استفسار وارجو المشاركه وابداء الرأي ؟؟؟؟

[LooK OuT]

السلام عليكم

يسعدني الانضمام الى منتدى المؤشر نت

ندش بالموضوع على طول
________________________________


سؤال وابي رايكم :

انا طلبي 2004

واتمنى اشتري بيت حالي حال الناس

ويكون البيت في المناطق الداخليه

ولكن بما ان طلبي 2004 يعني اكيد مليون بالميه راح يطلعلي بيت في احد المناطق الخارجيه اقصد الحدوديه

وصارلي فتره افكر اشتري بيت حكومه صغيره في احد المناطق الجديده مثل فهد الاحمد بسعر من 120 الى 140

70 بنك التسليف ..

70 قرض التمويل ..

واجره لمدة 15 سنه وبأجار البيت اسكر القصد الشهري

وبعد 15 سنه اكون مسكر كامل المبلغ

ولله الحمد السكن الحالي متوفر في بيت الوالد

وبعد 15 سنه يكون البيت مسكر الدين واقدر بعدها ابيع البيت خل نقول بأسوأ الحالات بنفس سعره والواحد ما يعلم الغيب بس يتفائل

وبعد ما ابيع البيت بسعر 140 .. ارد اخذ قرض 70 ويصير المجموع 210

ومع تحويشة العمر خل نقول 40

يصير المجموع 250 الف واشتري فيه بيت مناسب في منطقه قريبه وعلى ذوقي

ادري الكلام سهل .. والحلم اسهل وفي متعه اكثر :d

بس الفكره كلها عشان استفيد من الوقت

وطبعا في كثير من الشباب مسوين هالطريقه

بس ودي اسمع رايكم

وطبعا في فكره ثانيه اني اصبر حالي حال العالم لين يطلعلي بيت في المناطق الحدوديه وابيعه وازيدهم واشتري بيت في المناطق الداخليه

بس طبعا ما يندرى جم بصير سعر البيت في المنطاق الحدوديه !!!!!!!!!!!!!

 

[Abdulla990]

بس المشكلة انك ما تدري جم اسعار البيوت بعد خمستش سنة
ماكو شي يثبت على حاله و خصوصا في عالم العقار

و لا انصحك تورط نفسك بقسط عالي و تعتمد على الايجار للتسديد لأن المستاجر ما تلقاه كل وقت و اذا لقيته يمكن ما يعطيك ايجار يكفي لتسديد القسط و صيانة البيت

باختصار
الفكرة غير مجدية اذا ماعندك كاش مع فلوس التسليف

 

[q8_king1]

ممكن توضح حسبة 210 من وين يبتها ؟ الانة البيت بعد 15 سنة لو افترضنا بعتة وبسعر 140 الف وعندك قرض التمويل انت مكيشة خلاص يبقي قرض الاسكان الي لحد 15 سنة مايخلص الانة القسط الشهري 100 دينار اشلون بتسكرة ؟؟ من وين يبت 210 ؟؟

 

[Kaubar]

لا موبهالطريقه المؤجر يطلع روحك كل شهر واحسبها 15 سنه كل شهر عوار راس

اذا انت مرتاح بالنسبه للسكن يعني ساكن موبأجار حاول تاخذ بيت بعموم القرين ويكون مفصول

يعني دورين تأجر كل دور بروحه هذا يخلي الأجار أقل بالنسبه للمأجر ومايعور راسك

كل دور من 250 الى 300 المجموع من 500 الى 600 ناقص كهرباء وماي من 30 الى60 شهريا

نحسبها

550 دينار شهريا متوسط في 12 في 15 المجموع 99000 دينار

لا تنسى الأشهر الضايعه بدون اجار بمعدل اقل شي شهر بالسنه يعني 15 شهر

نحسبها

550 ضرب 15 يساوي 8250

99000-8250= 90750 الف

الصافي لك 90750 الف

تعال الحين لبنك التمويل ياحبيبي

70000 الف قرض ارباحهم 42000 الف

السبعين خذيتهم وتردهم يعني مراح تخسر شي

الأرباح هي التكلفه

تعال نحسبها

90750-42000=48750 دينار

خلال امتلاكك للبيت لمدة 15 سنه ومع توفيق الله اولا في تحصيل الأجارات راح يكون

طلعلك 48750 دينار

بيع البيت بالمستقبل مأقدر احسبها يمكن 10000 او ربع مليون الله العالم

الحين يرجع الأمر لك اذا شايف ان المبلغ يستاهل او لا خلال 15 سنه ممكن توفر المبلغ من معاشك

بدون عوار راس

وانا اشوف ان افضل استثمار شراء البيت واكبر انجاز ان يكون المعاش خالي من الأقصاد

 

[Rotary]

أنا أقووول تبيع بيت الوالد وتزيد عليهم فلوووس التسليف وتحطهم بالأسهم وبعد سنه يصيرون دبل وتشتري بيتين يم بعض بالمناطق الداخليه

 

[haddaq8]

أخوي التخطيط شي مهم و هذي خطوة ممتازة ، بس حبيت أنبهك بعد 15 سنة راح تكون المناطق اللي ذكرتها مو ذاك البعد ، يعني فهدالأحمد ممكن تعتبرها منطقة داخلية بعد 15 سنة إذا قارنتها بصباح الأحمد و الخيران ، أدري راح تضحك بس قبل 15 سنة (1995) كانت جنوب السرة بر فضاء و أسعارها زهيدة!

بس اهم شي إذا تبي تاخذ بيت حكومة نصيحتي لك اختار موقع ممتاز و مدخل سهل ، هذا الشي ضروري حق القيمة التأجيرية و قيمة البيت نفسه بالمستقبل و حتى لك انت إذا تبي تسكن فيه! و السبب الثاني المدخل السهل و القطع الطرفية تنباع أكثر فتلقى سكانها بعد 15 سنة هم الأرقى

بس إذا تقدر انت و زوجتك تاخذون قرض أكبر مع بعض أنصحك تاخذ أرض بشرق القرين أو بيت بالعقيلة/المنقف على 170 أو 180 الف

 

[LooK OuT]

مشكورين شباب جميعا