فيه ان الشخص عطاك شيكات من غير رصيد

وتصور كل شيك ست نسخ


وكل كتاب اتخليه بكتاب مستقل او تقدمهم مع بعض كيفك

وتروح بالطلبات لنيابة الاموال العامة

ومكانها بالرقعي

ومناك بس تقدمهم اول الصبح

يحولونك حق احد وكلاء النائب العامة

وكلها مجرد اجراءات بسيطة

وتنتهى منها

وبعدين عليك بس اتابع القضية

واتمنى انى بينت لك الاجراءات

اتصور سهلة وبسيطة

والله اعلم

 

[kuwait_17]

جزاكم الله خير ... انا اليوم هددت وراح اقابله بالليل

والله يسهل الامور ... ونخلص

مشكورين اخواني

 

[قناص_السوق]

لا يذبحك ديربالك تقابلو بمكان عام مهدده تقول

 

[qanon]

العفو يا كويتى

واسمحلنا على القصور

لا وين يذبحه وين قاعدين

بس على كلام اخونا كويتاوى كلشى جايز الحين


وكان الله بالعون

 

[Lawyer25]

ولو اخوي ما سوينا الا الواجب .. وعساك تبشر باذن الله برده فلوسك لك بدون مماطله ..

وقبلهم بالجنه تبشر باذن الرحمن

وما شاء الله عليك اخ ( قانون ) عسى الله يزيدك من فضله قول امــين

وبشرنا عاد كويت