استفسار يا اخواني الاستشاريين الخبره في دوامات الحكومه (مسؤولي يفرق بين الموظفين )

[قناص_السوق]

اخواني انا متضايق

لان المدير في الدوام يميز بين الموظفين في كشف الحضور و الانصراف يخلي ربعه يداومون اخر ساعه يوقعون حضور و انصراف

وكذلك يعطيهم استاذاناتهم و يزرقون على كيفهم من الدوام التابع لاحد الوزارات في الدوله


فالسؤال :-

1- هل يحق لي اعاند و اداوم على كيفي واقول للمسؤول شمعنى فلان و علان


2- هل يحق لي ادز الشكوى في البريد المسجل في قسم الصادر للمسؤول و ابلغه ان اذا ما ياز عن حركاته راح اعاند و اهو يتحمل المسؤوليه

4- هل يحق لي ارفع قضيه جزائيه في المخفر ضد المسؤول اتهمه فيها تعسف في استخدام السلطه لان يعطينا افادات و ما يعطي غيرنا و فوق هذا يطلع غيرنا بدون ورقة استأذان فوق هذا يعفي غيرنا من التوقيع و يوقع مكانه و بطبق القانون على ناس و ناس


4- هل يحق لي ارفع قضيه جزائيه في المخفر تزوير في محرر رسمي لأن ساعات اذا ياني بلاغ ان اليوم دوري بالمراقبه وانا ما وقعت البلاغ يوقع مكاني ويقولي سجلتك علم .

5- هل يحق لي اروح الشؤون القانونيه التابع لوزارتي اقولهم السالفه و اطلب يحولون هالمسؤوووول التحقيق


6- شنو احسن خطوات اتبعها برايكم حتى احفظ حقوقي , للعلم انا بعاند و باجر بداوم ساعه 11 عناد و للعلم المسؤول المباشر الي فوق مسؤولنا ماله شغل بشي ولا يتدخل و معطي مسؤولنا كل الصلاحيات .

تكفى لا تخلوووني اهل الخبره

 

[حامي الديار]

والله اذا انت وايد رسمي وقانوني جذي .. طبق قانون الخدمة المدنيه وداوم دوامك بتاخذ استأذن سجل اورقة استأذن واطلع .. بتاخذ اجازه سجل ورقة اجأزه واطلع .. ومالك شغل بغيرك شمعنى هذا وشمعنى ذاك .. ليش اهما الي بيصرفولك راتبك ؟ خلك بنفسك ومالك شغل بأحد ودوام دوامك رسمي وعن الحره والحقد ..

 

[قناص_السوق]

حبيبي لم غيري يطلع ما يحلل معاشه يخلون الي يقعد يشتغل شغل غيره يا سلام و تقول حره و حقد على العموم مشكور على المرور


على فكره الاستأذان هم ما يعطونك بورقه الا تكووون فاضي ما عندك شغل فهني هم شنو الحل


ومشكور عالمرور اخوي


نطلب من رحالي و امثاله و شرواه من الاستشاريين افادتنا

 

[q82007]

الله يعينك
اول شي بين لمسؤلك كل اللي في خاطرك
اما اذا وصل الموضوع لشكوى اداريه راح تتحولون كلكم للتحقيق والنتيجه خصومات وتركيب جهاز البصمه
اذا تحول احد الزملاء بتهمه التزوير وطلع منها راح يرجع عليك بالتعويض
والله يعينك

 

[قناص_السوق]

مشكور قلب نورتني بافادتك وفتحتني شوي


بخصوص اكلمه ما يتفاهم و انسان قذر وانت بكرامه يسب و يطلع اعذار حق نفسه ويقول احنا نعاقبهم بس ما نيي نقولكم انتو هذا شغلنا الاداره احنا ابخص فيه


كأن احنا يهال ما نفتهم شي


بخصوص التزوير تنصحني اغير توقيعي واخلي علامات سريه تميز توقيعي حتى لو وقع مكاني اثبت ان قاعد يزور من العلامات السريه الي احطها بتوقيعي ؟ لان انا بس اكتب اسمي واهو لم ايي يزور بس يكتب اسمي مكاني

 

[q82007]

