MOHAMMED11
عضو نشط
طرا في بالي اكتب هالقصة بعد قرائتي
لرساله من احد الاعضاء (حمود الفشقة ) يوصي طفله ان يكون شجاع
في موضوع اخونا قلم حر ، واول ماقريت الرساله
تذكرت حسين الديحاني
///////////////////////////////////////////////////////
القصة
مرتجلة طبعا
فالسموحه اذا فيها اخطاء مطبعية
.......
اثناء دوامي في احد المدارس ، كان هناك طالب
اسمه نواف ،في الصف الخامس، الطالب هذا شاق الارض وطالع
شيطان مشاكس شجاع مايخاف وفوق هذا مسوي
عصابه في المدرسه من الطلبة اللي في عمره ومسيطر عليهم
ويمشون بأمره .. وكان نواف كثير المشاكل
وكل يوم وثاني ماسك واحد من الطلبة وطاقة
وكان الجميع يهابه لجرأته وقوته
لدرجة انّي كل ماشفت طالب يبجي اقول نواف طاقة
واكثر الأحيان ضني يكون في محله
،،،،،
واحيان كثيره كان يطق الطلبه ومن خوفهم منه مايشتكون
لاكن اكتشف هذا الشي بالصدفه
بحيث اني ادخل صف نواف واشوف طالب يبجي
اسأله منو طقّك مايبي يجاوب من الخوف
فأدري ان اللي طاقة نوّاف ،،
حاولت اعاقبة اكثر من مرّه ، وبحكم علاقتي مع
ابوه كنت اطقة ، واقسى عليه صراحة
واحاول افهمه ان اللي تسويه شي مو حلو
وحرام تطق ناس اضعف منك . لازم تبطل هالحركات
ومن هالكلام ،
احيان كثير يقط كلامي ورا ظهره رغم خوفه مني
ويختلق له مشكله جديدة
ويضرب احدهم . وكأني كنت اكلم الطوفه
واللي يقهرني انّ بعض الأحيان يضرب طلبة شطّار
وعاقلين لآخر درجة ، فآخذه واجحشه
وماأسمع منّه غير ( ولله اخلي ابوي يرفع عليك قضية )
طبعا ابو نواف محامي ..
.
، المهم عرفت ان هالولد ماينفع معاه
لاكلام ولاعقاب ..
حاولت اتقرب منّه واعتبره صديقي لي
وحاولت اني ابيّن له اني اعتمد عليه بظبط الفصل
ودايم لا بغيت شي اسأل نوّاف ،
القصد ترا انت يانواف طالب ممتاز
وانا اعتمد عليك ،
وكانت محاولة انّي اخليه على الأقل يستحي
منّي ، وانجحت هالفكره بشي لاباس فيه
لاكن مشاكل نوّاف مو راضية تخلص
وضربه للطلبه مو راضي يوقف ...
،،،،
المهم انتقل للمدرسة طالب اسمه حسين الديحاني
كان اقصر من نواف شوي وتقريبا نفس
جسمة ، وهذا الطالب لاحظت عليه
انه محترم وعاقل ومايحب المشاكل ابد
وكان دايم بحاله وماله شغل بأحد
ونسيت اقول لكم انّه صار بصف نوّاف .
فـ لو صار دوري في مراقبة الفرصة
كنت اشوف حسين يروح المقصف ويصف بالدور
وياخذ اكله ، ويشوف له زاوية ويقعد فيها
ياكل وأول مايسمع جرس انتهاء الفرصة يروح بكل
هدوء للصف ،
عكس نواف اللي يمشي بالفرصة ووراه 6 او7 من
الطلبه اللي اهم عصابته ويمشون تحت امره
وكلهم يخافون منّه
فقلت باجر او اللي بعده راح يجيبني حسين يبجي من نواف
لعلمي ان نواف راح يختلق معاه مشكله
وماراح يخليه بحاله
وفعلا صدق ظنّي
بعد كم يوم من انتقال هذا الطالب ، واذا ماني
ناسي يمكن 3 ايام بالظبط .
شفت نوّاف بغرفة الإخصائي وكان واقف يسار طاولة الإخصائي
شفته يبجي ويشاهق من البجي
والصدر يصعد وينزل من قوّة البجوة والشهيق
صوته واصل غرفة الناظر والدموع اربع اربع
اطالعه وانا مو مصدق عيني نوّاف يبجي معقوله
منو هذا اللي يقدر يطق نوّاف ..
دخلت الغرفه واطالع يسار الطاولة ولاّ الطالب الجديد
حسين الديحاني ، شالسالفه شنو صاير
سألت الإخصائي وطبعا الإخصائي يعرف نوّاف
ومشاكل نوّاف ، اوّل ماشافني الإخصائي
قال بص يااستاذ محمد مين جاي يشتكي
التفت على نوّاف وقلت له شفيك نوّاف
منو طقّك ، اشّر على حسين واهوطبعا يشاهق
وقال هــ هــ هذا ال ال الحححمار .
وحسين بالمقابل يرد عليه ، حمار انت وشكلك
نوّاف : ولله مااخليك ولله لأكسر وجهك
حسين واهو مستحي مني بصوت خفيف، تخسي
رحت لحسين وسألته ، ليش طقيت نواف
رد حسين. استاذ اهو اللي غلط علي وتحرش
فيني ( ، ادري يحسين وكنت متوقع
بس ماتوقعت انّك بتقدر عليه طبعا اقولها بقلبي )
ايه // وبعدين دزني واخذ اقلامي ، قلت له ردهم
مارضا وقلت صير عاقل لااطقك
لاكن كل شوي يجي يمي ويدزني
وينادي رفيجه يقوله تعال شوف شعره ، يبي
يضحك الطلبه علي ، ومسك اذني استاذ ،ورفجيه يدز الكرسي
فقمت وطقيته اهو ورفيجه الثاني
طبعا رفيج نواف اكتشفت بعدين
انّه محصل له طقه محترمه من
حسين ،لاكن مااشتكى لان شاف زعيمه انطق
المهم وانا اسمع حسين قلت بقلبي
( كفو ولله ياابو علي )
كسرت شوكة نوّاف
ولااخفيكم ان شجاعة حسين وجراته اعجبتني
حيل ،
كيف ان طالب جديد على المدرسة ومايعرف
احد فيها ويمسك اثنين من اقوى الصف مثل مايقولون
ويمسح فيهم الارض ولا يرد عليهم ولا على عصابتهم
..
المهم صالحناهم ، واليوم الثاني حسين صار صديق
نوّاف ، لاكن اهو الزعيم ، واكثر طالب
بالمدرسة يخاف منّه نواف اهو حسين
ويويل نوّاف لو طق احد يعرف حسين
يمسكه حسين يلعن خيره ،، طبعا
حسين طالب عاقل ومايحب المشاكل
لاكن صاحب فزعه ومايخلي حقه
ولا يخاف من احد لا نواف ولا غيره
وهذي سالفة الطالب الشجاع حسين ..
اتمنى انها تعجبكم .
وصراحة وماهو غرور اهو يشبهني كثير
انا يوم كنت بعمره ماكنت اخاف من احد بالمدرسة
واللي يتحرش فيني اطقة . وكنت مثل مانقول اقوى الصف
