ماهو الحل؟ الوالد يرفض الذهاب للمستشفى

[الحـــوت]

اخواني

بصراحه مالقيت احد استشيره وإلا ما استشرته

الوالد عمره يتجاوز ال70 يطول بعمره ويرفض الذهاب للمستشفى وعنده موعد لعمليتين موعد للقلب وموعد ثاني للباطنية. ولكن للأسف ما بقى واحد من الأهل يترجاه ويبوس ايدينه لناخذه على المستشفى

تكفى شورتكم شنو نسوي ولو صار فيه شي هل احنا نتحمل ذنب وشنو الطريقة اللي نقدر نقنعه فيها ومشكلته انه ينسى اللي صار بعد 5 دقايق

 

[qadsawi]

حطوله منوم وشيلوه وهو مايدري او اتصلوا علي الإسعاف والله يعينكم علي بر والدكم

 

[Cccom]

الله يطول لكم عمره ويشااافيه
كلم الطبيب علشان يجبون اسعاف ويخدرووونه وياخذوونه للمستشفى ويسووون العمليات ويخلصون
اعتقد انى افدتك

 

[الحـــوت]

حطوله منوم وشيلوه وهو مايدري او اتصلوا علي الإسعاف والله يعينكم علي بر والدكم

منوم !! مايؤثر على صحته ؟؟ او نتسائل قانونيا" لو درى الدكتور؟؟

مشكور

 

[الحـــوت]

الله يطول لكم عمره ويشااافيه
كلم الطبيب علشان يجبون اسعاف ويخدرووونه وياخذوونه للمستشفى ويسووون العمليات ويخلصون
اعتقد انى افدتك

والله يرحم والدينك

كلمنا الطبيب مارد بشي نستفيد منه إلا حاولوا معاه وبس وقال الله يعينكم

 

[المهندس حسين]

أنا مو مع المنوم أو غيره

لأن صحته في النهاية وهو مسؤول عنها

يعني مايجوز نتحايل عليه عشان نسوي له عملية... أنا والدي عمره 74 ومايرضى يروح للطبيب وهذه حريته الشخصية... نحترمها.... نسوي معاه المستحيل بس في النهاية هو صاحب القرار في دخول المستشفى أو غيره... ولما يتعب يوافق يروح

إن شاء الله مايشوف شر...

ممكن تتفقون مع الطبيب و تنسقون معاه... ويمكن لو الطبيب يزوركم البيت ويعرف الوالد ويرتاح له ويسولف له عن نسبة نجاح العملية ممكن يأثر بقراره

 

[سرور]

والدي قبل وفاته يرفض الذهاب للمستشفى أو يزوره الطبيب .. وبعد ذلك استطعنا نقله بالاسعاف ولكن بعد فوات الأوان .. وأنا أشعر بمعاناتكم وهو أمر صعب .. صعب جـدا ،، الله يعينكم

 

[مستثمر73]

الله يعينكم ..

 

[قانوني]

فيه كذا فكره ..
- لا تتشنجون بالكلام او تهتمون وايد جدامه كأن الامر حياة أو موت .. و اذكرو له حالات ناس وايد بنفس حالته وراجعوا المستشفى و اليوم ماشالله حالتهم ممتازه .. و حاولو تستشهدون بناس يعرف اسمائهم .. و بأنهم عقب المراجعه او العمليه صاروا قويين و صحتهم ممتازه .. و تبينون له ان هالامور اليوم سهله و الطب متطور و كلها شغلات بسيطه .

- حاول تواعده بشي اهو يحبه مثل السفر لمكان معين .. و بأن العمليه راح تخلص بسرعه و تالي تسافرون معاه لمكان اهو يحبه او تهادونه بشي اهو وايد يحبه .. و كأن السفر متوقف على العمليه بأنها يخلصها و يرتاح ..

- بكل الاحوال اسلوب و طريقة المعامله و تشجيعه اهو المطلوب ..

يعني مجرد وجهة نظر

 

[MOHAMMED11]

الله يكون بعونكم
مريت في مثل هالحالة . مالكم إلا الصبر وتكرار المحاولة .
والله يقدم اللي فيه خير ..

 

[الحـــوت]

مشكوووووووووووووووور حيل على ردودكم الطيبة اللي خففت عني شويه
وردودكم تشرفني وجزاكم الله الف خير
المشكلة بالوالد انه عنده مرض الزهايمر من 10 سنوات وينسى اي شي تقوله بعد 5 دقايق
والله لا يحط احد بهالموقف
والله كريم

 

[الحـــوت]

مادري حايشني تأنيب ضمير !!!!!!!!!

 

[فوارق]

الله المستعان اخوي صارت معانا من قبل الكل عجز عنه حتى الدكاتره ما سمع لهم وآخرتها جت سستر اسلوبها حلو واقنعته ولي يومك يسولف عن هالسستر

 

[الحـــوت]

الله المستعان اخوي صارت معانا من قبل الكل عجز عنه حتى الدكاتره ما سمع لهم وآخرتها جت سستر اسلوبها حلو واقنعته ولي يومك يسولف عن هالسستر

اخوي عندنا ممرضتان وحده شفت صبح ووحده شفت مسائي وصارلهم شهر والوالد يسمع منهم إلا انه يروح المستشفى

الله يعينه جميع

 

[n.1]

==

انت بدال الممرضه اقعد عنده واشتغل له وساعتها يطيعك

==