بيت الزكاة

[ام سلطان]

السلام عليكم خواني

بغيت اعرف اذا بقدم طلب لبيت الزكاة شنو الاوراق المطلوبه ووين ومتى اقدمها واللي يقدر يساعدني بهالموضوع لا يقصر جزاكم الله خير محتاجتهم ضروري واللي يعرف اد يشتغل هناك يراسلني ع الخاص

 

[Hamilton]

اختي ام سلطان حاب اقدم لج نصيحه
بيت الزكاه يبيلهم واسطه ... صج يبيلهم واسطه ؟؟؟
او تروحين لهم وعقب ما تسوين كل شي ويردون عليج بشي ما يسرج ... سيده اتجهي للجرايد
بيت الزكاه معروف باعماله الخيريه الخياليه فقط .. ما شفنا شي صراحه ... الا ان جان بيقولون آبار مياه في افريقيا ويشلخون علينا ويسردون
المتبرع يستقبلونه بالاحضان ... واللي يبي منهم شي راح يشوفون وجوه مكفهره ... الله يسود وجوههم دامهم جذيه حارمين عيال البلد ويبوقون ويلطون واستنادهم على ( والعاملون عليها)

 

[ابو سعد الشمري]

اختي ام سلطان الله يعينج عليهم

بس شنو موضوعج الي تبين تقدمين عليه

اذ ممكن على الخاص

 

[عالي مستواة]

السلام عليكم
اختي ام سلطان
الله يهداهم الاخوان مايصير يحكمون على الناس جذية
هذي هيئة حكومية وانا شخصين اعرف ناس ياخذون من
بيت الزكاة مساعدات كل 3شهور او اكثر وان شاء الله مافي واسطة
لانة هذا عمل خير والله يرزقج وينا وجميع المسلمين

هذي بعض الطلبات اللي يبونها وهم لما تروحين لهم رح يعطونج
ورقة الطابات وبذن الله يحلون مشكلتج

الطلبات كتالي
1 صور البطاقة المدنية للعائلة
2 صورة عقد الزواج
3صورة عقد الايجار
4كتاب شرح حالة يعني تشرحين فية حالتج واذا عندج
ديون او علاج او قظاء بلمحكمة واي ثبوتيات
ترفقين معاهم كل الاوراق هذية

 

[عالي مستواة]

السلام عليكم
اختي ام سلطان
انا اشتغل بلجنة خيرية بس مو بيت الزكاة
موضوعج عالخاص واذا اقدر اساعدج ان شاء الله ماقصر
(( وتعاونو على البر والتقوا ولاتعاونو على الاثم والعدوان))

 

[luv]

عالي مستواة عيل شوفلنا قروض تساعد الشباب على الزواج بدون فوايد ..

 

[عالي مستواة]

عالي مستواة عيل شوفلنا قروض تساعد الشباب على الزواج بدون فوايد ..

ياهلا اخوي ولد عمي
الاولوية للي عندهم ضعف دخل والمرضي والايتام وغيرهم الي هم في امس الحاجة للمساعدة

وانت ان شاء الله مايقصرون معاك
والله لايحرمك الاجر

حياك الله

 

[طلال المطيري_1]

ياأخوان بيت الزكاة هيئه حكوميه مستقله لها قوانين عمل ولوائح صرف للمساعدات وعليها رقابه من ديوان المحاسبه والمكتب الشرعي هذه غير الرقابات الاداريه بيت الزكاة مايتبع اهواء موظفين او مدراء علشان كل واحد يصرف على كيفه لليبي او حق معارف هذه كلام موصحيح عملية الصرف تتم عن طريق السستم اي معامله ماينطبق عليها الشروط مايقبلها السستم وحتى لو قبلها في لجنه من المدره لازم يوافقون على المعامله - والله يعين الجميع انشالله

 

[بو علي]

والله في واحد في بيت الزكاة ياخذ 300 وينزلك قرض حسن 3000دينار قسط شهري 100 دينار على 30 شهر

 

[طلال المطيري_1]

اي واحد ممكن ياخذ قرض حسن من بيت الزكاة بقيمة 3000 والقسط 100 بس اهم شي يكون منطبق عليه الشروط القرظ الحسن وحتى لو افترضنه ان صج في واحد ياخذ 300 مستحيل يسويلك معامله مو منطبق عليها الشروط بس مايروحله الا الناس التحب الف والدوران والله يعبنهم على انفسهم

 

[عالي مستواة]

اي واحد ممكن ياخذ قرض حسن من بيت الزكاة بقيمة 3000 والقسط 100 بس اهم شي يكون منطبق عليه الشروط القرظ الحسن وحتى لو افترضنه ان صج في واحد ياخذ 300 مستحيل يسويلك معامله مو منطبق عليها الشروط بس مايروحله الا الناس التحب الف والدوران والله يعبنهم على انفسهم

السلام عليكم

يعطيك العافية اخوي طلال على الردك الجميل

لو سمحت شنو الشروط بخصوص القرض الحسن

ارجو الرد عالخاص لو تكرمت وشكرا