نصيحتي لك من واقع تجارب شفتها لاتكون المبادر في اتهام مديرك بالتزوير الا في حاله وقوعك في مشكله تقدر تقول هذا مو توقيعي وحتى لو وصل الموضوع للمحكمه يحال الموضوع لخبير الخطوط وننتظر رأي الزميل رحالي

 

[قناص_السوق]

مشكور اخوي ما قصرت لكن انا الي بعرفه عشان ليه شفت الظروف مضطر اتصرف :-

هل اقدر ارفع قضيه تزوير , + هل اقدر ارفع قضيه تعسف في استخدام سلطته على سوالفه + باقي اسألتي الي سألتها بعرف اجوبتها


ومشكور على المرور وما قصرت

 

[fayoona74]

عزيزي الحضور والانصراف فيه تعاميم باوقاته من الخدمة المدنية ومسئولك لما يخالف هالشي ويميز بين الموظفين يحتاج شكوى منك بالاثباتات لوكيل الوزارة وبدوره له طريقين اما فتح تحقيق او تسوية الموضوع مع المسئول

 

[sound blaster]

اذا سكتت فأنت تشاركه بالغلط

لا تسكت وشلخ فيه تشلخ .. بعطيك نصيحه خذها من أخوك

الواحد كل ما يكبر منصبه كل ما يزيد حرصه على منصبه ومكانه ..والطيحه من فوق الكرسي مو نفس الطيحه من فوق السطح ..

روح للوزاره وأشتك عليه .. واذا ما سمعك الوكيل روح للوزير .. وسجل شكوة بالفاكس عليه وودها للمسؤلين ..

هذه امانه ولازم الواحد يخاف ربه بوظيفته .. والله مالومك تنسد نفسك عن الدوام لما تشوف هل تسيب

والله ثم والله راح تشوف مديرك يخاف منك ويحسب لك الف حساب لانك على حق

.. لكن موضوع انك تسيّبها وتصير مثلهم . بيحط عليك المدير وبيركبك الغلط وبيتقعد لك قعده

بالتوفيق

 

[قناص_السوق]

مشكورين يا جماعه فيونه و ساوند بلاستر ما قصرتو

لكن انا اشوف انتو وايد ماخذين السالفه سهله اني اشتكي شنو اهي طرق الاثبات و شنو الطرق الي احفظ حقوقي ان اهو متجاوز للقانون


وفيونه ممكن تفيديني بخصوص اسألتي اذا اقدر ارفع قضيه تعسف في استخدام السلطه + تزوير توقيعي

وممكن تفيديني شلون اثبت تجاوزاته و اشلون احوله تحقيق ؟

لان ما ينسكت امس الخميس عناد داومت متأخر خلاني اوقع يوم بطلع قالي ما توقع لانك متأخر جان يقول حق ربعه هااا نخليه يطلع و لا ندبسه بشغل قالو خله جان يقول يالله وقع انقهرت و ربي بغيت اتهاوش وياه جان اقول لا حووول اوهووو لا حول و مشيت

 

[fayoona74]

اول خطوة تكتب كل ادعاءاتك ضد مسئولك بشكوى تقدمها لوكيل الوزارة وتطلب بالنهاية بفتح تحقيق بالموضوع
اذا حفظ التحقيق هني يكون عندك قرار تقدر تتظلم عليه وتكمل بس اول خطوة الشكوى لانك بدون اي اثبات ماتقدر تتمسك بشي والتحقيق ونتيجته راح يكون فيه تفاصيل واثباتات
عندي تحقيق حاليا بدا بشكوى من موظف بدون اثباتات ضد مسئوله وباشرت التحقيق فيه وشكلت لجنة فنية وبالفعل ثبت ان الشكوى في محلها والموضوع بطريجه للنيابه وسلامتك

 

[قناص_السوق]

مشكوره فيونه ... راح اقدم شكوى اشلون ادزها لوكيل الوزارة الافضل عن طريق البريد الوارد برقم مسجل اقيدها ولا اروح ليه مكتبه و اعطيها السكرتير هناك ؟


انزين فيون انا ساعات اداوم متأخر يقول لي وقع في كشف التأخير و اكتب ساعة وصولك و ساعات حسب مزاجه يطلع كشف حضور يخليني اوقع حتى لو متأخر ( فأذا وقعت في كشف التاخير و كتبت ساعة وصولي بعدها اروح له و اقوله بوقع اذا خلاني اوقع يعني توقيعين في يوم واحد واحد بكشف التأخير و الثاني بالحضور )

هل هذا يعتبر دليل قوي عليه ان اهو قاعد يتجاوز القانون وان طلعلي كشف الحضور في وقت المفروض ما يطلعه و يخلي مكانه فقط كشف التأخير

 

[مشعل المحامي]

اخوي اول شي ترفع كتاب مسجل من الصادر والوارد حق مدير الشئون القانونيه تذكر فيه كل شي وتطلب تحقيق في الموضوع اذا وصلت الى حل كان بها واذا ما وصلت لحل ترفع تظلم من النتيجه اللي وصل لها القرار . يعني تاخذ الحل رقم 5 (انظر الى سؤالك ) بند رقم 5 آخر شي تسوي 4 اذا فلست وانفجرت عاد وقتها اقولك شتسوي.
والله ما تنلام اذا كرهت الدوام المشكله انه هذي التفرقه في التعامل تخليك تكره ربعك وتحقد عليهم بدون لا تحس والسبب المدير
ها ونفس الشكوى دزها بظرف مسكر حق مكتب وكيل الوزاره علشان اذا ضبط نفسه من جهه صايده انته من جهه ثانيه

 

[قناص_السوق]

مشكوووور وايد اخوي مشعل و كثر الله من امثالك انا ما ابي استعيل بس باخذ الاحتياطات باجر بقوله ابي استأذان اذا ما رضى اكتب ورقة استأذان و شفت ان مطلع غيري بدون ورقة اسأذان ,,, راح ابدي باجراءات التصرف



بس سؤال بارك الله فيكم :- اذا كنت براجع جهه تابعه لوزارتي هل يعتبر استأذان رسمي و لا استأذان خاص لازم اسجله بورقه الاستأذان , مثلا براجع شؤون القانونيه و لازم اطلع من دوامي واحرك السياره و اروح لهم

عشان اذا رسمي اروح حتى لو مو عاجبه او ما يخليني اكتب ورقه اطلع بدون ما اعبره

للعلم اذا عاند ما رضى اكتب بورقة استأذان شنو افضل طريقه اثبت حقي اني فعلا استأذنت

 

[fayoona74]

اخ كويتي اذا كنت طالع لاي جهة سواء داخل او خارج الوزارة لمأمورية تتعلق بعملك فهذي تعد مهمة رسمية اذا شي خاص فيك يعتبر شخصي

مع احترامي الشديد لرأي الاخ مشعل اللي هم رأيه صحيح لكن ارى اختصاراً للوقت ان الشكوى تتقدم فيها لوكيل الوزارة مباشرة لانه من يملك الاحالة للتحقيق او من يفوضه ومايحتاج صادر رسمي تصور الشكوى ويستلمون على الصورة بالاسم والتاريخ حتى لو سكرتارية الوكيل
بالنسبة للاستئذان اذا مارضى يوقعلك تلجأ للمسئول الأعلى

 

[قناص_السوق]

اخ كويتي اذا كنت طالع لاي جهة سواء داخل او خارج الوزارة لمأمورية تتعلق بعملك فهذي تعد مهمة رسمية اذا شي خاص فيك يعتبر شخصي

مشكوره حيل شنو يعني مأموريه

واحنا الحين شبه حلينا المشكله بعد نجره و تهديد وياهم خافو مني شوي

مع احترامي الشديد لرأي الاخ مشعل اللي هم رأيه صحيح لكن ارى اختصاراً للوقت ان الشكوى تتقدم فيها لوكيل الوزارة مباشرة لانه من يملك الاحالة للتحقيق او من يفوضه ومايحتاج صادر رسمي تصور الشكوى ويستلمون على الصورة بالاسم والتاريخ حتى لو سكرتارية الوكيل
بالنسبة للاستئذان اذا مارضى يوقعلك تلجأ للمسئول الأعلى

المسؤول الي فوقه يدافع عنه ويقول رفض لان اكيد في شغل مهم شنو الحل ؟؟

قصدج اختصار للوقت اصور نسخه من الشكوه و اسلمها السكرتاتريه و توقع لي باستلام نسخه طبق الاصل ؟

 

[fayoona74]

اي قصدي اختصار للوقت وهالنوع من الاستلام يعتد فيه امام المحكمة
مأمورية = مهمة